Xidaxe ke Parma Luz04

Teliz mal Wikikrenteem.

Grablé kal exulera, aneyara

Xidaxe ke Parma


Balemeaf luz

Mecoba va in rodivmodayar, mei yona zeltara poke lima, mei sorera ke okol ustapan gan voltasikya. Vertega brugon jontikote dilfuyuna gan preussenafa okolervolia, remi kotraf afizcek fokevcenyeyeson, dimavlayar, oke arse van Franca otceyer.

Vombik, yikyeme, vagekiranyaf, ikarundayas va Macon, ve zo abaltayar ; vornokilik ikaplekus gu dirgara, batakusukkiraf guazik va vertega azavzayar.

– B… ! ~ in pu sayakikeem kaliyir, ~ remi sokasane, yatera anton viele volnik stegeyer… Va koti voki kalrojuc ise zo atac ! ~ in vogadason divieyer ; ~ dure voxo djukutolgenino gan preussenikeem !

Limama azavzayar, Fabrice ve divmodeyer. Awalt sumion titeon tiyir ; in zo gevapayar da riwe mielayar. Sayakik koe gojuca akoyepesa va minaf gradilik kotlizo vulteyed. In krupteyer da sin nuvelayad kindozaf.

– Tokcoba tir ? ~ in pu voltasikya eruyur.

– Mecoba. Zo anteyat, pinye ; preussenafa okolervolia va min abaltapar, arse. Kwestaf jadiwik taneon foliyir da tela minafa tiyir. Tetce, kirepton, va jin pomal nume va ksid ke Cocotte dimempat !

Konaka zeltara mal sanoya bora : minaf gradilik, gadiaf, va int kaliyir : « Voxe en, bak kotraf vielcek, me kevalieyé, va jadiwik anton fuzodeyé. »

– Gokevalié, ~ in pu voltasik kaliyir.

– Guaulawel, kevalietel, ise loon dam kuranil ! Dun kaldrasut.

Azon : – Aubry, jotye, ~ in pu pokolanis rizik ieyer, ~ va tira ke diremam gemeltgemelton disukel !

– Fu kevaliel ? ~ Fabrice pu Aubry kaliyir.

– Anse ! Va perfejuleem ta stutera fu plekú !

– Do rin laní.

– Va hussard okolikam gu rin juiké, ~ voltasik ieyer, ~ jotaf glastik tir takrelaf.

Aubry rizik mekalison laniyir. Anyust- ok sanoy sayakik vulteson kazokeveyed, in kadim indivakiraf persaalap va sin stayar. Batlize, kene aalxomo moe conyapa rundayar, ware mekalison ; kottan kapbure vegungik sanboron ik loon tigiyir.

– Ax, win ! ~ rizik kaliyir, taneatomon pulviyir, ~ abdi dirgara me tuyec, trakuc da va baroya aganta anton ware gic.

« Voxe tokcoba sokir ? » ~ Fabrice va int eruyur. Adim, viele di tiyir antafe do rizik, kaliyir :

– Va mek zelt dí.

– Stivawel ! Batliz abdulanil, arte alub-sanoya bora abdue aalxo, va kontan ke wawaf abaltayan sayakik ke vertega trasitil ; va inaf agantak isu zelt konaritil. Va bakanik me nabel, mex ! Va zelt is agantak ke atanyanik, ise keyul, enide gan minaf kontan me zo zeltal !

Fabrice malvulteyer aze dem zelt is agantak kalion dimvulteyer.

– Va ervo vajotel ise kadim bat aal va int aykal, voxe arse abdi jinafa titisa dirgara me zeltal ! Va Lorikap ! ~ rizik waljoaweson kaliyir, ~ va ervo dace me gruvajoter !... (Va Fabrice wan kalison pomayar.) Ede volnaf okolik van rin ta abaltara tcepar, va aal anamlanil voxe anton pokupon zeltal, viele okolik barboron titir ; rinafa fluga va inaf tantazukot riwe gonuzar.

Aze : – Va rinaf abaltap en mimal, ~ rizik divieyer, ~ goldeon djulubel, Lorikaj ! Man sayakikaj dure zo zilid !

Batinde kalison, va abalt miv nariyir aze zideson ilkabuyur.

– Rin, va zeltfrukti kan tiojesiki bosolal ! Meviele al zeltal ?

– Tí tcabanyesik.

– Lorik zo sisker ! ~ rizik repalepeson tolkaliyir. Arse me zeltal abdi jinafa titisa dirgara !

Aze mallaniyir.

