Xidaxe ke Parma Luz01

Teliz mal Wikikrenteem.

Grablé kal exulera, aneyara

Xidaxe ke Parma


Taneaf pak, taneaf luz

Milano bak 1796

Ba 15 alubeaksat ke 1796, Bonaparte jadiwik va Milano kolakiyir, vabdue bata jotafa ervolia levion remlaniyisa va Lodi za, tavesa pu tamava da arti li decemda Caesar is Aleksander va radimifisik diyid. Galova va buduca is norluca, konakaksaton dilizesa koe Italia, va komodeyese sane divmodayad ; dace anyustkon abdi artlanira ke yon francik, milanoik va sin gu drendafa blay anton krupteyed, gu otviele gilotces lente milk ke Gina fis Gazaf Ilamkik : icle tiyir coba baron safton pwadena gan felama gijafa dum nuba is rubiana moe zionafa eluxa.

Bak Klaamialuk, sokasanef lombardiik va buduca miltafa gu tela ke francik kowazdeyed nume riweyed da sinafa widava gan ginik ke Germana di zo tipokeyer. Vielu sin al vanpiyid sagaf ruptesik, intafa arientapa tiyir rubiara va ezla moe tiojesikimi kum raltukafo leso viele kurera ke yikya pasusa va kona oluafa ok kulafa yasa sokiyir. Toldon ok bardon abdi bate sarepe ke blira, bata yikya va zanas fuzodesik narayar : konakviele yolt ke naranik ke kurenikyefa yasa va porafa runda koe kurerazubi kereleyer. Mana ayikyakoraf lideem tiyir amidapaf gu yona kontegapa zilina gan meabdiwina artlanira ke francafa ervolia. Warzafa is skeusafa lida boreon gepoyteyed. Ba 15 alubeaksat ke 1796 kotrafe sane sonkeyer da kotcoba inon batvieli tarkayana tiyir ilamton kipeafa is kontomon vitcafa. Mallanira ke ironokafa vertega ke Ostera va akeoyera ke savsaf rieteem ve motcalayar : konedira va inafi bli tucavaweyer ; wiyit da kaiki jontika decemda dem tukerovasa pestaba kontan djupotis kalaf va guga ton kaikrenara goverenayar ise va gradilaca gonaneyayar. Trenara ke lickafa evayuca ke Carlos Quinto is Felipe II aludevon wan komielayar ; sinafa kudja ve zo trovgayad, nume afi ven vamostiyir. Mali mon alubsanda, ise darpe da Xadola is Voltaire koe Franca roidayad, tujpastik pu sanenye ke Milano ieyed da ravera va belira ok betcoba tiyir mefavlapafa zegara ise dodenyeson va ujakoayka pu adlutik is pu in sagon pwadeson va intaf trobameem, kontan tiyir riwe lanaf da va rundanya ko fuda di co-diyir. Gogol deguton doleyen pu in gan Ostera va medafura va kseldunik mu ervolia va bate lekeon eaftapafe sane ten nyateyer.

Bak 1796 milanofa ervolia va tol-san-balemoy vligunik vagekiraf gu kere ruldayar, dan do balemoya cuisafa vertega dem magyaraf moldeyik suyud. Nuyuca ke lideem tiyir lugavafa, voxe skeura riapafa ; ostik valev meplinuca da va kotcoba pu adlutik gopwadeyer, ika gakera va rawara koe bata tamava, sanenye ke Milano gu konaka ksabepesa gazafa riojara wan zo levplekuyur. Tulon, tiddacik sokes koe Milano is bowes yoltoe ginik kosayik, va zilidupusa rieta va dentkazara al diyir. Acum, Ginik va kota dolera va olk pu tawadayik kalpouyur vieli va intafe yone emaxe al tukotrayar.

