Stuveem ke Alice koe Zultaxo Luz08
Anyusteaf luz : Vefaxo ke gazikya[modifier]Raltapa rune kolanixo ke matela tigir ; ralte tid batakafe, vexe baroy matelamidusik keron linged. Alice trakur da tir rilitapaca nume illanir enide di disuker, aze bam va kontan kalis gilder : « Obral, Alube ! Va jin batinde me lingbediblal !» « Volins al askí, ~ Alube fredindon kalir ;~ Pere va jin al ladavar. » Nume Pere itamadar aze kalir : « Tire, Alube ! Va artan sobokel !» « Va int lokiewon co-gostival !! ~ Alube kalir. ~ Va Gazikya kalisa da zo co-gotakagabel, darevielon su gildé !» « Tokdume batcoba ?» battan pulviyis kalir. « Batcoba va rin me tikir, Tole !» Pere kalir. « Volgue, batcoba va in tikir, ~ Alube kalir, ~ nume fu givá. Lecen vanburera va brekulay lodam nyorku pu burmotasik tir. » Pere va lingesiki mimar aze toz kalir : « Ae, vanmiae kota memalyaca …» viele disukera mo Alice disukese va sin xuye luber, aze ine levgon vukir. Kot artan dere rwoder, aze kiavapar. « Vay rokalil, ~ Alice vazamon kalir, ~ tokdume va batyone ralte lingel !?» Alube is Pere va mecoba kalid, vexe va Tole disuked. Tole omon toz prejar : « Tire, wil Weltamikya, keraraltekirafa ralta co-govotigir voxe va batakaraltekirafa rokleson al rundav. Ise ede Gazikya co-sonker, pune va cin volmiv di takagaber, gildal. Batdume, Weltamik, rorabatel da cugeke tegiv abdida ina artpir …» Batvulon Alube, kotedje guyon anamdisukeyese vakril matela, divier : « Gazikya ! Gazikya !» nume baroy dodelik kal sid ve piriled. Boralorapar nume Alice rwoder, djuwison va Gazikya. Dicimabures sayakik taneon lanid ; tid bro matelamidusik : abrotcaf is azekaf, dem alavafa nuba isu nuga ; aze sanoy aboyik. Bantan tid dem duzlujor ise bro sayakik toltolon lanid. Kadimeon nazbeikeem ke Gazikya ; sanoy olkoy tid, ise abegikam daavon tesked, ton nuba koe nuba toltolon ; kot va yona takrakoraca diskir. Aze ganenik, nelkon Gazikye is Gazikya, vanlanid, ise Alice va Batakalibol vanmiaon katcalar. In nukonteger ise pulvison nutir perzaf, va kotcoba kalina kicegar aze meobrason va ine pokolanir. Facilik dem Takrakoraxa, bures va sona moe piakofa merna, radimelanir ; aze artelanison va bat ezgaldayap, GAZIKYE DEM TAKRAKORAXA ISU GAZIKYA. Alice grupenser kase dum baroy matelamidusik gopiriler ; vexe me setiker da va pulvira va mana godela konviele al gilder. « Ison va tokcoba ezgalday co-zanar, ~ trakur, ~ ede kottan kal sid gonopiriler enide va sin me rowir. Kle moe intafa runda wan ranyer aze ker. Ba artlanira ke ezgalday lent Alice, kottan vukir nume va ine disuker, aze Gazikya bokson kalir : « Toktan tir ?» Va Facilik dem Takrakoraxa gukoer, vexe battan nemon kiavar ise wetce antafa dulzera kicer. « Kwestik ! ~ volkeon takadimemimason Gazikya kalir ; aze rwodeson van Alice, dakiyir :~ Tok rinaf yolt tir, velya ?» « Jinaf yolt tir Alice, Ilamkapik, » Alice dolapon kalir. Vexe azon trakur : « Sin areldon anton tid liweem. Nume me kivá !!» « Ise toktan bantan tid ?» Gazikya kalir, nedison va baroy matelamidusik senyes aname ralta. Lecen gildal da, larde sin ton vola keve sid tigid ise intaf fum moe ge tir milaf gu tel ke betara liwa ke eruilt, ina me rogruper kase tid matelamidusik ok aboyik ok baroy intaf nazbeik. « Tokkane co-rogrupé ? ~ Alice kalir, akoyene gan intafa takreluca. ~ Batcoba me tir jinafa arienta. » Gazikya zideson turolmukawer, aze konakedje torigiyison kan teykas iteem dum snavol, toz iegar : « Zo takagaber !!» « Anse !» Alice ontinapudon is elvon kalir. Gazikya stivawer. Gazikye va nuba mo inafa ma aykar ise vazon kalir : « Krafial, abegya !! Ine anton tir velik. » Guazikya zideson gerwoder ise pu Facilik kalir : « Va sin dimtacec !!» Kle Facilik kan nuganaav trumapon askir. « Ranyac !!» Gazikya poon is opagon kalir. Baroy