Fabrice tiyir daavapaf. « Adim en fu kevalié, ~ pu int kaliyir, ~ va volnik fu atá ! Batgazdon, sin va min fixukad, voxe jin anton askiyí da va int gonatanon konedí ; ortasa exava. » Rilitapon anamdisukeyer. Arti gemelt, va per- ok anyustoya zeltara drumu int gildeyer. Vexe, me dirgambon va zeltara, kadime intaf aal guaulaweyer. Riwe mielayar ; va rupol koe Tramezzina mevtava vamoe Grianta fogetcabanyeyer. Ton tcabanyesik ve rieteyer ; va aganta div agantak nariyir aze va vilt griiksantuyur : « ede va rin wí, di gomebulfé », aze askiyir da bat taneaf vilt ko zeltbuli kilder. In drum intaf aal va toloy vordot ve gildeyer ; miledje va falton vagekiraf okolik kabduolakis is talton ronulakis wiyir. « In tir loon barboron, ~ pu int kaliyir, ~ vexe male mana soluma, tí lanaf gu jinaf vordot » ; va okolik kan zeltnaav radimefinyiyir aze adim va walkila ve xuvayar ; okolik do inaf okol lubeyer. Minaf gradilik fogetcabanyeyer : van inton balieyen olkom daavapon vulteyer. Va ayik nuvelayas awalkes ixam uzayar, viele, ton mefolisa kaliuca toloy preussenaf okolik ta abaltara van in ve gepoyteyed. Fabrice van aalxo otcepeyer ; enide loon vulter va zelt mimayar. Preussenaf okolik sum baroya bora anton tiyid viele in va warzafo taplekuxo dem rontanyaf persaalam pwertaf dum ma kene aalxo artlaniyir. Bat persaalam va toloy okolik azavzamayad, vexe remlakiyid nume remo senta toz tolonkayad. Tolon va in riwe zomeyed viele walo per- ok anyustoy aalap anjeyer. Batoulon, intafa vola gan teyka ke alub- ok tevoya zeltara kabduuon riwe ve zo anteyaweyer. In ve takomayar ; viele ve madayar, lente rizik tigiyir.

– Va tel rinaf al atal ? ~ Aubry rizik eruyur.

– En, vexe va zelt al drasú.

– Zelt va min me graced, til palikany ; damo rinafa logastafa tiva, va rinaf vielcek al wanyal, voxe bat sayakik va bat toloy onkasik va rin van int su gracad ; jin me wiyí. Dure wiluon goyatet, vertega tce tir arte lieue lumanyusteaca, ise, ostik, tir solumama dem werdxo lize zo rolyestapat.

Pulvison, rizik vabdue intaf sanoy ayik kalion laniyir. Arti tol-sanoya bora, kolanison va pulviyino werdxomo, bakayan jadiwik buren gan inaf tcicerafayik is kwik zo kakeveyer.

– Va balemoy ayik pu jin fu zilil, ~ in ton brigafa puda pu rizik kaliyir, ~ kal okildirem zo goremburé, jinaf nimat nokodayan.

– Ko K… zo emudel ! ~ rizik dulzeyer, ~ rin is kot jadiwik. Kot win va Ginik batvielon al relmec !

– Tokcoba, ~ jadiwik yatkon kaliyir, ~ va jinafa dirgara vol gildel ! Grupel da tí B*** biptik jadiwik, dirgasik va rinafa vastora, ikz-

In va blayak di askiyir. Tcicerafayik va yon sayakik ve ipeyer. Rizik ko ma ve flugayar aze borajontolason do intafa lospa mallaniyir.

– Meem is nimateem ke kot dum rin zo ronokodad ! ~ rizik vogadason tolkaliyir. ~ Kot zolonikaj ! Kot battan va int doleyes pu Bourbon is relmes va Ginik !

Fabrice va bata aklafa buntura nyebanon terektayar.

Moni sane bartiv bak siel, run widapa disa va konaka nilafa nuda, milkam va vertega kazokeveyer, vexe Fabrice katcalayar da Aubry rizik taruteyer da pu mek fayik pulvir.

– Vol rotabdulanit ! ~ rizik divieyer.

Kotbata nuda gan nugervolia is yon okolik is nelkon yona kaburervoliafa yultava isu ckanta zo tervayar. Rizik art baroya bata nuda va int atoeyer ; tidi tol-sanoya bora, azavzara : kottan vogadayar ise mibuweyer.

– Ware kon relmesik dirgas ! ~ rizik divieyer ; ~ ede volnik rieter da va wida voklakir, min dum vakol zo tuxaasat. Win va jin kadimelanic.

Fabrice disukeyer ; do rizik peroy sayakik anton tigiyid. Remo fenkuyun tuvelap va kuskap kolaniyid ; aze mal kusk va okolxe remlaniyid, ke dane tuvelam va matelama vansayar. Sin gemelton egluyud, canistoon krabes. Aze adim, va gleida remlanison, va dentxopo tigiyid. Bad le bartivmiala, nyapen gan yone ie is dojaf lor, va vawapa kaike wida dimtrasiyid. Kelor ke bata vawa tiyid kotraf gu jovleyen zelt ; Fabrice va tanoy solnariyir, vexe neke mantapafa vawa gan yon otcesik isu lima zo tervayar maneke bad bartivmiala rizik is Fabrice alubdecemboron nemon al abdulaniyid ; konaktan kaliyid da bata vawa kal Charleroi jupayar. Ba mamlera va san-tane male bartivela ke wida :

– Remo tawaday tolon lanit ! ~ rizik divieyer.

Milkam mea tiyir dem baroy sayakik is rizik is Fabrice. Arti lieue lumbalemeaca mali vawapa :

– Mea defré, ~ tan sayakik kaliyir.

– Jin dere, ~ artan kaliyir.

– Man warzotany ! Kot min batinde tit, ~ rizik kaliyir ; voxe va jin vegec nume di tinyic !

Va alub- ok tevoy aal kene keloram iste dentxopo wiyir.

– Kal batyon aal ! ~ pu kottan kaliyir ; ~ batlize senyac ! ~ artlaniyison loplekuyur, ~ voxe arse meka lorara. Vexe, abdi komodera, toktan va beg gir ?

