Vunda va Maiore
|
Lekepon tiyir, vlevi artlapira ke batakikeem ko tursia, ugale aelakola is roduca va kot oceaniaf ewaleem erolayar. Imweem tiyir awalkaf, aaleem ilbliyir. Wageyaal se, dum awalkafi sveripi yo, va toeem rumkawes tit tcurtaf ulim dere iskeyed. Se tulaviskano nodxo isu sfixo isu wikayxo isu bilmaalxo awalton turodaweyed. Koe bat letak, sanelia ilbliyir. Kelt tiyir karafaltaf, abdiplekuson va meka muvara. Koe fedaf diuzkiray, moe uling dem « pandanus », Moe va intafa iyekotjava ve vanmadayar. Azon, ranheson, inya nuvelayar da ko klokera lubeyer. Intaf abrotcaf ebeltaf usukeem va gazafi ingasiki askiyir ; kabdue grujdaf talgeem forteyawes kutceem fenkuwemeyer. Konakboron, Arutua aguntanik, va inya nhaseyer. Krupteyer da inya maneke tiyir listafa, artimon titisa kurenik ! Ise ta dositara va klokara ke zijnaf aguntanik, inye ve dankayar : « Moe, moe, miel tir lodeaftaf dam rinaf vaptaalukaf usukeem vox lefedaf dam rinafa larida. Miel, ta preyutara va bata tamava lize hinano is tiare imwa se awalked, va min anamplekur ! Moe, Moe, va guema vanmiao anoduvendaxo grujupá, ise ta gejakuftanubara jinafa ma al vanpir gijarotifa. Vexe, ey Moe, co-tí pof is pirtaf tir mezolonafa ede bli va min co-graceter ! Moe, Moe, tori jin til lolistaf dam ranhas awalt. Ey Moe, ko rinaf usukeem va kofigasiki ke monoi dem tiare aneyatá ! » Moe va dank ke aguntanik al terktayar. Bat dank va in zijnon koluyur. Va pitcas awalk mea modovayar. Djubliyir, ware djubliyir ta da va renonana puda ke Arutua ware rogilder ise va inafo po isu rena pokeon kotviele ropeztaler. Bam, silukon, ve kaliyir : - Arutua, rin til jinaf renanik. Dum sielsuka koo toeem ke aito se ke piluda, rinaf kutceem dankar. Tuke minafa djublira, ey Arutua, va anameon mwarnes awalk acagitit. Koe mevta, va Taaroa proyaf guazik grupé. Ba jinafa nasbalara, in pu jinafa gadikya kaliyir da jin co-tití listaf dum gazdabitej ise in ta bliwetara tori jin tiyir gadiaf. Lanit ta da va in trasit ! Van mevta lize Taaroa bliyir sin ve mallaniyid. Moe is Aratua van mevta lize Taaroa bliyir mallaniyid. Koo krantecorap yo ta aneyara va oga ke Taaroa laniyid nume tiyir teyawalton abrotcifa is cuusa avlara. Ematcap dem grelt yo va Moe dirnuson radimelaniyir. Riwe sielon, Taaroa adim awiyir. Abrotcaf noldaf usukeem va niskafa vola xutayar, ise in moe torstiskafa kramtaalgama va int zobeyer. Nuvelayar vumeltaf is pof maneke va in wison aeles grelt yo en ve grupeyed da va in rodirnuyud. Moe kal raporap va lanira ve trenayar, azon azavzaweson ve iegayar : « Proyaf guazik, va abdiplekuks askiyin ba jinafa nasbalara al setiké nume pí ta da va rin trasí nume askil da bliv, djubliv ise va sint djurenav ! ». Taaroa pu in ve dulzeyer : - Va rin kiavá, Moe ! Ba kova va rin al grupé viele tiyil listaf dum teina is fedaf dum tiare imwa. Tori rin, va kotabafa listuca askití ! Rin va tel titis rinaf bliradositik al kiblal. Inafa takra tidrenar viele in va rin nhaser. Mu rin va kotabafa aultovesuca askití ! Nume galova ve sokiyir. Alto ke Taaroa proyik ton Maiore ve artazukaweyer. Alto ke Taaroa proyik nuvelayar da ko sielgael titas va krant jeweyer, aze va divulaf tazuk yo narayar ; intafa java dum almuk ke guazaf aal tumucunaweyer, nimateem dum zae ko sid titickaweyer, voxe benu tugamaweyes meem toa se is ilt yo nasbalayad. Batinde maiore ve nasbalayar. Galova tiyir kotrafa. Lava ko rodafa ilava ke soist tolon toz traspuyur, taya se toltukusaweyed. Kontomon kratelakiraf ilt yo kan aldo askid da gameem badieyed, nume kot grelt va wida dankason is siskeson va Moe dimlaniyir. Kotaf mielcek wivenon ugalzeyer, aze mali eldeviel, kurera va Arutua is Moe zo kotgrupeyer. Malion sin, palseson va kaluca koe preyutanaf kirayam kene piluda vanmiae purao se, kalavielon bliyid. |