Bak alubeaksat ke 1796, barkon radimi kolanira ke francafa ervolia, jotaf pinobaf lingesik, oviskamaf is yoltkiraf gu Pwertik, daletoe kotgrupaf, piyis do ervolia, gildeson va negara va yona sega ke granaf tiddacik koe Selvi Zazdapa (batugale cavapafa), va vexala dem opraxa rubiayana moe toa kum vollistafa blafotafa eluxa nariyir. Mo trovgay va granaf tiddacik zovdayar ; francaf sayakik va in ko jivot flugayar, nume ute fortey, mefolina tokoda dem dent divtraspuyur. Coba yoltkirafa gu krandera ok ozara koe bata vepokafa patecta me zo grupeyer. Zovdaks iskeyen mo azega ke Selvi Zazda gan Pwertik ve nuvelayar galova va kelt tidufiyisa ; mielon zo gretcayar, nume tol-san-decitoy tulok eldeon di zo doleyed.

Miledje, boyotera gu gejawebera dem tev-celemoy talolk kevdinena ta olegara va francafa ervolia wayasa tevoy meld is olgalicuyus va tol-sanoya winka, is anton gracisa va perfejul ik rija ik vage ik edji.

Flava dem kaluca is tci va Lombardia kan batyon kimtaf francik levgon kofiyisa tiyir maneke antaf gertikeem is yon oluik va kranavera ke bata webera dem tev-celemoy talolk abdi jontikara vofayad. Bat francaf sayakik kipeyed ise tanion dankayad ; tiyid leon tolsanalubdaf, ise inaf okilaf jadiwik, tolsanperdaf, bevulayar tel loklaik ke intafa ervolia. Bata itupuca iku jotuca iku metrumuca va yona yatkafa abdikalira ke tujpastik puveson dulzayad, dan mali tevoy aksat tidu tumtafa rovava dakteyed da francik tiyid rostaza puidon gu klibura gonovanteyasa va kotcoba is gonogabesa va taka ke kottan. Batdume, kota vertega do vabdueon vriva laniyir.

Koe tawaday moe pikay ke koridxa francaf sayakik kovdan va pintik ke monikya zo rowir, ise bak riwe kot sielcek kon trugusik va sirta dingeltuson luwiyir. Kone countrydance stute tiyid grupearsafe is esarsafe gu ravera ke megrurastutes sayakik. Acum batse lizukafa ayikya va Monferina stute is Sauteuse stute is are italiavafe stute pu yon jotaf francik nediyid.

Fayik dene yon kulik lirotison zo vistaleyed ; godetildewepeyed. Tulon, rikulik yoltkiraf gu Robert va vistaleralipi tori berma ke Del Dongo tidbiptikya kazawayar. Bat fayik, oriwapaf jotaf kucilodambik, kolanison va bata berma, va tanoy talolk dem tevoy franc tal getcayan koe Piacenza anton digiyir. Moi remlakira va Lodi za, va cuisafa warzapafa kiltafa rija pu listaf osteraf fayik fixukatayan nariyir, ise meke vage konviele lofodjeson ve fepoayar. Intaf fayaf epitusizeeem tiyid baynaf ise dualt ke vage kene agdiz ke ewazalteem ta runyura ke lipeem zo asadayar ; vexe logabenaf goaspil tiyir : legeja ke kot perfejul tiyir kum edjiki dere trasiyini moe meldxo, kaike Lodi za. Bata luwiyina legeja kan yona rowipina awoba vamoe perfejul giweyed. Acum, viele kwokilik ke mona ko mawa ke Robert ta ganera va sielestura do tidbiptik weltikya va int atoeyer, rikulik zo toktepeyer. Tcicerasayakik is in va toloy bartiv kali bata baliafa estura yazgayad enide va vage latolasadamayad ise va afobaja ke kot perfejul gu ebelte kan sida labiayad. Adim eaftaf gemelt ve sokiyir.