– Jin, ~ tan sayakik kaliyir.

– Zilil ! ~ rizik mumapason kaliyir.

Va beg alubon pakayar aze va teli kimi nariyir.

Ba bartivbalemeaca abdi awaltara, ~ estuson kaliyir, ~ volnafa okolervolia va min fu ruzader. Vol isket da sin abaltad. Antaf sayakik koe bata azekapa zo atatar ede okolik tid, volse aluboy va int rogiwad : do jin monepon zavzac, anton pokuon zeltac, nume sieleldeon koe Charleroi ape titit.

Ba tanoy bartiv abdi afizara rizik va sin dimodayar ; askiyir da ervo zo tolvajoteyed ; moe vawapa wan iyeptayar, mali kotraf sielcek : dum sumuon gilden lor ke soist.

– Tid namulol otces, ~ Fabrice pu rizik ixakon kaliyir.

– Stivawel, jotikaj ! ~ exukes rizik kaliyir.

Aze baroy sayakik ponas va kotafa ervolia do Fabrice va in zideson disukeyed, dum ede in co-lamtayar. Va cos al pobaxayar.

« Batcoba tirsir ! ~ minaf gradilik trakuyur ; ~ dene ikagazik koe Milano ixam al katcalá ; sin me yated, me ! Dene bat francikeem va ageltuca gonomekalit viele inafa giopuca zo lemister. Voxe va inafa ikorafa tiva nulé, gotugildaná. » Sin arto alub-decemoya bora ile bat soist dem otcesik besas va vawapa ware laniyid. Arti tanoya lieue lum, va kelda zomesa va vawa lize jontiksayakik senyeyed rizik is milk remlaniyid. Fabrice va okolany ika balem-sanoy franc talolk lusteyer, ise vanmiae jontik anamjovleyen abalt va tan rontapaf trumapon solnariyir. « Larde gonuulat, bat tir tel lokiewaf. » Va int batinde kopaasleyeson, in askiyir da okol di tcepayar aze va abdulaniyis rizik boreon kazokeveyer. Moe sudoteem va int tuacayar, va abaltak taltenubon nariyir, aze pu balemoy francik kaliyir :

– Batyon korik otces moo vawapa nuvelad milkava dem namulol… Lanid dum kovudan namulol...

Kore Fabrice va namulol ravlem vuleyer, inaf palik mea setikeyed da weti tanoy bartiv gan bat ravlem zo mibuyud. Batkane tan kevaxaks wal italiafa anda isu francafa relmewer ; francik ape tir tel lokalaf, va bifeem ke blira sokildegar ise sozavzal meeksaf.

Me palset da Fabrice pulviyison va namulol gan int zo keldaskiyir. Sin keyakseson laniyid. Arti toloy lieue sum, rizik wan gevapan men wison va volnafa okolervolia, pu Fabrice kaliyir :

– Til minafa okolervolia, van bat diel moe bat tawarnam tcepal, pu tawadayik erul ede in va estuks djudoler, kalinyil da anton tit aluboy. Ede in klabur, va aluboy abdif franc talolk ke rinafa erba zilil vexe tuaulawel, kaiki miafizestura va batakaf talolk dimnaritit.

Fabrice va rizik disukeyer, ko int va merorelatcena gorestuca is tivanya va lidafa vamoeuca wiyir ; ve koveger. Kotcoba dilizeyer inde okilaf dirgasik al abdiwiyir, voxe Fabrice karakeyer enide aluboy franc talolk ziliyin pu tawadayik me poon di zo dimnariyid.

– Erba tir ke jin, ~ pu palikeem kaliyir, ~ mu win me dodé, ika nak inon ziliyin pu jinaf okol dodé.

Fabrice va francava tiyajayar maneke palik reme inafa pulvira va vamoeinda fopestaleyed ; ve zo lemistepeyed, nume batvielu koe intafa swava toldoaliera teni afizcek egaweyer. Sin va in amidapaf gu int krupteyed, lemistenon ; volson Fabrice toz pesteyer napaf gu sin.

Sin tolbartivon mekalison laniyid viele rizik, disukeson va vawapa, daavapon divieyer :

– Batliz, vertega !

Sin va vawa boreon artlaniyid ; voxe kax, aname kiiz le tol-decemoy ayik tiyid. Ita ke Fabrice va voltasikya boreon awiyir : in laniyir, ton keraf iteem ise gemeltgemelton boreyer. Fabrice va limama is Cocotte giopon aneyayar.

– Guinen, drasun, dubien ! ~ voltasik divieyer dulzeson pu disukera ke minaf gradilik.

Battel, va mecoba kalison, va okol titlaniyir, va fexa nariyir aze pu voltasik kaliyir :

– Tidlanil !

In va toleafa toma me ve ker.

– Va sudoteem tulotrelal, ~ askiyir.

– Moe okol inkenyeyen, va kote egale ke mielcek pu Fabrice toz pwardeyer. Teni abrotcapafa nega, kalterektana gan minaf gradilik, dan va mecoba ape grupeyer voxe va krenugafa nuca pu voltasik nediyir, in loplekuyur :

– Voxe batse francik va jin al ellaked ise al alied ise al emoyad…

– Tokcoba ! Me gan volnik ? ~ Fabrice ton ixakafa tiva tumempesasa va intafa gorestafa is zwafa volanya kaliyir.

