Vunda va Hiro
| ||||
|---|---|---|---|---|
| Vergumvelt | La légende de Hiro | |||
| Sutesik | - | |||
| Piskura | - | |||
| Ava | Tahitiava | |||
| Evla | - | |||
| ||||
| Vergumvelt | Vunda va Hiro | |||
| Kalkotavasik | Sabrina Benkelloun | |||
| Piskura | - | |||
| Evla | 2007 | |||
| ||||
| Webesik | Sab | |||
| Krentduga |  Gotuenan
| |||
Hiro tiyir nasbeik ke Raamuri okilik ke Havaii (Raiatea). Den Ana veygadikye ko Uporu krant koe Tahiti do intafe balemoye mialaberikye ve zo stakseyer. Koe Tapu-ata-i-te-rai bema berikye se goraveyed vexe in yoke klaama me rotcokeyer. Soe djuraveson, va tavera se divuon levterktayar. Ve raveyer kalion maneke viele va bemaklaa ve zomeyer, tavesik ve kosmayar da gotavenaca mea zavzayar. Hiro batugale tiyir tel lodontinaf is lopof velik ke Uporu.
Vanpiyis milgaf, in pu veygadikye va gonaskine ke ayik ve eruyur. Battel ve kaliyir da in va mona vegedur ise gorenonana is gosinkana is govagena kurenikya trasir. Hiro ve krupteyer da rieta akoydafa nume ve gorayar da daletoe vol co-askitir dum Ana kaliyir. In va coba rotafa ve eruyur. Veygadikye ve dulzeyer : « rotuxara ik coera ik dubiera ». Nume Hiro ve kaliyir da titir rotuxasik is nulesik is dubiesik. Va se uru (galketa) is jotaf wageyaal toz dubieyer aze ko intafa matela taplekuyur.
Hiro gan totara bam zo toz skepeyer. Va lologijafa guema toz vegeduyur uke da va ontinaf tumtaf ava aal toz gojeyer. Kevie boyaks ke veydadikye, ve naliyir liz ava aal tiyir, sume bira. Batlize toloy susik va inafa kelda ve oblayad, kalison da metan zo korictayar da rolanir. Yatkafo, Hiro kan kaba va konaka gama ke ava aal ve balieyer. Susik yo ve askiyid da sin ve dimatriyid. Hiro va diola bam ve zanieyer nume va jontika gama ve gabeyer aze va aal tenion ve divzaetawayar. Ta pomara susik yo va ayikestus Moiri govitabulol ve kevrozayad. Moiri va Hiro ve vajikeyer vexe battel va in ve taruteyer ise kabason ve orilnayar. Susik yo va Hiro bam ve ipeyed. In ben usukeem va sin ve ebiduyur nume takatakon klantason ve orianokodayar. Ben aal va kosik yo ve vaniksantuyur aze kal mona moe epita va ava aal drikon ve rembureyer. Tukultane veygadikye koeon keyer. Hiro va in ve tuvumeltayar aze va susik yo ve kotawayar aze va ava aal do zaeeem balem-sanon ve gabeyer aze va bulol ve estuyur.
Kan tota vegeduyuna golde bat aal, in do berikyeeem ve gorayar da sin ko Havaii dimlapitid ta da va gadikye wid. Hiro va jontik siabeks mu yasa, is firviks yo rundan mo muxelk ke guema mu lorikeem, is bruxaseila is anamba novesa va lomafa vagera, ve nariyir. Solve da Hiro totayar, levi da di komodeyer, pu berikye se ve kaliyir : « En tarutec da va kerafi sveri rotuc ede co-wic kire tir Tanu-Tane sveri ke Tane lorik ».
Boreon suray dem batakafi tumtafi sveri yo do ilamtafi kerafi sveri ve vantalayar ta da va sinka rundayana mo muxelk estur nume va valeuca ke Tane nedid. Vexe berikye se ke Hiro va sveri yo ve ipeyed ise va jontiki is Tanu-Tane ve balieyed. Krilason va pak mu Hiro va konaki batakafi sveri solzayad. Divmodeson, Hiro va sokiyisa coba ve gildayar aze blikeson ve askiyir da Tanu-Tane dimblir.
Va battan temes pu Tane koe saneaf kelt ve gildeyer. Levi da di komodeyer, pu berikye se ve kaliyir da lanon fu zivotcapayar nume in ve eruyur da ba toza di zo divmodayar. Boreon toz zivotcayar vexe berikye se va Hiro me divmodayad. Isti zivotc in soe ve divmodeyer. Ricol ke Tane baon ve artpujeyer aze pu Hiro ve eruyur da in va berikye se rotuyuse va Tanu-Tane zurter. Hiro ve kaliyir da va teli sveri al giwayar ise da boreon zo esteyer ise da intaf siabekseem tiyir perdoenaf. Ricol va balemoye berikye ke Hiro bam ve fixayar. Battan va mecoba ve rotaskiyir. Zivotc mo letafa piluda va guema ve kevkabuyur.
