Yon palsenaf pulviks pak01

Teliz mal Wikikrenteem.

Grablé kal exulera, aneyara

Yon palsenaf pulviks


Taneaf pak (arabavafo xanto)

1.1 In tir tela aliuca. Batcoba va gazaxo ke aliuca titfiyir, ise gan ava ke roti is gijarotiuca zo dakteyer, ise pu yon lekef katcilik zo razdayar. Va tisilapa al maldeswá aze kan lioza ke tciluca al besá, dum kavara va malyikeem enide va int gu gluyara ke Lorik gusagar ise bak blira va odiayan lag rokotaskir ise koe gazaxo ke swava va jwa ke lorafa ceakuca rokayestar. Ey nazbeik ke swava ! Batcoba tir jinafa taneafa pirda : va karafa is rubafa is ayewasa takra dil enide va savsafa is meroxonukasa is kotabafa nafaluca digil.

1.2 Ey nazbeik ke swava ! Sedme jin, va tela jinon lodalbana coba tir malyuca ; il ina me mangil ede va jin galpel, ise me frayel enide va rin rodirnú. Tuke ina miv vols volmiv rowitil, ise kan intafa grupera vols tela ke artan rogildatal. Va batcoba aldoanyal : tokinde gotil ? Arse, malyuca tir jinaf firviks pu rin, sugda ke jinafa vonucanya. Batdume va ina modisukel.

1.3 Ey nazbeik ke ayik ! Va int palses ko jinafe kotabafe tise is savsafa kotabuca ke tisila, va jinafa renara va rin grupeyé, batdume va rin al redú. Ko rin va jinafa ewava al gretcá ise va jinafa listuca al razdá.

1.4 Ey nazbeik ke ayik ! Va redura va rin al albá, batdume va rin al redú. Acum va jin renal enide va rinaf yolt romiwá ise va rinafa gloga gu swava ke blira tukotrá.

1.5 Ey nazbeik ke bli ! Va jin renal enide va rin rorená. Edeme, jinafa renara va rin mekane rozometer. Grupel, ey zanisik !

1.6 Ey nazbeik ke bli ! Rinafa fuda tir jinafa renara ; rinafa keltafa oga, tir warzafa tutanara gu jin. Vere kazokevel ! Mancoba mu rin koe jinafo keltafo gazaxo isu ilamafa nafaluca al zo kexir.

1.7 Ey nazbeik ke ayik ! Ede va jin renal, va int ilfil, ise ede va jinafa djumaskira aneyal, va rinafa me trakul, enide koe jin rotawalkel ise koe rin roblí, kotabon.

1.8 Ey nazbeik ke swava ! Tir dili mu rin anton ede va int ebgal ise van jin rwodel ; kire kan jinaf yolt volsu rinaf va int gotualial ise ko jin vols rin va fol gorundal, larde antaf zo djukaikrená.

1.9 Ey nazbeik ke blira ! Jinafa renara tir ralma ; bettan kofis tir bravakiraf is musedaf, ise bettan ilfis eglutur ise arse xonukatar.

1.10 Ey nazbeik ke pulva ! Til jinafa ralma ; kofil nume musedon blil. Jinafa renara tir koe rin, grupel enide va jin poke int rotrasil.

1.11 Ey nazbeik ke bli ! Til jinaf gum ise jinafi afi koe rin tigir. Ko ini va rinafa sizunta lirdel ise va jin anton aneyal ! Kire va rin gulaf al redú ise mo rin va kavara al plé.

1.12 Ey nazbeik ke bli ! Kan nubeem ke roti va rin al tazuká ise kan gelteem ke gijarotiuca al redú, aze ko rin va tisila ke jinafi afi al rundá. Gu batcoba zo djukakeldaskil ise va meka arcoba aneyal ! Kire jinafa skura tir kotunafa ise jinafa dirgara va rin seger. Me kobibel ise vol ilfolil !

