Don Diliodaf Bost Luz04
Taneafa neva, taneaf pak, balemeaf luz[modifier]Moni siel, xefto larbudayar. Bertraf rujod va wida artniyir. Don bost, broen gan suka, mo domegeem va yona soriafa is skaelafa runta. Kadime matelaxo, rodafa koafima va kelt anteyayad ise riafa ediara va sid seluyud. Vleve rujod, turci anametalayar, ton vokeyen wilteem, ise razama razamieson radimetalayad. Rujod, divdaakeson va fent, va bost taltuon kenoniyir. Kadime omafo werdxo, kelt tuorikaweyer ise tudratcesaweyer, rijust keyer ise stivaweyer. Koe wida, telvung zo ermitayad, guazikya mal sielmista kerujon is gamdasugdason dimlaniyid, moe viga briva dem lukoptafa gopa stibuskayar ise ixam idulanyana tawa va taneaf muvarolk dum faytawey kazawayar. Dunyacka, tustutesason va tronkeem, va kusk ve remvulteyer aze va tuvel ke wilxo ve ermitayar aze iste kusk azavzaweyer, ton pezolkeem warlan dum okol kabdue vakor. Rumeik, koe nuda, tiyid bakestaf. Anyustdaf vegungikam, Micka, tannimaton kurdas, bangeyer. Gijarsaf atsot ke gadikye moe taka anameniyir ise va iteem titniyir. In wiliedayar :
Besason lanitiv Ta blikera va Gadalorik Is Krist nazbeik.
Koe zeria, furovesa Gricka is gadikye, va tanamenafa donapa divilputayad. – Va wesaf fem is veelap, kalion ! ~ Grigori pu Dunyacka ieyer. Burmotaxo ve zo artafiyir. Darya debanyayar aze va dona toz gampeyer. Guazafa gadikya kovdason va velik puskaceyer : – Rin, Gadye, kotviele al tir taneaf ta mana redura. Kre fu co-gokenibec, tolna wan tiddroar voxe anteyal. Kas bartivany ta onara ? Tokliz mana akola va min fu star ? Taneon, fu wizuwec, tir lorafa zidera koe kusk. Djay, djay, va batyona koafima disukec ! Yesus Krist jiomaik, Maria Tumtafa Gadikya ke Lorik ! Tuwiiskasa faltamafa aftaca koe burmotaxo tanveraston ve tiyir nume amlit ve sokiyir : anton muvara kotcasa va telvungeem wan zo gildeyer ; moion ve ediayar. Dunyacka ve iemeyer ise va taka kodonayar. Darya van tuvel is dilk gamdasugdayar. Guazikya ton eaftaf iteem va karvolya va int pragasa keve inaf nimateem disukeyer. – Dunka ! Va bat tuvolkalas sulem al-o-o-yal ! Maria Tumtafa Gadikya ke Lorik, va trobeem ixel ! Dunka, va karvolya ko kusk ilmimal. Tetce, divon, pojo ! Go-… Grigori al iskeyer da donanaav luber ise gan apulvafa kipera zo botceyer. – Bam, tokdume maninde wiliec ? Stivawec ! ~ Panteley Prokofievitc ieyer. ~ Keyuc, win gadikya ! Mali konak viel pu win kalí da va dona disukec. – Voxe va tok kabay batbartivon fu onal ? ~ guazikya toz pulvajiyir. – Ede me grupel, stivawel ! Va klarisok moe degama fu nariv. Kot kabay van domega belcon iped, va zivotc sokivad. Tí aulanyaf, lava ixam skaltafa. Dunyacka, vultel nume va bost di terektal, ede in co-zider. Medjumaskison, Dunyacka art tuvel laniyir. – Voxe toktel va lava fu kolanir ? Luxe Darya, in me gotir, golde fent di co-rotastakoler, ~ guazikya linveyer. – Do Gricka lanití, ise mu bana dona, va Aksinya aneyatat ise va ara ayikya en trasitit. Dunyaca dimlaniyir, cepiteson. Muvaki bene inaf paurayeem skotcadayad. Do int va dakela ke abdarafa tawa vanstayar. – Bost buur, kovudar ! – Do cin pil ? – Va tok artel dere pir ? – Va yona ayikya gonaneyav. – Laní ! – Bam, va zipun lioza plekul aze den Aksinya vultel. Ede in di pir, va Malacka Frolova vanstar ! – Battel me tutapanaweter, ~ Grigori kiceson kaliyir. ~ Va sum dum bulolap dir. – Va rodaf nakany