– En til kwestaf, pinye ! ~ voltasik kaliyir ikuzason vox kiceson ; ~ ise damoon, til agralanyaf.

– Ise inde va rin wil, in va inaf preussenik en al atar, ~ Aubry rizik kaliyir, xuyavon tigis kaike okol do voltasik vanmiae jadifa erna. Voxe in tir oklaf, ~ tizik trenayar…

Fabrice ve liziweyer.

– Ise tok rinaf yolt ? ~ rizik trenayar, ~ kire en, ede munestera titir, va rin djuyoltá.

– Jinaf yolt tir Vasi, ~ Fabrice ton manafa siva dulzeyer, ~ trabe Boulot, ~ ildunupuson loplekuyur.

Boulot al tiyir yolt ke dagisik va vawalipi bulkayani pu in gan fuxedjasusik ke B… ; veyarinton trumon al vayayar, lanison, kire toz undemeyer nume gan koncoba mea zo gevayar. Valev vawalipi ke hussard sayakik Boulot, va italiafa remeluxaxa tciamon videyer, tuke dana va xuvasabesikidolesik Vasi oluaf yolt ronovespeyer. Viele rizik al culimeyer da in tiyir oklaf, riwe al dulzeyer : « Jin, oklaf ! Jin, Fabrice Valserra, marchesino del Dongo, djuprobures va Vasi yolt, va tel ke xuvasabesikidolesik ! »

Edje in undeyer ise pu int kaliyir : « En gonamí da va Boulot rozú, edeme dratcemb flint titir », rizik is voltasik va konak ravlem icde in al walkaliyid.

– Me buntul da tí rilitaf, ~ voltasik pu in ten rinuson kaliyir ; ~ ta rinafa tukiewara bibé. Toktan tir, en ?

Fabrice taneon me dulzeyer ; krupteyer da va lodabidas nik ta pirdura meviele co-rotrasir, ise govopirdupuyur. « Va gejawidava fu kolanit, bowesik va toka jinuca djugrupeter, ise va flint obrá ede kan jinafa yona dulzera bazé da koe 4-eafa hussard vertega dem jinaf tantazukot va metel grupé ! « Wetce ruptesik va Östera, Fabrice va adrafa zolonuca ke remeluxaxa grupeyer. Inaf yasik, soe oluaf is abidaf, soe pasus va wayaso pako, katecton gu intafa remeluxaxa tolsanon is loon al zo ksabeyed ; acum bibera ke voltasik va in me lemisteyer. Vexe, abdi dulzera edje va telyon lodaftaf francavaf ravlem aneyayar, voltasik rilitapon puilen, loplekuyur enide in toz pulvir :

– Aubry rizik is jin ta nyapera va rin fu boyanyat.

– Arse, ~ Fabrice dulzeyer. ~ Va Vasi rozú ise tí ke Genova ; jinafa berikya, kotgrupafa gu listuca, va redakik al kurer. Dume anton tí sanperdaf, in askiyir da pokon di piyí ise va Franca di wiyí ise da di zo tazukamayá ; va in koe Paris me trasiyison vox grupeson da in do bata ervolia tiyir, al pí, kotliz giopon al aneyá. Sayakik gevan gan jinafa tiyarinda, va jin al soped. Va erba giyí, nume pu batultik lekon al zilí, pu dan pu jin bulkayas va vawalipi is tantazukot is kaliyis : « Mallanil, ise ixul da va jinaf yolt meviele tiyatal ».

– Tok inaf yolt tiyir ? ~ voltasik eruyur.

– Al bosá, ~ Fabrice kaliyir.

– In over, ~ rizik trenayar, ~ batultik tir vligunik, vexe palik me goyoltar. Voxe tok tir yolt ke redakik , ke kurenik ke rinafa berikya ? Grupeson va inaf yolt rotaneyatav.

– Teulier, redakik dene 4-eafa hussard vertega, ~ minaf gradilik dulzeyer.

– Kle, ~ rizik vepokanyon kaliyir, ~ golde tiyarinda sayakik va rin gu toidesik al krupted ?

– Batse krizaf ravlem ! ~ Fabrice ton jebes iteem divieyer. ~ Jin maneke renas va Ginik is francikeem ! Batse tela loksabesa pobaxa !

– Me pobaxa, batcoba va rin coer ; roklara ke sayakik tiyir rogildepena, ~ Aubry rizik tolkaliyir.

Bam axabapon pebuyur da dene ervolia kottan va rumala pasur nume va tantazukot goburer, edeme ovopon gu toidesik zo krupter. Volnik va jontik levstakser : kottan koe bata geja relmer. Kralkeem tidu iteem ke Fabrice ve luber ; in taneatomon gildayar da icde intafa kotcoba tolaksaton sokiyisa kioveyer.

– Jotye va kotcoba gopwarder, ~ voltasik dem lololulana rilituca kaliyir.

Fabrice vegeyer. Tenion :

– Icdeon, ~ goreston pulvison pu rizik voltasik kaliyir, ~ bat oyik me tir sayakik ; va gejaja fu askit larde zo kaikaliet ise zo relmet. Tokdume in va niskeem mu lorik faston co-isker ?

