Warzaf vageeem ke ginik

Teliz mal Wikikrenteem.

Grablé kal exulera, aneyara

Warzaf vageeem ke ginik
(Reiz ke "Reizak" ke Andersen)


Warzaf vageeem ke ginik

Ginik loeke albas va warzafe listafe vage dare bliyir ; ta vagenyara va erba varon ixalayar. Va intaf sayakikeem is buska meinde dulapeyer ; vols va anton diremgestara koe aalxo ta nedira va intaf warzaf vageeem. Olkoy ta kot afizbartiv tiyir nume, dum pulvira icde gazik : « In koe pirdot tigir », kalira icde in tiyir : « Ginik koe gemxo tigir ».

Koe widavapa lize in irubayar blira daavon fiyir ; jontik diveik batlize worayad. Konviele toloy todlik artlaniyid, bevulason layesik ise va int milmuson gu grulayera va teli locuisafi rogestani tayi.

Osk kseveem is fumeem burkon tiyid listaf voxosk vage asadayane kum bati tayi va divulafa pilkaca gu tumerowinara va kot volstinik ok opelaf fitulik digiyid.

« Man sin co-tid tciamafe vage, ~ ginik trakuyur, ~ va sin bureson va kot volstinik ke ginaxo kreme co-grupé nume va gruik gu fitulik co-soltrakú. Bati tayi, lokalion fu zo golayer. »

In va erbakipi pu toloy todlik abdion ziliyir enide sin toz skuyud. Va toloyo layesiko en inkeyed ise nujikobayad voxe mel fem moe rujda tiyir.

Va telyon lolistaf lesofem is telyon losizuntas moavafem kalion imaxuxyud, ko intaf eyelt va sin plekuyud ise kali miel moe vlardafa rujda wan kobayad. « Co-djugrupé eke sin va tayi al nyofad », ginik pu int kaliyir, vexe pesteyer trabiangansaf undeson da in tiyir merowin gu fitulik is akoydik.

In va meke wupe tori int trakunyuyur vexe ve gorayar da va kontel taneon stakseyer enide va sokira di vofayar. Kot irubasik ke widava va galovafa pilkaca ke tayi grupenyayad nume tiyid volkeaf ta wira eke vegungik tiyir volstinaf ik fitulaf.

« Va guazaf is telaf eldik fu staksé, ~ ginik ve trakuyur. ~ In va keska sopuna gan tayi malyeter, tir grupaf nume metan lokiewon dam in flir. »

Bam guazaf telaf eldik ko onya di laniyir lize toloy rotuxasik moe vlardafa rujda kobayad. « Oyox ! ~ guazaf eldik itafenkupuyuson trakuyur, ~ va mecoba wí ! » Vexe ve volkaliyir.

Toloy layesik va in blikeyed da vonon di vanlaniyir ise eruyud ede listaf fum is felbes kseveem mex tiyid.

Sin va vlardafa rujda nediyid nume kimtaf guazaf eldik loloon itafenkuyur voxe ware me wiyir larde mecoba tiyir.

— Lorikap ! ~ va int kaliyir, ~ kas co-tí fitulik ? Meviele co-foliyí nume metan di raver ! Kas va jinafi fli co-sopujú ? Me, vol gokalí da va bati tayi me wí.

— Ex ! Va mecoba kalil ? ~ tan yambudik kalir.

— Ox ! Batcoba en tir felbesa, tela lolistafa, ~ guazaf eldik mafelason kan wezo. ~ Va bat fum !... va man kseveem !... En, pu ginik kalití da batcoba va jin kalpuver.

— Ax ! Cin tiv valeaf.

Toloy layesik va kot ksevayolt kaliyid ise va listaceem ke lum pintayad. Eldik kalkerektayar enide va kot ravlem gu ginik di rotolkaliyir. Batinde dimpiyison di askiyir. Todlik va moava is leso is moavafem gire bam ve imaxuyud. Ko ucom va kotcoba vols mek fem mo rujda plekuyud. Wori wan nujikobayad.

Vanion, ginik va ar flibikap stakseyer enide di sonkeyer eke layera tiyir ise ede tayi fu co-tiyir gadiafi. Milcoba varze bat ayik lidam eldik fepoayar, kore in kaldisukeyer, oye da vlardafa rujda anton tiyid, va mecoba wiyid.

— Listafi tayiki tir, mex ? ~ toloy todlik kaliyid, aze va yona intafa pebura tolbokayad.