« Bak blira, meviele tiyí lovoltrabiangaf, ~ pu jin Robert rikulik kaliyir, ~ bata korikya trakuyud da su tuvudayá, voxe loon dam sin skotcayá. Va jinaf perfejuleem disukeyé ise kon me grupavlayá. Del Dongo tidbiptikya, ~ in loplekuyur, ~ bam tiyir ton sizuntasa listuca : va in dem listapaf is pumkazijnaf iteem is orikalatkaf usukeemany zovdanyas va bata mempesa vizuafa vola al grupel. Koe jinafa mawa tiyir Herodias kudja ke Leonardo da Vinci nuvelasa inaf delt. Lorik kuraniyir da bata voltuwavafa listikya va jin di vannariyir inde va jinaf aboz vulkuyú. Mali tolda koe yona mevtava ke Genova gola va evakaca is kimtaca anton wiyí : va konak ravlem icde jinafa felbewera rovemaneyé. »

« Vexe tiyí frersaf ta da koe cpas ind azavzapayá. Va jinaf yon blayak askison, koe trilnapafo estuxo va tol-sanoy nugazanisik is yon mawazanisik vagekiraf gu koncoba nuvelasa tela locuisafa sedme int wiyí. Gestil da bat facilik va osk perfejulanyeem voxosk yona dilgavafa kenda digiyid. Va batyona bonafa disukera modisukesa va jinafe vage isu rotir perfejuleem arlon wiyí, coba va jinafa takra remrusa. Kan tanoy ravlem pu batyon korik co- kovudayá, vexe tokkane me lajuciwason va ayikya va sin co-rotolrundanyayá ? Kire tidbiptikya va kontel divxidas va Gina Del Dongo al stakseyer enide va takrelucama pu int ziliyir. Gina, berikya ke inaf kurenik, batugale tiyir sokesik ke xida aze batvielu vanpiyir mempes Pietranera biptik : metan trigaf ton itupuca is neciuca va in kaikfiyir, lidame metan ton takreluca is glogaboksuca bro volfala kaikfiyir. »

« Gina, bam tisa sanbardafa vox nujitisa sananyustdafa, blifa is ronjafa, va mokipera lente jinaf aboz kivayar maneke me rovebestuyur, dum grupel ; volson, tidbiptikya va jin gu stegena doluca anyayar ; koe jinaf iteem va balderinda winyiyir. Ton tanoy ravlem, va fitulafa vola atoeyé, va vligura roxanyayá, va bata coba ke francik fotisa merotisa. Adim rieta tidufiyisa va kelt va jin ve koafiyir : va jinafa copuca pu batyona weltikya toz negayá, is inde koe mevtaxo ke Genova gola toldon al mejeyev lize guazaf fitulaf jadiwik va cin kagiyid. Batlize, ~ kaliyí, ~ va yon namuiskaf gu patecta fizud is kotvielon baroye sabe dem beg mbi ziliyiv. Mali toloy verast nemon pulviyí viele tidbiptya ikuzayamar, ise Gina al tuekemaweyer.

– Mancoba, rikulik, ~ in pu jin pulviyir, ~ va baroye sabe dem beg !

– En, weltikyama ; voxosk bad safta anamzilira baron gracayar, ise dume vredakucilodamb tawadayik tiyid locopaf dam cin, va abic cinaf beg ziliyiv. »

« Ba bulura va azega, kal tuvel ke bontay va ma pu tidbiptik firviyí, aze, kalion dimlanison, pu zanoleyes kwik va tanoy talolk dem tevoy franc tal ve ziliyí, va bat talolk kane va stekefa tufa al klokarsá. »

