Stazkiraf karvol

Teliz mal Wikikrenteem.

Grablé kal exulera, aneyara

Karvol feliik okon stazkiraf karvol

Reiz : Karvol feliik okon stazkiraf karvol

Sukarnik wetce kotafa kiewega pu baroy nazbeik va sukarn is astol is karvol anton ve iskeyer. Pakara sure zo skuyur : mei tegivsutesik mei malyesik zo rozeyed. Va copafa gadakiewega abicedje co-estuyud. Taneanazbalik va sukarn seotayar, toleik va astol ise lojotik va karvol anton kazawayar. Bantan va int me rovinuyur kire va licopafa nyosa digiyir :

— Berik, ~ in kaliyir, ~ va sint belcon plekuson, telon roblirawatad ; voxe jin, viele va karvol al estutú aze kum alma va ewazalt al iatá, arse aelawalketé.

Karvol, gildeson va bata dewitca ise vol nuveleson, pu in frendon is elimon kaliyir :

— Va int me vanmanyal, feliik, va eyelt anton zilil ise askil da stazeem mu jin zo iar inde koo beripxo di rolanil, nume witil da loon dam folil al zo buelel.

Beka feliik dem Karvol va batcoba folinsiyir, va in askis va yona plaxaca ta konarira va tovol ik slakol al wiyir jontikote mea gripokoleyer da bas copuca ganon zo co-greler. Tulon viele kan nugeem rumkanyayar oke bevulason awalkaf ko regelta va int palseyer.

Karvol seotayas va coba al eruyur, va int budon stazayar, aze, plekuson va eyelt ben berga, kan vabduef inieem va wazdel nariyir, aze ko libolxo lize jontik libal tigiyid mallaniyir. Va jumba is yona laiteron ruxa ko eyelt plekuyur, aze senyason dumede tiyir awalkaf, keyer da kon jotaf libol, men raveyes va beyeem ke bata tamava, di vanlaniyir aze ta estura va koeon sinka va eyelt di kolaniyir. Moi senyara, in zo tuvaleayar : jotaf gariandaf libol va eyelt kolaniyir nume Karvol feliik, vere impason va wazdel, va in nariyir aze volsegayeson atayar.

Aliaf gu wivga, den gazik laniyir aze eruyur enide di ropulviyir. Ko kraba ke Nafalik zo stayar. Kolaniyis, va gazik gidukapayar aze kaliyir :

— Nafalik, batse tawadaylibol. Carabas biptik (tiyir yolt inon djuzilin pu feliik) va jin al vajger enide va bat sulem ke in di atoé.

— Pu rinaf feliik kalil, ~ gazik dulzeyer, ~ da grewá ise in va jin puvegar.

Arviele, in vanmia dent va int palseyer, gire gison va fenkuyun eyelt, aze moi kolanira va toloy tovok, va wazdel impayar nume va sin nariyir. Azon den gazik laniyir aze va sin atoeyer, milinde luxe tawadaylibol al askiyir. Gazik va toloy tovok tcion kazawayar nume askiyir da in di rotuliyir.

Karvol, bak toloy ok baroy aksat, va tcabanyerawivga ke intaf feliik pu gazik batinde dile wan bureyer. Konviele ve grupeyer da gazik ken kuksa, do nazbeikya tela lolistafa sersikya ke tamava, di gozayar, acum pu feliik kaliyir :

— Ede va jinafa pirda djutarkal, rinafa tufa fu tir : opelon koe kuksa lize nedití, va int kolavatal, aze iskel da di askí.

Carabas biptik va pirda ke karvol askiyir, megrupeson inde batcoba di tiyir kiewafa. Edje va int kolavayar, gazik pokolakiyir, bam Karvol toz kalieyer :

— Va pomara ! va pomara ! Carabas biptik wizuwer !

Ba bate ie, gazik rem tuvelta va taka plekuyur, nume, kagrupeson va Karvol jontikedje bureyes va wivga, pu rinaf susikeem dirgayar enide Carabas biptik di zo greleyer.

Edje kimtaf biptik div kuksa zo maltiolteyer, Karvol va diremuko vanlaniyir aze pu gazik kaliyir, da edje inaf feliik va int kolavayar, dubiesik piyid ise va vageeem divbureyed, kore in kev dubiesik kalieyer ; vepokik leve raporap va in al palseyer.

Gazik pu fayik ke intaf vagezanok vere dirgayar enide inafe konake lolistafe vage mu Carabas biptik di zo aneyayad. Gazik va decitoya pulviranya pu in maneyer, ise larde listafe ziliyine vage va inafa sivanya tukiewayad (lecen in tiyir listaf is bruckakiranyaf), nazbeikya ke gazik va in karolapayar nume, arti toloya ok baroya tarkapasa vox krenugapafa levdisukera ke Carabas biptik, ve kalrenayar.

Gazik ve kuraniyir da in ko diremuko va int rundayar ise va gozara pakeyer. Karvol, felben wison da intafa erava toz kiewaskiweyer, abdulaniyir, aze kakeveson va yon tawadayik dolistes va werdxo, pu sin kaliyir :

— Korikany dolistes, ede pu gazik me di kalic da dolisteno werdxo tir ke Carabas biptik, dum zomakcot kotote tiguon zo kuftosatac !

