NyagaceemScapin Nakileem02 Nakila03
Toleaf nakileem, bareafa nakila[modifier]Léandre : Va jin batinde levcoel ! Facilik jontikdume co-gotis taneaf da va jinafa odiaca preyutar, tir tel askis da jinafe gadikye kosmar. Ax ! va kelt vogá da bata relmera me zavzatar meestena ! Octave : Abegaf Scapin, pu rin maneke danú ! Til mafelik ! Ise stakseson va rin ta grelera va jin, kelt en tir fikuntaf gu jin ! Léandre : Ax, ax ! Rin batliz. Tí valeaf da va rin trasí, facilik weltik ! Scapin : Weltik, rinaf zanisik. Va poraca pu jin askirsil. Léandre, ~ plekuson va nuba ben dug ~: Rin va ikoraf krandesik zirsel. Ax ! Pu rin fu tavé… Scapin, ~ badeson ~: Weltik. Octave, ~ wal kottol va int rundason enide tatcer da Léandre tazer ~: Ax ! Léandre. Léandre : Me, Octave, va jin me kagil, djay ! Scapin : Ex ! Weltik. Octave, ~ va in kagison ~ : En vay ! Léandre, ~ djutazese va Scapin ~: Iskel da va vidjera karlé ! Octave : Yolton gu nuca, Léandre, va in me askipejel ! Scapin : Weltik, va tokcoba pu rin al askí ? Léandre, ~ va in djutazese ~: Va tokcoba pu jin al askil, zatkik ? Octave, ~ va in kagison ~: Ex ! Aulon. Léandre : Me, Octave, djumé da in va yotaca kev jin fure miv movur. En, facilik, va rinafa randayera grupé, su zo kocenká ; ise ape me foliyil da bata birga pu jin zo co-razdur ; vexe va movura gan miv rin kuraní, edeme rem alto va rin dugatá. Scapin : Ax ! Weltik, va mancoba co-askil ? Léandre : Pulvil, bam ! Scapin : Kas va koncoba pu rin al askí, weltik ? Léandre : En, facilik, ise rinafa jiluca va coba pu rin kalirsir. Scapin : Me grupé, efe. Léandre, ~ abdulanison ta da tazer ~ : Me grupel ! Octave, ~ va in kagison ~: Léandre. Scapin : Ex bam ! Weltik, larde djumel, pu rin movú da jin do yon nik va bat miluntam dem Espana vor al ulí, va bat vor pu rin konakvielu bundayan ; ise va milunt al ludzé aze va lava al anamgimá, enide kottan folir da vor al yateyer. Léandre : Rin, drendik, va jinaf Espana vor al ulil ise golde rin va zanisikya kornapayá, folison da in al randayeyer ? Scapin : En, weltik : pu rin ixedá. Léandre : Tí valeapaf gu ravera va batcoba ; vexe me tir dure icdeaca. Scapin : Me tir batcoba, weltik ? Léandre : Me : tir arcoba va jin loon icdesa, nume kuraní da kalil. Scapin : Weltik, me setiké da va arcoba al askí. Léandre, ~ va in djutazese ~: Me djupulvil ? Scapin : Ex ! Octave, ~ va in kagison ~: Aulon. Scapin : En, weltik, ageltafa da weti baroy aksat va jin lansielon stakseyel enide va trulama pu renana jotafa misrikya di bureyé. Viele va oga dimpiyí, jinaf vageeem tiyir diblakirapaf ise gexata forteykirapafa, nume pu rin kaliyí da va dubiesik al kakeveyé, va dubiesik va jin alieyes is va trula faluyus. Jin, weltik, va trula al levdubieyé. Léandre : Rin, va jinafa trula al levdubiel ? Scapin : En, weltik, enide va tis bartiv rowí. Léandre : Ax, ax ! Jin va mancoba batlize ravé ise va sagapaf zanisik en dikí. Vexe me ware tir jinon eruna batcoba. Scapin : Me batcoba ? Léandre : Me, krizik : kuraní da va arcoba movul. Scapin : Ax ! Léandre : Kalion kalil ! tí soriaf. Scapin : Weltik, anton tir jinaf askiks. Léandre, ~ va Scapin djutazese ~: Kotcoba ? Octave, ~ va int kabduon rundason ~: Ex ! Scapin : Kle ! En, weltik. Kas va bat idatcolik setikel, weti tandacku, dan va rin lanmielon peyapayar ise, lubesison ko fuk bak otcera, va rinafa berga folempayar ? Léandre : Ex bam ? Scapin : Jin tiyí, weltik, tel zirses va idatcolik. Léandre : Rin tiyil, zatkik, tel zirses va idatcolik ? Scapin : En, weltik, anton enide pu rin tuvudá ise askí da mea kuraní da min kotmielon trubat, dum al givebayal. Léandre : Va bat taveks kotviele is kottode setiketé ! Vexe va askiks djumuzá ise va rinaf kaliks pu jinafe gadikye pu jin movul. Scapin : Pu rinafe gadikye ? Léandre : En, rotuxasik, pu jinafe gadikye. Scapin : Mali inafa dimpira, jin dace me al wí. Léandre : Me al wil ? Scapin : Gue, weltik. Léandre : En ? Scapin : En. Fu askí da ine va batcoba pu rin miv kalitir. Léandre : Neke vey ine va batcoba dagí. Scapin : Tire, ine meagelton al kalir. |
| |||||||||||||||||||||||||||||||||||||||
 Toleaf nakileem |