« Arti anyustka, ~ Robert trenayar, ~ viele coba nijunyuyur da francik va metan vrivayad, Del Dongo tidbiptikye dimdenlakiyir, mal intafe Grianta lamone tide Como uzda liz ba vanlanira ke ervolia, jovleson gu gejavuxa va lilistaf jotaf kurenik is berikya, va int budon al gelbeyer. Bogara ke bat tidbiptik va cin tiyir lifa gu inafa vudera, trabe merosabena : inafa zwafa is abidafa volapa relandeyer viele pu jin va dolaca bildeyer. Ba eldef viel ke inafa dimpira ko Milano, va baroye sabe dem dualt is tol-decemoy franc tal ke webera dem tev-decemoy kazawayá : dimsiveyé nume vanpiyí fuzodesik va toloya eyikya kire sirtugal tozuweyer. »

Rupa va Robert rikulik tiyir milapafa gu kot francik ; ute da bat budaf vox jastraf sayakik zo balged, saud nume zo albayad.

Bate sare dem meabdiwina kaluca is izakuca toldon anton jijayar ; oviskuca al tiyir slikafa is jadifa maneke me co-robazé, rade bata izvafa is aludevafa undera : mali decemda bate sane argaweyer.

Tuwavafa drelduca ke geefa patecta vanmiae aboyikeem ke Visconti is Sforza, ke bat vartaf dacikeem va Milano lekeon al gazayar. Vexe mali 1624 ilana, espanik va Milano dacaxo al koilkayad, ton mustaf is uculesaf is intotcaf felisik somokivas va kevmadara, nume itupuca al otceyer. Sane, narase va lideem ke felisik, va jaxadara gu beta pobaxara kan nubemara lodam pojara va dureaca modovayar.

Oviskafa daava is drelduca is vulkura va kota gabenaca iku opelafa pestaka, mali kolanira ke francafa ervolia va Milano ba 15 alubeaksat ke 1796, zo platiyid maneke bak balemeaksat ke 1799 teni Cassano meld in di aloyayar, ise guazaf celemkiraf dolekik ik guazaf tegivsutesik walion vulkuyus va kota wareskaca isu erbawara zo rotozwayad.

Cugon co-robazeyet da abica oluapafa yasa ko tawadayafa berma al buluyud, nudrusa va jadifa saipuca is nagewera ke yona takra. Arse dere, bata oluafa yasa bak walmunera va gejawebera eruyuna mu francafa ervolia mibon al zo katcalayad.

Del Dongo tidbiptikye, kevitsane wison va li itupuca, al tiyir tan taneik dimpis va intafe cuisafe Grianta lamone, kaike Como, liz eyikya va Robert rikulik stayad. Bate lamone, tigise koe tirka rotir tanafa koe tamava, moe azekexa arte decem-alub-sanoy pied lum tide bata lugodafa felilena uzda, al tiyir folk. Del Dongo yasa bak XV-eafa decemda al kolnayar, dum tcalokkirafa trilnaxa kotlize vrutayad ; va yon zalot isu ae laviskaf aludevaf kelor ware rowiyit ; voxe dem rebava ontinafa gu anyustoy pied lum is vafa gu tevoy pied lum, bate lamone me zo roxagayar ; batdume tiyir abegafe gu uculesaf tidbiptik. Vanmiae tol-san-aluboy tce abidas kwik oku bar-sanoy, nuvabidas kire in ton pobaxara tid art pu sin kotviele pulviyir, gan vudera leon zo olyasteyer dam koe Milano.

Bata vudera mevaron tiyir fastafa : in va toidesik rundayan gan Ostera kake swizafa jowa arte baroy lieue lum male Grianta, ta tuyatesara va flintik ke meldxo, tegirapon dogoleyer. Batcoba gan francafa sayakafa rictaga zo co-rokrafiapayar.

Tidbiptikye va jotaf kurenik koe Milano al iskeyer : in va yasaf arienteem batlize gadeyer ise va kota webera koaykana pu Casa del Dongo govajuleyer ; va irutara laskuyur, batdume va yon oluik naleyes va winugafi fli is dace yon turestapaf ebidayik gonowiyir. Bifapa dene bata yasa ve sokiyir. Tidbiptik va kurera ke jotafa berikya Gina gu kulapaf is emapaf oluik al vanbenplekuyur ; voxe in goa bureyer : acum Gina va in mokipepeson kazawayar, nume va Pietranera biptik boreon oviskon kureyer. Battel ae tiyir kapaf oluikany, vox rawanaf mali veygadik, is volfikunton stiraf pakoik va warzaf rieteem. Pietranera tiyir titrikulik koe italiafa jopa, loaca gripokolesa va tidbiptik.

