NyagaceemScapin Nakileem02 Nakila03
Toleaf nakileem, bareafa nakilaLéandre : Va jin batinde levcoel ! Facilik jontikdume co-gotis taneaf da va jinafa odiaca preyutar, tir tel askis da jinafe gadikye kosmar. Ax ! va kelt vogá da bata relmera me zavzatar meestena ! Octave : Abegaf Scapin, pu rin maneke danú ! Til mafelik ! Ise stakseson va rin ta grelera va jin, kelt en tir fikuntaf gu jin ! Léandre : Ax, ax ! Rin batliz. Tí valeaf da va rin trasí, facilik weltik ! Scapin : Weltik, rinaf zanisik. Va poraca pu jin askirsil. Léandre, plekuson va nuba ben dug : Rin va ikoraf krandesik zirsel. Ax ! Pu rin fu tavé… Scapin, badeson : Weltik. Octave, wal kottol va int rundason ta da weyonar da Léandre tazer : Ax ! Léandre. Léandre : Me, Octave, va jin me kagil, vay ! Scapin : Ex ! Weltik. Octave, va in kagison : En vay ! Léandre, djutazese va Scapin : Va jin iskel da va vidjera karlé ! Octave : Yoltoe nuca, Léandre, va in me askipejel ! Scapin : Weltik, va tokcoba pu rin al askí ? Léandre, va in djutazese : Va tokcoba pu jin al askil, zatkik ? Octave, va in kagison : Ex ! Aulon. Léandre : Me, Octave, djumé da in va yotaca kev jin boreon miv movur. En, facilik, va rinafa randayera grupé, su zo kocenká ; ise lanon rin me foliyil da bata birga pu jin zo co-razdur ; vexe va movura gan miv rin kuraní, edeme rem alto va rin dugatá. Scapin : Ax ! Weltik, rin va mancoba co-askil ? Léandre : Pulvil, bam ! Scapin : Jin va koncoba pu rin al askí, weltik ? Léandre : En, facilik, ise rinafa jiluca va coba pu rin kotron kalir. Scapin : Va rin ravaldá da me grupé. Léandre, abdulanison ta da tazer : Me grupel ! Octave, va in kagison : Léandre. Scapin : Ex bam ! Weltik, larde djumel pu rin movú da jin do yon nik va bat miluntam dem Espana vor al ulí, va bat vor pu rin konakvielu bundayan ; ise da va milunt al ludzé aze va lava al anamgimá, enide kottan folir da vor al yateyer. Léandre : Rin, drendik, va jinaf Espana vor al ulil ise golde rin va zanisikya kornapayá, folison da in al randayeyer ? Scapin : En, weltik : pu rin ixererú. Léandre : Tí valeapaf gu ravera va batcoba ; vexe me tir dure icdeaca. Scapin : Me tir batcoba, weltik ? Léandre : Me : tir arcoba va jin loon icdesa, nume kuraní da kalil. Scapin : Weltik, me setiké da va arcoba al askí. Léandre, va in djutazese : Me djupulvil ? Scapin : Ex ! Octave, va in kagison : Aulon. Scapin : En, weltik, ageltafa da weti baroy aksat va jin sielon al staksel ta da pu renana jotafa misrikya va trulama buré. Viele va oga dimpiyí, jinaf vageeem tiyir diblakirapaf ise gexata forteykirapafa, ise pu rin al kaliyí da va dubiesik al kakeveyé, va dubiesik va jin alieyes is va trula faluyus. Jin, weltik, va trula al levdubieyé. Léandre : Rin, va jinafa trula al levdubiel ? Scapin : En, weltik, ta da va tis bartiv rowí. Léandre : Ax, ax ! Jin va mancoba batlize ravé ise va sagapaf zanisik en dí. Vexe me ware tir jinon eruna batcoba. Scapin : Me batcoba ? Léandre : Me, krizik : kuraní da va arcoba movul. Scapin : Ax ! Léandre : Kalion kalil ! tí soriaf. Scapin : Weltik, anton tir jinafa askiks. Léandre, va Scapin djutazese : Kotcoba ? Octave, va int kabduon rundason : Ex ! Scapin : Ey bam ! En, weltik : va bat idatcolik setikel, weti tevoy aksat, dan va rin mielon peyapayar nume ve trakuyur da rinafa berga al zo empayar koe fuk liz otceson ve lubeyel. Léandre : Ex bam ? Scapin : Jin tiyí, weltik, tel va idatcolik zirses. Léandre : Rin tiyil, zatkik, tel va idatcolik zirses ? Scapin : En, weltik, anton enide pu rin tuvudá ise askí da mea kuraní da min kotmielon trubat, dum al givebayal. Léandre : Va taveks, viele is lize firvitir, kotron setiketé ! Vexe va askiks djumuzá ise va coba rinon kaliyina pu jinafe gadikye movul. Scapin : Pu rinafe gadikye ? Léandre : En, rotuxasik, pu jinafe gadikye. Scapin : Mali inafa dimpira, jin dace me wí. Léandre : Va in me al wil ? Scapin : Me, weltik. Léandre : Geltron ? Scapin : Geltron. Fu askí da miv in va batcoba pu rin kalitir. Léandre : Neke mal inaf art jin va batcoba gí. Scapin : Ede va jin levnovel, in va ageltuca al me kalir. |
| |||||||||||||||||||||||||||||||||||||||
 Toleaf nakileem |