– Dace, ~ rizik kaliyir, ~ in va zelt meinde gruvajoter. Jin va vordot atayas va preussenik al vajoté.

– Ostik, in va erba pu bettan nedir, ~ voltasik loplekuyur ; ~ vielu do cin mea tigitir zo dubiepeter.

– Tel taneaf kakeveten levefayik ke okolervolia, ~ rizik kaliyir, ~ mu intafa ulira enomatar, aze in mu volnikeem rotir zo kseldutur, kire kottan relmer. Tel taneaf bettan djiatar da in radimlanitir, nume skutur ; kofison va cinafa vertega loon co-askir.

– Volgue, vay, rizik ! ~ Fabrice blion divieyer ; ~ okollakira tir lovrendafa, ise ostik va zelt me gruvajoté, ise dere al wil da okolú.

Fabrice ve tiyir oklapaf gu bata dewitcama. Va fliderapa va inafa stekeuca wal rizik is voltasik me munesteté. Fabrice katcalayar da bat korik va kot goaspil ke inafa rupa baron ok balemon dokalison tolkaliyid : va yona uculera ke sayakik, is va batultik doles va vawalipi is tantazukot, is tode in va fuzodera va tcodik arinton al pakeyer, is va win tcepas Ginik, is va atan okol, ikz-.

Ton ayikyafa rilituca, va ask inde in gu okolany lusteyen sedme inafa pirdanya zo nabeyer, voltasik tanion dimpiyir.

– Al pestalel da bene nugeem zo nariyil, moo ault ke okol vion al zo impal, aze mo sid al zo debal ! ~ « Tokdume in va batcoba minon ixam grupenyeyena liviele tolkalir ? » ~ Fabrice pu int kaliyir. ~ In me grupeyer da koe Franca saneik va rieta batinde sokaneyar.

– Tokote va erba digil ? ~ voltasik ve eruyur.

Fabrice me klabuyur nume dulzeyer ; tiyir lanafe gu glogolukuca ke bata ayikya : batse kriltany ke Franca.

– Koton, bar-sanoy moavaf napoléon is alub- ok sanoy écu talolk ware gí.

– Battode, kabdu rin joya fenkuwer ! ~ voltasik divieyer, ~ div bata kalaliena ervolia yatel ; voklakil, va taneafa fetamayana trasitina vawa ronon kenolakil ; va okol acon abduplatil, va ervolia tanion illakison. Ba taneafa katecta va yone unaykafe vage lustel. Viele arte anyust- ok sanoy lieue sum ise va sayakik mea witil, va sarvadirem naral aze koe kona widavanya va int anyustkon tildel ise va atelanya estul. Pu kontan meviele kalil da va ervolia al pakel, kire batultik va rin wetce emdusik co-tredud ; ise beka til agralanyaf, jotye, ware vepokansaf tode pu batultik co-gonodulzel. Vielu bene int va glastafe vage buretel, va vawalipi sollipapal nume va ageltaf yolt dimnaril ; kalil da til Vasi.

Aze : – Voxe toklizu in tir, gokalitir ? ~ in pu rizik askiyir.

– Male Cambrai-sur-Escaut : batse widavamanya, gildel, ise lize wevala is Fénelon tigid.

– En, ~ voltasik kaliyir ; ~ meviele kalil da va meld al pakel, icde B… ik batultik doleyes va vawalipi me ravlemsukel. Viele va Paris djukolanil, va Versailles taneon vanolanil aze va tuvel ke Paris batlizo remlanil, zikason is lanison dum gozasik. Koe rija va rinaf talok asadal ; voxe loeke, viele va koncoba gododel, va erba adrafa gu dro anton nedil. Voxe argé kire fu zo restel ise va kotaf digiks mbi dubiel, acum va tokcoba erbiskon askitil, rin me grulinulas ? ikz-

Voltasikany wan pulvipir ; rizik va inafa yona boyara tidtakason zobeyer, me rotimpavantason va amlitam ta pulvira. Laizon bati tari besasi va vawapa, va bora taneon jontolayar ; azon va keloram talte vawa tanoulon remlaniyir, aze vultepeson toz otceyer.

– Kazakik ! Kazakik ! ~ jontiktan ieyed.

– Va okol dimnaril ! ~ voltasik divieyer.

– Lorik kalweyonar ! ~ Fabrice kaliyir. Tcepac ! Otcec ! Pu win zilí. Va koncoba ta lustera va diremam kuranic ? Lik ke jinaf digiks mu win.

– Va okol dimnaril, kalí ! ~ zides voltasik divieyer.

Nume latitlaniyir.

Fabrice va abalt ve impayar :

– Va int ginyil ! ~ ieyer, aze kan azekom va okol tolon ok baron abaltayar, nume in toz tcepayar ise va otcesikeem radimlaniyir.

