Un article de Wikikrenteem.
Sersik
2-eaf luz : Icde konolerokafo sersaxo[modifier]
Va sokasane me suleté, kire arlize al pulvipí : va sersaxo anton viunsutú ; ise, tolnarison va exoneyen fem dem walgrupera, jonkon rindeté inde batkase sersik rolinular ise va uskej rovider.
Kle kalí da, icde konolerokafa soka asketcayana ta kalvegera va sersayasa, gira va ina dam warzafa soka tir lodrikafa : sersik va mekaikaskira va ninkera ke intaf abdigadikeem gozegamar ise va kona bifa gonarevlar. Batinde, kore va unaykafa duga anton gruter, va uskej grusutur, vaxede merotacagino is merotabdiwino po vetrovgar ; vexe kore al tazdatar kona volfalama askitir da in dimdigitir. Italia icde dacik ke Ferrara va tula nedir ; ede in bak 1484 va konaka dilfura ke Venezia az bak 1510 va konaka ke Julius II papik al acagir, tanon kire inafa yasa va dacaxo jontikedje giyir.
Ae konolerokaf sersik va bowenikeem ledume govolpuver : acum lopon zo albar ; ise, vaxede volunaykafa fogra va in tuboganad, sin tuwavon tid vurolaf. Ostik darpe savsuca is krulderapa ke gijarotiaca, namira va kona abdifa tuwarzara relvawer ; warzeyesa lazava krezed : bata keraraporinda kotviele iskeyena gan artowara ta zobera va ara kle mea tid.
|
|