— Me tí akoydaf, ~ flibik trakuyur, ~ kle va jinafi flipi me dojeniá. Abigamafa voxe metan gogruper.

Nume va mewini tayi kosiskeyer ise gu daava lazavana gan wira va bat listaf kseveem is bat felbes lum ravaldayar. « Tir tela lolistafa coba, » pu ginik kaliyir. Kottan ke widava va ribiegafi tayi pulviyir. Adim, ginik miv djuwiyir edje tayi moe rujda wan tiyir.

Do jontik mubeyen aboyik, don toloy laniyis guazaf donaf flibik, va toloy vepokik cugapoon layes (kan mek lesofem) denlaniyir. « Cuisafa, mex ? ~ toloy guazaf flibik divieyed, ~ Rin Ginik va bat lum is batyona bia mafelal. Va vlardafa rujda geltnediyid, gestison da kot artan va koncoba wiyir.

« Maninde ! ~ ginik trakuyur, ~ va mecoba wí ! Mayakafa ! Kas tí fitulik ? Kas me tí ta ginara ? Co-tir eaftafa ! Ox ! Listapafa, ~ miledje kaliyir, ~ va win vanovapá. » Daniaskinon takazekayar ise va vlardafa rujda nyaseyer. Me djukaliyir da va mecoba wiyir. Varaf aboyikeem kaldisukeyer voxe va locoba dam kottan me wiyir nume dum ginik kaliyir : « Ox ! Listapafa ! » Aze pirdayar da in va vabe layeyene koe bati wafafi tayi ba vanif ezgaldayap di lwiyir. Cuisafa ! Felbesa ! Kotunafa ! Bat ravlem artarton talayad, kottan pesteyer vecan.

Ginik va kot toloy todlik gu okoldikafa gamda tori tialtak wizbuyur ise va vergumvelt vas layes feliik kserayar. Bak varaf mielcek abdi ezgalday, todlik ta kobara leve afiara ke san-tevoya leta zavzayad. Varafa widava va sinafa zegara ta jiadara va warzaf vageeem ke ginik batinde vofayar. Sin va tayi mou rujda nujideswayad, kan konaka iwotapa ridon ilbodeyed, veeliskon is femiskon asadayad, aze tenion divieyed : « Wic, vage tir tenukeyene ! »

Ginik do yon lozolonaf aboyik miv piyir. Toloy rotuxasik mamadayad milinde va koncoba co-giyid :

— Batse rija, batse vage ! Banse lioza ! is ark. Bagafa dum vartebak, lidame mecoba keve alto co-tir, batse guntap ke tayi.

— En, en, ~ radimef aboyik kaliyid voxe va mecoba wiyid larde mecoba tiyir.

Ginik va intafa varaf vageeem deswayar aze todlik zatcayad inde va ar plekuyud. « Lorik ! Batcoba gucenyer ! En askinyiyisa ! ~ kottan kaliyir. ~ Man lum, man kseveem ! Tapegafe vage tid. » Mawazanisik gobures va djawa ke gazalioza va myeza nubon uzadayad ise nubamadayad inde va bata djawa co-treduyud. Ginik va ezgalday vleve cuisaf vamok batinde kabduelaniyir, ise kot sedenik divieyer : « Lorik ! Warzafe vage ke ginik en tir cuisafe ! »

Metan djuwelidayar da va mecoba wiyir, larde batinde co-wiyir da tiyir volstinaf ok opelon fitulaf. Meviele warzafe vage ke ginik maneke al kiewatcayar.

— Vexe, va meke vage burer ! ~ velik koe tari ve ieyer.

— Lorikap ! Gildec, in tir puda ke volgunuca, ~ gadikye kaliyir.

Ise kottan va artan tinteyer :

— Va meke vage burer…

— Va meke vage burer ! ~ varafe sane areldon ieyer.

Ginik ve susteyer kire varafe sane nuvoveyer, voxe in miledje trakuyur da kali tena ke ezgalday goruyur. Va int lodoklon rontagiyir ise mawazanisik va metisa gazalioza isu djawa wan bureyed.

  Xanto  
Vergumvelt Keiserens nye Klæder
Reizak Eventyr
Sutesik Hans Christian Andersen
Piskura -
Ava Danmarkava
Evla 1837
  Kalkotavara  
Vergumvelt Warzaf vageeem ke ginik
Kalkotavasik Marjorie Waldstein
Piskura Kotava.org
Evla 2012
Klita -
  Krentduga  
Webesik Marjorie
Krentduga Image:75%.jpg Gotuenana


Ara ava se