|
Paris, ba 10 santoleaksat ke 1948
Abdipulviks
Torigison da kagrupera va bagaliuca vegodafa gu kot bewik ke ayikeem is va inaf miltaf is volroripindan rokeem va rigot ke nuyuca is dili koe tamava tadler ;
Torigison da uldinejera is vligura va ayikrokeem kal bartaca yo kevmadasa va jiluca ke ayikeem al jupad ise da sokira ke tamava lize ayik sotitir nuyaf gu pulvira is folira, tunuyayan sol eaftuca is copuca, wetce tela lodontinafa djumera ke ayik al zo etimar;
Torigison da gonipir da kan rokavertuma ayikrokeem zo gonendar ta da, va vidura va kevmadara kev kalstegera is rictara, ayik ilamon me zo kaiksteger ;
Torigison da gonipir da vonera va walvedeyaf naf skedeem zo gobristur ;
Torigison da koe Efaya saneeem ke Tanaraf Vedeyeem va intafa kevfolira va rigotaf ayikrokeem is va ayilkucafa bagaliuca isu voda is va miltuca ke rokeem ke ayikye is ayikya tolon al etimar ise al ruyer da tir elvaf gu tukuvara va seltafa abduxoa is pendera va lokiewafa bliragropa se koe logijafa nuyuca ;
Torigison da Bewaf Sokeem al vilter da, dotegison va Tanaraf Vedeyeem Grustaks, va tamefa is kruldesa tarkara va ayikrokeem is rigotaf nuyaceem di ravaldur ;
Torigison da dofa envara va bat rokeem isu nuyaceem en tir zolonapafa ta kotrafa tugeltrara va bata viltera ;
Jadifa Koka
Wetce dofa rietava gozometena gan kote sane isu vedey va bat tamef dakteks va ayikrokeem etimar, ta da kot ayik is seltvila, tanion kodororan kan bat Dakteks, kan tavera is gaara sugar da va tarkara va bat rokeem isu nuyaceem di voner ise kan vedeyafa ik walvedeyafa abduasaca yo sugar da va tamefa is kruldesa kagrupenuca isu rewanuca, dene sanexo lidam notraxo ke Bewaf Sokeem, di ravaldur.
1-eaf Teliz
- Kot ayik sokoblir nuyaf is miltaf gu bagaliuca is rokeem. Va ova is jiluca in sodigir ise kottan is artan va sint beron gotegid.
2-eaf Teliz
- Kottan va kot rokeem isu nuyaceem etiman koe bat Dakteks voltuamidanon soderaykar, tulon va zaava ik ikra ik ava ik alka ik gaderopafa ok ara trakula ik vedeyafa ok seltafa xanta ik tufa ik kota ara debala.
- Ostik, metan kan gaderopafa ok rokopafa ok vedeyafa ravalduga ke intafa patcta oku tawavo zo sosolkatcar, kore bata ik bato tir merupteso ik adomtayano ik mivvexafo ik menafalanhafo.
3-eaf Teliz
- Kottan va blira is nuyuca is intafa musuca sorokar.
4-eaf Teliz
- Metan zo sotulevetirar ; levetiruca is levetirikkazara en bellikon kotinde zo sopoud.
5-eaf Teliz
- Metan zo sonaker ike kan udutafa ik meayafa ik ligundesa pursara iku askipera zo solevplekur.
6-eaf Teliz
- Kottan kotlize va kagrupera va intafa rokafa ilkuca sorokar.
7-eaf Teliz
- Kottan sotir miltaf varze mwa ise va miltafa mwafa nendara voltuamidanon sorokar.
- Kottan va miltafa nendara kev kota solkatcara aktasa va bat Dakteks is kev kota pistolera ta mana solkatcara sorokar.
8-eaf Teliz
- Kottan sorokar da va vedeyafo mwaxo se stinafo icde tegira aksasa va intaf rigotaf rokeem tadlemwon ik mwon kagrupen kruldeson rovidur.
9-eaf Teliz
- Metan wavidon zo sokazavzar ike zo sodagir ike zo sodivblir.