matelamidusik ve madagid aze va Gazikye is Gazikya az kot jotaf sersik is kottan toz kiavad. « Tenukec !! ~ Gazikya iegar. ~ Va jin spikonac. » Bam, rwodeson van ralta, dakir : « Va tokcoba batlize askil ?» « Tarkapason, Ilamkapik, ~ Tole dulkapon kalir, aykason va bade mo sid, ~ toz …» « Wirsí ! ~ Gazikya kalir, sure rindeyeson va ralte. ~ Zo takagabed !!» Aze ezgalday va kelda dakir, edje baroy sayakik vadimeon zavzagid enide va baroy kimtaf matelamidusik di klibud, vexe bantan van konendara ke Alice vulted. « Me zo takagabetec !» Alice kalir, nume va sin ko pokef imwakap plekur. Baroy matelamidusik remi tanoya ok toloya wexa ta aneyara kotliz lutced, vexe turkon van arak aulon mallanid. « Kas al zo takagabed ?» Gazikya iegar. « Sinafa taka mea tigid, Ilamkapik !» sayakik dulzeson iegad. « Acke ! ~ Gazikya iegar. ~ Kas croquet gruvefal ?» Sayakik me ewasuked ise va Alice disuked, lecen bibera pu ine tire zo maner. « Gue !» Alice iegar. « Battode, artlanil !!» Gazikya eviegar ; nume Alice, rilitapafe gu grupera va sokitise, va int gu ezgalday zokever. « Reafizon kiewapar !» vazafa puda moneon kalir. Ine poke Batakalibol guyon disukes lanir. « Efe, ~ Alice kalir. ~ Toklize Dacikya tigir ?» « Kay ! kay ! » Batakalibol blion omapudon kalir, wesidon disukeson vamo inafa epita. Aze naavon ranyar, aze va art kev oblaka ke Alice krur aze ewasuker : « Ina al zo awalklanzar. » « Tokdume ?» Alice kalir. « Kas al kalil : “Aje !”? Batakalibol erur. « Volgue, ~ Alice kalir. ~ Maninde vol trakú. Al kalí : “Tokdume ?”» « Ine va oblakeem ke Gazikya tazeyer, » Batakalibol toz kalir. Alice ve kipemer. « Ox ! kay ! ~ Batakalibol kovudanon omon kalir. ~ Gazikya va rin rovogilder ! Ina gavemon al artlanir, wil, aze al kalir …» « Va int korundac !!» Gazikya ediason iegar, nume kottan kotliz toz vulter, va sint ardeotason ; neke artimon kottan moe intafa runda tigir nume etsa bokawer. Alice trakur da va mana rilitapafa croquet vefara meviele al wir. Vefaxo anton tir kotrafo gu bourga is kevbourga ; blis poegol gu fixu zanudad, ise jergol gu bweda. Kot sayakik, badiewepes, va taka is nugeem gogir enide va kotarn sopur. Coba tozion toktesa va Alice tir nubara va jergol ; ine va alto lev intafa ma vrendackon lajuplekur, askison da nugeem rumkawer ; vexe cugviele moida va berga divimpackar ise kan taka va poegol fu tazer, bam jergol va int mucuson madagir aze erinvepenon disuker eke volins ve kalkiper ; azon, viele gire va inafa taka su tuomar aze fu tolyovar, bam wir da poegol va int su gritanamewer aze mallanir. Ison, kona kevbourga oku bourga koe kelda djumukotana ta staksera va poegol kotliz sodigid, ise larde badiewepes sayakik dun madagid enide va vefaxo batliz ok banliz moelanid, Alice zolter da batcoba ape tir volfakapafa vefara. Vefasik miledje kotote vefad, mekeson va silu, va sint kotviele motcason, ise va sint kevalieson enide va tel daditis va poegol gruped. Gazikya fure toz zideper ise toz luojar kipegason : « Va battan takagabec !!» oke « Va bantanya takagabec !!» mon tanon wexeon. Alice toz pester voltrabiangapafe ; tire va Gazikya me al mijer, vexe gruper da batcoba betviele rosokir. « Battode, ~ nuer, ~ tokcoba vanpití ? Batlize sin va korik eafton djukatakagabed. Zo gevá da blisik wan tid !» Va kon otces mergil anameon aneyar, ise nuer kase mewinon co-royater, viele va divulaca koe rid kozwir ; bata awira taneon evodapar, vexe moi dizvera kosmar da tir konejara, nume trakur : « Cheshire Karvol ; batvielu va ropulvimb tisik dikití. » « Tokinde vil ?» Karvol kalir, batvielu um inaf art rovopulvir. Alice ker da iteem awir aze bam non takumar. « Pulvira abdi awira ke oblakeem tir mefavlafa, abdi icle olkoy. » Arti tanoya wexa, varafa taka nediwer, nume Alice va jergol mo sid bam aykar