Volkalaca meviele tanon sokir

Teliz mal Wikikrenteem.

Grablé kal exulera, aneyara

Volkalaca meviele tanon sokir
Wolofavafa vunda (Senegala)


Reiz.
Zo terektar.
Konviele lekepon.
Wan tir.


Konviele lekepon tiyir guazikya walzilisa va kiray do perake is zveri. Kotviele zveri atoayar, perake va zveri fixayar.

Tabison, zveri va ina kevlaniyir aze kaliyir :

— Volkalaca meviele tanon sokir ise antafi dili va vegunganyuca nendoyer. Co-kuraní da pu perake fu kalil da ine va jinyono ato ten fixar.

Guazikya dulzeyer :

— Va tokcoba ayik vanmiae motc ke perake is zveri gonaskir ? Batcoba va jin sikapburar. Va artan kevlanil !

Zveri va slakol kevlaniyir ; in va nyoxa madayar ise ranyayar. Bam zveri pulviyir :

— Co-kuraní da va ayikya kevlanil enide ina pu perake di kalir da ine va jinyono ato ten fixar ; kotviele atoá, sofixar.

Slakol dulzeyer :

— Efe grupel da va int kotviele preyutason koe kiray ke ina blí ; ede ina va jin co-wir pune vere co-awalké. Tokinde co-kevlaní enide pu perake di kalir ? Va artan kevlanil ! Batcoba va jin me sikapburar.

Zveri dulzavayar :

— Ax ! Tetce ! Seylon ! Volkalaca meviele tanon sokir.

Zveri va varteba rupeyer. Kaliyir : « Vay, va ayikya kevlanil enide ina va perake di walzer enide ine va jinyono ato merotur ; kotviele atoá, sofixar ; kotviele atoá, sofixar. »

Varteba dulzeyer :

— Jin, va kota stama jinon iana mielon koe kiray, ba divmodera ayikya dimaskir. Batdume va koncoba ika rin me rokalí. Va artan kevlanil !

Zveri va vakol kevlaniyir aze kaliyir :

— Vakol, min koe kiray tigit. Co-kuraní da pu ayikya kalil da ina va perake di walzer enide ine va jinyono ato ten fixar, kire volkalaca meviele tanon sokir.

Vakol dulzeyer :

— Jin, va mona mielcekon sú, vexe viele inafa estura tid gadiafa, va niska iskeyena gan rumeik anton rovovibá. Bata arienta va jin me sikapburar, va artan kevlanil !

Zveri kaliyir :

— Kle va astol kevlaní.

Batinde pulviyir :

— Astol, va rin co-djustaksé enide pu ayikya di kalil ; enide ina di kalir da ine va jinyono ato gonisker, kire efe grupel da volkalaca meviele tanon sokir ! Dili va vegunganyuca nendoyer.

Astol dulzeyer :

— Grupel da ayikya va jin gu porn anzar, ise ostik, kadim jin va int rumkar aze va jin gipeyar. Ise va tokcoba astol vanmiae motc kevus va zveri gu perake co-askir ? Va artan kevlanil. Me lanití meie va betcoba kalití lecen ina va jin me albar, tir jinaf volnik !

Zveri va wilye kevlaniyir. Ine kaliyir :

— Jin, ayikya, jinaf dank vaon divmodesir, vexe viele diveik zo emuder, ina benplekur da zo ebidú aze zo laridagabé ; ayikya tir jinaf volnik. Me rokevlaní enide va rupa wal perake is zveri di vanvur. Batcoba va jin me sikapburar, va artan kevlanil.

Zveri kaliyir :

— Kiewaxe ! Volkalaca meviele tanon sokir ise antafi dili va vegungunyuca nendoyer. Pu kot win al kalí da gopouc da perake va jinyono ato fixar, voxe kalic da batcoba vaon me sikapburar. Va namulol kevlaní.

Zveri pu namulol kaliyir :

— Co-kuraní da va ayikya kevlanil enide ina pu perake di kalir ; kotviele atoá, ine sofixar, ise grupel da volkalaca meviele tanon sokir !

Namulol dulzeyer :

— Ayikya va jin kiewagir vieli tí sudaf, va jin koe inafo wilxo varter vieli tuontinawé, neke viele Tabaski sokir, ina benplekur da zo ebidú aze zo laridagabé. Motc wal ayikya is zveri is perake va jin me sikapburar. Va artan kevlanil.

Zveri kaliyir :

— Ax ux ?

Bantel kaliyir :

— En.

Ini kaliyir :

— Kiewafa !

Zveri va vanteyasiki aneyayar. Dimlaniyison, kaliyir :

— Re, al pulví, cué. Kotviele va kontel staksé, in vewar. Va coba katisa fu askí.

Ini va vanteyasiki plekuyur aze va kiray teyayar.

Ayikya is wilye is varteba is slakol, koe fird kotote xonukayad. Astol laniyis ta greledara dimpison awalkeyer, anteyayan.

Luxe namulol, va estuks gu korik laniyis ta tenanteyara is tolvegedura va kiray zanudayar. Bam zveri va kottan kabelcayar aze dakteyer :

— Va batcoba abdiwiyir, batdume va kot sin stakseyé enide di co-kaliyid da ayikya pu perake gopouyur da ine va jinyono ato fixayar, va jinyono ato fixayar. Kottel pu jin dulzeyer da motc wal perake is zveri va in me sikapburayar. Va daneks re rabatec. Antafa gilduranya va vegunguca sonendoyer. Volkalaca meviele tanon sokir !

Bam, reiz va bira kevstiyir nume kontan vaon senges pune va fuda kofitir.

  Xanto  
Vergumvelt Un malheur ne vient jamais seul
Sutesik -
Piskura -
Ava Wolofava
Evla -
  Kalkotavara  
Vergumvelt Volkalaca meviele tanon sokir
Kalkotavasik Marjorie Waldstein
Piskura -
Evla 2013
  Krentduga  
Webesik Marjorie
Krentduga Image:75%.jpg Gotuenana