Stuveem ke Alice koe Zultaxo Luz07
Pereaf luz : Oviskafa yeladulira[modifier]Inkeyena azega valeve aal kabdue mona tigir, ise Libakol do Edjiiasik yeladulir. Kenibepes Aspakol wale sin ranyer, ise kottol va in gu merna kouner, moon badeson is prilason vamoo inafa taka. « Volerodafa gu Aspakol, ~ Alice trakur. ~ Vexe larde in keniber, pune batcoba va in me kostrur, tce. » Azega tir mantafa, vexe sin baroy keve tana alava licanon tigid. « Me runda ! Meka runda !» wison va vanlanise Alice iegad. « Jontika runda tigid !» Alice panon kalir, nume ko iribapa keve tan ar naav ke azega. « Va vor zaniel !» Libakol fralton kalir. Alice va azega anamdisuker, voxe anton yelada tigir. « Va mekaf vor wí, » dizver. « Efe, me tigir, » Libakol kalir. « Battode, vaon firvison, tiyil dolansaf, » Alice mibunon kalir. « Voxe, benazegason abdida zo ganeyel, dere tiyil dolansaf, » Libakol kalir. « Me grupeyé da tir winafa azega, ~ Alice Kalir. ~ Zoratc tori loote baroy korik tigir. » « Rinaf usuk zo gogaber, » Edjiiasik kalir. Va Alice konakedje rilitapon su dizver aze batcoba tir taneaf pulviks pu ine. « Co-goravé da katcalajara pu kontan tir yoromaca, » Alice bokson kalir. Gildeson va batyona ewa, Edjiiasik itafenkupur ; vexe anton kalir : « Tokdume guvaxa va bugi vektar ?» « Tetce ! fu relandewetet ! ~ Alice trakur aze ontinapudon loplekur :~ Tí valeaf da sin toz welimad. Va batcoba fodiepilé. » « Kas sugdalal da folil da va dulzeracka rotrasil ?» Libakol kalir. « Arse, » Alice kalir. « Battode va djukaliks co-gokalil, » Libakol dakir. « Batinde askí, ~ Alice blion dulzavar. ~ Icle, icle va jinaf kaliks sugdalá. Batcoba tir milcoba, ae. » « Batcoba vol tir milcoba ! ~ Edjiiasik kalir. ~ Acum dere co-rokalil da djam “ Wí va coba estú ” djamae tir milcoba dum djam “ Estú va coba wí ” djamanse !» « Milinde co-rokalil, ~ Libakol loplekur, ~ da djam “ Va inaf ziliks albá ” djamae tir milcoba dum djam “ Va jinaf albaks mbi zilí ” djamame !» « Milinde dere co-rokalil, ~ Aspakol, kenibeson nupulvis, loplekur, ~ da djam “ Gaelé viele kenibé ” djamae tir milcoba dum djam “ Kenibé viele gaelé ” djamame !» « Batcoba tir milcoba icde rin, » Edjiiasik kalir ; aze prilara vukir ise amlit konakwexon tiskir edje Alice va kot intaf setikeks icde guvaxa is bugi trakodur, voxe batcoba tir vugcoba. Edjiiasik taneon amlitjoar. « Tokeaf viel tir ?» kalir, rwodeson van Alice. Va trula su divucomar aze guyon modisuker, dile botceson is vanplekuson gu oblaka. Alice undemer aze dulzer : « Baleme. » « Toloy viel kaikion !~ Edjiiasik repaler. Aze zideson disukeson va Libakol, loplekur :~ Wori pu rin kaliyí da fest va lizibela somekatir !» « In tiyir tel lokiewaf fest, » Libakol dulkon dulzavar. « En, vexe ape kelk al kolud, ~ Edjiiasik puskacer. ~ Kan begwed ta plekura va fest me al gofavel. » Libakol va trula narir aze gabenton nyaser ; azon ko yeladaxak perdoer aze gire nyaser. Vexe anton trasir da va intafa taneafa katcalara tolkalir : « In tiyir tel lokiewaf fest. » Alice vamoo intafa epita riliton al disuker. « Mana manafa trula ! ~ katcalar. ~ Ina va tokeaf viel ke aksat vols rebartiv bazer !» « Tokdume co-gobazer ? ~ Edjiiasik prejar. ~ Kas rinafa trula va reilana bazer ?» « Volgue, efe ! ~ Alice meklabuson dulzavar. ~ Vexe kire ina millize jontikviele zavzagir. » « Milinde tela jinafa, » Edjiiasik kalir. Alice zo tokteper. Katcalara ke Edjiiasik va koncoba nuvolsugdalar, neke batcoba tir avawadafa. « Va rin grupensé, » ine cugeke dolon kalir. « Aspakol gire keniber, » Edjiiasik kalir, aze va abica