NyagaceemScapin Nakileem01 Nakila03
| ||||
|---|---|---|---|---|
| Vergumvelt | Les fourberies de Scapin | |||
| Sutesik | Jean-Baptiste Molière | |||
| Piskura | - | |||
| Ava | Francava | |||
| Evla | 1671 | |||
| ||||
| Vergumvelt | Nhagaceem ke Scapin | |||
| Kalkotavasik | Staren Fetcey | |||
| Piskura | - | |||
| Evla | 2006 | |||
| Klita | Kalkotavaks | |||
| ||||
| Webesik | Vieux Daniel | |||
| Krentduga |  Gotuenan
| |||
Taneaf nakileem, bareafa nakila
Hyacinte : Ax ! Octave, tir ageltafa coba pu Nérine Silvestre su kalir ? Da rinafe gadikye tir dimpise ise va rin djukurer ?
Octave : En, listafe Hyacinte, ise bat warzot se va jin uduton vanolad. Vexe va tokcoba wí ? Rin ikuzal ! Tokdume bat ikuzeem ? Golde kona volsagaca va jin uculel, kalil, voxe icde jinafa renara va rin me til lanaf ?
Hyacinte : En, Octave, tí lanaf da va jin renal ; vexe me tí da kotviele renatal.
Octave : Ex ! Va rin co-rorená ede artion me co-renatá ?
Hyacinte : Al gildé da rinaf ledam jinaf milikrik abrotcion renar ise da lujuca ke ayikye tir tey tenuweyer lifakon dam nasbalar.
Octave : Ax ! Abegafe Hyacinte, jinafa takra me tir milafa dam tela ke artan, ise peztalenhé da kali naboxa va rin renatá.
Hyacinte : Djufolí da peztalel va rinafe kaline, ise me etraká da rinaf pulveem tid puraf ; vexe va roti lhumatasi va rinaf krenugaf peztakeem tori jin koe takra kivá. Va gadikye djukurese va rin do artan ruptel ; ise tí lanaf da awalketé ede mana volkalaca co-sokir.
Octave : Me, listafe Hyacinte, me tir gadikye rostegese ta da va rinafa folira grací, ise co-gorá da va vo lodam rin co-bulú ede co-olegar. Jinafa balikenikya va jin idapar kore vaon meviele al wí ; ise, metison udutaf, co-jugemé da bira vaon batlizu artion ilar. Me ikuzal, vay, jinafe neciafe Hyacinte, kire rinafa borera va jin atar ise me rowí teka jinafa takra zo remrur.
Hyacinte : Larde djumel, va borera djubosolanhá, ise va jinafa coba goratana gan kelt taniiton keté.
Octave : Kelt va min progeter.
Hyacinte : Me co-rovolproger, ede co-til sagaf va jin.
Octave : En tití.
Hyacinte : Acum tití kalaf.
Scapin : In me tir lifitulaf, en ! Ise sedme jin nuvelar vumpamaf.
Octave : Batse kontel kotron ropomapas va jin, ede co-djumer.
Scapin : Al vruzapá da va tamava mea fornatá ; vexe ede kottol va jin blikepec, rotir…
Octave : Ax ! Ede ta seotara va rinafa pomara gobliké, va rin ogolepé ta da va minaf tiv kojupal.
Scapin : Ise rin, pu jin va mecoba kalil ?
Hyacinte : Va rin ogolé, sedme jinafa tula, kan rinafa lodabegafa kotcoba, ta da va cinafa renara djukalzanil.
Scapin : Zo gocenhé ise tí ayikevaf. Tcay, tori win djutegí.
Octave : Folil da...
Scapin : Kay ! Mallanic ise tildewec. Ise rin, va int egal ta da va domune gadikye acon likel.
Octave : Pu rin welidá da inafa domura va jin abdion tuskotcasar, ise tuwavon merocenhenon tí vazaf.
Scapin : Wori ba taneafa vordava gonuvelal acaf, kivoe da, golde rinafa axuca, in gorar da va rin lidam rumeik co-jupar. Batlize, va ponara vayason lagal. Til laonhaf ise yovatal da icde inafe rokalitine elvon dulzetel.
Octave : Tel lokiewon askití dum grupaskití.
Scapin : Kle, yawamat, ta vangiltara va rin. Va rinafa yorda tolkalimit, ise wit ede askinhitil. Djay. Elvafa siva is rontafa taka is frendafa disukera.
Octave : Dum baton ?
Scapin : Ware lodabicon.
Octave : Baton ?
Scapin : Kiewafa. Gestil da tí rinafe artpise gadikye, ise pu jin acon dulzel, dum ede pu in co-askil. « Tokon, rotuxasik, webdik, krizik, volbagaliaf nasbeik ke man gadik jin, rin eblel da kabdu jinaf iteem awil, radimi rinafa gruspewera, radimi da viele tiyí gracaf vaon nhukon al randayel ? Kas ilt ke jinaf trumaceem, tozekik ? Kas ilt ke jinaceem ? Tarkasuca va jin zo-daner ? Tarkasuca va danu pu jin videl ? Tetce. Rin til jlokaf, yotik, da mekeson va jinafa gadikafa finera viltel, da birgoton kokurel ? Pu jin dulzel, facilik, dulzel. Va rinaf vratieem disukenhet. » Ox ! Va tokcoba ! Rin til stivawes !
Octave : Kire gestí da tir gadikye gildene..
Scapin : Ex ! En. Batdume me rotil dum volgunik.
Octave : Fu tí lodelvaf nume acon dulzeté.
Scapin : En ?
Octave : En.
Silvestre : Batse rinafe pise gadikye.
Octave : Ey kelt ! Tí buktaf.
Scapin : Djay ! Octave, zavzal. Octave ! In otcer. Man kimtik ! Va tel guazik me asket.
Silvestre : Va tokcoba pu in kalití ?
Scapin : Iskel aze pu in kalití ise dum jin askitil.
 Taneaf nakileem |
