Viruda

Teliz mal Wikikrenteem.

Grablé kal exulera, aneyara

Viruda


Viruda

Langazdon idulugalon. Koe vumeltaf gael ; anton jaxok moe domega ier, konlize, dirbeko vazon ier. Sayakoraf rujod koe kelt mezekason tigid, oltavaf gu faytawena nolda… Valeve kusaf gameem ke dzopoka, poke vegeduna drimula, Gerasim rentasik, i ontinaf mazdaf tawadayik dem blakerafa is kendakirafa taka is gexata broenafa gu im, koe lava royner. Ilgaeler aze gaeloyer, aze itabotcepeson, va koncoba valev zaeeem ke dzopoka laguzar. Arte tanoy sajen solumolk, koe lava kale berga, Lyubim jotaf pusik tigiyir, i bargentimvolakiraf zimik dem nilaf siniakoraf itameem. Gerasim is Lyubim tid klaimkiraf is vukulakiraf. Kottol gu fent zo tufaltad kire mali loon tanoy bartiv koe lava tigid.

— Tokdume va nuba dun vanludeval ? ~ zimaf Lyubim iegar, skotces dumede co-vozer. ~ Zverikovudasik ! Gil edeme ina fu maltalar, i nayana ! Gickil, kalí !!

— Me maltalatar… Tokliz talatar ? Lev zae va int al palser… ~ Gerasim, kan odjafa is cegesa puda me stisa mal larida vols jivototsa, kalir. ~ Tir kildesa, man lionasik, nume me grupé kane rokonubá.

— Ben xaska ebidul, ben xaskeem !!

— Va xaska me kozwí… Kel !! Ben koncoba su konubá. Ben art… Bugdar, lionasik !

— Bene art me impal kire fu co-ilgil ! Ben xaska ebidul, ben xaskeem !! Va nuba gire vanludeval ! Kle til rietiskaf tawadayik, ey Keltagazya va jin ixer !! Ebidul !!

— « Ebidul !!» ~ Gerasim kalir, dertason. ~ Man gransesik en til ! Battode, pil aze miv ebidul, zimaf oretlik !!… Va tokcoba ranyeson kel ?

— Co-konudá ede co-rotaskí… Kas poke doma roranyé larde tí omaf ? Banlize aludevafa !

— Xabe, aludevafa ok me… Pujeckel !…

Zimik masotcer, van Gerasim pujer aze va gama geltgir. Voxe ba taneafa ticumara, vanludevawer, trot ticnid.

— Kaliyí da aludevafa ! ~ iegar, yatkon itatanameson. ~ Kas mo rinafa berga fu gowaganyá ?

— Mo zae ranyal… Sine jontikote tigid, dum fogelom…

Zimik va zae kan buu uzear aze va int exoner, vere nubagiyison va konaka gama… Ton ravaldana milbava is gina runda, va int badier, aze, sugason da lava va art mekon konir, kan nuba wal yone zae toz joxar. Kildeson moo besasi vebdi, egluson ko yona lavaruxa, nuba mo kurt ke warmoletra luber…

— Men al zo wil, va oretlikoc ! ~ Lyubim iegar, zideson kabuson va warmoletra mo sid.

Adim, inafa nuba va tela ke Gerasim uzear, aze, titnison kev ina, va xetkafa is fentafa xa kalnir.

— Ax, batse !… ~ Lyubim kicer. ~ Ina tir pwertafa, lionasik… Geltdivpaklal, ben xaskeem vere konubá… Kel ! Kan ladava me klantal… Vere konubá… vere. Anton iskel da nartecké… Va int leve zae aludevon palser, me grupé kane rokonubá… Va taka me laguzá, va dupa anton uzadá… Aix ! Va valpok moe jinafa berga atal !! In va jin anteyar ! Fure… ben xaskeem… Vakrilon vanlanil, va ina platil, platil !! Kan gelt puilel !!

