Talteon me warzaca Luz12
12-eaf luz[modifier]Muvugal tir. Ke savsaf sayakikeem, abic olkoy wan tid. Tí tel bocik ke pera ke cinafa pula. Kottan va gejanonura is dilira pulvir. Kottan ker. Ede ware co titir basbidgara, pune skaya sotitir. Pokolera tid porsafa : tire metan rodivpakuder lecen edeme sina en edaveted. Ede me dilira, pune artowara titir. Va tildesa san-alubda dadí kire va abice tie al fixá. Leve awalt koe matelama kotafizcekon debanyé. Gejanonura fure artfir ; re, folí, jin dere. Bam, dimdenlapitiv ; jinafa trakura batliz vukid. Va batu u mea rokaikfid. Coba sumpasa va jin isu kolizisa, tid pestaka, i blisiputera, i sumpara ke vo, i fortey, i izakuca ta giwara. Vexe bata coba me tid mukot. Ede bak decit-lerd-decem-san-teve tanda co dimdenlapiyiv, kan cinafa ugalayana kranavera is po, pune va zivotc co basrodayav. Ede re ko intafa ebava dimlapiv, pune tiv legaf is filten is tuvlardan is zaeiskaf is mepokoles. Mea romoticatav. Dere mea zo gildatav, lecen lente cin lana oxila laumar. Efe ina va batyona tanda do cin al tiskiyir voxe va ebava is eba ixam dadir nume ko intyona darefa tirka dimfitir lize va geja ilbulutur ; ise, kadimi cin, lana oxila laumar, i oxila milkafa inde gelkeon tiyiv, i oxila titisa divefa gu cin is divpakudetesa. Tiv mefavlaf tove int. Atritiv ; konaktan zalewetev ; artan trobindatav ise jontiktan en titiv buktaf ; tanda remfitid aze, tere, zertutuv. Vexe rotir, kotafa jinafa trakura anton tir kexuca is burduca, ise batcoba griawitir viele valeve frumba gildeson va lorasa toa gin tigití. Anse bata zijnuca tegulayasa va cinaf fortey, is vollanuca, is guyuca is vanfira ke direkeugal is inafa data gexata, is cwa ke klokereem is neveem, is izakuca, is ayikyafa abdipestalera mea krulded. Anse kota batcoba koe gripokolera is sayakafe tresexe gan tizuca ke gasizara me al zo vanmecobar. Aal batlize tid dem jonukafa sizunta ; voja ke pegenda koe toeem tukerawed. Vawa batakapafa van zida vulted ise diliranisu dum senka va doestuxo felkusid. Ranyá, tí vumeltapaf. Aksat az tanda rotartfid. Va koncoba gu jin mea naritid. Tí antapaf is volpokoles eke me kivason rotemudé. Bli bureyesi va jin remi batyona tanda koe jinaf nubeem isu iteem wan tigir. Kas tiyí felisik va batcoba ? Me grupé. Vexe, liedje batlize tigir, pune va intafa kelda aneyatar, do finera ke bato po tigiso koe jin is kaliso « Jin », oku voldo. In bak saneaksat ke decit-lerd-decem-san-anyuste tanda ve lubeyer, bal afizcek tis aulackaf moe kotaf redjel eke goleks opelon murobayar da talteon me warzaca tiyir. Mo abdunisa taka ve lubeyer, senyes moe sid dumede kenibeyer. Viele zo tubantaweyer, rabatera tiyir da in ape al mejemeyer. Inafa gexata tiyir vumeltafa ise va teca valeuca muxayar da batcoba batinde al tenuleyer. |
| |||||||||||||||||||||||||||||||||||||||
 (Erich Maria Remarque) ← 11-eaf luz - 12-eaf luz - → |
