Kudeem ke Aisopos : Deaxol

Kudeem ke Aisopos : Deaxol

Savsugalafa ellasafa kuda

Deaxol is astol Ayik va deaxol is astol sinkar. Okie deaxol va astol tudjumasar kire in zo gigestursur. In kalir : « Wal gotacena gatcewa is yon goburen porn, rinafa blira tir teniskafa olyastewera. » Aze pirdar da in va kilandruca jidjar ise ta tildera ko fe ins luber. Va pirdara tarkar, ins luber nume va varafo alto lupur. Feliik va sulemkurmik tagar, va wayot tori bakanik erur. Sulemkurmik va koplekuks ke deaxolaf riz savsuter ; bat wayot va in dimon tugalesitir. Acum deaxol ta fraskera va astol di zo vikear. Bettan kev artan nyagon levtiur, pune sovanpir taneaf askisik va intafa volkaluca. Deaxol is deaxolsusik Deaxolsusik va deaxoleem ko suxe anamrozar. Pu olkoy vangaveyes yoke kono baspexo, deaxolsusik va rapor kabur, kulmecker nume va nola empar. Bam voser enide in pu feliik me di kalir. Deaxol dulzer : « Kore va amlit co-vidé, tokinde co-ropalsé ? Kottan rowir da nola zo empayar. » Viele rola tir exaksunafa, zo sovolpreyutar.. Deaxol is Deaxolropesik Deaxolropesik va olyuba ke intaf Deaxol gidubier aze doler ; kevoke afizcekon gibepragar ise gibefibastar. Deaxol pu in kalir : « Ede en djumel da tí listaf, pune va olyuba tori sinkara va jin mea dolel. » Bata kuda nedir da erbafamik va wawik kan brostasa dewitca is derbera merizer edje guon sokaldeswar. Deaxoloc is valus idatcol Deaxoloc, zavzagiyis kadime milkava, gan idatcol zo onkar. Rwoder ise kalir : « Efe grupé, idatcol, da ta rinafa estura zo baliké ; vexe enide volporon me di awalké, valul ise va jin stutesil ! » Edje idatcol valur ise deaxoloc stutedar, vakol ba lor vanvulted aze va idatcol toz tcabaned. In pu deaxoloc rwodeson kalir : « Rotaxe dolge jin ! lecen, larde tí atelonyik, yorda vol tir valura. » Batinde, koncoba askina volkare goaspil, dace gina koe nuba, zo sotiolter. Deaxoloc koe mona is idatcol Deaxoloc tigis koe mona va vanlanis idatcol wir. Toz lutsagar ise balger. Idatcol dulzavar : « Copik, lutsagik me tir rin vols mona, xo lize tigil. » Bata kuda nedir da xo is katecta ta lureskara va gijarotiik jontikviele sotupirtad. Deaxolsusik is govitaf deaxoleem Deaxolsusik, jupayas va deaxoleem ko baspexo, sonker da govitaf deaxol gu in al aotced, nume, ba siel ko arula va volant sin platir. Direvielon, xeftoapar. Acum larde me mo gubefo baspexo rostar, pune va sin koeon roper ; vexe va abic werdol gu digin deaxoleem anton zilir, biwe enide in me di aelawalker ; kevoke gu divef, in va vace tugijar enide dere di vanpilkar. Moi sazaj, ko mulexo va belcon sin jupar ; vexe govitaf deaxol ko meftava otced. Edje deaxolsusik va sin gu niauca kagar larde damo intafa manafa ropera batinde zo jovlé, sin rwoded aze dulzed : « Batdume, loeke, va rin budaxav ; kire, larde va darevielaf emudenikeem lodam rinaf guazaf bonoleem al ropenyel, ede warzaf deaxol di pid, pune va cin joke ban sin arse frayetel. » Bata kuda nedir da kievera va nuca ke kontan taneon krafias va noeltaf nik lodamu guazaf zo gonafanar.

Xanto   Vergumvelt Αισώπου Μύθοι Sutesik Αἴσωπος Piskura Ava Ellasava Evla 6-eafa voldecemda   Kalkotavara   Vergumvelt Kudeem ke Aisopos Kalkotavasik Yurani Andergan Piskura - Evla 2013   Krentduga   Webesik Yurani Krentduga Tuenayana

Kudeem ke Aisopos (Aisopos) ← Okol - Deaxol - Vakol →