Vunda va Punaauia
| ||||
|---|---|---|---|---|
| Vergumvelt | La légende de Punaauia | |||
| Sutesik | - | |||
| Piskura | - | |||
| Ava | Tahitiava | |||
| Evla | - | |||
| ||||
| Vergumvelt | Vunda va Punaauia | |||
| Kalkotavasik | Sabrina Benkelloun | |||
| Piskura | - | |||
| Evla | 2006 | |||
| ||||
| Webesik | Sab | |||
| Krentduga |  Gotuenan
| |||
Sumion, koe Hiti utca ayik yoltkiraf gu Puna bliyir. Hiti bam tiyir yolt va Punaauia.
Konviele, Puna ve gorayar da ko Raiatea ewala koyar vexe va Hotutahi tota godimjupayasa ko Tahiti ve keluyur. Radeyes, va mecoba grupaskison taltopujeyer ise ronopujeyer ise kotlizo pujeyer. Intafa djudimlapira va ewala tiyir gijafa volse va mecoba grupaskiyir.
- Kimtaf tí ! Va tokcoba rotaskí ? Tokkane fu dimdenlapí ? Toktan va jin denon rodimjupatar ? Puna trakuyur.
Remion, imboza ke ewalagazik va in disukeyer ise va inaf lapireem vayayar. Va puidera tukotrasa va in ve rabateyer.
Pu in ve kaliyir :
- Tokdume baton vultel ? Tokdume til maneke gabentaf ?
Puna ve dulzeyer :
- Jin tí volkalaf kire me rodimdenlapí. Me grupaskí, va tota al kelú.
Imboza ve trenayar :
- Ten ikuzal, va rin denon fu jupá. Nume mo jinafe ge va int rundal, davon malpujet.
Sin va Raiatea belcon ve malpujeyed aze va Teoneuri ok Ofai Piipii xo ve kalpujeyed.
Imboza pu Puna ve kaliyir :
- Denon su artlapil nume rotitlanil.
Puna mou ge ke imboza ve titlaniyil aze ve dulzeyer :
- Vaon grupé.
Grupel va coba in ve askiyir ?
In va balemoy wiltok ke sulem ve walgabeyer aze ve kaliyir :
- Daletoe, koe Teoneuri zavzatal.
- Tokdume va batcoba pu jin askil ? imboza ve dulzavayar. Va rin batliz al jupá, ko rinafa ewala inde al erul. Rotaxe ! Batcoba tir abica vexe kan intaf iteem va intafa volkaluca witil.
Bata imboza va lani roti digiyir. Acum ewalagazafa yasa va Puna yoke inafa rotura ve vajikeyer.
Inoarii, Hiti gazik va intaf ayikeem ve belcayar ise djiayar :
- Va Puna aneyatac nume atatac, batinde vangrupeter da gazayik yo ik gazanasbeik yo vol zo gonaskipejed.
Puna krantkranton koolaniyir aze mo Teivirairaitaharara mevtaxed ve artlaniyir. Batlize Paateve is kurenikya, bulolvartesa tolonga, irubayad. Puna va vanvrodasa bulolya ve kozwiyir. Siputepesa, ve trakuyur : « Ta da grisiputesá va vrod narití ». Ta da in mouvar ve vanlaniyir. Akoyena, bulolya ve ranhayar. Puna ve milbavadrasuyur nume ve kildeyer nume tit mevta ve lubeyer. Va lavafeme ve wiyir. Bate tiyir pinafe eke tisa lava me zo ronariyir. Puna ta da yovar da ulir ve inhanhayar. Voce da va int grisiputesayar aito aal ve artayar. Puna ve takamadayar aze ve kaliyir :
- Toktan til ?
- Jin tí tela rinon askipejeyena imboza.
- Ax en ?
- Rinafa linulara va jin al awuzapar. Goldeon al mejé. Noelkeon icde kotafa rinon lazavayana rotuca va int jaxadá.
- Me, va batcoba me askil ! Pu jin sazilil ! Al vultepé nume tí poiskaf !
Puna kan reyaalaf wazdel anam nubeem is nugeem ve zo gluyedayar. Man wazdel tuke prantuca is deluca zo sokagruper. Wison da in va int me rodimiksantuyur, ta da zo tunuyar va aito aal bam ve voseyer.
- Va rin me tunuyatá, rin va jin al bakal. Va rinafa zatca vol al vangrupé…
Mali bat viel, kan Punarau (Puna iksantunafa) bato xo zo soyoltar kire batlize in ve zo gluyedayar. Ta da zo vikear ise zo wetar, mo piluda ve zo bureyer, bam ve kaliyir :
- Tokdume mo piluda va jin burel ?
- Kire va rinafa rotuca koon witil.
- Va batcoba pu jin me askil. Icde kotafa jinon raplekuyuna rotuca skalé nume co-djumirglié !
- Me, me is me !
In ve zo vikeayar ise ve zo wetayar. Malion, Hiti utca va Punaauia yolt ve zo kazawayar.
Inaf prijust ko remasti ke utca ve zo kabuyur.
Malion, remasti va Taapuna yolt (itowa ke Puna) sodir.
Luxe inaf iteem, in ve zo tcekaremruyur aze ko krant yoltanaf gu Matatia (remrunaf iteem) ve zo bureyer.
