Xansey is Bansey

Teliz mal Wikikrenteem.

Grablé kal exulera, aneyara

Xansey is Bansey
Nepalafa vunda


Xansey is Bansey tiyid toloy nik. Millize kobliyis ise belcon varteyes, sinafa nuca tiyir merotaskina. Nemon divlaniyis va arula lize do kota gadikya bliyid, mallaniyid aze koe pokefo werdxo is aalxo konakbartivon vefayad. Batvieli, kotcoba tir preksafa ise tir gimbafa toza ke vunda. Mecoba cugunaykapafa, win kevbenutuc. Iskec da taveson dume bata naca tir gevasa va win akoyé : Xansaraj, ikayoltkiraf gu Xansey, tir jotaf jaftoloc. Luxe Bansaraj dere yoltan kan Bansey, tir jaktoloc milklaaf gu Xansey. Kas va jaktoloc is jaftoloc belcon vefas konviele ixam al wic ? Kottol gildunhuyur ise va meka rotaca krupteyer. Koe krant lize sin bliyid konakviele sinafa kamamasa kipera se zo gildeyed.

Tokinde batcoba tiyir rotisa, win pu jin kalitic ? Batcoba tir opelamafa is gabentapafa eke Xansey is Bansey meviele al raved. Tir lazava va bata volgiltafa naca : konviele, jaktolya va aalxo divlaniyir aze va estutuna coba aneyayar. Fentugal artayar nume koe aalxo wivgeem vanpiyir riaf. Genasbalayas in, ta moblira ke pintik, va po is fa olegayar. Adim, va werdxo lize jaftolyapa baspeyer ise va ironokafa brixa zavzasa abdi taneafa noldara muleyer, ve artlaniyir. Jaktolya va int abdion ve kutcfrineyer aze ve divkabuyur. Vexe jaftolya vaon al kozwiyir ise kovudana ve kaliyir :

– Segayel ! Va jin me davon atal !...

– Tokdume ? Jin koe jivot va pintik dí nume aelepé ! jaktolya ve gabeyer.

– Larde fu til gadikya, va jin fu gildal. Va jin disukenhel, wil, dere jin, va pintik kes va koblira koe jivot, dí. Ede va jin djumestul, kas icle co-rokel da in di koblir ? Moion, pu rin tití, abdiplekú.

Jaktolya undeyer aze pu int arldon ve kaliyir, stekef jaftoloc vaon me al rotuyur nume rokanhayar da in blir ise vanpir losudaf…

– Dotrakú, in pu jaftolya ve kaliyir, vexe ta da tí lanaf da va rinafa bosara tarkatal, va batcoba fu askit. Ko bata arula, batliz pokapon, do jin fu pil aze va koblira ke pintik yo belcon ketet. Azon, va rin estutú.

Jaftolya, trobindas vox keldaskin da ronasbatar, va jaktolya ve radimelaniyir. Bak walukam, sin ve radekayad.

Kaiki koblira se gadikya se gan kontega yo zo nariyid ise wison va pintik yo nanhon laumas tiyid kalaf. Safta se ugalzeyed voxe sin me vofayad. Jotik yo koe aulucanha bliyid, do renara ke gadikya mu bat is kiewati ke renara ke nik mu ban.

Vexe solve da Xansey is Bansey tiyid diveon ise vefayad, jaktolya pu jaftolya ve kaliyir :

– Va abdiplekura setikel ! Jinafa mola dimpir, eldeon ko aalxo lodilamon mallanitil ! Va rinaf pintik walzetel da me dimpitil aze va rin radimelanití…

– Dotrakú, jaftolya ve dulzeyer, vexe pu jin abdiplekul da pu Xansey me uzatal viele batlize mea tití !

– Denon ! Batcoba pu Bansey co-puiderser ede va intaf antaf nik co-drasur.