10-eaf Teliz
- Kottan miltanhon sorokar da intafa lazava miltekon is saneon zo gilder gan meruptese is pakodafe jizxe goratase va intaf rokeem isu vebakseem ok va rokanha ke kota pursarafa vajolera va int.
11-eaf Teliz
- Kottan vajolen icde fugaca zo sokabdiyer volgunaf kali da intafa gunuca mwon di zo exoner remi sanef jiz viele koti adrafi ozesiki ta rojura va in al zo ravaldud.
- Metan zo solanhatar icde tegira ok vulkura dana, ba intafa raplekura, kare vedeyaf ok walvedeyaf rokeem va fugaca me tadleyed. Milon, meka pursara lopofa dam tela rorewayana ba fugaca me zo rorewatar.
12-eaf Teliz
- Metan va wavidafa koropira va intafa ilablira iku yasa iku oga iku daalakseem is va zomera va intafa poruca iku sposuca somukatar.
- Kottan va mwafa nendara kev mana koropira iku zomera sorokar.
13-eaf Teliz
- Kottan va nuyafa pridura is kiblara va intafo sokexo koe sokaxo sorokar.
- Kottan va bulura va kota patcta, don tela intafa, is dimpira ko tela intafa sorokar.
14-eaf Teliz
- Varze brazara, kottan va ditsaneyara is ditsbelundara ko ara patcta sorokar.
- Bata roka me sorubdar ede krulded onkara se ke dana intaf sul zo tadler gan jadirokafa gomilara ik tegira se volsafa gu enideem is nelkoteem ke Tanaraf Vedeyeem.
15-eaf Teliz
- Kottan va vedeyaca sorokar.
- Metan sol intafa vedeyaca is roka va vedeyacabetara wavidon zo sozelar.
16-eaf Teliz
- Mali kureraklaa, ayikye is ayikya, en meirutason luxe zaava ik vedeyuca ik alka, va sintafa kurera is yasaredura sorokad. Tove kurera is kurenugal is baskurera va miltaf rokeem sodigid.
- Kurera do nuyafa is kotrafa finera ke enidaf kurenikeem anton zo sobiogar.
- Yasa sotir tel tuwavaf is rigotaf seltolk nume va seltafa is sokafa nendara rosokar.
17-eaf Teliz
- Kottan, antaf lidam dof, va pilkuca sorokar.
- Metan sol intafa pilkaca wavidon zo sozelar.
18-eaf Teliz
- Kottan va trakurafa is jilucafa is alkafa nuyuca sorokar ; bata roka askir da kottan sotir nuyaf ede va alka ik minia djubetar ise ede va alka ik minia djumexaksar, tison antaf ok dof, saneon lidam mesaneon, kan tavera ik ura ik atay is kotaskira va miga.
19-eaf Teliz
- Kottan va nuyuca ke trakula is muxara sorokar, batcoba askisa da va meaneyanuca golde beta intafa trakula sorokar ise va aneyara ik kazawara ik galbura va giva is rieta sorokar, luke jowa is kotkane.
20-eaf Teliz
- Kottan va nuyuca ta diliokafa katanara iku gesiara sorokar.
- Metan zo sovebar ta da va gesia pasur.
21-eaf Teliz
- Kottan sorokar da va saneaceem ke intafa patcta paker, rontion ok kan nuyon kiblayan kaatoesik yo.
- Kottan sorokar da va sanefi fli ke intafa patcta vansar, koe gropa se ke miltuca.
- Sanekuranira tir tel rigot ke rictula ke sokaroti ; bata kuranira kan telafa rekolafa libura se, is kan miltaf tamef vek, is kan brudara birgafa ok vertana kan milvodafa diotexa ravaldusa va brudaranuyuca zo somuxar.
22-eaf Teliz
- Kottan, wetce seltik, va seltamusuca sorokar; va keldaskira va skapaf is seltaf is arayaf rokeem vrebaf gu intafa bagaliuca isu ilkucavonera, tuke vedeyafa sugara is walvedeyafa dotegira, oye grustanuca is robeem ke kota patcta roseotar.
23-eaf Teliz
- Kottan sorokar da rokobar ise nuyon kobarakiblar, koe miltekafa is keldaskisa kobaragropa se, ise va nendara kev stilara sorokar.