Arti bata toloya oviskafa is kalafa tanda, Directoire ke Paris, nafalupuson, va warzafa bogara gu merotakaca nediyir. Giugaf jadiwik kodirgayamb va ervolia ke Italia va konak vanif meld koe bata azega ke Verona millize zulta va Arcole isu Lonato toldon abdion dilizeyed. Osterik va Milano vanlaniyid ; Robert rikulik, vanpiyis vornokilik is bakayan bal Cassano meld, artlakiyir aze dene nik Del Dongo tidbiptikya ironokon vistaleweyer. Donedivkiavara tiyid gabenafa ; Robert do Pietranera biptik kadimelakis va francafa bulura van Novi mallakiyir. Jotafa biptikya, vewayamba va dodera va inaf mwedaf walziliks gan berikye, koe lima va ervolia kadimelapiyir.

Batvielu bate kategirevafe sare is dimfira va savsaf rieteem tozuweyed, ugal dayoltan gu i tredici mesi trogarn (san-baroy aksat) kire bata dimfira va kwestuca ae anton sanbaraksaton di jijayar, kali Marengo is tolon kaluca. Kotcoba guazafa ik abidafa ik wareskafa tide arienteem tolawayir ise va selt tolgadeyer. Boreon korik zavzayas sagaf gu eniltany koe yona wida sanegayad da Napoléon gan Mamluk sayakik koe Misra al zo rumkayar inde lidume riweyer.

Vanmiae bat ayik druyus moe inaf taway is dimpis ta jaxadarapa, Del Dongo tidbiptikye golde yatkuca solwikayar ; inafa ilamaykara va in tid pako tuwavon bureyer. Bat weltik, sintaapik voki vudera, wan skotcas, va osteraf jadiwik lajubritsayad : battan, ayikany, zo mobuiveyer da boksuca tiyir gaderanya, nume askiyir da tol-decem-alub-sanoy gugafamik di zo azavzayad. Arse tiyid tel lokiewaf ke Italia.

Boreon ko Kotor ceda zo rezgaleyed aze ko levesidafa arula di zo kabuyud lize abduca is loon beggracira kev batyon yelipik wiluon is keskoton di tcuxayad.

Del Dongo tidbiptik va rundapa mokereleyer, ise milinde va fordafa totciduca gu jontikara duganya zokeveyer, va int volilon milmuyur da va mek talolk pu berikya Pietranera biptik stakseyer. Battel va kurenik me djubuluyur nume do in koe Franca aelawalkeyer. Tidbiptikyanya zo gripokoleyer ; adim va konaka duzxama lajudivrankiyir. Ranki gan kurenik kotmielon zo dimnariyir aze ko aziltyult vleve ilava zo kobudeyer. Inya va anyust-decem-decitoy franc tal ton bueleks pu kurenik al vanbureyer voxe va anyust-sanoy franc talolk ta ilkafa ixalara kazawayar. Bak san-baroy aksat edje francik dive Milano ugalzeyed, bata weyustapikya yontayar ise va ebelte me buluyur.

