Tokdume dikdatol tir drelgekiraf
| ||||
|---|---|---|---|---|
| Vergumvelt | Pourquoi la hyène est-elle rayée ? | |||
| Sutesik | - | |||
| Piskura | - | |||
| Ava | Francava | |||
| Evla | - | |||
| ||||
| Vergumvelt | Tokdume dikdatol tir drelgekiraf ? | |||
| Kalkotavasik | Bruno Cordelier | |||
| Piskura | - | |||
| Evla | 2006 | |||
| ||||
| Webesik | Bcordelier | |||
| Krentduga |  Gotuenan
| |||
Lekeon, sumion, dikdatol tiyir napaf do libakol. Tiyir divulafa naca : vepokaf, dikdatol va libakol coeyer kotviele katcta sokiyir ise sintaaf libakol iskeyer da in askiyir. Me djumotcason, abdualbayar da va mecoba askir.
Fereon, toloy nik ta onara belcon laniyid. Keaf is amlitaf, libakol kene lava zavzapayar. Nume va kabay ebiduyur loon dam ctempaf dikdatol vultepes kene temba kepte da nekev conhok inaf kabay se kiewaskiyid da otced. Damoon, dikdatol kotviele tazdayar. Kotgemelton pu libakol va inaf kabay faluyur inde da battan moekote mu in bam onayar. Konviele ve tabiyir :
« Jin va onara ektudapá voxe sopron rin til tel koton estus va kabay. »
Rotir da va kabay gilestú loon dam rin vexe dere tí logijaf dam rin. Rin me co-kiewaskil da va kot bat kabay se nume sin co-blokawed », dikdatol ve dulzundayar.
« Bibe me tir bate. Jin va in co-rovikizé kire vikizeyen kabay me soblokawer ».
« Dotrakú, va kabay fu vikizet », dikdatol ve naleyer gestison da va vikizeyen kabay co-dubieter.
Libakol tiyir budaf vols akoydaf. Va onakseem ve treduyur aze mo ara temba ve mallaniyir.
Dikdatol ve konejayar :
« Moekote me komodel : rinaf kabay zo co-rodubier ! »
Batoulon sin va sint ve buluyud. Ba mielara dikdatol va libakol ve rozayar :
« Ey, libakol ! Kas va kabay al ten vikizel ? »
Libakol me dulzeyer.
« Me komodel, edeme dubiesik va rinaf varaf onakseem naritir ! »
Va mecoba kalison, libakol ko tey va azilfokev ve daykayar. Dikdatol va kuksa zijnon ve remlaniyir aze va libakol is intaf kabay se idatcolkoron ve vanlaniyir. Libakol ve nuveleyer da keniber. Viele dikdatol va kabay ve solgiyir, nugon ve welveyer aze va fokev ve ebiduyur aze kan entuidulayan uul va dikdatol aliepeyer. Va mecoba kalison, in otcepeyer. Artlapiyis mo ara kuksadomega, va libakol ve tolrozayar :
« Ey libakol ! Kas va dubiesik co-wiyil ? »
« Dubiesik al pir vexe vaon al fixé », libakol kipeyer.
« Grupé. Va vordaveem batliz al peztaleyé. Kan tokcoba va rin al aliel ? »
« Kan batakon tuidulayan fokev. »
Mali bat ugal, dikdatol tir tridekiraf golde batakon tuidulayan fokev mo ge.
