Kudeem ke Aisopos : Vakol
Vakol dem kirma[modifier]Vakol yoton gibugdar. Feliik va kirma ta bazera pu kottan guon rumkar. Okie, in, botceson va kirma, moe viga linular mupuskasik. Guazafa vakolya kalir : « Tokdume gelangul ? Va mana kirma diskil, me kir rinafa ceakuca vols efe rankera va faigoyafa trukuca. » Mupuskareem ke fuglasik va birgafa ikoruca sogurowinackar.
Lyumaraf vakol is yon vakol[modifier]Lan vakol, sinkan dene mona, ta lyumara va snavol zo viklur. Lanvielon va jontik moe tanoya ema wir nume va bergaflek empar aze xuyavon gu nudeem otcer. Ar vakol, wison va in gijarotif dum jaftolye, kalid : « Tokdume otcel ?» Dulzer : « Grupecké da trabiangon blí ise va kota daniaskira va uvvona seotá, vexe lyumason va rupol ik krapol poke awalk sotigí. » Nume vakol pu sint kalid : « Va kiewafa nek copafa blira dikit, me lyumason va krapol ik rupol. » Ta sinkapa ik giopafa aliuca, kontan va wupe gu int somevanimpar voxe sogotaruter.
Kenibes vakol is idatcol[modifier]Vakol kabdue diel keniber. Idatcol iper nume fu estur, viele vakol ve bliker da me vere zo vikear : « Re, ~ kalir, ~ tí tiguaf is wiputaf ; vexe kemel !! Jinaf feliik fu vidiafiptar ; dere jin estuputú, tusudaweté nume tití loplinafa estura ke rin. » Idatcol va in folir nume mallanir. Vanion tollanir aze va vakol kenibes koe ontinafa olkoba ke mona trasir ; tidon vukir aze rozar, tolkalison va sintafa agvava. Bam vakol : « Ey idatcol, ~ kalir, ~ ede batvielu va jin kenibes kabdue diel co-wil, pune va vidia mea kel !!» Bata kuda nedir da pestorik, viele va int gu lane wupe al divplekur, pune remi blira guon sokonendar.
Ganen vakol, okon Ayik is vakol[modifier]Ayik ta ganera va tan yastaf nik va sielestura egar. Inaf vakol va ar ganer. « Nik, ~ kalir, ~ do jin batliz vay pil aze estul !!» Ganenik daavapaf artlanir, aze disukeson va sielesturapa vukir, koeon prejason : « Ox ! man meken ervay mu jin ! Fu estursú ise fu volaelesir inde direvielon mea aeleté. » Edje batinde trakur, aultzekason, dum nik va nik dirnur, burmotasik wison va in anamaneyas, ben inieem narir aze rem dilk ve malmimar. Nume vakol kizoyuson mallanir. Moe kelda va aryon vakol kakever ; tan erur : « Tokkane al sielestul, nik ?» In dulzer : « Al ulirsí maneke al tugrijawé, ise dace me grupé lizu al divlaní. » Bata kuda nedir da kontan vanyes disaf gu kiewega ke artan zo somedirnur.
Vakol is atelonyik[modifier]Vakol, ipeyes ko atelonya va tanoya takra divnarir edje atelonyik kobar, aze in otcer. Atelonyik rwoder nume va in otces wir, diviegar : « Rin, en grupel da kotlize tigitil, va rin kevdisuketel : lecen va takra ke jin me al naril voxe pu jin vaon volson al zilil. » Bata kuda nedir da konakviele walta tir tavera pu ayik.
Vakol is wilye is bresitol[modifier]Vakol is wilye dositason koyad. Lansielon, wilye va aal ta kenibera ticlanir, edje vakol tit mil suxaf senyar. Okie wilye, giltison dankayason abdi afiz, bresitol gilder aze vanvulter aze, vukison tit aal, bliker da in van int ticlanir ; kire va sulem dis va mana listafa puda djudablur. Wilye kalir da in va tuvelsusik kenibes tite aal taneon godivmodar : nume in moi fenkura fu co-titlanir. Bam edje bresitol pu tuvelsusik lapulvir, vakol levgon welver aze va in gosar. Bata kuda nedir da pestorik, viele volnik dilfur, vodjuson van kon lopof va in rester.
Vakol is kuldoy[modifier]Vakol gifixas va ato, wison va kuldoy, garizafenkur nume tizon budeson va prijusteem, dojeson gu ato va in fixar. Vexe inafa uvoona tugamiawer, pune in rotur nume kalir : « Batse jinaf riweks, larde va kota anamkafa xa gu ato al dojé. » Bata kuda taver da kontan mesoltrakuson bokas va arienta ko divulafe tokte volins flatcer.
Vakol is libakol[modifier]Tcabanes vakol, ebiduyuson va libakol, va in dile bugdar oke va inaf kutceem friner. Libakol nodraf kalir : « Ex ! rin ! ten bugdal oke ten kutcal ! enide grupé kase til volnik ok nik. Bata kuda va tolpestik gukoer.
Vakol bures va atela[modifier]Vakol gis va atelaki va kuksa rempujer. Kozwiyison va intafa izga moe lava, folir da ar vakol gis va lopwertafi atelaki tigir. Acum, divgison va intafi, iper enide va teli ke bantan di konarir. Vexe maletiks tir da va bati mei bani me seotar : bani dive intafa inia tigir larde dace me krulder ; ise bati larde gan rust al zo guoter. Bata kuda va gojesik gukoer.
Vakol onkas va krapol is bresitol[modifier]Tcabanes vakol, kozwiyison va krapol, toz onkar. Vexe krapol rwoder ise toz ier. Acum vakol ve vuder nume dimevulter. Bresitol va in wir aze kalir : « Olkikaj, va krapol onkayar voxe va inafa iera me grutcizal. » Bata kuda, icde abdiwesik kevpulvis va logijarotiik vox vere otces viele bantan va taka nedir, zo co-ropwader.
Yon aeles vakol[modifier]Aeles vakol va yona alma perdoewesa koe kuksa wid. Kire me rozomed, volant gorad da va kotrafa lava fu ulid nume va alma batinde artlanitid. Vexe dun ulid nume tire xonukad abdida va beta alma rozomed. Tire, lan ayik, djupokimpavantason, va int gu wupefa kobara levplekud nume eglud abdida va intaf jugemeks rotuzad.
Vakol fineyes va idatcol[modifier]Idatcol pu vakol kalir : « Tokdume, larde til kotinde oltavaf gu cin, me gildul, dum berik ? Larde tiv meinde araf, rade trak. Cin, nuyon sobliv ; rin, levplekun gu ayik isu levetiraf, va vordava guon sokekel, va flek solevgal, va milkava sokikasul ; ise viele rinaf feliik estur, va kona niska pu rin anton kabur. Vexe va cin folil ; va milkava zurtel aze volant plekutuv enide vol aelesitit. » Vakol va bata dragera malterektar ; aze idatcol, kolanison va namulolsuxe, va vakol taneon laridagabed. Kuba kazawana gan relmesik va guga sotir mana. |
 ← Vakol - Okol - Razamey → |