co-gonaril, Gricunka, ~ gadikya pirdayar, ~ aze mo takra di co-plekul, edeme, koeon fentetel. – Grigori, va nak fu aneyal. Guazik al kalinyir. Boreon, Dunyacka do yona ayikya dimpitil. Aksinya va sollipanaf awem wazdelwebokayan bene anamba, is va faltaf gratcot tulodontinas is tulemazdas bureyer. Do Darya va sint kiceson, va dozga al deswayar aze va usukweboka lolicason tolaskiyir, tolon va int besayar ise va Grigori fentalon torigiyir. Moe pikay, pwertafa Malacka va omexeem vaniksantuyur ise, kan ermialacegana puda kaliyir : – Va yon eyelt, al naric ? Lorikany, batvielon va kabay jontikon fu onat. Sin va kusk divlaniyid. Mo tulwafa tawa razon muvayar, jebrason va yona warulla aze van Don bost ton soist ipeyer. Grigori kabduolaniyir. Gan medizvena itupuca zo fotolgeniyir. – Obral, Gadye, kelor ! – En orikapar ! – Aksiuca, poke jin zavzal ! Belcon avlujat, ~ aze Malacka tridenon ve kiper. – Disukel, Grigori ! Me tir divtotaxo ke Maidannikov ? – Gue, en. – Batliz… batlizu bokat… ~ Panteley Prokofievitc ier, lasufelison va sukaralor. – Va mecoba gildé, veygadik ! ~ Malacka ieker. – Va dona vokel… Jin impá lizu lo lava tir. Cugafa lava, kalí… Malacka, xadaf oretlik, tokliz lanil ? Jin, laní liz lo lava tir, Grigori, Gricka ! Aksinya male domega anton gonimpar ! Jaftoliera, brera vamoe Don bost. Suka va dadef italk ke muvara gosapar. Va ludev nugon uzeason, Grigori va lava kal anamba al kolanir. Xetkaf fent va ast al anjer ise bro ivamuk va takra lictar. Runta va gexata is budenyen iteem ustad. Dona dum vipot deewer ise vanludevawer. Baynomexakiraf nugeem ke Grigori moe bixef ludev kilder. Wazdelnaav bas nubeem soltioltewer… Lodaludevon, ware lodaludevon. Fe. In nugadrasur. Salt va in trucon vanimpar, ist bost gelavar. Grigori kan kotafo po ke ronefa ma van domega pujer. Bata ebeltafa is lizisa aludevaca batvielon lodam betviele kovudar. Nuga mo betawes ludev daavon aykawer. Kabay va inafe abade klantawer. – Lodaludevon ! ~ puda ke gadikye, konlize koe xetkafa tapeduca. Dona dadeon plekuwer nume van ludev tolon kilder ; tolon salt lev nugeem va sid tuyatesar nume Grigori pujer ise putcer, takamadason. – Aksinya, blis ? – Batvieli, en. – Ten muvar, nutison ? – Ten muvamar viele toz muvapar. – Lepoon ! Ede gadikye gilder, mibuweter. – Va rinafe gadikye me crakel, mex ?... Sin remimon amliton impad. Lava, bro xetkaf zom, va kota sinafa liziwera daneyar. – Grica, kros poke domega tir, folí. Gonanamolanit. Eaftafa gla va Grigori ilmimar. Lava nokodanon bimiler, dum ede pistok griiksantuwes benu kiria ko bost al atitsur. – A-a-a-ax ! Konlize poke domega, Aksinya remruson ieper. Grigori, kovudani, va welma tidpujer aze va iera vanpujer. – Aksinya ! Suka is betawes lor ke lava. – Aksinya ! ~ vuderafentesi Grigori ier. – O-ox ! Gri-go-ri-i ! ~ tuxadana puda ke gadikye, sumuon. Grigori va nezura tulodabrotcar. Xetkaf plek leve nugeem, nubasotcer : dona. – Grica, toklize til ?... ~ puda ke Aksinya borer. – Tokdume me dulzeyel ? ~ zidesi Grigori ier, va domega baleminion tidlanison. Buukurdas is skotcas sin va tufixuweyesa dona dimaotced. Tael rem fe koe sollipawes rujod awir. Kadime omafo werdxo tixolon wan ediar. Linvesa abdaruca va tawa tuafigasar. Kelt tcaten gan muvara tir olgaf is aftaf. Va dona dimaotceson, Grigori va Aksinya disuker. Inafa gexata tir batakafa dum afolt, voxe keraf