Stuveem ke Alice koe Zultaxo Luz05
Alubeaf luz : Pirdara ke goma[modifier]Goma is Alice va sint abicedje amliton dizved. Adim Goma va nargile plo gu art divplekur, aze va ine ton kenibesa is impadimawesa puda gukoer. « Toktan til ?» Goma kalir. Batcoba me tir koldarinda ta bokara va prilara. Alice gojamafe dulzer : « Jin (~ dure miv grupensé ~), grupé dan regazdon divmodeson tiyí voxe folí da batvielu yonviele al betawé. » « Va tokcoba batkane sugdalal ? ~ Goma boksakomon kalir. ~ Pebuckul !!» « Miv me ropebú, kivá, ~ Alice kalir, ~ kire me tí int, efe, wil. » « Me rabaté, » Goma kalir. « Kivá da lodafton me rokalí, ~ Alice dolapon dulzavar, ~ kire va mecoba taneon miv gildá : laumara az vollaumara jontikviele bad tanoy viel, mancoba selekapar. » « Me, volgue, » Goma kalir. « Rotir men al vofal, ~ Alice kalir, ~ voxe viele vanpitil bordoc, kire batinde titil, tire, az bord, tce pestetel abigamaf, mex ?» « Volgue !» Goma kalir. « Rinaf pestabeem rotir tir amidaf, ~ Alice kalir. ~ Va kotcoba grupé : batcoba sedme jin co nutir abigafa. » « Rin ! ~ Goma vliguson kalir. ~ Toktan til, rin ?» Batcoba va sin gu toza ke prilara dimvanstar. Alice gan yona gabesa katcalara ke Goma zo nugemer nume madagipir aze gorestapon kalir : « Arse taneon co gokalil datan rin til. » « Tokdume ?» Goma kalir. Batcoba tir ara toktepesa bibera ; nume larde Alice va meka gozilina lazavacka trasir ise Goma nutir enaflicejesa, ine rwoder aze illanir. « Dimlanil ! ~ Goma iegar. ~ Va zolonaca pu rin gokalí !» Ganera tir waltenyesa, tire. Alice dimlanir. « Me perlel !!» Goma kalir. « Kotcoba ?» Alice kalir, cugeke tuzijnason va dulzavara. « Me, » Goma kalir. Alice trakur da efe co goker kire va betcoba me gonaskir, nume ina va favlaca rotir kalitir. Konakwexon wan vikizar, mekalison, azon adim volmagamdar aze va nargile plo gu art deswar aze kalir : « Kle gestil da al betawel, mex ?» « Trakú ise kivá, weltik, ~ Alice kalir. ~ Va betcoba dum lekeon mea rosetiké, ise va mile rane remi sanoya wexa somevidé !» « Va tokyona coba me rosetikel ?» Goma kalir. « Ae, va “ How doth the little busy bee ” kuda al lakareizú, voxen kotcoba tiyir amidafa !» Alice nigeson dulzer. « Gire kalil : “ Til guazaf, William gadik, ”» Goma kalir. Alice nubagamdar aze bokar : Ise rinaf usuk re tir batakaf ; Ise cugviele moe taka tigil. Kas manklaon kiewaca tir ?» « Ugale tiyí jotaf, ~ William gadik pu nazbeik dulzavar, ~ Kivapayá da va kerava di dasayá ; Voxe re lané : vaon me dí, Batdume askí ise dun askí. » « Til guazaf, ~ jotik kalir, ~ inde su miwá, Ise al tupwertawersel ; Nume rem tuvel tramkedal. Benje ! Tokdume mancoba ?» « Viele tiyí jotaf, ~ proyik kalir, zekason va lukoptaf usukodeem, ~ Waleniskayeem tiyir plaxaf, Uneson va gruwa ( bor vas tanoy shilling tal ), Kas novel da va tola pu rin dolé ?» « Til guazaf, ~ jotik kalir, ~ ise rinaf talgeem tir axaf ; Koncoba olgafa loon dam sum ; Va goyol don niskeem is oral tenukeyel ; Kalil, tokkane ta askira nartel ?» « Viele tiyí jotaf, ~ gadik kalir, ~ icde mwa xodiayá, Va kurenik kottode mijeyé ; Aze remi blira reltafo po Va prijustap pu jin askiyir. » « Til guazaf, ~ jotik kalir, ~ kontan riwe co levaykar Da rinafa ita tiyir cugeke acafa, Va serpega arte pez madayal, Tokcoba va rin maneke tudeksar ?» « Icde baroya bibera al dulzé, ise batcoba tir umafa, Ten tivul !