Anna Karenina Pak01 Luz03
Taneaf pak, bareaf luz[modifier]Vageyeson, Stepan Arkaditc va int ve koafigayar, aze va ewazaltoyeem giltazatcon ve impayar aze ko ucom va ruseta se is vobor is vanteyasiki yo is trula is jontolafa ruda ve plekuyur, aze va loitesiki ve dimsoayar, aze, peztaleson da tiyir parvuaf is dakelakiranhaf is vinhis is itupanhaf nekev volkalaca, ise soe ton impadimawes nimateem, ko estuxo ve remlaniyir lize poke inafa fadxa twa se is eluxaxa se ke elda va in keyed. In va twa se ve beliyir. Tanoya volplinapafa, va dolekik djulustes va aalxo is ind ke Oblonski sersikya malayar. Golusteyer vexe lidabrotcion dam va int do kurenik me di tolnepaleyer Stepan vaon me rotrakuyur ; ostik tele lovolpline tiyir da ko bata tolnepalera erbadulapok bam belckaweyer. Trakura da in zo roplataeyer ta da do kurenik golde erbatod tolnepaler va Stepan Arkaditc bakayar. Va twa se beliyison, va eldaf eluxaxeem van int ve impayar, aze va toloyi vargi ve gixuyur, aze kan ogalt konon ve stragajayar, aze ve toz beliyir. Stepan Arkaditc va nuyotevafa fela kazawayar ise beliyir, va lugavatrakuliskafa is gaderopamialukafa. Beka icde opa ik yanba ik gaderopa me dulapeyer, va trakulanha icdeon diyir : va tela ke lotan is intafa fela, ise anton do lotan vaon betayar ; lokiewon kalison me betayar vexe tiyid koe in meropeztalenon miv betawesa trakula se. Stepan Arkaditc va nia ik trakula se me kiblayar, kal in bat sin miv piyid, ic-milon da va tazuk ke edji oku vabe me kiblayar volse do cava va int turapalayar. Dira va trakula se, dene bat ayik blis koe lana anameda, olegason va lana grufa tegiruca ke dana vonewera bak lukrafa klaa jadion dilizeyer, tiyir lidadrafa dam digira va edji. Ede in abdualbayar va nuyotevafa trakula dam tela viderevafa dana zo ikatcuyur gan inaf anamedaf jontiktan, leon tiyir kire krupteyer da nuyotevafa trakula tiyir lodovekafa dam kire bata va inaf blirask loon kapburedayar. Nuyotevafo pako kaliyir da koe Rossia kotcoba flijiyir ; ise keskeon Stepan Arkaditc tiyir bozakirapaf ise erbagraciyir. Nuyotevafo pako ruyeyer da kurera tiyir volcavaf gotoltazukan kizeks ; ise keskeon yasafa blira pu Stepan Arkaditc va puveme tiskayar ise va in poayar ta rotuxara is stetara, trace inafa giltafa ronjuca. Nuyotevafo pako kaliyir oke loon torayar da alka metir ara dam daney luxe megrubelisa pula ke sanelia ; ise keskeon Stepan Arkaditc me roterktayar, nimatroteson, va trelafa mista ise me rokagrupeyer va favluca ke kota bata gairtafa is eaftafa pulva se icde tela ara tamava, viele koe bata tamava rotir jonte itupafa. Ostik, Stepan Arkaditc, dan albayar va krandera, kontomon relandeyer gevason va kon diliokaf pulvisik rogdason va boy da ede kontan djutir intotcaf icde intaf abdigadikeem, Rurik sersik me rotir tel losavsaf, vexe tir jidol. Acum nuyotevafa rietova se vanpiyid giltaca tori Stepan Arkaditc, ise albayar va intafa fela dum ruse moi sielestura, golde selam warzen gan bata belira koe intafa taka. Va taneaf teliz in ve beliyir. Banugale, zo kaliyir, tir giopafa da zo espur da zaeleva ta koartokara va kot viderevik se ise da bowere kle gosabegar kev artowarafe perake. Cin karolav da wupe me tir tori bata artowarafe perake vols prostewa se riojasa va abduxoa, ikz-. Vlevon tiyir erbopaf teliz lize Bentham is Mill is ikz- yolt se zo ozwayad ise koegis va dilfumura se kev elda. Kan intafa blifa gruuca, va sugdala ke kot aflaks Stepan vangiyir ; va asmalas tel is puf tel is icdefa coba in diepileyer ; gubeon va puvenhe satoleyer. Vexe batvielon, puve zo jivayar golde setikera va pirdeem ke Matriona Filemonovna is va gojuca gazasa koe mona lize kotcoba sokijiyir. Stepan dere beliyir da Beust biptik, dumon lor al vulteyer, en al mallaniyir van Wiesbaden ; da mea tiyid lukoptaf usuk se ; dolera ke bagaf direm zo walzeyer ; va une jotik eruyur ; vexe pu belisik va zijnafe is beonafe puve dum gilton me tiskayad. Tenuyuson va fela, va toleaf fadxakcek in ve beliyir, aze festkirafa zogia ve estuyur aze ve ranhayar, aze va kelk se lubeyes mo vesuk ve botceyer ; azon warlason va intaf mantaf ast daavon ve levkipeyer, me da koe gloga