Jivakiraf aal

Jivakiraf aal

Madagasikarafa vunda

1-eaf siatos : 2007 Koe lindafa azeka poke wida aal malipon soranheyer. Veygadik is barveygadik vaon kotviele al wiyid. Kaliyit da in tiyir loguazaf dam Tawava. Tiyir diolaf. Ortanikya se piyid ise voseyed ta da in jaxadar ; lijkikye se va rotokwayot birgon benon aneyayad. Vexe meviele va tan inaf cuisaf ilt kontan grivuteyer. Tokdume ? Kire miala ke ilteem tiyir jivakirafa. Vexe metan va toktol grupeyer : granaf ulim fuxetolaweyer. Taneafa gama blibureyer volse toleafa awalkgetcayar. Aal zo disukeyer volse zo uzayar. Bak lana tanda, idulaf idulugal va tawa turodayar, rodaf muvugal gedeyayar, tuopranas fentugal va ixam ixewayan fay tutapanayar. Aelakola va wida boreon tolgeniyir. Galova : antaf moe azeka, aal zavzayar merorelatcen. Mek inaf ilt al xonukayar. Aelepes widik yo ve motrakuyud da wal arpuma va glebasa awalkera grivuteson va moavukafa ribiega is lanuca va aelawalkera megrivuteson gokiblayad Ayik, ke dan nasbeikye ware nemon bliyir, laizon ve ebleyer da vanlanir. Vleve taltefa gama ve azavzaweyer aze ve iltyestayar aze ve itabudeyer aze ve fegalayar nume… di rembliyir. Bam kot widik va in ve milaskiyir ise va galaf ilteem ke taltefa gama ve ipeyer. Mea aeles, va ronefa gama ve torigiyir. Taneon idanon az bogason. Va intafa abdifa vudera batceyer nume widikeem ve gorayar da drume ulim gabeson va gama va int jaxadar. Vexe arti tolka, aal vigabeyen sol intafa jivakirafa miala ve tuebeltaweyer ise ve turodaweyer nume ranheson ve awalkeyer, dum intaf ilteem. 2-eaf siatos : 2010 Aal koe lindafa azeka mone wida mali mesetiken ugal sokalfeliyir. Veygadik is barveygadik va in kotedje wiyid. Konaktan kaliyid da in tiyir losavsaf dam Tawava. Restenikya voseyer enide di zo jaxadayar ; lickikye va wayot ta intafa mejera gu in birgon aneyayar. Vexe metan va kon inaf iltany meviele yoyayar. Tokdume ? Kire man inaf lik tiyir jivakiraf. Vexe toktol me zo gruper : granaf ulim ton toloya gamapa solparseweyer. Battol va blira bureyer volse bantol va awalkera. Zo disukeyer voxe me zo uzayar. Konviele, idulugalaj va tawa turodayar aze rodaf muvugal gedeyayar aze tuopras fentugal va ixewanaf fay tutapanayar. Aelera va wida boreon tolgeniyir. Galova : antaf moe azeka, aal tugiltaweyer. Mek inaf ilt al xonukayar. Aeles widik gu sint kaliyid da govokiblad wal glebara yoyason va moavukafa ribiega, is lanuca me grivuteson va aelawalkera. Ayik dis va kevblimis nasbeik laizon laxuyabdulaniyir. Vleve ronefa gama azavzaweyer aze va ilt yestayar aze itabudeyer aze fegalayar nume... di rembliyir. Bam kot widik di milaskiyir ise va galaf ilteem ke ronefa gama ipeyer. Griaeleyen, sin va taltefa gama torigiyid. Taneon boikenon az bogason. Va intafa vudera batceyed nume va in gabeson drum ulim va jaxadara gorayad. Arti tolka, aal vigabeyen gu kojivayan lik tuebeltaweyer ise badieweyer nume int lidam intaf ilteem awalkeyed.

Xanto   Vergumvelt L’arbre empoisonné Sutesik - Piskura - Ava Madagasikarava Evla -   Kalkotavara   Vergumvelt Jivakiraf aal Kalkotavasik Bruno Cordelier Piskura - Evla 2007   Krentduga   Webesik Bcordelier Krentduga Gotuenan