Zverieem

Teliz mal Wikikrenteem.

Grablé kal exulera, aneyara

Zverieem
Amerindiafa vunda, ke Abenaki sane


Darekeon. Tozi tamava, Redusik yoltan gu Tabaldak gan Abenaki sane va tawava redur, nume sedme ine tawava al vanpir matela ke Tabaldak. Batvielu, guazafa gadatawava va sinkasa metca is ropesa ruxa sofirvir. Tabaldak va kotcoba olegana gan ayik moe tawava al redur. Va kotcoba al redur, ok va cugcoba lecen sedme Abenaki sane Redusik sometir kotunaf kire edeme va kot saneik kotunon co reduyur.

Kot Abenaki saneik lente reduks wender vieli Batakarupol va batakafa liozapa mo tamava djukuplekur aze va fentaf gaeloy ta fentugalara suker.

Banugale, Abenaki sane koe dranga loedje blir ise rumeik al vanpid gabentapaf. Vaxe teyguboy nutis zakodamaf golde noapaf fent, va betcoba relandesa mea dadid. Remi idulugal, va toa ke baerdaal al vefad. Va bergak is onduk is bord kumon al epud ise va kuksama dere al vefad. Vexe golde nolda besayasa va kotcoba, koti vefasiki al grawir nume al vanpid gabentapaf. Maneke Bilotol veygadikya katcalar nume va Tabaldak djukukevlanir. Kalir :

— Va jontikcoba mu rinaf milgaf nazbeikeem al redul. Va kotcoba al firvil enide in blickir. Vexe va jinaf oceem al vulkul.

Tabaldak undemer aze va Bilotol veygadya vanovar. Abdizilir da va debala fu vanvur. Vieli imwugal vanfir pune va roreduna coba toz under enide fentugal tove sin titir loeke plinaf. Bam setiker da va yon rumeik vefas va toa ke baerdaal al wir. Acum va zverieem kle djukuredur. Vexe ampursuson puveguson va rumeik tori direfentugal, va dokoton batakafi zveri redur, i va zveri dem mila kseva ke fentugal.

Rumeik tid valeapaf gu bat reduks. Wil inde va nudol ik tovok ik edgabia ik natconga ik proklami ik ciesta ik vilbol ik peang ik kotari zveri vefad. Rumeik vefason va warzaf nik zverieem va imwugal az idulugal az dace muvugal daskid.

Viele Batakarupol va batakaliozapa mo ge ke gadatawava gin mimar, pune rumeik vofad da zveri tid milksevafi dam nolda nume batdume winsid. Dace zveri va sint medrikon kagruped. Kot tid milksevaf. Nume rumeik gabentapaf ko dranga dimlanid.

Bilotol veygadya va gabentuca ke rumeikeem wir. Va Tabaldak gin kevlanir aze kalir :

— Tabaldak, tce va zveri kaliarson al redul. Va tuwava ksevakirapafa dum rin pu milgik al firvil, voxe al vulkul da rumeik va milyona kseva tori zveri dere riwed.

Tabaldak under aze pu Bilotol veygadya tere kalir :

— Oveckel. Fu dimroklá. Va koti zveri rozal aze kalil da sin kabdu jin va sint di belcad !!

Batedje, Tabaldak va tawaberetre is werdkuse is keltfalte is awaltblafote is teykere is rujodlukopte narar aze va yona cuisafa biaxinda epur aze ko ilamtafa furutsa kum cirdatalmuk iayana gan Bilotol veygadya plekur. Furutsa va fedaf almuk divdaakecked.

Tabaldak va furutseem dem biaxa kabduon rundar. Batakaf goyol van Tabaldak taneon abdulanir aze va bruxa zilir enide in va koti zveri di roksevar. Batakagoyol kalir :

— Va jinafa bruxa ta rinafa redusa kobara naril !! Jin zavzatá batakaf enide rumeik setiketed. Ilaneon va sinafo tawavo vamoetalatá enide va rin di setiketed.