aze va intafa croquet etsa toz pwader, vecanon da kontan gilder. Karvol nutrakur da umeke zo rowir nume mecoba loote awir. « Sin ae meronjon vefad, ~ Alice mevaleon toz kalir, ~ ise va sint motcapad eke metan va int pulvis rogilder ; ison meka vexacka nutir, icle ede vexa tid, pune metan tire tarkar. Ostik gestijil inde kot blis gor ke vefara en tir toktera ; tulon govalevolanin kotarn arte bani vefaxoki gozar, ise kev poegol ke Gazikya va croquet uuk sure co-kirebayá ede, wison va jinaf kevmiman poegol, in me al otceyer !» « Kas va Gazikya albal ?» Karvol omapudon kalir. « Volgue, ~ Alice kalir. ~ Ina lanerser … ~ Miledje va riwe kakeon Gazikya malterektasa kozwir, nume dakir :~ lanerser da fu war, eke va etsa me gonotenuket. » Gazikya kicer aze volvukir. « Do toktan ae prilal ?» Gazikye kalir, vanlanison va Alice is rilitapon disukeson va taka ke Karvol. « In tir tan jinaf nik, Cheshire Karvol, ~ Alice kalir. ~ Novel da atoé. » « Va inafa siva vol albá, ~ Gazikye kalir. ~ Wori, in va jinafa nuba rokutcar, ede djumer. » « Me, rotison » Karvol bazer. « Me til eskarnaf, ~ Gazikye kalir, ~ ise va jin batinde me disukel !!» Va int rundayason kadim Alice is tiyason va batyona ewa. « Kon karvol va kon gazik soronodisuker, ~ Alice kalir. ~ Va batcoba kou neva al belí, vexe mea setiké lizu. » « Kle, batcoba zo gosular, ~ Gazikye elvapon kalir aze pu Gazikya batedje pokolanisa iegar :~ Abegya, co-djumé da va bat karvol volmiv deswal !» Gazikya va tanoy bask ta maera va arge sodadir, va argepe ok argeme. « Zo takagaber !!» dace me rwodeson kalir. « Va klibusik miv kevlaní !!» Gazikye wiluon kalir, nume ve mallanir. Alice trakur da co-godimlanir enide di wir liz etsa artfir, lecen va zideriesa puda ke Gazikya sumuon gilder. Va ina lanzasa va korisayas vefasik gu takagabera ixam baron al gilder, nume va bata dilizerinda vol albar, larde vefara tir gojapafa eke va intafu silu meviele gruper. Bam va intaf poegol toz aneyar. Bat poegol va ar kevalier ; batcoba nutir katectanya ta croquet kebara kan bat kev ar. Vexe argeme ta askira tir : inaf jergol va bani matelaki al artlanir lize Alice va in giopon lasutictalas is lasuwanes mo aal rowir. Moida va jergol al vebidur ise al dimjupar, meld tenukeyer aze toloy poegol al griawid. « Loxe, ~ Alice kalir, ~ larde kot kotarn va bani preimaki al bulur. » Numon va jergol lev ma dimplekur enide in mea yateter, aze ta prilarama do intaf nik gire kevlanir. Dimvanlanison va Cheshire Karvol, zo akoyer ise va taripi aname in kosmar : fliderapa dem klibusik is Gazikye is Gazikya dilizer, ise bat sin ant belcon pulvid edje kot bantan va int guamlitar ise nutir voltrabiangapaf. Ba awira ke Alice, baroy rozad enide ine va uum di gorar, ise va intyona dusiva tolkalid. Larde kot miledje pulvid, flecupur da va kalikseem gildar. Dusiara ke klibusik tir : taka me zo rogaber vaxede alto beneon sotigir ; ise va mancoba meviele abdion al askir, nume ba bata intafa klaa me fu tozur. Dusiara ke Gazikye tir : kota xa dem taka zo rotakagaber, ise freiskaca me zo gokalir. Dusiara ke Gazikya tir : ede uum fure me zo co-maer, pune ina va rowin kottan volmiv di co-takagaber. ( Bat ironokaf dizveks va kot korik al tugorestapar ise al tuguyapar. ) Alice, kabe arcoba, opelon kalir : « In va Dacikya pasur. Va ina guon co-gorupec !!» « Ina koe flint tigir, ~ Gazikya pu klibusik kalir. ~ Batliz zo vanstar !!» Nume klibusik dum tceka malvulter. Taka ke Karvol toz griawir vielu klibusik al bulur, azon varon al askir viele in do Dacikya dimpir ; numon ta trasira va bata taka Gazikye is klibusik bro oviskik kotlizo toz vulted edje arak ke tigisikeem ta gire vefara mallanir. |
    | |||||||||||||||||||||||||||||||||||||||
 (Lewis Carroll) ← 7-eaf luz - 8-eaf luz - 9-eaf luz → |
