NyagaceemScapin Nakileem01 Nakila04
Taneaf nakileem, balemeafa nakila[modifier]Argante : Kontan va mana miltafa tegira ixam al gilder ? Scapin : In va arienta ixam al vangruper, ise ganon zo sikapburar maneke vaon poon pulvir. Argante : In manon tir rulokapaf ! Scapin : Va in gildemet. Argante : Va coba rokalitina icde bata kureranya co-djugrupé. Scapin : Va batcoba al trakut. Argante : Kas va meura va coba yawatad ? Scapin : Me, me vaon trakut. Argante : Oke va skalera yovatad ? Scapin : Va batcoba, rotitir. Argante : Kas va coera va jin krenjason lwitid ? Scapin : Rotir. Argante : Kotaf rinaf dewitceem titir mefavlaf. Scapin : Fu wit. Argante : Va mecoba nyurnatá. Scapin : Va mecoba vogal. Argante : Va jinaf randayejes nazbeik konendatá. Scapin : Va batcoba namyetet. Argante : Ise Silvestre facilik, va in vordavapá. Silvestre : Zo co-gevá ede in va jin al co-vulkur. Argante : Ax, ax ! Batse rin, proyaf yasagadesik, bowenyesik va yikeem. Scapin : Weltik, tolwison va dimpis rin zo felbé. Argante : Va Scapin kiavá : va jinaf dirgareem en maninde al tarkal, nume bak jinafa metigira nazbeikye al linular proyackaf. Scapin : Vickil, rabaté ? Argante : Vimí. ~ Pu Silvestre :~ Va mecoba kalil, facilik, va mecoba. Scapin : Rinafa koyara al tir kiewafa ? Argante : Lorik ! Kiewapafa. Iskel da aulon motcamá. Scapin : Djumotcal ? Argante : Gue, djumotcá. Scapin : Va toktel, weltik ? Argante : Va bat facilik. Scapin : Tokdume ? Argante : Va coba sokisa viele tiyí gracaf me al gildel ? Scapin : Va abiccoba al gildecké. Argante : Tokon abiccoba ?! Mana tegira ! Scapin : Ovemel. Argante : Mana laoaca ? Scapin : Ageltafa. Argante : Nazbeikye kurese nekev mefinera ke intafe gadikye ? Scapin : En koncoba icdeon zo rokalir. Vexe co-boyá da me goniyeptal. Argante : Me batinde boyá, jin, nume en djumiyeptapá. Va tokcoba ? Me kruptel da va koti zidesi vrati dadí ? Scapin : Gue. Viele va coba al grupé, dere al boyá, aze, tori rin, va rinaf nazbeik motcason al dulapé. Pu in va tel jinyon vorceks erul ise da icde acafa tarkara va gadikye ke dane in va bora co- gokutcar va in al codá ? Lokiewafa pulvira pu in me rotir, kore co-askil. Vexe en ? Al dostecké nume al krupté da, rigon, in me kiover lidame co-rofolit. Argante : Va tokcoba pu jin pwadel ? Cwade kureson va megrupenikya in me kioveper ? Scapin : Va tokcoba rokalil ? Bali va in al kalplatir. Argante : Ax, ax ! Batse tana lolistafa lazava ke tamava. Rogestanon rogomilat, coet, dubiet ise skaleweson kalit da bali al kalplatir ! Scapin : Lorik ! Ton trakopik va jinafa pulvira narursul. Sugdalá da in va bata arienta balion al zo- kofir. Argante : Voxe tokdume vaon al kofiyir ? Scapin : Djumel da in tir proyaf loon dam rin ? Yik sotir jotaf ise me xeyaf lion dam gotir ovakiraf : tula, minafe Léandre dane, nekev kot jinaf tavereem, ware roton al askir loon dam rinaf nazbeik. Co- djugrupecké ede rin me al til jotaf ise bro artan bansareon va yona bonaca me askiyil. Al gildé, jin, da lekeon tiyil dositik