1.13 Ey nazbeik ke swava ! Va rin kulaf al redú, acum tokdume va int gu wawuca tuomal ? Va rin olukaf al askí, tokenide va int rotustral ? Mal tisila ke grupera va blira al zilí, tokdume van artan va afi aneyal ? Kum kuritca ke rena va rin al asketcá, tokenide va artan dam jin roviunsul ? Van jin maldisukel enide va jin pof is gijarotif is miv laptes koe int rotrasil.

1.14 Ey nazbeik ke ayik ! Til jinaf digiks, voxe jinaf digiks me xonukar ; tokdume kival da awalkel ? Til jinafi afi, voxe jinafi afi vol tenanteyaweter ; tokdume va griawira kival ? Til jinafa aliuca, voxe jinafa aliuca vol tuspupiawer ; til jinaf gem, voxe jinaf gem meviele lameweter. Acum zavzal acaf gu renara mu jin enide koe gazaxo ke aliuca va jin rotrasitil.

1.15 Ey nazbeik ke pulva ! Van jin takaskaral ise va kotcoba rade jin ebgal ! Kire jinafa nafaluca trenar nume jinafa kalfelira me xonukar. Ede va artan dam jin co-trasil, manon, ede va tame kotabon co-joxal, kalaneyara co-tir giopafa.

1.16 Ey nazbeik ke afi ! Va kotcoba rade jin vulkul ise do jinafa swava tinefkal. Batcoba va tisila ke jinafa dirgara malfir, batdume sopul !

1.17 Ey nazbeik ke swava ! Gu jin zo djukakeldaskil ise va mek artan ta grelera aneyal, kire metan rade jin meviele va rin stapeter.

1.18 Ey nazbeik ke swava ! Me erul va coba mu rin galpé ; bam gu jinaf savsuteks ta rinafa tukiewara zo keldaskil, kire va batcoba impavantatal, ede zo co-djukeldaskil.

1.19 Ey nazbeik ke ribiegafa cora ! Ko jin va ki ke intafa swava al koswavá enide rotil jinaf fertik. Tokdume va jin al iskedal ise va ar renanik lodam jin al aneyal ?

1.20 Ey nazbeik ke swava ! Jinafa roka moe jin tir gijafa nume me zo rovulkur. Jinafa kavara va rin tir getcafa, me zo rotitalkar. Jinafa renara va rin wetce oga al askir, me zo ropalser. Jinafi afi tir exaksafi tori jin, me zo rotutapedar.

1.21 Ey nazbeik ke ayik ! Ben aal ke aliuca, tori rin va yon lokiewaf ilt al rumká ; tokdume ta yon lekiewaf ilon mangiyil ? Van lokiewaca tori jin koe keltafo gazaxo kle dimpil !

1.22 Ey nazbeik ke swava ! Va rin olukaf al redú, wori al tuomawel. Kal gropa reduyuna tori rin kle ranyal !

1.23 Ey nazbeik ke ilamtaf Tisik ! Tori kotabuca va rin rozá, wori, va xonukasaca aneyal. Tokdume il jinafa galpera ta keldaskira va rinafa mangiyil ?

1.24 Ey nazbeik ke ayik ! Va kona rinafa kima me kaikfil ise va mefudjera me imaxul ! Va vola ke rinaf lorik pirilel, va jiomik ke gijarotiuca is roti !

1.25 Ey nazbeik ke swava ! Kabdue wawik me milmuwel kire moe kelda va in nyapé ; ise ton gropaja va rin wí nume va rin kotvieli dojé.

1.26 Ey nazbeik ke bli ! Tokinde va intaf afreem rovulkul voxe va tel ke artan roviunsul ? Kontan batinde tegis, va in rotapsá !

1.27 Ey nazbeik ke ayik ! Icde kona troba ke artan va ravlem me sukel ede dere al trobal. Ede va bata dirgara co-kaikfil, zo co-rotapsal, ise va batcoba vrutá.

1.28 Ey nazbeik ke swava ! Ae grupel da kontan dirgas va malyuca pu ayik vox raplekus va rotaca vol tir ke jin kore va jinaf yolt co-burer.