va kon plinanhaf trakuray diyir : antafa logara tiyir lazava ke bata daavafa levkipera. Vexe laizon va kotcoba in ve setikeyer aze ve tutrakusaweyer. Toloya rumeafa puda kadime tuvel ve zo gildeyed. Stepan Arkaditc ve kagrupeyer va puda ke jotafe nasbeikye Grica is tela ke taneanasbalafa nasbeikya Tania. Sin impadimayad va koncoba lubetena. - Pu rin en kaliyí da koyasikeem me zo goplekuyur moe vegem, rumeikya englavon ve ieyer. Batse ! Noelkeon tredul ! - « Kotcoba sokijir, Stepan Arkaditc ve trakuyur. Noelkeon nasbeikeem mea zo eninter ! » Va tuvel vanlanir aze va sin ve rozayar. Jovleson va bor wartazukayan ton kelot, va gadikye sin ve illaniyid. Rumeikya, gelukafa ke Stepan, laoon ve vulteyer. Va inya ve kutcayar. Kipenheson, bene berga inya ve zavzayar mokolliawesa, felbenon dum kotviele golde dakela ke kofigasiki yo diveksoyeni gan lukast ke gadikye. Adim dabluyuson va gexata mhalana golde blagana nubagina tirka, ise koafinon kan krenuguca, va intaf meem rumeikya ve griiksantuyur aze ve djumallaniyir. Gadikye va in ve kagiyir. - Va tokcoba Mama askir ? in ve eruyur santason va gedelafa is zijnafa bergama ke nasbeikya. - Azon, gukoeson va nasbeikye : « Kiavá », pu in ve kaliyir. Kagrupeson da va rumeikye leon renayar, soe yovayar da tir malhaf dolge in ; vexe battel va bata abdualbasaca peztaleyer, ise pu levkipera ke gadikye ve dulzeyer. - Mama, rumeikya ve dulzeyer, mea keniber. - Stepan Arkaditc ve repaleyer. - Ware konviele, in kotmielon al me keniber ! ve trakuyur. - In itupaf tir ? in ve eruyur. - Rumeikye grupeyer da motcara sokiyir wale gadikeem ise da gadikya me rotiyir itupafa ; ve grupeyer da gadikye, baton bibeson, va brunuca stetayar, ise tori in goldeon ve tukeraweyer. In davon ve sonkeyer ise dere ve tukeraweyer. - Jin me grupé, ve kaliyir. In me al benplekur ta vayara. Al kalir da den veygadikya do Hull weltikya cin golaniv. - Ex, lanil, Taniucanha. Ax, kel, ve kaliyir, va in ware kagison ise va gedelafa nubama santason. - Mou keldega va fageakam eldeon rundayan in ve nariyir ise pu in va toloye fage ve ziliyir, kiblason va tele abdualbase : va sabakirafe is botaxazomkirafe. - Bate tori Grica tir ? va sabakirafe nedison rumeikya ve eruyur. - En, en, in ve dulzeyer. Va inafa epitama ware santason, va inaf usukeem isu berga ve kutcayar, aze va in ve iskeyer ta da mallaniyir. - Direm kabdueon tir, Matvey ve kaliyir… Ax ! Tir yanesik, ve loplekuyur. - Malipon ? - Moni riwe miabartiv. - Tokote pu rin al benplekú ta da davon zo walzé ? - Icle pu rin va ugal ta va fadxa ulil gozilí, Matvey ve kaliyir, kan naf is yastaf kom kevon mibuwera vol tir. - Ex, tukaliawel ise askolanil ! Oblonski ve kaliyir, aundon woltgeruason. - Yanesikya, nhobrik ke tan Kalinin eldaf redakik, va volrotisa is peztorafa eruyur. Vexe, dum gilton, Stepan Arkaditc ve kozideyer da in debanhar ; va in me waljoason obrason ve terktayar, aze pu in va tegitira tagelton ve bazeyer ; tori in milon ve suteyer, kan abrotcafa is robeliyina sutera, va twama tori rotison favlaf kontel. Mali da yanesik al buluyur, va intafi edji Stepan Arkaditc ve nariyir. Aze ve xaayar, va int eruson ede va koncoba al me vulkuyur. Va mecoba al vulkuyur, vaxe nelkafe djuvulkuse, va kurenik. - Ax ! en ! takomason ve evieyer, acum intafa plinafa gexata ve tukexaweyer. Kas golaní oke me ? - Koefa puda pu in kaliyir da in golanir. Betcoba in co-kalir anton co-tid stetara is rotuxara ; debala tiyir tuveliskafa, kire dimzilira pu kurenik ke Stepan va menpesuca is jekusuca is jotuca tiyir limerotisa dam wartazukara va in ton guazik merovansas va rena. Noelkeon rotuxara is murkuca mal bata debalaja va volkalik anton rodivimpayad, ise va inafa tuwavafa ronjuca lan mergil se balveyed. « Wori, baton fu gozomé ! Baton va coba me rotiské », in va int ve kaliyir yovason da gastanver. In va int ve turontayar aze va ruseta ve nariyir aze vaon ve vanteyaweyer aze va toloya tamka ve gelavayar aze ko grujdaf tsadayak va ruseta ve mimayar. Porfeon, kaliakalion, va bonta ve remlaniyir aze va tuvel ke mawa ke kurenik ve fenkuyur. |
| |||||||||||||||||||||||||||||||||||||||
 Taneaf pak |