idulafa yelada mo inaf pez gimar. Aspakol volkeon takazekar aze meitafenkuson kalir : « Tire, tire, jin va batcoba tagelton fu kaliyí. » « Kas va welima al diepilel ?» Edjiiasik kalir, gire rwodeson van Alice. « Me, ebgá, ~ Alice dulzer. ~ Toka dulzera tir ?» « Meinde rietá, » Edjiiasik kalir. « Jin dere, » Libakol kalir. Alice arganon repaler. « Tce, va ugal lokiewon co-rofavel, ~ kalir, ~ nume va dulzeriskafa welima me co-grebel. » « Ede va Ugal lion dam jin co-grupel, ~ Edjiiasik kalir, ~ va vaon grebera me co-pulvil. Tir in. » « Me gildá va coba sugdalal, » Alice kalir. « Arse ! ~ Edjiiasik kalir, vliguson takabotceson. ~ Lané da pu Ugal meviele al pulvil !» « Rotir me, ~ Alice xeyon dulzavar, ~ vexe grupé da va ugal gonalié viele va lexa ravé. » Ax ! batse batdume ! ~ Edjiiasik kalir. ~ In va aliera me sutur. Soe ede tire co-zavzal skedanyas, pune in va cugcoba rinon djumena co-askir. Tulon, levaykat da lerde bartiv ke riel tir, toza ke tavera : va ewama pu Ugal anton omapudon co-gokalil, nume veel jowikason co-kotirkar ! Tane bartiv is acku, gemelt ke miafizestura !» (« Co-djumecké, » Libakol omapudon kalir. ) « Batcoba ci-tir plinapafa, ape, ~ Alice trakuson kalir. ~ Vexe men co-aeleté, gildal. » « Rotir me taneon, ~ Edjiiasik kalir, ~ vexe va in moe tane bartiv is acku co-rosul liedje co-djumel. » « Kas batkane rin skul ?» Alice erur. Edjiiasik gabenton takabotcer. « Volgue, me jin ! ~ dulzavar. ~ va sint darebaraksaton al motcav, riwe abdida in al tuoviskawer, ae. ~( In kan foria va Libakol dasugdar. )~ Tiyir dolpapa zilina gan Takra Gazikya, ise godankayá : « Va bata danka rotir grupel ?» « Va mana koncoba ixam al gildé, » Alice kalir. « Radimaca tir, ae, » Edjiiasik dakir : Like a teatray in the sky. Twinkle, twinkle »</poem>Dure Aspakol va int botcer aze kenibeson toz dankar : « Twinkle, twinkle, twinkle, twinkle », jontikedje eke zo gokurtar enide di stivawer. « Ae, va taneafo dongo biwe su tenú, ~ Edjiiasik kalir, ~ viele Gazikya eviegar djam “ In va ugal adjuber ! Zo takagaber !!” djamae. » « Mana virnafa govitaca !» Alice diviegar. « Voxe batvielu, ~ Edjiiasik gabenton dakir, ~ Ugal va mecoba jinon eruna djumaskir ! Mevieli sotir teve bartiv. » Rietanya va swava ke Alice konir. « Kas batdume manote jontik yeladaxak tigid ?» erur. « Gue, batdume, ~ Edjiiasik repaleson kalir. ~ Sotir yeladabartiv nume ta pormatcatera batedje me ugaldadit. » « Kle tce va azega anamlanic, » Alice kalir. « Arse, ~ Edjiiasik kalir, ~ darpe zanivara va yeladaxak. » « Vexe, tokcoba sokir viele runion gire tigic ?» Alice laxukalir. « Ede va prilara co-betat, ~ Libakol wirkason waljoar. ~ Ina va jin toz argar. Dragé da jotafa weltikya va rupa pu cin pwader. » « Kivá da va meka grupé, » Alice kalir, stubemenon gan bata dragera. « Kle Aspakol fu askir ! ~ toloy sin iegad. ~ Divmodel, Aspakol !!» Aze va in ben krileem kurtad. Aspakol vion itafenkur. « Me kenibeyé, ~ ton axafa is cegana puda kalir :~ va kota winafa ewa al gildé. » « Va rupa pu cin pwadel ?!» Libakol kalir. « En, vay, askil ?!» Alice vosemer. « Ise kalion askil, ~ Edjiiasik loplekur, ~ kire edeme abdi toza gire fu komodel. » « Lekeon, lekepon baroya berikya tiyid, ~ Aspakol vere tozur, ~ yoltkirafa gu Elsie isu Lacie isu Tillie ; tite lird irubayad …» « Va tokcoba blidayad ?» Alice kalir, sodulapese va kot uum icde estura ik ulira. « Va tcopiga blidayad, » Aspakol arti underama kalir. « Me rotisa, gildal ! ~ Alice zijnon dizver :~ Battode co-akoleyed. » « Tire, ~ Aspakol kalir, ~ akolepeyed. » Alice va keska