Solve da Hiro va mejiluca divayar, toloy aalxoloramikya va seila is anamba ve dubieyed nume otceyed. Hiro va ujiwa dem eipkirafa lava ve askiyir nume va listaf kabay se rundayar aze ludevon ic ujiwa va int ve preyutayar. Loramikya se jekuna gan kabay se ve vanlaniyid aze va kabay ve solgiyid kalion maneke Hiro va mecoba ve rotaskiyir. Va xo lize loramikya se va int kolavayad Hiro bam ve tcaluteyer nume koon va int preyutayar. Sinya adim ve divlavaweyed aze ben usukeem in vaon ve vangiyir. Ve abdiplekuyur da vaon co-dimebidur ede va seila is anamba co-dimdigir. Sinya vaon ve dimziliyid nume ve fixewayar.
Hiro ve gorayar da icde Tanu-Tane va int jaxadar. Poke inafa begama vaon ve keyer ise kan mapa ve vangiyir. Tanu-Tane ve kiewaskiyir da ve tittalayar ta da va Hiro divvawar vexe battan acon nubagiyir. Tanu-Tane va Rurutu ve arttalayar, Hiro beneon, aze mal Rurutu kal Havaii pujeyer. Arti pujera Hiro va int beneon giyir nume va bestuxafa kabaydakela meviele bulutusa di videyer. Tanu-Tane, arte po, va Hiro ve dildeyer nume tuke sa me ve zo atar volse zo divbliyir. Batinde Tanu-Tane koe saneaf kelt do Tane sogozavzar.
Hiro, den gadikeem dimlaniyis, va listapikya yoltkirafa gu Vai-tu-marie, va kurenik ke Tatae gejikye, ve korenapayar. Hiro va Tatae ve uzerayar vexe intafa neciafa ik plabafa tila va Tatae ten tabodjayar. Konviele in van Hiro ve kabamadayar. Hiro va taka bam ve vannariyir aze ve bergajoayar. Nume Vai-tu-marie vanpiyir inafa yerumanikya.
Tolonga va toloy nasbeik di diyir : va Marama nasbeikye is Piho nasbeikya. Sin tamon bliyid kali da Hiro, va guema nhofason, ve gildeyer da yerumanik pu woras nik yo va inafa bestuxafa dakela nuleyer. Eldeon, Hiro vaon ve rozayar ta da in pomar asadason va guemazebeem. Beka in meviele al askiyir, ve naleyer. Va gelt boreon ve rebokayar nume ve eruyur da Hiro tunuyar. Bam ve narteyer da in va nuba ika gelt rebokayar aze in va balgera se culimeyer. Vai-tu-marie ve ixereruyur ise blikeyer da in va vaweluca isker. Oviskapafo, Hiro vaon nugason ve atayar. Vaon bam kobixeyer.
Marama pujeyer bak piza. Dimdenlanison pu gadikye ve eruyur lize gadikya tiyir. Hiro ve dulzeyer da me grupeyer. Tarama lizina gan razdura tagelton ve laniyir liz gadikya al zo kobixeyer. Vaon ve kosmayar aze vanmia yasafo marae xo ve kotawayar. Azon art uul di gelbeyer aze meestuson is meulison konakvielon zavzayar merovinusa. Hiro va Piho ve stakseyer ta da in va berik wir. Battel tenion ve dimdenlaniyir. Wori Hiro vaon taruteyer kivason da in va gadikya co-djujaxadar. Vexe Marama va anda memilafa gu gadikye ve diyir.
Hiro va tela logijafa kruldeyesa guema boreon djuvegeduyur. Va ewala exuleyer aneyason va gijaf aal se nume moe tawavo ke Puna gazik va cuisaf aal yo ve trasiyir. Vexe lotipis battan ve vewayar da zilir. Hiro, dimlaniyison ko wida, pu Puna gazik va toloy intaf onasik do tel lolistaf onaks ve stakseyer. Battan, abdigrupeson ba beya, va siabekseem ve vewayar. Onasik yo, dimdenlanison, va zanisik yo ke Puna gazik ve kakeveyed. Va kabay se ve drageyed nume sin va naleyed. Bam Hiro ve tollaniyir nume pu Puna gazik va aal yo ika inon kazawayan bundaks ve eruyur. Puna gazik ve zo vebayar da golde rokla ke intaf zanisik yo naler. Hiro va kotaf aaleem don tumtaf aaleem bravas va marae xo ve balieyer.
Hiro va tela logijafa kruldeyesa guema bam di vegeduyur aze ta konaka vestara totayar. Koe vo mea di zo tolwiyir.
