Kar
 Bat teliz tir kotavaf suterotvildeks vols kalkotavaks. |
| ||||
|---|---|---|---|---|
| Vergumvelt | Kar | |||
| Sutesik | Orhan Pamuk  | |||
| Ava | Turkiava | |||
| Evla | 2002 | |||
Rupa[modifier]
Turkiaf ezlopik, dis va Ka toriyolt, koe Germana mali jontika tanda divbliyinon blir. Yoltoe Istanbulafa fela, ko Kars sostanafa widavama arte Turkia zo stakser. Ta kogrupara va ksera ke yikya se is ta sutelara va teliz yo icde enidafa dotalibura zo vuidar. Vexe intafa birgafa jugemera tir ta da in va Ipek koeon co-rokatrasitir. Battanya tir savsaf milbemik noelton solkureyes va Muhtar tan liburaretik.
Mali artlapira, Ka zo yaneper : gan ardialokilik zo ganer, va minieson italkkirafa berikya ke Ipek rungruper, do sordopasutes kotlik ke islambema keyakser, do cugaf islamevik birgoton blis artukon doalier, do gaderopaf tegulasik kevudar… Kottan yawar da varze ezlopik tuluntawer ise vaon kavangluyar.
Kars widava gan gronon lubesa nolda zo elekar. Jadifa vanama tir rotapafa ise seltafa ilatcewera va pizaca yo abditar. Soe, dezunon gan rena va Ipek, Ka va gracasa mali balemda ezlafa koswavara dimdrasur.
Wenhaxa grustana gan winugarictaga ta rojura va turkiafa vedeyeva isu suptuca gan bellikevaf alkaf lizoreem pistolenon zo remwir. Bilma ke islamevik yo va konak kosik atar ise va tizarunta askisa da in albodar va blira ke kotaf koredikeem basrodar.
Sebuks[modifier]
"Kar" tir taneaf berpot ke Orhan Pamuk kowedis va gaderopaxo. Kan sorda is jontik esaf koredik is ardialskujenhera, va lingera va vo sollipano gan vonewera ke bellikeveem is vedeyevaf meviallasaceem suterotik drager. Va bat turkiaf zokaceem budon suler nume batcoba va eaftafa volnaca yo kevon al askir.
Kars xayastanafa widavama keskeon tir lecafa gu seltaf ik gaderopaf ik skapaf zvakeem ke patcta kire, batlize dum kotlize, Sokasane is suptafa Soka koaykayana gan Mustafa Kemal Atatürk gan islameva zo moakled. Bata islameva koe vielaf drikaceem ke turkiafe sane is copuca mejena gan tela lo sanelia va zeitafo tawavo trasir. Koe dere Kars poura va italk koe bema va bogara titickar nume va tizafa kevotcera yo is dere bilma se tuyer lize birgotaf islamevaf grustaks yo tid gadesik.
Vexe "Kar" me tir tcilkberpot kire intaf askisik va pakovil meviele vanikatcur ise vewar da va tegira yo ke konakilayan koredikeem malher. Kotron tir berpotaf grabom, dem tanuskapaf martig kan nobafa waltegira se ke sutesik (radimiwituca va belisik taon al gilter) is rukuzafa vegedura ropplekusa va bifevlemeem. Koe gaderopaxo ik ar ind Orhan Pamuk me yawar ta da danedir volse ganer ta da icde coba astegisa kontan is rotisa lizisiki va tisuca va int bibet. Kotcoba zo goremtrakur ise mecoba tir drikon rovangrupena. Kota blira va intafa esuca isu olhastewesuca, ewavon gu ezlafa koswavara ke Ka dana nuvelar da va keveluca malestur.
Kotcoba tir leca is ikasugdala. Batdume, do rupa wenhaxa zirsena koe Kars is tisa jala ke eaftevik yo zo dolunher. Koredik ke berpot, sixoason va Hegel turemsetikesar da « en dum koe wenhaxe, izva va yordeem ziliwaler. Ise dere, dum koe wenhaxe, tid takrelik yo koas va izvaxo ».
Tenuyunon va neva, belisik van bali va koredikeem batceson jovler. Loote bati bali tir folvafi, teka skaltewera koton tekawer ise nasbayane rigotafe bibe yo geltron zo relvad.
