Rurera is Parray
|
Lekeon lekepon tiyir. Batugale bira is kelt is bitejeem is sulemeem is ayikeem tiyid. Tcastanaf moe Australia bat sidayap, mivirubikeem do tuwava tamapon bliyir. Alizmonik, sin kare olegara laniyid. Viele, moe kelda, va ar grelt pis mal ara gola gamdayad, va graces warzeks yo pu sint vindayad. Batinde bli koe Australia grustaweyer, bak taneaf ugal ke redura va tamava. Parray is Rurera va Wutati sane nelkon blise koe gola noelon yoltkirafa gu Queensland pasuyud. Sinafa wida tiyir domon ice bira tiskapasa va jontika kabayinda. Koe bata aulafa widama, Rurera is Parray tiyid itupapafe yikye se albane gan irubasikeem. Belcon al tugijayad ise va tumerosolparsanasa napuca al voneyed. Milgaf, sinaf gelukaf virt tiyir lexura is stutera. Parray tiyir gazik va didgeridoo lexusiki nume viele lexuyur, kottan zo menpeyer… Jontiktan dere kaliyid da inafa gralomhesa lexa va tuguyamasa diolafa kerdela diyir. Luxe Rurera, ribiegon stuteyer dum rembureson gan lexa ke nik. Konakviele, ar widik yo eruyud da sin torion lexud ise stuted. Bam, puvegapason, Parray kan digeridoo lexusiki va rupa negayar ise Rurera stuteyer, donon narason va tazuk va lan sulem yo. Konviele, pirdot dem proyik yo va Parray ve ganeyer da in pir. In puon va walzeyer da in ta kurera pu yikya ke vegungafa wida zo walteyer. Tiyir poracapa ise Parray grupeyer vexe woltendason va proyikeem yikye ve ikuzedayar. - Va wida me djubulú ! in ve pebuyur. - Vexe erura va rin ke ar grelt tir poracapa ! Sin trakud da til tel lokiewaf gildeyen lexusik ! Bam Parray ve batceyer da tir jonte kiewaf lexusik. - Va yikya ke wida djukuré ise va nik me djubulú ! in adim ve welidayar. - Oskon, va rokiblara me dil. Ika rin al gorav, dum prostewa diner, nume gazdeldeon mallanitil, zunen proyik yo ve dirgayad. Ware, Parray en batceyer da tir jonte kiewaf lexusik. Ta da tir gadiaf ta gazdeldefa mallanira, va koti intafi lexasiki anamplekuyur. Vexe ta ironokafa divkiavara, laniyir aze va intaf nik worayar. Viele va debala ve pebuyur, toloy nik belcon ve boreyed. Larde fu zo solparsayad, ve gorayad da ironokon lexuyud ise stuteyed. Sedme sin lexa is stute tiyid lopofe dam ravlem yo. Bam widik yo bak mielcekki va kexafa lexa gildeyed, gabentaf trakuson da va likiewaf lexusik is lidaavaf dositik fu drasud. Konakviele lexa keyuweyer, ruldason va varafa zidera ke yikye, ise Rurera miv yatkafa gu solparsara sol intaf kotvieluf nik armorayar. Batinde, abicabicon, lexuson is stuteson, sin boreon tiyid moe piluda. Kottol, ton intaf bask gukoeson va lorik, Parray, va piaal tidlanison is ta lokiewafa terktara va kelt illanison wan lexuyur. Rurera, in, dildeson va intaf lorik ta da zo pomar ta va bato sko levburer, do bira is runteem vefayar. Viele laizon, runtapa va stutesik ve vlevplawayar nume ve wizuyur. Lexa laizon ve tutenaweyer, dum cuon gabeyena. Evodan gan bata laizafa tena, widik yo mo piluda boreon ve artlaniyid aze va alto ke wizuyuna Rurera ve kosmayad. Ixam bores va griawira ke intaf jotaf nik, boreon tiyid vrutas va divulafa wica : viele vartebinda dem lona is kurteem ve nuvelayar da va alto ke stutesikye divar, tid tel lopokef piaal va sinafa obrara lor ve jekuyur. Tideon, sin va ar men grupen sulem disves kan anamkaf is gabentaf iteemap ve kozwiyid. Poke in, koe gama se, sin va didgeridoo lexusiki ke Parray ware rokozwiyid. Tel toloy sulem van mila niaa, sume djusolparsayasa wida, bam ve mallaniyid. Batinde tel taneaf tul isu ekibol ve kobliyid. |