1.29 Ey nazbeik ke bli ! Va medjugana coba pu kontan me dirgul ise va rinon measkina coba me pulvil ! Jinafa dirgara tir mana, va ina vegel !

1.30 Ey nazbeik ke ayik ! Pu jinaf zanisik va inon roteruna coba me vewal, kire inafa vola tir jinafa vola ; batdume, kabdue jin me til voldulkaf !

1.31 Ey nazbeik ke bli ! Abdi rozara kotviele va int jilarindel, kire awalk mo rin mewalzeson lubeter nume zo ganetel da va rinaf tegireem munestetel.

1.32 Ey nazbeik ke ilamtaf Tisik ! Gu awalk va daava staksakirik tori rin al askí. Nume batdume vanmanyawel ? Va afi koafisi va rin kan inafa wafuca al askí. Tokdume kabdue ini va int italkal ?

1.33 Ey nazbeik ke swava ! Kan daavaf warzoteem ke razdara va rin kiavá ; wivel ! Ko tumtafa tamava va rin rozá ; koe bata tamava zavzal nume dilion kotvieli roblitil.

1.34 Ey nazbeik ke swava ! Tumtafa swava va daavaf warzot icde tutanara pu rin vanburer ; acum tokdume tugabenawel ? Swava ke roti va rin koe intafo pako gruyer ; tokdume krulal ? Afi ke intafa vola va rin nyaper ; tokinde roteglul ?

1.35 Ey nazbeik ke ayik ! Anton tugabenawel ede ile jin til. Anton wivel ede vanlanil ise van jin dimlanil.

1.36 Ey nazbeik ke ayik ! Koe felbera ke rinafa takra wivel enide co-rotil bagaliaf gu kakevera va jin is tcazedara va jinafa listuca.

1.37 Ey nazbeik ke ayik ! Gu jinaf cuisaf gem va int me asregel ise gu rinaf pak ke jinaf ribiegaf sul va int me zelal, kivoe da kotvieli co-siputel !

1.38 Ey nazbeik ke bli ! Va jinaf mweem ta renara va jin vegel, ise va kota djumera ebgal ede va jinafa puvegara aneyal !

1.39 Ey nazbeik ke ayik ! Va kona jinafa dirgara me iskedal ede til duxibeyes va jinafa listuca, ise va meka jinafa pirdara vulkul ede va jinafa puvegara rozomel !

1.40 Ey nazbeik ke ayik ! Ede rem lumiskaf dark co-ipel aze va keltap co-exulel, va int levplekuson gu jinafa dirgara is tison dulkaf kabdue jin, va tildera anton di co-aneyal.

1.41 Ey nazbeik ke ayik ! Va jinafo pako siskel enide va buleem ke jinafa gijuca rorazdatá ise kan kotabafi afi va rin rokoafití !

1.42 Ey nazbeik ke ayik ! Kabdue jin til dulkaf enide van rin rubon di ropí ! Ta xultura ke jinafo pako ranyal enide rocenyé viele moe tawava wan til !

1.43 Ey nazbeik ke bli ! Moe jinafa tawava va jin miwal, enide koe jinaf kelt va rin ronamí ; batinde jinaf iteem isu rinaf zo felbeted.

1.44 Ey nazbeik ke uskej ! Rinafa oblaka tir jinafa oblaka ; kanon terektal ! Rinafa ita tir jinafa ita ; kanon gowil enide artu gloga va jinafa lugodafa tumtuca roslamel, acum artu int va emapa mu rin rovrutá.

1.45 Ey nazbeik ke bli ! Lagawalkel awalkexik koe jinafa kelda, kalaf gu jinafa puvegara is kagrupes va jinafi kexi : leve italk ke ilamkuca kake truduak ke aliuca do jin rodaykel.