Gazik me gracayar da pu yon dolistesik eruyur ke toktan dolisteno werdxo tiyir :

— Ino tir ke Carabas biptik, ~ kot sin belcon kaliyid, kire dratcera ke karvol al kovudayar.

— Va konoleksany batlize digil, ~ gazik pu Carabas biptik kaliyir.

— Wil, nafalik, ~ biptik dulzeyer ; ~ batse werdxo kotilanon zilidupuso.

Karvol feliik, wan abduelanison, va yon vebaltasik kakeveyer nume kaliyir :

— Korikany vebaltas, ede pu gazik me di kalic da batyon vebaltan dent tid ke Carabas biptik, dum zomakcot kotote tiguon zo kuftosatac !

Gazik fure pokolakiyir nume djugrupeyer ke toktan bat win dent tiyid.

— Sin tid ke Carabas biptik, ~ vebaltasik dulzeyed ; nume gazik do biptik gire wiveyer.

Karvol, abduelanis va diremuko, va milcoba pu kottan kakeven ware kaliyir, nume gazik gan kiewegapa ke Carabas biptik zo gevayar.

Karvol feliik ko listafe lamone adim artlaniyir, ke dane feliik tiyir gulamoledjik, tel mevieli lokulaf ; lecen kot taway koolaniyin gan gazik tiyir ke lamonexo.

Karvol va tira ke gulamoledjik isu grupaskira trumon abreyer, aze eruyur enide pu in di ropulviyir, kalison da va inafe lamone me al djupokolanipiyir meporason is megidukason. Gulamoledjik va in riewovgapon emudeyer ise askiyir da in va int di tildeyer.

— Zo ravaldayá, ~ Karvol kaliyir, ~ da va betara va int gu beta suleminda grutel ; da, tulon, va int gu krapol ok fuzol grupartazukal.

— Ageltafa, ~ gulamoledjik levgon dulzeyer, ~ nume su nedí vanpison krapol.

Karvol wison va krapol kabdueon ve zo kovudapar eke va belaxare di urpeyer, puideson is iyelon golde stazeem katijis va avlara moe mikiya.

Vanion, Karvol, wiyison da gulamoledjik va intaf taneaf tazuk al jovleyer, titlaniyir aze va intafa vuderapa welidayar.

— Ware zo ravaldayá, ~ Karvol kaliyir, ~ vexe arse me rofolí, da va roti ta kotazukara va lopinaf sulem dadil, tulon va int gu tovol ok slakol robetal ; welidá da va mancoba koton merotisa krupté.

— Merotisa ! ~ gulamoledjik evieyer ; ~ fu wil.

Miledje va int gu slakol toz vultes moe azeba betayar. Karvol va in ve kozwiyir, vere moebiduyur aze estuyur.

Neke, gazik pokolakison wison va listafe lamone ke gulamoledjik, djukolaniyir.

Karvol, gildeson va lor ke diremuko moo madaraza, va gazik kabduvulteyer aze kaliyir :

— Nafalik til drumbaf ko bate lamone ke Carabas biptik !

— Oyox, biptik weltikye, ~ gazik divieyer, ~ bate lamone dere tir ke rin ! bat kusk is batyona anamefa kolna en tid listapafa ; va koexo wit, vay !

Biptik va nuba pu jotafa sersikya ziliyir, aze kadime gazik taneon tidlanis, va bontapa kolaniyid lize va cuisafa estura volmiv egayana gan gulamoledjik mu inaf konak nik trasiyid. Voxe grupeson da gazik koeon tigiyir, pitis bantan me di rovekolaniyid.

Gazik, mempes gan duganyeem ke Carabas biptik, is dere nazbeikya oviskafa gu in, is wison va inafa digina kiewegapa, arti aluboya ok tevoya ulira, kaliyir :

— Batcoba va anton rin rupter, biptik weltikye, enide di vanpir jinafe arnazbeikye.

Biptik, gidukapason, va poraca askina gan gazik malnaleyer, nume, milvielon, va sersikya kureyer. Karvol vanpiyir jiomapik, nume kadim slakol anton ta deasera mea di vulteyer.


LIDOK

Kore pojara va konoleksap
Vey gadik kal nazbeik
Tir guntap,
Kobara is grupaskira
Lodam besayana kiewega
Mu yik gubeon vodapad..

  Xanto  
Vergumvelt Le Maître chat ou le Chat botté
Reizak Les Contes de ma mère l'Oye
Sutesik Charles Perrault
Piskura -
Ava Francava
Evla 1697
  Kalkotavara  
Vergumvelt Stazkiraf karvol
Kalkotavasik Elisabeth Rovall
Piskura
Evla 2013
Klita
  Krentduga  
Webesik Seramikya
Krentduga Image:75%.jpg Gotuenana

Yunkeks ke Carl Offterdinger
Yunkeks ke Carl Offterdinger


   
   

Les Contes de ma mère l'Oye ke Charles Perrault