vanmiae ayikyeem ise da va yona bansarefa durimikya fiaeyer ise da va kota arton onkayal. Argante : Batcoba tir ageltafa, dotrakú ; vexe kotviele al tí durimanyaf ise me al askí bateke in al askir. Scapin : Va tokcoba djumeyel da in di askiyir ? In al wir va jotikya torion djumesa va kiewe ( kire vey rin tir battel renan gan kota ayikya ). Krupter da in mempes. Va in worar ise agralon dokalir ise durimon repaler ise linular skewes. Inya pu in kaldunur. In va fala platir. Voxe batse gan inaf gadikeem doon zo onser, podratceson steges da in va inya gokurer. Silvestre : Batse deksaf nyagik ! Scapin : Kas co-djumeyel da in iskeyer da zo atayar ? Kurera lodam awalkera vodar. Argante : Arienta pu jin me batinde al zo negar. Scapin : Pu in kre erul : in pu rin me volson kalitir. Argante : In al stegevanon kureyer ? Silvestre : Gue, weltik. Scapin : Kas pu rin co-djurotuxá ? Argante : In ko tegivsutesik va tizuca davon co-gokevotceyer. Scapin : Va batcoba me al djumaskir. Argante : Batcoba pu jin ta kurerajoara va drikuca loon co-ziliyir. Scapin : Joara va bata kurera ! Argante : En. Scapin : Me joatal. Argante : Me joatá ? Scapin : Me. Argante : Tokon ? Kas va gadarokeem me dadil ? Ise kev tizuca dolge nazbeik va dimkurera me seotatá ? Scapin : In va batcoba me dotrakutur. Argante : Me dotrakutur ? Scapin : Me. Argante : Jinaf nazbeik ? Scapin : Rinaf nazbeik. Djumel da in mover da tiyir kivas ise va batcoba stegevanon al askir ? Va mancoba vol ebler da welidar. Batcoba va int co-kiovar linulason volbagaliaf gu man gadik rin. Argante : Va batcoba sí. Scapin : Fiste, ta inafa poruca isu rinafa, da in koe widava kalir da va inya eron al kurer. Argante : Voxe, jin, kuraní, ta intafa poruca isu inafa, da volson kalir. Scapin : Me, lané da in me askitir. Argante : Va in en vebatá. Scapin : In me askitir, pu rin kalí. Argante : En askitir, edeme va in baskonoleté. Scapin : Rin ? Argante : Jin. Scapin : Ae. Argante : Tokinde, ae ? Scapin : Va in me baskonoletel. Argante : Va in me baskonoleté ? Scapin : Me. Argante : Me ? Scapin : Me. Argante : Tetce ! Atedafa : va nazbeik me baskonoleté. Scapin : Me, pu rin kalí. Argante : Toktan va jin weyonatar ? Scapin : Miv rin. Argante : Jin ? Scapin : En. Me titil manon nuedajaf. Argante : En tití. Scapin : Krandel. Argante : Me krandé. Scapin : Gadafa krenuguca askickitir. Argante : Va mecoba askitir. Scapin : En, en. Argante : Pu rin kalí da batcoba titir. Scapin : Grewej. Argante : Va grewej me gokalil. Scapin : Lorik ! Va rin grupé, til vonackaf. Argante : Me tí vonaf vols ikoraf viele kuraní. Va bata viskzunesa dewitca tenut. Bulul, facilik, va jinaf nazbeikaj kevlanil edje va Géronte jiomaik kevlanití aze va jinafa volporaca di pwadeté. Scapin : Weltik, ede ta koncoba rotí favlaf, va jin dirgal ! Argante : Va rin grewá. Ax ! Tokdume in tir tanafe nazbeikye ! Ise da re me tir nazbeikya deswayana gan kelt, dana co-tir jinaf konolesik ! |
| |||||||||||||||||||||||||||||||||||||||
 Taneaf nakileem |
