Amlitmona
 Bat teliz tir kotavaf suterotvildeks vols kalkotavaks. |
| ||||
|---|---|---|---|---|
| Vergumvelt | Sessiz Ev | |||
| Sutesik | Orhan Pamuk  | |||
| Ava | Turkiava | |||
| Evla | 1983 | |||
Rupa[modifier]
Koe intafa savsafa mona ke Fudafolk, moltam koe lentefa Turkia, pomanon gan Redjep klodik sagaf zanisik, Fatma va tel baroy veynasbeik kazawar. Beka loon tiyir 90-daf ise vewar da pu sin kalir kire va zavzara do setikekseem abdurenar, va mana worara se armorasa va intaf vielcek yo is tulotrelasa va ugal Fatma karolar.
Tel baroy yik tid amidapaf : Faruk tir izvopik ise ta aneyara koe savseluxaxaxo ke widotam blirektur ; Nilgun berikya tir listaf is zardaf sayudasik va dodelalazava ; Metin toleanasbeik leklaon tis tandaf, tir bitonaf kotlik klokas da tutufawer.
Bal bata ilanafa idulugalafa jonvielera, sin va xo se ke rumeugal dimtrasid, dodisukeson wal vumeltaf is plinaf lekef Fudafolk is vanpiyis rabaf moltam. Va gluyasiki se do abdif nik yo sin tolwebokad. Vanmiaeon tir Hasan, nutik ke Redjep, malipon duxibeyen va Nilgun vexe intaf gaderopaf trakurayeem va inya ilad.
Luxe Fatma zavzar ralentana va intaf abdiugal, nuvelason folvaf, tciamon suson va birga kivoe da gan veynasbeikeem zo ilikatcur. Arldon, kiblar da ganon divetamava zo vielvielon ilar…
Sebuks[modifier]
Fudafolk tir widavama ke Turkia dum jontika ara. Kota volsaca yo ke sanelia kaikimpana walo toloya tamava is aneyasa va tela intafa pilkoma dilized. Koredikeem tir ewavakiraf gu mana esaca, kottan ilkon kategis varze betukepereem ke XX-eafa decemda tizon tsenteyes va stabregeem ke Otman ginaxo. Ede nuyuca abduayar, patcta di zo gotolvegeduyur ta da anton kaagdeson va abdiugalki ben wiluca rozalewer. Mancoba en tir lirkkirafa yoke da ravlem yo dum "wiluca" ik "sokasane" ik "suptuca" tid tel se ke kevelik, ke bata Talteka kotviele kevalieyena isu bogayana is wetce wasik medjumena. Tison abduxoevik ok kategirevik ok suptik ok islamik ok doevik ok cosevik, kulik ok copik, koredik se ke berpot va kobodeem is etrakeem ke sarefa Turkia tulecad.
Tola se va sint kontomon sollipad kire tana tamavenvara solparsar. Tulon, pu kurenikye dum pukeem ke Islam koaykar Fatma va int levplekur. Vexe tokinde va ayik rawas va yasa ta koafira kan "ovafi" yo va Roneka aneyason va sutelara va xadola bro Diderot co-grurenayar ? Tid volrotixesaca yo dum merodivoksena eksaca yo krulded, vexe lanon tir tele lorote viele mana vlevepeztaka lazavana is kiewagina gan wafivafa sbolesuca ke taltekikeem lanaf gu inafa araya isu vodeem.
"Sessiz Ev" tir taneaf berpot ke Orhan Pamuk, vexe, valev elubkaf watseem isu uumeem ke grabom, bata kuranira va akoyera va belisik kan esafa kolnara is elvon jonmamafa pwadera koeon ixam tir. Brubetca yo pomasa ta da va gonoy se ke turkiafa gloga vion kolanit.