Zimik, tcordeeson, kagison va kagaelara, itafenkupur, ise, va gelt « kak xaskeem » cwe ixam fargier. Vexe batvulon gama nubagimba gu taltenuba joawed, nume milbava mea tigir nume ko lava ! Ivamukoraf rukom, dumede zo kovudad, va domega yategad, ise trot levgon ticnid lize in al luber. Zimik, pujeson is kligason, va gama nubagir.

— Fu wizuwel, gire, oretlik, nume fu gonogiwá ! ~ Gerasim cegeson kalir. ~ Mangil, pu merowina rostaza jovlel ! Miv fu divlavá !

Mijera tozuwer… Awalt burmer ise burmeper. Izga tutrelawed ise va int dum noleem ke lewa kostid. Ontinaf werd, tuidulan gan awalt, va rusagafa is kerovafa is koltkorafa dakela toz divdaaker… Miafiz fure tir, voxe Gerasim is Lyubim valeve dzopoka wan royned. Bana cegesa puda isu bata bresitoliesa va auluca ke bat idulugalaf afiz dun joad.

— Benu xaska impal, djay !! Kel, va ina fu platí ! Tokliz kan nubokap kalizil ? Kan gelt vols nubok, bulolaj ! Vakrilon vanlanil, talton ! Talton vanlanil, lecen roneon kela tigir ! Ta estura ke merowina rostaza co-iskel ! Benu art impal !!

Ustermitara tauler… Trasin gan Efim bonolsusik, milkava, moo titafa domega, vungon, kal lavak titlanir. Bonolsusik tir caviskaf is tanitaf guazik, artmucus is takomason lanis, disukeson va nuga. Namulol, taneon, va lava vanlanid, az okol az jaftol.

— Va ina levoon platil !! ~ va puda ke Lyubim gilder. ~ Va gelt plekul !! Til xadaf, arse ? Oretlik ! Pwox !

— Va tokcoba ebiduc, nik ? ~ bonolsusik iegar.

— Va viruda ! Me lajudivoksev ! Ina lev zae va int al palser ! Vakrilon vanlanil ! Vanlanil, vanlanil !

Efim, tanvulon, van toloy onasik itabotcer, aze va averdeem tioltel, va oliz ticu epita lubesir aze va klaim deswal. Va rija braldeson vider, aze, gamdumayason, sespason va mazdaf is ebeltaf meem, va lava kolanir… Art mon alub-sanoya bora moo dremaf ludev, aze toz pujer.

— Kec, jotye !! ~ iegar. ~ Kec !! Va askiracka me grupec, fu keluc. Fiste aptacik !…

Efim va toloy rentasik kazokever, aze, baroy, va sint klantason kev ladava ik bade, cepites is va sint lutsagas, millize siudad… Lyubim zimik skeur, aze zadrusa is remrusa bobara tauler.

— Toklize bonolsusik tigir ? ~ kontan mou domega iegar. ~ Efim ! bonolsusik ! Toklize tigil ? Milkava ko matela ! Askil da div matela !! Askil !! Toklize bat guazaf drendik fotce rotigir ?

Ayikyefa puda zo gilded, azu tanoya ayikyafa. Kadime polku ke jiomafa matela, Andrey Andreitc jiomik awir, dem jeg kum persaf sedok is gis va fela koe nuba… Ton koerusa tiva disuker liz iera malstid aze va drimula ekeyuson vanlanir.

— Tokcoba batlize ? Toktan ier ? ~ bokson erur, kozwison wale gameem ke dzopoka va baroya pumana taka ke onasik. ~ Va tokcoba batlize nubac ?

— On… va kabay onav… ~ Efim tcipar, me takamadason.

— Maneke pu rin va kabay co-zilí ! Milkava ko matela, miledje in onar !… Tokviele drimula titir runkafa, oretlik ? Mali tolka kobac, voxe tokeke al askic ?

— Drim… drimula titir runkafa… ~ Gerasim pulvajir. ~ Idulugal tiskipir. Oluik, ta kolavara, va ugal ware daditil… Pfrrr… Vexe bata viruda va cin dun tubakestar… Lev zae va int al palser nume dum koe gelbe tigir : me batliz mei banliz…

— Viruda ? ~ jiomik erur ise inaf iteem jeber. ~ Tetce, va ina kalion divlavac !!

