Trig ludevon ice uzda
|
Konviele tiyir gazik lickapaf gu intafi roti. Kale pintama va blira ke sedenikeem gadeyer ise bas kottan va wiiskafa vegera dineyer. Wori me tiyir kalaf kire va int kaliyir : « Sin veged kire tí jotaf is pof. Voxe viele al vanpití axaf guazik, sin mea vudeted ise va int kevmadatad. » Acum, enide in wan nuvelar jotaf va usukeem tubianayar ise kan yona medrega va gexata is alto tuxawanayar ise va yona jotuliba pu kurmajik lusteyer. Vexe va fira ke ugal me rotutenayar. Konviele sonkeyer da inaf lopokef zanisik al tuguazaweyed ise re va batakusukeem is ploz bureyed nume in pu int kaliyir : « Sin bak mile sare dam jin al koblid ise belcon al tuontinawev. Tokenide co-nutí jotaf ede sin mo intafa vola va jinafa klaanya robelid ? » Batdume in va taka ke kot guazaf zanisik volmiv gabeyer ise koe varafo gazaxo va bat piskot volmiv etimayar : « Gazik va kot jotaf is laspedaf sedenik dum int kuranir. Batakusukik abdi barka va gazaxo gobulud. Kaikion, taka ke kot guazik zo gabeter. Vexe, tison disaf lidam gijarotif, Gazik va kalustera va gadikye pu inaf nazbeik firvir : kontan va moavatrig ludevon icu uzda dimonatar, va bli ke inafe gadikye giwatar. Artode, kottol awalketer. » Raveson va piskot, konaktan askiyid da gadikye ko divefa patecta otceyed, ar konaktan preyutayad, ar konaktan ko berma ta lagonara va moavatrig va sint atoeyed. Vexe mek estobasik va bat di lajuvanstayar, nume vielvielon konake sanoye yikye lev tiglakufta ve titkeyed. Tari va kota lagara ronotcokeyer enide metan va sokiyisa vursera co-rokaliyir. Yikye dere kenlaniyir ise ko remawisa lava disukeyer : trig moe bixe ke ludev jebeyer. Nubasotcera ta vannarira nustapeyer. Neke, kottan estobayas bak bat viel ton vlardaf nubeem tidpujeyer nume inafa taka ve zo gabeyer. Yikye, trakusafe, denlaniyir aze ko eyelt va sinka plekuyur aze van kelda ke meftava mallaniyir. Batlize, ludevon ice arula va guazafe gadikye preyutayar. Miledje ayik estuyur, yikye guamlitaweyer. — Ey rin, tel lodabidas nazbeik, ~ guazik kalir, ~ tokdume bateke til gabenaf ? Rotir til legaf kotvielon askison va bata keldapa ta sinkara va jin ? — Me, gadye, ~ yikye divier. ~ Va bata soluma baron co-rotexuleyé, wari da co-til musedaf. Vexe va bat trig trakuyú, ludevon ice uzda. In zo rowir volse zo rotebidur. Tokdume ? Gadye undemer aze eruyur : — Kas aal koe domega tir lize trig zo rowir ? — En, gadye, ~ yikye kaliyir. — Ise kas gameem koe lava tcazedawer ? — En, en, ~ nazbeik dulzeyer. — Ede va gameem ke aal co-djunaril, koe lava me co-lagebidul, mex ? Ex kle, tir milcoba icde trig ! Geltron, in tir koe aal nume coba lavanstana gan estobasik, tcazedaks anton tir. Yikye va gadik dabluyur aze denlaniyir aze eldeon, ba taneaf bartiv, ko berma ta laposara va int atoeyer. Kabdue yon akoydan tcokesik, ko aal tidumayar aze va trig dimrumkayar : in beneon tiyir ton titef art uke da, koe tcazedara, ludevon ice lava nutiyir. Xultbureyenon gan tari, yikye ton trig koe meem kabdu gazik va int atoeyer. — Tokinde al diepilel da trig koe aal tiyir ? ~ gevapan gazik eruyur. — Jin batinde me rieteyé, vols jinafe gadikye ; ta gelbera kev rinaf sayakikeem koe meftava preyutawer. Gazik gumodovasaweyer. Pu int kaliyir : — Lo decemoy yik ton abdufa taka al iped, va beya mediepileson. Voxe bat guazik koe ilefa meftava al vangrupenyer. Klaapik rotir tir lodutcoraf dam jotik… Gazik va kuidera va kexi dirgayar, nume batvielu, koe bata patecta, kottan va batakusukik sotarkar. |
|
|||||||||||||||||||||||||||||||||||||