kutceem kavlepemeson ixam kiper. – Viele mo domega al zo dimmimá, ~ in vangaeleson pwarder, ~ al pestadrasú. Fogesawalkeyé ! Foliyí da al wizuweyel. Sinaf nubeem klantawed. Aksinya va nuba ko inaf klaimewazalt lavanludevar. – Koe rinaf ewazalt maneke idular, ~ temedason kaliyir, ~ jin fentepé. Koe kotrafo alto roté. – Batlizo al rempujer, bato nuparojo ! Iste dona va fe dem tanoy arcina lum is miala Grigori divpaklar. Kontan mal degama artvulter. Grigori va Dunyacka kagruper. Sumuon, pu in ier : – Va fem gil ? – Gue. Do jin. Dunyacka ilgaeleson artvulter. – Tokdume batlize zavzac ? Gadye va jin stakser enide kalí da va in kalion gokazokevec. Banlize va eyelt dem klarisok al nariv ! ~ Koe puda ke Dunyacka melapalsen xultkom. Aksinya, talgermitasa, va fe ke dona ten gamper. Sin van degama malvulted nume di dimiduled. Panteley Prokofievitc kan lavaplozayan gelteem, deenaf dum tel ke wizunik, va ruseta krafolmer ; legejalier ; va int sisker : – Ba taneafa lagara : va anyustoy, ba toleafa… ~ Va gemelt sur, va ruseta vanteyar aze kan nuga va eyelt mekalison nedir. Aksinya riliton ve itar. Koe eyelt, tegulawera : blif klarisok – Tokdume al illanic, win ? – Nuparo va dona al rempujer. – In tir gampeyen ? – Va yon ametc al gampev inde rogampev… – Ae, kal abade ware pumawet aze di dimdenlanit. Va lava kolanil, Gricka, tokdume klabul ? Grigori glaganimaton avlamar. Aksinya susteper ise Grigori artu dona pestaler. – Me skotcal ! – Co-djumepé voxe me lajuvangaelé. – Rotaxe… batlizu divlanic, kabay va Oretlik kalpujer ! Wasplapa va dona kopujer. Keyuson, Grigori va dona kabalier aze va wazdel impar. Aksinya, badiewepesa, va domega kalvulter. Lava moo bixe dimruston lorar, kabay wogider. – Va omafo werdxo remolanit ? – Remo aalxo, lotrelafa. Ex, win, en, boreon tenutcec ? – Lanic, vebidutuv. Va dona anton di goneskelav. Aksinya va gratcot konejason mucur, aze mo epiteem va eyelt dem onaks vajar aze riwe malvuter. Grigori va dona burer. Arte mon decemoy sajena lum, Aksinya toz brer. – Mea rodelaní ! Va nimateem, mea ! – Tandaf kseway, rotir fu rotidulel ? – Ox ! en. Awalketé abdi da rodedenlanití. Grigori va ontine ke kseway vakrilon platir aze fesuxal. Anteyasa dakela ke zaxaks male xuvanaf nak bimiler. – Va int iston plekul. Koeon, dum koe cade. Aksinya va eyelt mimar aze kal berga va nak kolanir. – Batcoba en tukiewar ! Grigori, fenttcotasi, poke in senyar. Zijnafa skaltesa dakela va abdaraf usukeem ke Aksinya tidstir. Takakadiyis is artfenkumus in vexon gaeler. – Rinaf usukeem peziwer dum axiba. Grupel, batakafa imwa… ~ Grigori van in xowason tinter. In me dulzer. Disukera tir brafa is sumafa, titickasa va vangabena limega ke tael. Grigori va nuba divucomar, laizon va taka ke Aksinya vanimpar. In va int levgon grifunyer, madagir. – Va jin iskel ! – Stivawel ! – Iskel, oke tulorá ! – Kel, Aksinya… – Panteley ziavik ! – Al eglul ? ~ pokepafa puda ke Panteley Prokofievitc kadime brixagaxo dulzer. Grigori, talgalicason, div kseway grabler. – Tokdume iel ? Al eglul ? ~ guazik vanlanison tolkalir. Aksinya, ranhesa poke kseway, va dozga titu kapray licekar, vamoe in ganta ezar. – Al eglú, volgue, vexe toz fentepeyé. – Ax ! Ayikya ! Djay, va kseway disukel. Va int rotuidulal. Aksinya kicer, xowasa vamoe eyelt. |
| |||||||||||||||||||||||||||||||||||||||
 ← 3-eaf luz - 4-eaf luz - 5-eaf luz → |