Welidá da, bro tula ke jontik sutesik, va rupa ke minaf gradilik mali tanda abdi koblira al boká. Bat benelaf koredik ae tir mil dam Fabrice Valserra, marchesino Del Dongo inde Milano soduvuyur. Su zegayar da nazbalayar viele francik zo aloyayad ise xuyavon gu koblira tiyir toleafe nazbeikye ke bat Del Dongo jiomaapaf tidbiptik, ke dan va paokafa gexatapa is rolafa kicera is ninkeiskafa bogara va warzaf rieteem ixam grupel. Varafa tufa ke yasaxo pu taneanazbalafo Ascanio, bagaliafa delt va gadikye, zo abdiziliyir. In tiyir anyustdaf, voxe Fabrice toldafe, viele bat Bonaparte jadiwik, malipon forumkayan gan poremakirik va Saint-Bernard roz laizon tidulaniyir. Va Milano kolakiyir, ise bat gemelt wan tir tanaf bak izva. Va varafe kalrenase sane gestil. Vanion, Napoléon va Marengo meld wayar. Ark tir mefavlaf gu kalira. Izakuca ke milanoikeem ve tiyir cugafa ; voxe batviele tiyir aotcafa gu yona rieta va jaxadara : bate sanenye va bogara mbi taveyer. Boreon zavzas gugafamik rezgalayen ko Kotor ceda dimlapiyid ; vedeyafa jora di fiptayar. Sinafa paokafa vola is gevapan iteem is tumazdaweyes beweem va kotlizu sizuntasa daava divulon kevaxayad. Sinafa artlapira ve tiyir sugdava va mallapira ke telyona lorotplekuyuna yasa. Del Dongo tidbiptik ve tiyir tan taneaf otcesik van inafe Grianta lamone. Okilik ke yasapa tiyid bogepes is vudepes ; voxe kurenik is nazbeikya va yona daava remi taneafa ugalzera ke yon francik trakoduyud, nume va Milano is yona liditupafa sirta grustatana koe Casa Tanzi moi Marengo batceyed. Vani cenyera, francaf jadiwik vajgeyen gu guaulara koe Lombardia vofayar da kot barnik ke oluik is kota guazikya ke tawaday, vol modovasa va bata gevasa Marengo cenyera betayasa va bali ke Italia is tanvielon tololgalicuyusa va san-baroya folkafa widava, disa va gloga kalkerelena gan katcilaca ke Santo Giovita taneaf tilik ke Brescia. Sedme bata tumtafa pulva, triguca ke francikeem is Napoléon di ilpiyid arti tagelton san-baroya safta kaiki Marengo. Batcoba va Del Dongo tidbiptik is kot drus oluik ke tawaday skalemer ; sin va katcilaca mebuskuson en foliyid. Kotbat korik va balemoya neva me al beliyir ; ta dimlapira ko Milano arti san-baroya safta va int moegayar, voxe ugal, fison, va yona warzafa kiewatca mu dulap ke Franca tcalayar. Dimpiyis ko Paris, Napoléon, kan yoni proyafi kexi, va Artowara koe patecta lidam abdion Marengo kev divexo giwayar. Bam lombardiaf oluik va int gelbeyes koe inafe lamone kosmayad da, taneon va abdikaliks ke tumtaf tilik ke Brescia al gildajayad : batcoba me tiyir san-baroya safta vols ae san-baroy aksat. San-baroy aksat di fiyid, ise triguca ke Franca kotvielon nukevlaumayar.

Va sanda dem abduxoa is kaluca, mali 1800 kali 1810 kaikfí ; Fabrice remi yona taneafa tanda koe Grianta lamone bliyir, nubokason is nubokanon vanmiae moraf tawadayikeem ke wida, ise raveson va mecoba is dace me belira. Kaikion, ko Jesus reila koe Milano zo stakseyer. Tidbiptik gadikye kodineyer da latinava di zo-nediyir, me sedme yon savsafa sutesik alokon pulvis va sokasane, vols male cuisafa karba fumkirafa gu lo decemoy gretcaks, grabom ke yon yambik ke XVII-eafa decemda ; tiyir latinavafa xanteka ke Valserra, Del Dongo tidbiptikeem, sanegayana ba 1650 gan Fabrice Del Dongo, tidtujradik ke Parma. Tufa ke Valserra tipisa sayakafa, gretcaks va jontik meld kaatoeyed, ise kotlize kon dugas gradilik dem bat yolt zo rowiyir. Bata neva va jotafe Fabrice puvepeyer. Inafa gadikya, sontesa, ko Milano ta wira jontikviele zo ronolapiyir, vexe kurenik meviele firvis va erba ta koyara, batse ikaberikya, neciaf Pietranera biptik, pu in miaziliyir. Kaiki dimpira ke yon francik, biptik al vanpiyir tana lojebesa ayikya ke aboyikeem ke Eugène sersik ikagazik va Italia.