~ Gadik kalir. Kas trakul da va mana uga vielcekon rogildé ? Ten, oke va rin tid fogelom platí !»</poem>« Batcoba me tir malyafa, » Goma kalir. « Me koton, kivá, ~ Alice vazon kalir. ~ Jontik ravlem al zo roataled. » « Batcoba tozatenon tir rotafa, » Goma elvon kalir ; azon amlit remi yona wexa dilizer. Goma taneon kalir. « Va toke rane djumel ?» erur. « Ox ! Me tí elvaf gu rane, ~ Alice blion dulzavar ;~ voxen metan lion fereon sodjubetawer. Grupel. » « Me gildá, » Goma kalir. Alice stivawer ; batvieli metan va ine maninde al kevkalir nume pester da fu nyatewer. « Kas re zo keldaskir » Goma kalir. « Co djukatí loon ontinamaf, tire, ~ Alice kalir. ~ Baroye arekte tid kipeafe rane. » « Batcoba tir ranecke !» Goma zideson kalir, cugeke volapcason. ( Ine tickir vas baroye arekte ). « Voxen, men giltí !» kimtafe Alice seitakomon dulzavar. Aze trakur : « Co djumé da bat tisik co tid viwoyansaf. » « Giltavetel, » Goma kalir, aze ko art va nargile plo plekur nume gire toz vikizar. Batviele Alice keon ker vieli ina toz pulvir. Arti tanoya ok toloya wexa, Goma va plo divartar, aze tanon ok tolon wirkar, aze va int botcer. Bam va nyul ticulanir, ko preima kilder, aze mallanison opelon kalir : « Bat kril va rin laumasitir, voxen ban vol. » « Bat kril ke tokcoba, ban ke tokcoba ?» Alice trakur. « Ke nyul, » Goma kalir dumede Alice ontinapudon al erur ; moion Goma al griawir. Alice va nyul trakuson nyasemer, ladiepileson va toloy tis kril ; ise larde nyul tir anamkackaf, krupter da uum tir toktepes. Adim cugeke anamon masotcer, aze kan kota nuba va kimi ke doma ke nyul solimpar. « Dure, toktol ?» pu int kalir, aze va lip ke ronenuba fafigemer enide va keska di rabater. Voxe lev itowa vere tizon zo vordavar ; ini va inafa nuga su dendar ! Ine gan bata levgafa betara zo kovudapar, voxe gildar da va ugal me godrasur kire kalion vollaumar. Kle va ban lip kalion toz estumur. Inafa itowa tir poke nuga maneke darka ta artfenkura tir biwe uma. Ine adim lajufenkur aze kan taltenuga va lipam lajufixar. « Adim, jinafa taka tir nuyafa !» Alice daavakomon kalir abdida zideson ier, vofason va gracara ke intaf epiteem. Xowason is ticon disukeson, va teniskafa bergapa numadawesa dum colk tic valeveon bira dem kusafa toa anton rowir. « Tokcoba bat kusaf toeem rotir ? ~ Alice kalir. ~ Voxen toklize jinaf epiteem tir ? Ox ! jinaf kimtaf nubeem, tokinde me rowí ? Pulvison, ine nubazekar voxe va lizirama sumeon vanmiae kusaf toeem anton daskir. Larde va mergil rodefuzas va taka gu nuba me trasir, pune va nuba gu taka laguzar nume daavon vofar da berga dum perake drikon kotliz askarar. Ton kaf beetc biwe su soar aze, vanmia toeem tadleckes va ontinuk ke aala valeveon lize al kraber, fu estobar, viele golde vucafa azdara wiluon gonodimelanir : dirbekopo va inafa vola su vantalar ise va ine wiltapar. « Perake !» Dirbeko iegar. « Me tí perake ! ~ Alice panon kalir. ~ Me kostrul djay ‼» « Perake, gire ruyé ! ~ Dirbeko gire kalir, vox ton lozijnaf kom ; azon buwejamason loplekur :~ Kotkane al sugá voxen mecoba va mane nukeldaskir !» « Va rinaf sugdalaks vol gildá, » Alice kalir. « Va aalzae al lwí, va manni al lwí, va gleida al lwí, ~ meobrason va ine, Dirbeko wan kalir. ~ Voxen kone perake mekane zo sokeldaskir !» Alice loloon zo evodar, voxe trakur da va kona kalira me gozegar abdida Dirbeko di ten pulvir. « Osk va atocwara soflecú, ~ Dirbeko kalir, ~ voxosk va bete perake kotafizcekon is kotmielcekon gonopitcá ! Nume mali baroya safta me al itabudé !» « Al zo olyastel numen zo argé, » Alice kalir, toz gildason. « Viele va tel lodontinaf aal ke mikaci su kiblayá, ~ Dirbeko dakir, tupoason va puda kali riwe iera, ~ kle viele guzekayá da fure di tiyí aulaf gu sine, bam ticu kelt jontike mucudaweson lubed ! Ugux ! Perake !» « Voxen, jin me tí perake, ruyé ! ~ Alice kalir. ~ Tí … Tí …» « Ae ! Tokcoba til ? ~ Dirbeko kalir. ~ Wí da va koncoba laredul !» « Tí … tí velikya, » Alice kalir, klibumuson kire va ota ke revielon levgana betara setiker. « Rupa ageltodansafa ! ~ Dirbeko kan vligupus kom kalir. ~ Remi jinafe sare va jontika velikya al wí vox meviele va kona dem mana berga ! Me, arse ! Til perake ; numen meura tir mefavlafa. Tce fu kalil da va ato meviele al estul !» « Volgue, al estú, tire, ~ Alice kalir, me grurotuxase ;~ voxen grupel da velikya va ato lidam perake sokestur. » « Anse, ~ Dirbeko kalir, ~ voxen ede batcoba tir ageltafa, pune ina tir perakeinda, tire. » Batcoba tir warzafa rieta, batdume bak tanoya ok toloya wexa Alice guamlitar, nume berde Dirbeko loplekur : « Va ato aneyal, batcoba va jin staper. Acum vol nué kase til velik ok perake, mex ?» « Batcoba va jin me staper, ~ Alice blion kalir ;~ voxen tire va ato me aneyá, voxe kore co aneyá, pune va rinafo me co djumé ; va zakafo ato somealbá. » « Battode ! mallanil !» Dirbeko druson kalir edje va int ko begama dimplekur. Alice vanmia aal lorotison anjer, va int omason. Berga va gama az gama volins tanameyar, numen kotviele ine govukir aze griaskir. Vanion, setiker da koe nubeem va lipeem ke nyul wan gir, nume skudapason bokar, fafigeson va ont tan ont ar, is ont laumason ont vol, vieli va tuwavafe rane adim lajudimtrasir. Jontikedje al mea tir vas ranecke, acum batcoba taneon nutir atedafa voxe ine tere giltir aze dum gubeon pu int toz pulvir. « Tetce, lik ke jinaf azed re tir skuyun. Kotbata betara tid toktesa ! Meviele lané inde arti tanoya ok toloya wexa fu vanpí ! Soe, dimon tí vas ranecke ; dure va bata cuisafa matela golaní. Tokkane gonaskí ?» Kalison va batcoba, va senta vere artlanir lize mona ontinafa vas mon balemoye arekte tigir. « Bettan batlize irubad, ~ Alice trakur, ~ va int vas bate rane me gonatoé : va sin co kovudapá !» Acum va lip gin koe ronenuba gire toz fafiger ise va mona me laxuvanlanir vieli kal lerdoye arekte va int di vollaumasir. |
     | |||||||||||||||||||||||||||||||||||||||
 (Lewis Carroll) ← 4-eaf luz - 5-eaf luz - 6-eaf luz → |
