Nagib Maxfuz

Nagib Maxfuz

1911-2006 Arabavaf misraf suterotik

Nagib Maxfuz (نجيب محفوظ‎ arabavon). Suterotafa klepa ke Nagib Maxfuz do izva ke witaf berpot koe Misra is arabaxo manton dojewer. Teni XIX-eafa decemda, arabavaf berpot va selt is araya kosmasa va bato suterotxo kan kalarabavara va yon decemdaf europaf berpot toz kofir. Bak 1920 sanda, Muxammad Xusayn Xaykal suterotik is gaderopik waster va nazbara va vedeyaf suteroteem kan yona europafa teza enide misrikeem koeon wir da tir abduef loon dam Talteka, ise rotir da tir kaikef loon dam in koe seltayind. Metel loeke dam Nagib Maxfuz va man abdumimaks artstatar. Bak 1911 koe glastedafa yasa ke Alkaira Nagib Maxfuz koblir. Koe Alkaira kotla (Fuad kotla) vayar ise bak 1930 sanda koe konaka suterotafa virda va yon taneaf suteravord sanegar. Aze va flibikaf play seotar ise gorar da ta berpotafa tolsutera va izva ke Misra di ektudar. Rodjama ke yon taneaf berpot, tikis va faraonafa Misra, is rotir orkakwituca (yoke toza ke Toleafa Tamavageja Misra jebeper) joke negara va davafa izva gan in askid da va man abdumimaks ebgad. Daletoe, koe milsarefa Alkaira inaf berpot sokid. Va inaf seltaf ropplekuwereem geltrevon pimtar (Zukak al-midak, 1947 ; Bidaya wa-nixaya, 1949). Vexe sanefa kiewatca is malyoparafa kagrupenuca gaveped. Bak 1952, kaikida tenuyur va berpotap vanpitis Bara (Bayn al-Kasrayn, Kasr al-Cauk, Al-sukkariya), joke nios (ledolukafa vols lododesa sutera) va berpotafa sutera Maxfuz malisker. Sanegara va Bara bak 1956-1957 va in basetrakar. Tison 45-daf in adim zo kagruper. Kan bat yasaf bwoy dere tis izvalenopara va Misra, mali 1919 artowara kali ironokaf tandeem ke gazaroti, Maxfuz tir nesidaf gu tela warzafa gaderopafa debala male vertumabetara ba 1952 is gu suterotaf is yambaf lizor gogolas va kottazukafa geltreva. Soe in kan Aulad Xaratina azaf berpot (1959) ilon ilawer; tir viank koe klepa is izva ke arabavaf berpot. In va kulafa prostewa ke purdasorda tire tolwebokar enide voner va malyopara va ginukaf dantereem ke vertuma ke Nassir, aze va rotatrakurevafa undera va roti voner. Koe Al-Axram fela skulton sanegayanon, tel berpot, gan yon ulemik karolas da in tir lamtas, zo dilfur aze koe Misra zo levpour (bak 1967 koe Beirut zo sanegatar). Milugale bilita va inafa sposuca weber ise va flibaklepa me vanolar. In sanegapar : va yon warzot koe feleem is mon tanoy tandaf berpot, lopokon dimpison va malyoparafa geltreva (Tartara fauk al-Nil bak 1966, Miramar bak 1967), oke palseson va intafa staksa koe yona tselkaxa (Al-lis wal-kilab bak 1961, Al-tarik bak 1965). Nelkaf geltrevaf berpot tantanon elpatopon zo zaled, acum va logijaf saneg dam tel suterotaf en vanfir. In tir pokefis va yon jotaf zidaf suterotik tidfis remi lembiekafa rekola moi 1967 egale, aze koe yon radimif berpot va yon sinaf listucaf tuwarzaks balte miv nareter. Vexe tir viele do intafa gelukafa koswasa klita (guazafa Alkaira ke rumeuca) in tolwebokar da tice yamba en tir (Xikayat xarati-ba bak 1975, Malxamat al-Xarafic bak 1977). Zavzason lisagaf gu nuyevaf gaderopaf minieem is intafa envara va suterot, remi 1980 sanda in tir feliik tarkan tuke lidadugeem is vanburerapa pu arabavaf berpot, vexe golde yon gaderopaf ikatcuks (tulon zobera va misrayisraelafi dili) fereon zo akler. Ba 1988 Nobel Poradro zo ziluker. In tir tel taneaf arabavaf suterotik batinde gableyen, acum va tamavadolebela di vansar (konak decemoy remsuteks kal konaka sanda dem ava batvielon zo ropatad). Vexe, orkon gu tizafa likera wal roti is yona lugavevaca ke islamevaf kevusikeem, is dere koe lidafa is alkafa tutritawera riwe icdesa va kotyona bada ke misraf selt, motcara icde Aulad Xaratina zo toltitfir. Golde wedasa lapisonara gan toloy islamevaf jotaf ukik (1994) Nagib Maxfuz galovon moblir.