Redusik kle toz kobar. Kan kere is beretre va vilbol ksevar. Kan falte va kseva pu edgabia zilir. Kan blafote va proklami ksevar akz-, vieli koti zveri tir dem kseva ke tuwava. Dace ede va dizvera va zveri co bedumul, pune co diepilel lizu Tabaldak va biaxa ta ksevara va koti rodizveni zveri al malnarir. Meka kseva tigisa bene beti zveri koe tuwava sometigir.

Edje in keon kobar, lani zveri dun funer. Ier, lorason wiltbotcer, va kotari nokier ise vulkur da va daava do berik gowalzilir. Ison va Redusik kevlanir aze pobaxar kalison da inyona biaxinda ae tid listackafa vox jebensesa ta biara va inaf cuisaf bruxeem. Redusik keon dun kobar. Zveri loloon tir funesi is wiltbotcesi is dure iesi.

Kabdu Redusik gire dimtalar aze va furutseem dem biaxa wiltason trovgar. Biaxinda trovgaweson va sint aotced nume tuebeltawecked. Bilotol veygadya kadime dranga tigir, yatkafa, mefolison va coba askiyina gan zveri.

Redusik, ware tis keapaf, va ebeltafa biaxa tredur aze ko warzafa furutsa vanburena gan Bilotol veygadya dimplekur. Va bruxa gin narir aze wan kobar. Mili funesi zveri bareon vantalar aze gin pobaxar, vexe banviele Tabaldak va sulem ben inieem vannarir aze ko ebeltafa biaxa levlavekar aze arte ma ontinapon madar, kalison :

— Batse rinafa kuranira, zveriji, numu jinafa. Kire al kuranickil, sotitil funesi is lorasi zveri. Gamion is lorason sotalatal. Kotari zveri va rin sokivatar nume yategatar. Gu Razama zo yoltatal.

Aze isker da zveri maltalar. Vexe me tir bocafi zveri. Bocafi zveri kabdu Tabaldak dulkon arttalar. Va aroafa linulara ke vilbol skaler aze pu Redusik kalir :

— Tabaldak, va zatca ke vilbol batcé. Co djumeyé da va jinaf bruxeem gu korfi ke rinaf reduks besal. Batinde besayan, van awalt ontinapon co rotalatá ise va yonu ivamupu co roconyukatá enide nazbeikeem va rinafa gijarotiuca co di witir. Co djutití rinafa leca tori rinaf oceem. Redusik gan dewitca ke zveri zo kontecker. Pu sulem kalir :

— Wiltsotcepel !!

Va bruxa bam narir aze ko ebeltafa biaxa perdoer. Va abica biaxa ben wiltotsa az anam berga moplekur. Va abica ben ault dere rewar aze va ge ke sulem krenugon tsenter, kalison :

— Batse rinafa kuranira, zverinyi, numu jinafa. Titil jinafa leca. Ontinapon talatal ise va baerdafu ivamu conyukatal. Va kotafa gijarotiuca plekutú nume oceem di witir. Titil antaf sulem rodemodisukes va awalt. Gu kiiz zo yoltatal. Ise ta setikera, kotviele tan jinaf oc va gerot dem intyona leca isu sulemuk kosidatar, pune va rinaf wilteem lecas va jin ticon rundatar. Titil nyapesik va jinaf oceem. Batse rinafa kuranira, zverinyi, numu jinafa.

Kuraní da grupel da batvielu, Abenaki saneik va bruxa ke kiiz ta epura va listafa zikexa malfaved ise tanoya kiizbruxa bene baerdafo plo sotigir.

  Xanto  
Vergumvelt Les oiseaux
Sutesik -
Piskura -
Ava Francava
Evla -
  Kalkotavara  
Vergumvelt Zverieem
Kalkotavasik Staren Fetcey
Piskura -
Evla 2011
  Krentduga  
Webesik Vieux Daniel
Krentduga Image:100%.jpg Tuenayana