Dersu Uzala
Rupa[modifier]Gralomyes gan wiyuca is viuca is listuca ke « prejan » patectoyeem, Dersu Uzala elpat va alto is swava ko siberiafo taiga aalxo estobasir, kenefison va kelda ke Arsenyev redakik vestas do abic sayakik va Usuri grupejena gola poke Sinia. Moe kelda, bat jotaf fayik va omikye kakever : va Dersu Uzala. Gold saneik sokes cane Mandcura is Rossia, Dersu tir tcabanesik mea grupes mali awalkera ke yerumanikya is nazbeikeem va kona lotira, koe aalxopo alizmonon blis. Kaliapon, sayakik gan Dersu zo memped. Grupesu va taiga aalxo lidam intafa vukuda, Dersu va sin pomar nume va jontike ikse di taruted, va sinka di trasid, di ugalwad… Cugunaykaf tisik, dem gloganya, Dersu Uzala kalion vanpir « gadesik » va brinuga. Trumasu va kot sulem, kruptesu da tey is suka is lava tid « gijarotipaf ayik », va Vladimir Arsenyev fu droler. Ise rabatet da kottan zo memper. Batcoba va laizafa is pelkafa vonafa is disafa moebidura redur. Dersu va grupera va tuwava isu tarkara pu Arsenyev taver. Ise viele, remi merovulkuna nakila (toloy nik moe oprayana uzda gan miel bak zivotcap zo iksed) guazikye va blira ke Vladimir giwar, aludevafa nuca va sint wori amidapaf toz gluyar. Vexe brinuga tenuwer nume kottel va intafa nia godimlanir. Widavik va aalxoik van inaf sulemeem is liziranuyuca isker… Arti alubda, bak 1907, Arsenyev ta warzafa opafa brinuga ko taiga aalxo gire mallakir. Bam, beka toloy ayik zilison va meka kakevetca va sint al buluyud, kottol va artlanira ke artol pitcar. Konterapa. Sin va sint dablud, kalison va mecoba va sint dimtrasid, va afigasuteks askid, va setikeks dimtegirad. Aze gire lanira koo aalxopo. Vexe rotuca sokir… Konviele, solve cane pemaxo jaktol mwarner, Dersu enide in otcer, va in zeltar nume bakar. Batvielu, koncoba vanmiae tuwavafa vura tir empayana, nume blira ke omikye mevieli di tir mila. Tire Dersu Uzala va bata zatca kruptena vas rotapsara gan intafe sane nudoderser. Inafo alto tuguazawer ise dare robelina tuwava tuxadawer ise tuarpidawer. Ilbadesu va ayafa gropa, stumanu, Dersu va ganera ke Vladimir nik naler nume den in di blir, koe filtersesa rossiafa widava. Vexe pester kobudenu is licarsanu koe listafa mona ke redakik nume va vieleem djujiadar lize kotvielu al blir… Acum, tokinde bali ke bat cugunaykaf tcabanesik grupes va kota birga ke taiga aalxo isu wupe di tir ? Bali ke bat rovaf swavanyapesik dimnepales va ayik gu tuwava vox dere va sane gu are… Efe, va jiadara ke bat eroyaf wiyaf is beraf kind pu rin me ravaldatá. Opelon kalití da « tamava » va intafa udutuca koaykatar. |
| |||||||||||||||||||||||||||||||||||||
 Mamtaca ke bata kotavaxa |
Divef vuesteks[modifier]
