Bugni is Ku
|
Konviele tiyir ayikya va mecoba en digisa. Wawafa is vuwikiskafa is nasbeikiskafa, antafa dive grelt bliyir, dum sostanafa gu tamava. Konviele, arte po is acagira, mea ve ruyur nume va awalt, va bat lorik vanpiyis koca, ve voseyer ta da ganon zo pomar. - Va jin disukel, Awalt, jin tí antaf is wawaf is aelepes. Kevoke ara ayikya se tid lokalafa dam jin. Va nasbeik yo adones va sinafa antuca leon did. Ta da va jin pomal, va koncoba me rotaskil ? Batcoba va jin co-pomar ta da blí ise va copuca levburé. Awalt me ve dulzeyer. Vexe eldeon, ba divmodera, kabdue tuvel va toloy aalam in ve trasiyir. Woltendan vox lanaf da dildeyen Lorik al rwaveyer, vaon bibeyer : - Grewá, va jinaf Lorik, icde bat siabeks. Vexe va tokcoba doon gonaskí ? Awalt pu in ve kaliyir : - Pu sin va estutuna koncoba zilil aze vartel dum rinaf nasbeikeem. Konviele, sin va rin silukon pomatad. Budikya ve askiyir dum awalt al tiaveyer nume va toloy aal gestuyur. Kare intaf nasbeik yo va sin krupteyer nume kan Bugni is Ku al yoltayar. Darpe aksat yo, toloy aalam atriyid voxe zavzayad rabetaf dum turodawes. Guyafa dum gadikya lente rabetif nasbeik yo, icde gonaskina coba va intaf Lorik tolon ve bibeyer. In opelon ve dulzeyer : - Pu sin va ulitina koncoba zilil ise til keaf. Aalam yo va lava diyid nume toz vanpiyid gijaf is listaf aal se. Ayikya tiyir guon oklafa. Konviele in loon dam artan va fent ve peztaleyer, pok intaf aal yo ve laniyir aze ve eruyur : - Nasbeik yo, koe kiray fentar nume va idul ke tey co-djupeztalé. Pu jin va konaka awalkafa gama co-rozilic ? Nasbeik yo balte ve ziliyid nume ayikya va opelafa kaluca ke tey leve rekleda is tuidulasa teyka rogrivuteyer. Ugal traspuyur, wison va kalafa ayikya is lolodatris aal yo. Ayikya tuloguazayar ise boreon ve peztaleyer da nekev tegiraf tey ba abdamara intaf niskeem tuopranayar. Pok nasbeik yo tolon ve laniyir : - Nasbeik yo, daletoe tí guazapaf ise lekef tey va jin mea tuidular. Va logijaf co-olegá. Pu jin va win gestuyus is vartes, ta da tí lotrabiangaf, va lo gama yo co-rozilic ? Bugni va lo gama se metairdason ve ziliyir. Volse, Ku krulon ve vewayar nume rodon ve dulzeyer : - Toktel til, rin espus da til jinafa gadikya ? Va jin al gestur ise varter, ageltafa, vexe va jin me vektal. Mu jin til mecoba nume va lofa mecoba pu rin zilití. Gadikya, yatkafa, ve perleyer : - Kiewafa, nasbeik, niaik ! Va rinafa gama yo sul ! Bugni, in linteyer, tiyison vonaf dolge jin, titil acagis aal nume viele ayik se va rin balieted, batcoba titir wavdafa kire anton gavepon blagaweté. Vexe ta kolnara va sinaf kiray va rin rozinulatad. Volse Ku, titil listaf aal. Vexe viele ayik se va rin djugabeted, davon lubetel aze kalion zaxawetel, tozuson jon takra. Nemon til inta tori tey, kaliapon anteyawesa is va metan tuidulasa ! Ware batvielon va bugni is ku koe kanakafo aalxo rowit. Sedme abdikaliks ke guazikya, kare istef swalot ke kiray bugni wan zo faver kire tir acagipis. Kevoke, ku zo afanar, bat aal tir dulapiskaf rade vanteyara. |
| |||||||||||||||||||||||||||||||||||||