Sin batinde ve askiyid. Gazdeldeon, jaftolya pu pintik ve kaliyir :

– Xansey terktal, ta aneyara va lomildafo baspexo lodilamon mallanití. Va afizcekon ekedacek dem vrod pu rin iské. Vexe setikel : ede vrod co-vanpir keraf dum fortey, tir da co-awalkeyé nume me dimpití. Al gildal ?

– En, gada ! jaftoloc ve dulzeyer, moobrason va bata pulvira.

Keyuson ta da va intaf nik kazokever, teskeson ve mallaniyir. Xansey kotviele al tiyir tel lovoldwis ke kottol ise teskeyer ise kipeyer ise ta deasera va Bansey stuglacupuyur. Jaftolya taneon ve divlaniyir aze ko aalxo istlaniyir. Azon gadikya ke Bansey ve piyir ise va in ve walzeyer :

– Bak varaf vielcek diveon tití. Me bonacul ise va rinaf nik viunsunhul !

Jaktoloc ve epitamadayar ise wan vefayar. Tiyir tel lodekemaf ke kottol isu lodundes. Fereon va intaf nik gonazavzayar abdi da battel va wupefa coba askir, opelon ta tcongera.

Afizcek ve tenuweyer aze miel mo krant toz lubeyer. Puskeyen vox kalaf pintik yo va arula ve dimlaniyid. Xansey va vrodkirafa ekeda bam ve kozwiyir : plawa al vanpiyir kerafa ! Bam setikeson va pulvira ke gadikya, in ve ikuzapayar. Bansey va bati arulaki ve vanvulteyer. Wison va nik maninde tis zo ropplekuyur nume ve eruyur :

– Tokcoba sokir ? Tokdume baton borel ? Kalil !

Bam jaftoloc va varafa rupa pwadeyer. Toloy nik abrotcion belcon boreyed, jaktoloc tori jaftolya kotviele tiyisa dolgeon vonafa donon ikuzayar. Sin ve komodeyed, tan kev artan tison licanaf. Gildeson va dimpisa gadikya Bansey ve divmodeyer :

– Gada, toklize tiyil ? Al vudeyé da rin dum gadikya ke Xansey tenuwel.

Aze in va rupa silukon pwadeyer voxe laizon ve vofayar da gadikya me terktayar. In ve etrakamayar :

– Kas icde jaftolya va coba sokiyisa grupel ? Kalil ! Inafa awalkera va rin me puidar ?...

Gadikya va mecoba ve dulzeyer ise ve fandizaweyer, volaelesa. Bansey bam ve wiyir da jivot ke jaktolya tiyir sotcenapaf kir estursuyus. Davon ve vangrupeyer nume tolon toz boreyer, voxe batviele, golde udutuca ke gadikya.

Remi moif viel se, jaftoloc vewayar da va int gestur ise va gadikya boreson imaxuyur. Intaf nik, merotis va pomara, va varafa ziduca mo intafa gadikya ve plekuyur nume puon ve kaliyir, solve da Xansey kenibeyer :

– Jin dere, kali da kabdue jaftoloc milgaf werdanh tir mea estutú !

– Vexe tokdume ? Rin, va intafa gadikya al me drasul, in ve dulzeyer, stuben wison da pintik maneke groleyer.

– Larde va in al atal, godimempal nume va Xansey gopomal !

Jaktolya ve undeyer aze ve mallaniyir, gabentafa wison da jaktoloc tir liyatkaf gu in. Turkon, in va wayeda opelon al tarkayar. Va milgaf werdanh ve trasiyir aze abdi dimpira va arula ta ulira va kuksa ve vanlaniyir. Vexe intaf nasbeik al radimelaniyir aze ko salt vaon ve platiyir ! Me levbureyer da golde intafa gadikya intaf nik tir ligabentaf, acum al gorayar da va inya atar. Jaktolya kalion ve wizuweyer, tisa gamiarsafa gu vumbeyen jaftol.