mo int rowarzena gan mana zultafa blirinda larietamar, vexe batcoba relatcerser nume ine dakir : « Vexe tokdume tite lird irubayad ?» « Va abica yelada loote naril !» Libakol pu Alice dolapon kalir. « Mekon al narí, ~ Alice kantamanon dulzer, ~ acum loote me ronarí. » « Sugdalal da leote me ronaril, ~ Edjiiasik kalir. ~ Loote lodam meote narira tir drikaca. » « Metan va rinaf vil al erur, » Alice kalir. « Toktan va katcalaraja dure maner ? Edjiiasik xultuson erur. Alice va batcoba grudulzenser. Acum va abica yelada is tanoya festkirafa beggabiyexa pu int zanolur, azon van Aspakol rwoder, tolkalison va bibera : « Tokdume tite lird irubayad ?» Aspakol abicedje gire under aze kalir : « Tiyir lird dem tcopiga. » « Mancoba somekrulder !» Alice zunenon toz kalir. Vexe Edjiiasik is Libakol askid : « Kay ! kay !» aze Aspakol fredindon dizver : « Til dolackaf oke va rupa miv tenul !!» « Me, dakil, vay ?! ~ Alice dulkapon kalir. ~ Va rin mea waljoatá. Rovekalí da tanoy rotir krulder. » « Tanoy, benje ! ~ Aspakol panon kalir ; soe djudakir. ~ Kle bata baroya berikyama, gruravimpayad, ae. » « Va tokcoba impayad ?» Alice kalir, ilsetikeson va intaf abdiplekuks. « Va tcopiga, » Aspakol kalir, vol sonkeson va vula. « Va cufa bilaga djumé, ~ Edjiiasik waljoar. ~ Va tanoya runda ant abdulanit !!» Pulvison abdulanir ise Aspakol kadimon ; Alice va runda ke Aspakol erajon narir. Ant Edjiiasik va gunt gu betara impavantar ; dure Alice ton debala rotafa loon dam abdion tigir, larde Libakol va vrodak ko inafa razeka su trovgar. Alice, gire djumekantason va Aspakol tranodon dakir : « Vexe me gildá. Tokkane va int gu tcopiga co-divliziyid ?» « Larde va lava div lavalird rotimpal, ~ Edjiiasik kalir, ~ pune tce va tcopiga div tcopigalird co-rotimpal, mex ?» « Vexe sina koe lird tigiyid, » Alice pu Aspakol kalir, afanason va ironokaf katcalaks. « Tire koeon tigiyid, » Aspakol kalir. Bat dulzeks va kimtafe Alice skalter, nume va Aspakol konakedje dakis mewaljoason isker. « Gruravimpayad, ~ Aspakol dakir, wirkason is itapragason kir wan modason, ~ ise va jontikbet plek dem B tozeltay impayad …» « Tokdume dem B ?» Alice erur. « Tokdume me ?» Libakol dulzavar. Alice stivawer. Aspakol al itabuder nume gire modamar ; vexe kurtanon gan Edjiiasik vucon ieson ve divmoder aze dakir : «… dem B tozeltay, dum bukolikse ok bali ok bidga ok beyark, ae beyarkaf plek. Kas va impara va beyark konviele ixam al wir ?» « Tire, pu jin dure erul, ~ Alice toktepenon kalir, ~ me trakú …» « Kle va int co-gostival !!» Edjiiasik kalir. Bata yoromaca va Alice skalterser : ine panon ranyar aze mallanir. Aspakol ve komoder, ise mek artan va inafa mallanira obrar, beka ine tanon ok tolon kadimon disuker, riwe djupodimrozanon. Ironokatomon wir da sin va Aspakol ko yeladak laplekud. « Metode batliz co-djudimlaní ! ~ Alice kalir, aneyason va kelda rem mikaci. ~ Tir tela lokipeafa yeladulira lize mevieli al tigí !» Kalison va batcoba, vofar da tanoy aal va rokolanis tuvel dadir. « Batcoba tir rilitapafa ! ~ ine trakur. ~ Vexe betcoba re tir rilitafa. Folí da gonaskí. » Nume kolanir. Koe mila bontapa poke mila trivafa azegama gire tigir. « Retomon, lokiewon narteté, » trakur, aze konarison va moavafa marnama az fenkuson va tuvel vane matela bokar. Azon va koucomayani nyulki toz fafiger vieli kali rane vas toloy inch lum vollaumar. Bam va berlama kolanir, aze koe ilamtafa matela vanmiae imwaxo is fedaf sul arton tigir. |
   | |||||||||||||||||||||||||||||||||||||||
 (Lewis Carroll) ← 6-eaf luz - 7-eaf luz - 8-eaf luz → |