1.46 Ey nazbeik ke ayik ! Undel ise kobral ! Moe ilavot djumawalkel oke ko gopa va fortey djugimal, ton awalkexik moo jinafa kelda, nume batkane rovanpil exaksara va jinafa dirgara is razdasik va jinafi afi pu fudapa ? Miltekon malyel, ey zanisik !

1.47 Ey nazbeik ke ayik ! Ox listuca ! Ede va usuk gu rinaf fortey co-bial, sedme jin batcoba tir logijafa dam redura va tame is afi ke toloya tamava. Lajupekal, ey zanisik !

1.48 Ey nazbeik ke ayik ! Tori kota coba tanoya sugda krulder. Sugda va rena tir glogapo lente jinafi kexi is keuca remi jinafa posara.

1.49 Ey nazbeik ke ayik ! Puraf renasik va jontika vanmanyara jugemeper, dum kevmadasik va ixera aneyar ise trobasik va segayera.

1.50 Ey nazbeik ke ayik ! Ede keveluca moo jinafa kelda va rin me zomer, tokinde va joya ke battan valeaf gu jinafa puvegara co-roradimofil ? Ede, remi rinafa djukakevera va jin, jontika duxara va rin me vanmanyatad, tokinde koe rinafa renara va jinafa listuca va afi zometel ?

1.51 Ey nazbeik ke ayik ! Zexa mal jin, jinafa vedistuca ; nutison tey is jaxadara, volson, afi is segayera. Keyul da vanon ipel nume di vanpil kotabafi afi is kruldesafa swava. Batcoba tir jinafa dirgara, vegetel !

1.52 Ey nazbeik ke ayik ! Viele triguca artfir, me wivel. Ise ede plukera va rin tazer, me vanmanyawel, kire sina remifitid aze griawitid.

1.53 Ey nazbeik ke bli ! Ede wawuca va rin tazer, me tugabenawel, larde ba vielany, Jiomik dem kuluca van jin pitir. Va plukera me kival, kire konviele, aliuca ben rin va int titickatar.

1.54 Ey nazbeik ke bli ! Ede rinafa takra va bata kotabafa is roxonukasa felira, va mana savsavafa is kotabafa blira, suver, bam va bata sedielafa is awalkolafa nafaluca ebgal !

1.55 Ey nazbeik ke bli ! Va bata tamava me viunsul, kire, kan tey, va moava posá ise, kan moava, va jinaf zanisik posá.

1.56 Ey nazbeik ke ayik ! Rin va moava djumel voxe jin galpé da va int guon tunuyal. Digison fogetil kulaf, voxe grupé da rinafa kuluca tir iliksantura. Ox bli ! Jinafa grupera tir mana ise rinafa gestira dere. Tokinde va jinaf vil do rinaf ronepalé ?

1.57 Ey nazbeik ke ayik ! Va kota jinafa kulaca pu jinaf wawikeem zilil nume koe kelt va ezba dem kruldesafa wafuca is yona jwa dem meroxonukasa aliuca rovansatal. Vexe, ox bli, firvira va rinafa gloga tir lodaliaca, anton tode kan jinaf iteem co-wil.

1.58 Ey nazbeik ke ayik ! Dopewa ke bli tir jinaf uskej ; gu kotcoba tukaral enide va int rotinké !

1.59 Ey nazbeik ke bli ! Rinafa takra tir jinafa oga ; tutumtal enide vaon titfí. Rinafa swava tir jinafo razdaxo ; tukaral enide koeon exaksawé !

1.60 Ey nazbeik ke ayik ! Va nuba mo rinafa takra enide, ayewas is draydes, va rin rovamofí.

1.61 Ey nazbeik ke ayik ! Kal jinaf kelt titfil nume va daava ke tutanara trasitil ise va vorany ke fromta ke kruldesafa aliuca rotulipitil.

1.62 Ey nazbeik ke ayik ! Weti jontik viel m orin edje va yona korcaca isu giopaf gestaks rotcayal. Tokedje moe ilava zavzatal liuges ? Divmodel ise ranyal, kire awalt tir mirastif nume va rin gu afi ke listuca rotir koafitir.