Nagib Maxfuz  Blira 1911-2006  Ava Arabava  Suterind Berpot   Suterot Abat al-akdar (1939) - berpot Radobis (1943) - berpot Kifax Tiba (1944) - berpot Al-Kaira al-jadida (1945) - berpot Xan al-Xalili (1946) - berpot Zukak al-midak (1947) - berpot Xams al-junun (1947) Al-Sarab (1948) - berpot Bidaya wa-nixaya (1949) - berpot Bayn al-Kasrayn (1956) - berpot - Bara ke Alkaira, Axoda ke toloy berm Kasr al-Cauk (1957) - berpot - Bara ke Alkaira, Berm ke jugemera Al-Sukkariya (1957) - berpot - Bara ke Alkaira, Botiaxe Aulad Xaratina (1959) - berpot Al-Lis wal-kilab (1961) - berpot Al-Simman wal-Xarif (1962) - berpot Dunya Allax (1962) Al-Tarik (1964) - berpot Bayt sayi al-suma (1965) Al-Caxad (1965) - berpot Tartara fauk al-Nil (1966) - berpot Miramar (1968) - berpot Xammarat al-Kit al-Aswad (1969) Taxta al-Midalla (1969) Xikaya bi-la bidaya wa-la nixaya (1971) Caxr al-asal (1971) Al-Maraya (1972) - berpot Al-Xub taxt al-matar (1973) Al-Jarima (1973) Al-Karnak (1974) Xikayat xarati-na (1975) Kalb al-Layl (1975) Xadrat al-muxtaram (1975) - berpot Malxamat al-xarafic (1977) - berpot Al-Xub fauk xadabat al-xaram (1979) Al-Caytan yaiz (1979) Asr al-xub (1980) Afrax al-Kuba (1981) Layali Alf Layla (1982) Raaytu fi-ma yara al-naim (1982) Al-Baki min al-zaman Saa (1982) Amam al-arc (1983 - berpot Rixlat Ibn Fattuma (1983) - berpot Al-Tanzxim al-sirri (1984) Al-'Aic fil-xakika (1985) - berpot Yauma kutil al-zaim (1985) - berpot Xadit al-sabax wal-masa (1987) - berpot Sabax al-ward (1987) - berpot Kuctumar (1988) - berpot Al-Fajr al-kadib (1989) Asda al-sira al-datiya (1996)

wp-de:Nagib_Mahfuz wp-en:Naguib_Mahfouz wp-es:Naguib_Mahfuz wp-eo:Naguib_Mahfouz wp-fr:Naguib_Mahfouz wp-it:Naguib_Mahfouz wp-nl:Naguib_Mahfouz wp-pt:Naguib_Mahfouz wp-ru:Махфуз,_Нагиб wp-sw:Nagib_Mahfuz wp-tr:Necib_Mahfuz