Yana woyek
|
<poem> Tokcoba tubatakawer, zekar tide batakafa Belacitsa ? Kas noldaflava ok batakaf loror tid? Batakafa noldaflava me tid, batakaf loror me tid, voxe batakafa broca tir, vleve broca jotaf Stoyan, jotaf Stoyan akoleson daykeyer, pu berikya pulviyir : « Berik, batakafa Yana ! Lanil, Yana, pu jin vanburel va fedafa lava ke batakafa Duna ! » Yana pu berikye pulviyir : « Terektal, berik, jotaf Stoyan ! Jin me grupé va kelda kal batakafa Duna, kalon is dimon. » Stoyan pulviyir ise kaliyir : « Berik, gabentafa Yana ! Va rinaf geltam gabel enide ebeltaf fortey traspur ; viele va aalxo remlanitil, va aal is rapor tcalatal ; viele va batakafa Duna benlanitil, va fedafa lava gimatal aze dimlanitil ; golde tcaleem va kelda dimtrasitil. » Yana va berikye terektayar, va intaf geltam gabeyer, rem aalxo mallaniyir, va aal is rapor tcalayar, va batakafa Duna kallaniyir, va fedafa lava gimayar aze dimlaniyir. Voxe Yana, gabentafa Yana ! Voxe zarendamayar, nume va tcaleem tcateyer, va tcaleem, va rinaf ebeltaf fortey, va aal is rapor kanon al tcalayal. Voxe Yana, gabentafa Yana ! Voxe va kelda roklayal, nume koe aalxo toz egluyur. In barkon laniyir, barkon egluyur, va sleda me dimtrasiyir enide pok berikye dimlanir, pok akolaf Stoyan berik. Bam Yana, gabentafa Yana, va Lorik gabenton dildeyer : « Terektal, Lorik, abegaf Lorik ! Va jin artazukal, Lorik, ton sverimi, ton faltafi sveri, ton woyek, enide vamoe tajdaal talá, enide va berik aneyá, va akolaf Stoyan berik ! » Aze Lorik va in terektayar, ise ton faltafi sveri artazukayar, ton faltafi sveri, ton woyek, dani dure wan woyekier. </poem> |
| |||||||||||||||||||||||||||||||||||||