Viele Fabrice va taneafa tinefkara al skuyur, battel va ronodivreilara va in gu tidbiptik wan divbliwes kevseotayar. Krupteyer da in tiyir manaf is swavaf is ekemapaf vox lista fudjes bontayon gu cavikya ; ostik, afanapas is nemon grubelis. Biptikya, ekemafa gu kotcoba, va konendara pu reilokilik abdiplekuyur ede Fabrice veyberikye va gevasa abduxoa di co-askiyir ise arti ilanacek di zo co-droapayar. Enide va mergil ta riwera dir, in askiyir da ba kot sielaf pereaviel in zo aneyayar, ise pu inaf tavesikeem ba anton balemeaviel ok alubeaviel jontikviele dimdeswayar. Jesus ujikeem, beka renonan gan ikagazik sersik, div Italia gan mweem ke gazaxo zo malplatiyid, nume tidokilik ke reila, deksik, va varaf dulap rotimpan gu skedara va aboyafa gijarotiikya pestaleyer. Obrayar da va gracaceem ke Fabrice me temer, dane, lodafanase dam meviele, arti ilanacek va aluboya taneadrora seotayar. Battode, jebesa Pietranera biptikya, kabdue kurenik, jadiwik dirgas va tanoya vastora ke ervolia, is aluboy lozolonaf koredik ke aboyikeem ke ikagazik oku tevoy, va ziliwalera va droara dene Jesus reila tcokeyer. Tidokilik gan intaf okilikeem di zo-cpayar.

Biptikya va veyberik den kotbata jebesa jora tcalayasa va trelarsafa gazara ke neciaf Eugène sersik stayar. Kan intafa rictula va in ton hussard fayik al koinkeyer, nume santoldafe Fabrice va bat tantazukot bureyer. Konviele, biptik vecan gan inafa sivanya, va rundak va jotaf oluazanisik mu in pu sersik eruyur ; batcoba sugdalayar da Del Dongo yasa va int kavangluyayar. Eldeon va intaf varaf fol olegayar enide di seotayar da ikagazik va bata erura djumesetikeyer, kire movewara va dinera ke gadikye ke stekef jotaf oluazanisik. Vani bata oviskaca, tubupayasa va drus tidbiptik, in yontayar ise ko Grianta va jotafe Fabrice tolrozayar. Biptiya va berik vligupuyur ; va in dum gabenaf fitulik krupteyer, dum kontel co-tis ikoraf dem roti. Vexe tiyir oviskafa gu Fabrice, nume, arti amlitafa sanda, pu tidbiptik ta imaxura va veyberik suteyer : inafa twa me mbi dulzeyer.

Ba intafa dimlakira ko bate pelkafe lamone, kolnayane gan tel logejafamaf abdigadik, Fabrice va mecoba grupaskiyir, vaxe da gruksubeyer ise grulakiyir. Jontikviele Pietranera biptiye, lidoviskafe gu bat rumeik dam kurenik, va in tulakisayar ise do int den ingoy stayar.

