Difference between revisions of "Katherine Mansfield"

Katherine Mansfield, agelton yoltkiraf gu Kathleen Beauchamp, bak 1888 koe Wellington koe febapafa yasa ke warzazelandaf glastikeem al koblir, vexe di awalker 34^-daf. Tison 20^-daf sol yasafa vierma otcer ise ko London va int divblir lize bak 1909 va pudopatavesik eldeon bulutun kurer. Bak 1918 va John Middleton Murry suterotaf malyopasik tolkurer. Koe Bayerna is Provenca is Italia is Swiza di jonvieler. Ba 09/01/1923 koe Fontanebleau koe Franca golde kotcakola al awalker.

Ede lanedje, kan tanoya adala liafa blira ke Katherine Mansfield zo rovilder, in otcer aze dimpir aze tuakolawer aze awalker jotaf, inafa meromilaskina sutera zavzar bulapa. Wetce kotraf suterot, in va warzot is ilkapone is tweem anton al isker, trabe abiccoba tori suterotikap. Davon tir amidaf gu yonar englavaf suterotik dan va rupa ba koblira ke gradilik narid aze remi yona zixa kal tenafa grogara vaon jupad. Katherine Mansfield va yasa ik anameda kiblar. Va gabera konakedje askir ise va yon lit ke tisik pimtar bak kiblan gemeltam icdeon cenkason kan anton sinaf trakukseem isu oulakalikseem. Pilke ke yanba ke Katherine Mansfield dere tir kiblara, wetce watsa ke inafa vayara, va entaf viel tcalan gan meka cugunaykafa bifa. Kan inafa sutera, opelafi yasafi tegi ik grilizeblira ik ilanuk ik kapama vanblid dum kontegaklita.

Kotrafa ageltuca

Belira va warzoteem ke Katherine Mansfield roxayer. Nega ke warzazelandaf suterotik va cultimeva divvawad. Sin levgon azavzawed viele djumet da abdujijawed. Tolwelved liz me zo ked. Vamoe yona imwavioma ik zveridank ik kseva ke gum ik kofigasiki ke dieka moe lima ik yon bitejkiraf kipeks ke rumeik klokes va kotvielee vangaved. Katherine Mansfield me tir geltrevaf suterotik. Vexe kan glebasaca ke fereon ayewasa is sedielafa vols tublisa pinta va kotrafa geltruca wir.

Koe bat litevaf suteroteem griva va rumeuca is awalkvudera belcon gluyawed. Baliafa oula sokir viele bak 1915 ko Engla Leslie lojotaf renapan berik artlapir enide in wetce sayakik va ervolia kazokever. "Va sintafa taneafa rumeuca ve konakbartivon flideyed, John Middleton Murry setiker. Bam Katherine ve gorayar da va blitolnazbara ektur dum koe Warzazelanda al bliyir ise al pestaleyer". Awalkera ke tel berik, arti aksat, va inafa erava ve gruyeyer. Kadimion, va Engla ko Bandol Katherine Mansfield bulur aze toz kobar ta warzotap, ta nega va inafa rumeuca. Bat warzot yoltoe Prelude vergumvelt di sanegar.

John Middleton Murry pwader da radimi sanegara va Bliss larma lize Prelude warzot tir taneaf, inya toz kazawar va yona twa ke opelik albas va inaf suteroteem is nelkon koefa pinafa Kezia. Inya ve pestaleyer blodafa dolge man belisikeem. Pu in va geltuca is anton geltuca danuyur. Bata abdikerelera va gelte, va inafe sutene gelte, va inafe glogagelte enide in rotir muxarabagaliaf, vanpir vumbesa skewera ke yona ironokafa blitanda.

Koefa tukarara

Bak 12^-aksat 1917 Katherine Mansfield tumenomakolapawer. Va yona koyara jonkar : va Bandol az Ospedaletti koe Italia az Menton az Montana koe Swiza. Viele bak 1922 The Garden Party and Other Stories zo tusanegar, dan va in ve tukotgrupesayar, dene in sutera al vanpiyir volromotidana sufera, lyumara va akola is koefa minia da abdi rotabduxoara in va koefa tukarara di gokotaskir.

The Canary, entenuyuna ironokafa nega bak 7^-aksat 1922 zo tenur. Arti baroy aksat, in va sutera ebgar ise ko Fontainebleau koe Gyurdjiyev viray bulur. Ba 09/01/1923 Katherine Mansfield laizon awalker. Inafa bliratena ve tiyir aneyara va entulebawera gwidanyon vrutana gan pone. "Engalova al sokir, ~ in suter.~ Al tolvanpí rumeik. Va tamava is cot is degrik megrupé. In koe jinafa gesta is anton kotlize blir". Va ezlopa skotcasa veda ke Katherine Mansfield zo fereon duvur. Lexa dere zo rodivrozar, icde in dan viele tiyir jotaf ve djuvanpiyir dingeltokusik. Lexa va dana anton yon norlik tugrugildesad.

Virginia Woolf milugalikya icde in al kalir : "Tir tanafa ayikyafa sutera gu dana tí lickafa".