- Kottan va miltafa kuba yoke miltaf kobaks mesolkatcanon sorokar. Bettan kobas va miltekaf is keldaskis viroyaks ravaldus pu int is intikeem va kruldesuca rapalafa gu ayabagaliuca sorokar, bat viroyaks plunon tukotran kan koti ari seltanendasiki.
- Kottan sorokar da do artan se va grosiba roredur ise va grosiba ta intafa rojura royoter.
24-eaf Teliz
- Kottan va tildera is tci is ovakirafa kimara va kobarugal sorokar, ise va rekolaf doden udoreem sorokar.
25-eaf Teliz
- Kottan ta ravaldura va intafa is yasafa musuca isu kiewati va bliravwa umeke sorokar, tulon va gestura is vagera is ogara is selucaropereem is adraf seltazanireem ; va musuca todon gu stilaca ik akola ik megaluca ik nhobruca ik guazuca sorokar ise koe kot ar tod lize al drasutur va intaf blimergileem yoke volkuranis goaspil sorokar.
- Gadikyuca is rumeuca va aptafa pomara isu tcicera sorokad.
- Kot rumeik, kobliyis vanmiae ok eze kurenikeem, va miltafa seltanendara pojar.
26-eaf Teliz
- Kottan va gaanuca sorokar. Gaara sotir fastafa, icle luxe rafa is rigotafa tavera. Ratavera sotir vrebafa. Brubefa is ebafa tavera zo gotujadiar ; vansara va vamoef vayareem zo gokalfenkur milton gu kottan kare riwetcuca.
- Gaara va nagenhera va ayilkuca is tolopoara va tarkara va ayikrokeem is rigotaf nuyaceem gokulmer. Va doplekura is gindesuca is nuca wal vedeyeem is kot zaavikeem yo isu alkikeem se gotukuvar, ise va vonera va tegireem ke Tanaraf Vedeyeem ta dilinubagira gotukuvar.
- Gadikeem va kiblara va gaarinda va intaf rumeikeem abdukon sorokar.
27-eaf Teliz
- Kottan sorokar da va arayabli ke doda nuyon paker ise va yanba se pojar ise va ogafa abduxoa is maletis benaskikseem paker.
- Kottan va nendara va intaf gruucaf is ugaf dulapokeem maletis va kot ogaf ik suterotaf ik yanbaf inton askiyis warzeks sorokar.
28-eaf Teliz
- Enide sleman rokeem isu nuyaceem ke bat Dakteks en rorewanhawed, kottan va seltafa is walvedeyafa gazara ke mana vura sorokar.
29-eaf Teliz
- Kottan varze doda lize antafa nuyafa is kotrafa vonewesa ke intafa ilkuca tir rotisa va goni yo sodir.
- Funteson va intafa roka se is pojason va intafa nuyaca yo, kottan anton divlapuron zo sokimar gan mwa ravaldusa va kagrupera is tarkara va artanaf rokeem isu nuyaceem ta daniaskira va malhaf dineks yo ke lidok is sanevura is kiewati koe sanerotif selt.
- Bata roka se isu nuyaca yo kevie enideem is nelkoteem Ke Tanaraf Vedeyeem vol zo rofunted.
30-eaf Teliz
- Meka miwa ke bat Dakteks zo robesugdar dum rovanzilisa, yoltoe soka ik lospa ik olkik, va beta roka ta tegira ok kotaskira va koncoba djuvilasa va kota slemana roka iku nuyaca.
|
|
|
| Vergumvelt
|
Déclaration universelle des droits de l'homme
|
| Sutesik
|
Tanaraf Vedeyeem
|
| Piskura
|
-
|
| Ava
|
Francava
|
| Evla
|
1948
|
|
|
| Vergumvelt
|
Tamef Dakteks va Ayikrokeem
|
| Kalkotavasik
|
Mixail Kostov
|
| Piskura
|
-
|
| Evla
|
2002
|
| Klita
|
Kalkotavaks
|
|
|
| Webesik
|
Axel
|
| Krentduga
|
 Gotuenana
|
|