— Va talolkam co-zilitil… oluik… Granafa viruda, sudafa dum dolekikya… Ika zegara… Tatcel da ina otcer, Lyubim, oke urdatal ! Levuon vulel !! Va zae ticon impamal, sintaye !!… Tokkane zo yoltal ? Ticon, vols titon, oretlik !! Va nimat me kalizic !!

Aluboya wexa tiskid, aze sanoya… Jiomik toz tabir.

— Vasili !! ~ iegar, rwodeson van mona. ~ Vaska !! Askic da Vasili kal jin !!

Vasili diremstasik vanvulter. Va koncoba roxanar ise ilgaeler..

— Va lava kolanil, ~ jiomik benplekur, ~ va sin ta divlavara va vurida pomal !!… Va vurida me lajudivlavad !

Vasili va int wiluon basvager aze va lava kolanir.

— Va ina vere fu… ~ kalidar. ~ Toklize viruda ? Vere fu… Fure gitit ! Vexe co-govobulul, Efim ! Meinde batlize co-gotigil, guazye, mancoba vol tir viunsura ta rin ! Toka viruda batlize ? Va ina vere fu… Ax, wí ! Va nuba deswac !!

— Tokdume va nuba godeswav ? Grupeckev : va nuba deswav ! Voxe rin, divlaval !!

— Kas batkane fu divlaval ? Fiste ben taka !

— Vexe taka leve ulim tigir ! Bettan sogruper, fitulik !

— Benje, me iel, edeme ina fu otcer ! Tozekik !

— Oblakon ice jiomik yona oltavafa ewa… ~ Efim tcipar. ~ Me fu lajudivlavac, nik ! Ina oblirson al gelber !

— Kec, vere fu… ~ jiomik kalir aze va int ekeyuson basvager. ~ Win balemoy fitulik voxe va viruda me lajudivlavac !

Vageiskaf, Andrey Andreitc va fede kemel aze va lava kolanir. Vexe inafa tegira dere me jupekar.

— Va zae gogabet !! ~ Lyubim adim gorar. ~ Gerasim, va kufta kevlanil !! Va kufta deac !!

— Va gelt me gabel !! ~ gildeson va vordava ben zae leve welma, jiomik kalir. ~ Efim, mangil !! Kec, va viruda fu divlavá !!… Win me…

Zae zo gabemer. Xelkanon zo levmadar, aze Andrey Andreitc rwavepenon pestaler da gelteem lev xaskeem ke viruda kilder.

— Va ina divlavá, nik ! Va jin me licac !!… Ranyac !!… Divlavá !

Pwertafa taka ke viruda welmon ic lava awir, az ebeltafo alto abrotcafo dum ma. Viruda va ault rusagon botcer ise va int lagrifuner.

— Niustel !… Benje, nanya ! Zo naril, mex ? Ax !

Tierdafa kicera bene kota gexata tigir. Tanoya wexa tiskir, remi amlitafa nyasera.

— Ilamtafa viruda ! ~ Efim pulvajir, fasiason va intaf melieem. ~ Morbé da inafo aldo tir vas sanoy funt…

— Ox ! en ! ~ Andrey Andreitc dotrakur. ~ Va mana wela dir ! Maneke ina riwe dive jivot. Ax !…

Viruda levgon aultzekapar nume onasik va birierapa gilded… Kot kalion nubafenkur, vox gaverson ; viruda, kas va yolt setiketel ?

  Xanto  
Vergumvelt Налим
Sutesik Anton Tcexov
Piskura Петербургская газета
Ava Rossiava
Evla 1885
  Kalkotavara  
Vergumvelt Viruda
Kalkotavasik Mixail Kostov
Piskura
Evla 2008
Klita [1]
  Krentduga  
Webesik Troubadour
Krentduga Image:Compare.jpg Tuenayana


   
   

Berpotam ke
Anton Tcexov