Minaf gradilik va vawapa disukeyer ; levion bar- ok balem-decitoy olkik tandewed, va sint licas dum tawadayik kadime ezgalday. Moi kazakik ravlem in va kontan mea wiyir ; otcesik va yoni shako edji isu zelt isu abalt ikz- al jovleyed. Gevane, Fabrice va taya rone kelda tidlaniyir ; va krileem ke vawapa is azeka disukeyer, voxe va meka conyuta ke kazakik wiyir. « Nickik, batyon francik. Larde goronlaní, ~ in trakuyur, ~ ven gomallaní ; tce landume bat korik al malvulted. » In va zelt treduyur, va vajotera ageltayar, va merizgoa kaliziyir, va frukti tucuayar aze va udapayan agantak solnariyir, aze tolon anamdisukeyer ; en tiyir antaf iste bata azeka levion dem taripi. Sumepon, va otcesik toz griawis kadim yon aal is wan vultes wiyir. « Batcoba en manafa ! » pu int kaliyir ; aze setikeson va arintafa tiura ke rizik, ist dentxo fu debanyayar. Me illaniyir kire va inaf nikany djutolwiyir, va voltasik is Aubry rizik.

Koe bat dent, ageltayar da san-anyustoy napoléon talolk zavzayad, ute bar-sanoy dum in trakuyur, voxe va yon duzam gazdon aykayan ko agdiz ke staz ke hussard okolik koe mawa ke fuxedjasusik koe B… giyir. Va napoléon talolk preyutanyayar, undepeson va bata lilaizafa griawira. « Kas abditajara pu jin ? » pu int kaliyir. Lofa batcera tiyir da va Aubry rizik me al icdeon bibeyer :

« Kas va meld en al tcoké ? » In foliyir, voxe arse co-tiyir tel lokalik tode co-tiyir lanaf.

« Soe, ~ pu int kaliyir, ~ dem yolt ke flintik al tcoké, koe ucom va vawalipi ke flintik is ostik inafe vage bene int giyí ! Batcoba tir baliafa gu enipa : va tokcoba Blanès adlutik co-kaliyir ? Ise bat kimtaf Boulot awalkeyes koe flint ! Kotcoba larbudajar ; bali ko flint va jin statar. » Fabrice va kot digiks co-ziliyir enide gruper ede Boulot hussard sayakik en tiyir gunaf ; namison fosetikeyer da fuxedjasusik ke B… al kaliyir da battan zo treduyur osk ta dilgavaf zoratc voxosk kire va jaftol al dubieyer ise va inaf tawadayik al kaikalieyer : Fabrice me etrakayar da konviele golde rola kapbure tela ke Boulot sayakik di zo co-koflintayar. Va Blanès adlutik, va inaf nik, trakuyur ; va in en co-djurupeyer ! Azon, setikeyer da mali divlakira va Paris pu ziavikya me al suteyé. « Volkalafa Gina ! » pu int kaliyir nume tit iteem va yona ikuza pesteyer, viele loram pokepon gildeyer ; sayakik askiyir da baroy grifexayan okol va dent estuyud kire nuvaeleyed ; in va sin kan fexama giyir. Fabrice ranyayar nume dum tovok sayakik ve vuder. Minaf gradilik ve katcalayar nume iskuyur da va hussard okolik tciyordamayar.

– Tanbat okol va jin pasur, t… ! ~ in divieyer, ~ vexe soe pu rin va aluboy franc tal fu zilí, ika rinafa zegara da van jin batliz al kojupal.

– Kas va jin sil ? ~ sayakik kaliyir.

Fabrice arte tevoya bora va in tcorkulmeyer.

– Va okol ilnaril oke va rin anteyá !

Sayakik va zelt keve ge vendayon bureyer ; lanarison epitazekayar.

– Ede betinde zekal, di awalkel ! ~ Fabrice vanvulteson divieyer.

– Ae ! Va aluboy franc tal zilil nume va okol naril, ~ gojaf sayakik kaliyir, batceson itayason va vawapa lize metan tigiyir.

Fabrice, tideon taltenubon gison va zelt, va baroy alubaf franc talolk ronenubon ve vanmimayar.

– Titlanil, oke di awalkel ! Va ebeltaf fexal aze do ar toloy illanil… Va rin anteyá ede kalizimil.

Sayakik tairdason kevvegeyer. Fabrice va okol vanlaniyir aze va fexa anam taltema plekuyur, wan disukeson va vion illanis sayakik ; arti alub-sanoya bora mo okol oriwon ve grableyer. Moion va ronef sudot kan nuga aneyayar viele va azdas vilt pokopon ve gildeyer : batse sayakik zeltas. Fabrice, ve zides, van otcepes sayakik toz tcepayar, voxe kadimion va in lakis is tcepas moe tan toloy okol ve wiyir. « Ae, in dive zomera », pu int kaliyir. Lusteyen okol tiyir cuisaf vox nuvaeles. Fabrice van vawapa dimlakiyir lize men blisik tigiyir ; remlakiyir aze soreyer kal taltefa dampa lize va voltasik djupotrasiyir ; vexe viele tideon tigiyir, arte lo tanoy lieue lum va konak sostayan sayakik anton kozwiyir. « Va in tce mea tolwití ! Sintaikyanya ! » pu in repaleson kaliyir. Va sumeon is roneon kozwin diel artlakiyir. Va okol metitlanison is abdidodeyeson, va granja gu legaf okol ziliyir, gu aeles eke in va wird bugdayar. Radimi tanoy bartiv, Fabrice moe vawapa soreyer, djupodimtrasimison va Aubry rizik ledam voltasik. Wan lakison is anamdisukeson, va wedafa kuksa dem vwepamafa intafa za artlakiyir. Vabdue za, rone vawa, tigiyir va antafa mona dem Cheval-Blanc sugduka. « Batlize fu sielestú », Fabrice pu int kaliyir. Okolervoliaf fayik dem vendayon ma rune za tigiyir ; moe okol tiyir ise nuvelayar gabenapaf ; sanboron baroy lanis okolik va plo djeyed. « Tid korik va okol sivon rovolusted ledroe al dodé, » Fabrice trakuyur. Bakayan fayik is baroy lanisik va in vanlakis disukeyed ise nukeyed. « Va kuksa roneon co-kenlakí lodame va bata za co-remlakí, batcoba tce co-tir vawa co-pirdana gan voltasik div arge… En, ~ minaf gradilik pu int kaliyir ; ~ vexe ede otcé, eldeon tití kinokapaf : ostik jinaf okol tir duganyaf, voxe tel ke fayik tce cuer ; ede in va jin laplekur, tcepatá. » Batinde undeson, Fabrice va okol licayar ise boramon abdulakiyir.