Artlapison va Grianta lamone, Fabrice, ton iteem ware keraf gu yona ikuza pleyena buluson va listaf bontay ke ziavikya, va skena santara ke gafikya is berikyeem, anton trasiyir. Tidbiptikye ko intaf ilput do taneanazbalikye, do marchesino Ascanio, va int kobudeyer. Sin va yona tubirgana twa staksetena ko Wien iayad ; gadik is nazbeik ba kota estura anton awiyid. Tidbiptik vanklason tolkaliyir da pu tuwavaf radimifisik va jontolafa patopa va warzera ke kot inaf taway taveyer. Agelton, tidbiptik tiyir lickarsaf gu intafi roti batdume va mancoba pu nazbeik, pu adraf konolesik va intaf tawayeem, me pulviyir. Va in ta tubirgara va yona kutcupsa dem san-aluboyu ok tol-sanoyu bu uneyer. Sin ko Swiza az batlizu Ostera tolon ok baron safton zo stakseyed. Tidbiptik espuyur da pu mwedaf nafalikeem va koef sok ke Italia gazaxo kowalzeyer. Me miv grupeyer, wori twa tukiewatcayad ; batse kane. Tidbiptik askiyir da va ota dem sayakik ke mana francafa ok italiafa vertega betasa va virutsa moo vawapa gan kon musaf askisik di zo patayar ise, munesteson va bifa pu aboyikeem ke Wien, in va irutara gu balemeacapa va ota dem anoelaf sayakik obrayar. Bata twa, ostik kipeafa, va zibura va yonara lodageltafa riwedayad nume puveyed. Acum, kabdi artlapira ke Fabrice va lamone, va pozla ke sposaf veem al kazawayar. In tiyir alubeafa zikesa va intafe vage ke chambellan fayik. Agelton, nigeyer kire va bate vage dive ilput me rovepluuyur ; vexe va kutcupsa meviele rovedukaliyir ede va fidenaf aboz dem kot inaf veem al kavageyer. Tegison arinde, va tarkara co-fogegraciyir.

Tidbiptikya gan kava ke nazbeik zo skebuyur. Voxe va gisutera tolon ok baron ilanon pu A*** biptik jadiwik al videyer ; battel tiyir noelaf Robert rikulik. Tidbiptik va rotuxara pu renan bettel akladayar ; va nazbeik koeruyur nume va inafa afanasuca di zo kovudayar.

« Ede in nutir gaanansaf, ~ va int kaliyir, ~ sedme jin grupensas, Robert tis grupeapaf, co-krupteyer da inafa gaara en al zo kelur ; okie, dure, in goriwer. » Ara pilkovaca riwe lion gevayar : Fabrice va kota ujaca taveyena dene Jesus reila al krafiayar. Beka in tiyir lorbapafa, ukuca ke bat rumeik va in tubupasayar. « Ede tidbiptik co-tir endayaf da bat mergil va turestara co-rodiepiler, va renara ke jinaf nazbeik fu tiolter. » Inya borepeyer ise skeura va Fabrice vanlaumayar.

Blira ke bate lamone, frofanafe gu bar-sanoy ok balem-sanoy kwik, tiyir gabenapafa ; acum Fabrice gibetcabanyeyer oke moe uzda gibetivtotayayar. Boreon do yon diremstasik isu okolviunsusik va int gluyapayar ; kot battan oviskon tiyir mu francikeem nume va abidaf mawakwikeem gibalgepeyer. Detcepe va krandera kev batyon gorestaf korik, zanis va tidbiptikye ok inaf taneanazbalik, tiyir da sin bro intaf felisik sogoabureyed.

  Xanto  
Vergumvelt La chartreuse de Parme
Sutesik Stendhal
Piskura J. Hetzel
Ava Francava
Evla 1839
  Kalkotavara  
Vergumvelt Xidaxe ke Parma
Kalkotavasik Sabrina Benkelloun
Piskura Kotava.org
Evla 2012
Klita
  Krentduga  
Webesik Sab
Krentduga Image:100%.jpg Tuenayana (2012)


Xidaxe ke Parma (Stendhal)

← — - 1-eaf luz - 2-eaf luz →

Ara ava se