1.63 Ey nazbeik ke ayik ! Male zida ke tumtafa meftava, afi mo rin al jeber ise, moe Sinay ke rinafa takra, afiswava al sukar. Va int gu yon iltalk ke giopafa gestara tunuyal aze ko jinafa matela kofil nume titil gadiaf gu kotabafa blira is bagaliaf gu kakevera va jin. Battode awalk ik cu ik olyastera va rin me rozometed.

1.64 Ey nazbeik ke ayik ! Jinafa kotabuca tir jinaf reduks, mu rin al redú ; gu ina va kruja tori jinafa dopewa askil. Jinafa tanuca tir jinaf skuks, mu rin al asketcá ; ton vage naril enide kotvieli til muxara va jinafe kotabafe tise.

1.65 Ey nazbeik ke ayik ! Jinafa ilamkuca tir jinaf zil, ise jinafa gijuca tir bera va jinafa segayera mu rin. Icde jinafa fudjera, metan gildatar nume metan romuxatar. Ae, koe jinaf birgaf fuk is jwa dem jinafa dirgara, sugdon gu jinafa vonucanya varze zanisikeem is jinafa segayera va sane, al sú.

1.66 Ey nazbeik ke lorafa is merowina Tisila ! Weyonatal da va jin rorenal ise gloga skalteweted viele va jin miwatad ; kire gruuca va jin me rodegildar meie takra va jin roruldar.

1.67 Ey nazbeik ke listuca ! Ox jinafa swava isu kavara ! Ox jinafa segayera isu listuca ! Kot jinaf razdaks pu rin kan ava ke roti, is kot jinaf suteks mu rin kan bruxa ke gijarotiuca, va rinafa gildara isu defrera volsu gropa volsu pudacwa vadjed.

1.68 Ey nazbeik ke ayik ! Me grupel dume va rin lidam kottan male mila gopa al redú ? Enide metan va artan co-lavamofir. Me ten kobral inde zo reduyul ! Larde va rin lidam kottan male mila dorora al asketcá, gonotic antafa gloga, milboron fisa, kan mil art estusa, is moe mila tawava sokesa enide mal tel winaf ludev, ton winaf tegireem isu skureem, sugda ke tanuca is tisila ke nuyuca rotexaksawed. Jinafa pirdara pu win tir mana, pu afikorikeem. Kalobrason vegel enide va tumtilt ben aal ke ribiegafa aliuca rowarolatal.

1.69 Ey rin, nazbeik ke swava ! Til jinafa jwa kire ko rin va yon jinaf bulamard isu gruperakoba. Va sin gu kot diveik vanmia jinaf zanisikeem is kot lorbik ke jinafe sane kevnendal !

1.70 Ey nazbeik ke tel ranyayas kan inafa tisila koe inafo gazaxo ! Grupel da, mo rin, va kota tumtafa kofiga al suké ise pu rin va jinafa pulvira al razdapá ise kan rin va jinafa vonuca al tukotuná ise mu rin va jinaf jugemeks al jugemé. Acum, til valeaf gu jinafa puvegara ise til muntaf gu jin !

1.71 Ey nazbeik ke ayik ! Mo vapey ke rinafa swava, kan afisida, va kot jinaf razdaks sutel ! Ede me rotil, va sida kum tisila ke rinafa takra ial. Ede me jupekal, battode kan bata kerafa sida mopleyena moo jinafa kelda sutel. Bata tir zijnafa lodam betara vile jin ; inafi afi kotvieli solinver !

  Xanto  
Vergumvelt Kalimát-i-Maknúnih (کلمات مکنونه)
Sutesik Baxaxulla
Piskura
Ava Arabava, Persava
Evla 1857
  Kalkotavara  
Vergumvelt Yon palsenaf pulviks
Kalkotavasik Angela Wagner
Piskura -
Evla 2012
Klita -
  Krentduga  
Webesik Angela
Krentduga Image:Compare.jpg Tuenayana