– Abdulakil, hussard okolik, ~ fayik tafreon ieyer.

Fabrice abdulakimiyil aze azavzayar.

– Kas va jinaf okol djunaric ? ~ in ieyer.

– Anse ! Abdulakil !

Fabrice va fayik disukeyer : in va batakafa nyoxa is tela losintaafa tiva diyir ; tiojesiki levgisi va inafa taltema tiyir forteykirapafi, ise ronenuba anamplekuyuna gu grita dere milinde. « Batse lanisik van fexa ke okol fu grables », Fabrice pu int kaliyir ; vexe kaldisukeson, wiyir da lanisik dere al zo bakayad.

– Yoltoe poruca, ~ fayik dem vombafe epitusize, ~ wetce greltasik batlize digil nume pu kot witin dragon okolik iku chasseur iku hussard kalil da Le Baron vombik koe bata yorida tigir, ise benplekú da sin va jin fu zokeved.

Guazaf vombik nukranavepeyer ; mali taneaf ravlem va minaf gradilik al levrotiyir ; in freon dulzeyer :

– Tí jotapaf, weltik, inde kontan va jin co-djuterektar ; va suteyen dirguks co-olegá.

– In over, ~ vombik kaldisukeson kaliyir ; ~ La Rose dise va ronenuba, va dirguks sutel !

– Mekalison, La Rose va migajeyaf buak divucomayar, va konaka conya suteyer, aze sollipason va toaz, pu Fabrice bulkayar ; vombik va benplekura pu in tolkaliyir, loplekuson da arti toloy greltaf bartiv, in malyon di zo ikarundayar, gan tan baroy bakayan okolik do in. Va batcoba kaliyison, in do sin va yorida kolaniyir. Fabrice va sin lanis disukeyer voxe arte intaza zavzayar meliziwes, dume gan brigaf is amlitaf kranav ke bat baroy koredik al zo pedrapayar. « Nutid diwedayana zolka », pu int kaliyir. Adim va soayan toaz fenkuyur aze va bata benplekura beliyir :

« Le Baron vombik, ke 6-eafa dragon vertega, dirgas va 2-eafa taksa ke 1-eafa okolervoliafa vastora ke 14-eafi ervoliaki, pu kot okolik is dragon is chasseur is hussard da sin va za me goremlakid ise ko Cheval-Blanc yorida poke za va in gokazokeved lize inafo dirgaxo tigir.

Koe dirgaxo, poke Sainte za, ba 19 tev- 1815.

Ika Le Baron vombik, bakayan gu ronema, is yoke inafa benplekura, La Rose tidrizik. »

Fabrice tiyir greltik moe za mali anton bartivmiala viele va tevoy artlakis chasseur okolik isu baroy lanis wiyir ; pu sin va benplekura ke vombik goler.

– Fu dimlakiv, ~ balemoy lakis chasseur okolik kalid, ~ aze va za sorepeson remlakid. Artan zavzas va benplekura tenon tolerur, aze divburer kalison :

– Pu jinaf palik ape dimlakitis fu buré, va sin acon kel !

Nume tcepason mallakir ; inaf palik radimelanir. Kotcoba ve dilizeyer.

Fabrice, yatkafe, va tan bakayan sayakik awis kadime tan dilk ke Cheval-Blanc yorida rozayar. Bat sayakik, win dem mepta va tidrizik gan Fabrice, titlaniyir aze vanlanison ieyer :

– Va abalt koe nuba ! Til greltik !

Fabrive vegeyer aze kaliyir :

– Sin va benplekura al ilbured.

– Gan arintafa arienta al zo zuned, ~ bantan brigon tolkaliyir. Pu rin va tana jinafa westa fu deá ; ede bettan va djiara poar, tidon vordotal, artlanití ike vombik miv awitir.

Fabrice va akoyerinda ke tidrizik ba daktera va malnariyin benplekuratoaz al katcalanyayar ; gildayar da ilkafa pobaxara dolge in tiyir, nume pu int abdiplekuyur da mea di zo tafuyur.

Ervokiraf gu milostwesta ke tidrizik, Fabrice va grelta al tolgiyir viele van int va peroy artlakis hussard okolik wiyir : va int al korundayar inde va za oblayar ; pu sin va benplekura ke vombik goler, sin zo nukevitsapad, tel lolaoik laremlakir. Tarkason va proyafa vexa ke voltasik nik dan, gazdarinton pu in kaliyir da puilera lodam abaltara, Fabrice va uul ke rontaf abaltap omar aze va bet sin co-poas va djiara nujitazer.