Batcoba askiyina, Bansey dimpiyir aze pu Xansey taveyer da dere intafa gadikya al awalkeyer, soe mepebuson va goaspileem ke awalkera. Sin abrotcion belcon boreyed aze arldon ildunuyud. Gadikiskaf sin, ton tela lokiewafa gildunhura, belcon laumayad. Vexe jaktoloc, noelkeon vanpiyis jotaf jaktol, va nik dwiyir. Keskeon battel tiyir tel lodagralaf voxe nuvelayar da va anamefe wupe se isu govitaf sulem yo me vofayar. Konviele, in va nik ve rozayar :

– Xansey, ko aalxo konakvielon fu mallaní. Kas antaf gruwergutul ?

– Denon ! Va jin vol krafial ? in ve fuglayar.

– Ekemon pulví ! Tir biotama, pu rin zilí. Ben berga vaon plekul ise viele va pomara olegatal, va in popon tunoliesal, nume gildeté aze artvulteté, dotrakul ?

– Dotrakú ! kipeson is doimpason va nik ko tanamura koe werd jaftoloc ve kaliyir.

Icmilon dam batcoba al zo abdiwiyir, Bansey ta tcabanhera eldeon ve mallaniyir. Tozion, va Xansey guantason tiyir guyamaf vexe kaliapon tcabanhera va intafa varafa obrara kagiyir. Va wivga kalion toz ulijdayar ise ta dilfura va int egayar… viele biota ke Xansey yatkon ve tauleyer. Jotaf jaktol va tcabanhera davon ve jovleyer ise ta grelera va nik vanvulteyer. Va in aulon senhes koe werd ton levkiperapa bene kutceem ve trasiyir.

– Ex, Xansey, tokcoba sokir ? Me keunil ?

– Me, me ! jaftoloc kipeson ve kaliyir. Opelon tiyir ta da ageltá da va abdiplekura co-lotil !

In gan askiyina randayera va nik zo felbeyer nume wan kipegayar.

Jaktol va mecoba ve kaliyir vexe riyomeyer da va intafa estura al jovleyé, me ta grelera va nik vols mukara va inafa kranderaja se.

Xansey ko aalxo tolon ve mallaniyir aze va aelkeldaskira al kiewaskiyir viele biota toleon ve tauleyer. Elvaf ta da toleon me zo rofaver, ve gorayar da va intafa bosara lotir vexe batviele oviskon mevulteson. Ostik estuks va jinafa uvoona tervayar. Liz va Xansey al iskeyer grutcion laniyir nume aulon meipeson ve artlaniyir.

Va coba in bam ve wiyir nume va intafa ewaruca ve batceyer : atelonhik yo va jaftoloc nik walgabeyed ise ta estura tey ixam al zo egayar. Va batcoba wison, jaktol ve zideson is gabenton jaktolieyer. Ayik yo nhebaweyed, titicken gan zidera. Bansey pu sin ve benplekuyur da ko tey va varafa atela is niskeem ke nik plekud aze otced. Atelonhik yo davon ve askiyid aze va betcoba meeruson ve mallaniyid.

Jaktol kan intaf varaf ikuzeem boreyer ise piron batceyer da me al vanvulteyer, kore batcoba co-tiyir ara lionara ke nik. Icle Xansey wan co-tir blis ede in me al tiyir oklarsaf.

Batlize izva ke Xansey is Bansey gabenton tenuwer. Va kranav me levbureson ise lente ciwan iteem ke pokef ayik yo, Bansey ta da do merogreleyen nik awalker, ko tey va int poon welveson ve kabuyur ise va int vikeayar…

  Xanto  
Vergumvelt Xansey and Bansey
Sutesik -
Piskura -
Ava Englava
Evla -
  Kalkotavara  
Vergumvelt Xansey is Bansey
Kalkotavasik Elisabeth Rovall
Piskura -
Evla 2007
  Krentduga  
Webesik Seramikya
Krentduga Image:75%.jpg Gotuenana