– Ax ! In va cin djumatar, jotikaj ! ~ hussard okolik divied, ~ dum ede arinton zo atansayav !

Sin belcon abaltimpad aze van Fabrice iped ; in fogesawalker vexe va akoyera ke tidrizik ve modavayar batdume vol tolon zo djuvliguyur. Moe za dimelakison, lagabaltuulayar. Tiyir atedapaf nubason va bat rontaf abaltap ke okolervoliapa, dure gamiarsaf tori in, maneke hussard okolik va tok zolkomen olkik boreon vofad ; bam aneyayad da me di bakayad voxe va vage bene alto di gabeyed. Fabrice va bar- ok balemoya abaltara mo ma batinde kazawayar. Luxe in, ware sagaf gu vexa ke voltasik, va jontika uulara godjon kabuyur. Aje tana uulara va hussard okolik ben nuba ve bakayar : zidepes uzayanon gan man sayakik, in kan aludevafa uulara zomesa va jaday ke Fabrice dolzukeyer. Vorda ve tiyir uzasa kire okol ke minaf gradilik, lodame il rwama otceyer, nupuveguyur nume va ruzadesik ipeyer. Wison va fortey traspus ken ronema ke Fabrice, battan kivayad da va vefara al ilplatirsiyid, nume, van taltef zakrast va in platison, tcepason ve mallakiyid. Vielu Fabrice va gemeltany ve diyir, ta walzera va vombik tidon ve wetayar.

Balemoy lakis hussard okolik isu toloy lanis, ke milafa vertega dam tel yonar, van za ise kaike tol-decemoya bora ware tiyid viele wetara ve sokiyir : sin va dilizera moe za trumapon disukeyed, nume gestison da Fabrice va inaf yon palik al wetayar, balemoy lakisik tcepason is ton abalt tideon va in ipeyed, ageltucafa vajikera. Le Baron vombik, walzen gan westara, va tuvel ke yorida fenkuyur ise van za ve ipeyer viele tcepas hussard okolik artlakiyid, aze miv djiayar da sin di azavzayad.

– Mea dure tir vombik ! ~ tan sin divieyer platison va okol.

Tabodjan vombik va intafa codara ve waljoayar, aze kan bakayana ronenuba va dirkey ke okol ronon konariyir.

– Azavzal ! Sayakikaj ! ~ pu hussard okolik kaliyir ; ~ va rin grupé, til ke rumala ke Henriet redakik.

– Tetce ! Redakik miv benplekur ! Henriet redakik arinton al zo atayar, ~ in kipteson loplekuyur, ~ ise ko K… lanil !

Kalison va batyona pulvira, va remlakira djupoar nume va guazaf vombik lubes mo lume ke za platir. Fabrice, arte toloya bora moe za vox lente yorida, va intaf okol platir nume, solve da astoy ke okol ke ruzadesik va redakik menyus va dirkey mo sid malmimar, Fabrice, keviene, pu hussard okolik uulapar. Anye, inaf okol, pestes miman van sid kan fexa gina gan vombik, ezon ve liziweyer inde imizap ke okolervoliaf abalt ke Fabrice ken nesuk ke okolik kabduo inaf iteem kildeyer. Yatkaf, hussard okolik rwoder ise popon abaltar, di gabeson va ewazalt ke Fabrice is di komawepeson : minaf gradilik luber.

Tan lanis hussard okolik, wis va toloy rojusik va za moe sid, va katecta ve vangruper nume mo okol ke Fabrice grabler ise mimason va tcepara mo za djuvangir.

tidrizik, va yorida malvulteson, va vombik lubes al wiyir, nume foliyir da battel astirbon al zo bakayar. In radim okol ke Fabrice vulter aze va uul ke intaf abalt gu dubiesik kowelzar, battan luber. Hussard okolik, wison va antaf lanis tidrizik ware moe za, tcepason remlakid aze kalion illakid. Tel lanis ko tawaday otcer.

tidrizik va bakanik vanlaniyir. Fabrice ixam al dimranyayar, mejemeyer voxe va fortey drasupuyur. Vombik lovion madagiyir ; lubera al spikonapayar voxe in va meka bakara al levgayar.

– Golde savsaf bakaks va nuba anton mejedá, ~ pu tidrizik kaliyir.

Hussard okolik, bakayan gan tidrizik, awalkeyer.

– Oretlik ilburer ! ~ vombik divieyer.

Aze, pu tidrizik is toloy ar vanvultes okolik : – Voxe, va bate yikye jinon kowupejeyene modovac. Poke za fu zavzá enide va batyon riyomesik di lagazavzá. Va yikyeme ko yorida stac aze va inafa ma gasupec ; va tan jinaf klaim naric.

  Xanto  
Vergumvelt La Chartreuse de Parme
Sutesik Stendhal
Piskura J. Hetzel
Ava Francava
Evla 1839
  Kalkotavara  
Vergumvelt Xidaxe ke Parma
Kalkotavasik Sabrina Benkelloun
Piskura Kotava.org
Evla 2012
Klita
  Krentduga  
Webesik Sab
Krentduga Image:100%.jpg Tuenayana (2012)


Xidaxe ke Parma (Stendhal)

← 3-eaf luz - 4-eaf luz - 5-eaf luz →

Ara ava se