Vasilisa Listapya

Teliz mal Wikikrenteem.

Grablé kal exulera, aneyara

Vasilisa Listapya

Rwaltreiz : Vasilisa Listapya

Lanugale darekeon. Lane dolekikye tir. Remi kurerafa santolda, va tanoya nazbeikya al dikir, i va Vasilisa listapya. Gadikya mulufter viele velik tir anyustdaf. Pestaleson va vanfisa jiadara, gadikya va in rozar, aze va bragodama palseyena levu modivatcesiku narir aze pu Vasilisa kalir :

— Va jinyona bocafa ewa terektal, va bocafa kuranira kalvegel ‼ Va bata bragoda do jinafa kumzilira zilí ; va ina kevsul, pu metan nedil ‼ Ede kona rotera co sokir, batkase va estuks pu bragoda firvil ise pirdadal ‼ Ina va rin ton xaka pomatar.

Kurenik ke dolekik va nazbeik dablur aze mulufter. Nyobrik katison va int erolar, aze va tolkurera guzekar. Tir vonik nume va galpesik me gracir, voxe va mea jotafa ayikya narar, i va nyobrik dum int dem toloya nazbeikya milklaafa gu tela intafa : « In tir exomikany, ~ trakur, ~ is stropaf yasagadik ». Acum zo kurer, vexe in al rokler : kurenik me tir gadikany tove Vasilisa. Gadikaj is intaf toloy nazbeik tid lickaf gu listuca ke Vasilisa. Sin va ina olyasted, gu ol kaikanzad, enide suka is awalt va ina di tuebeltad ise kobara di vanxomesir.

Vexe Vasilisa va kotcoba metemeson tcizar ise vielvielon tulolistar, vielvielon lobatakafa is lodiewafa, solve vangadikya is intaf toloy nazbeik kliwaf is mekon askis kan gelteem aundeson dun tumazdawed nume djumason tuviskukawed.

Me gruped da bragoda va Vasilisa pomar. Voldo ina, rumeikya va mana kobarapa me co rokotaskir. Sielon, viele kottel komoder, pune ina koe lutiz va int gikobuder, va estuks pu bragoda zanolur ise va intyona volkalaca pwader :

— Bragodanya, estul ise va jinyona puidera terektal ‼ Mona ke gadikye tir gabentafa, ise trukafa vangadikya va jinafa jiadara kuranir. Pu jin kalil, va tokcoba gonaskí ?

Bragoda gilestur aze va Vasilisa vinur, pirdar, aze gazdon va kobara ikaon kotaskickir. Vasilisa bak fedugal va int tilder, va imwa yestar ise batedje rostelaxo zo basratar ise lava zo lirder ise kunta zo rustoled ise tey zo daskir. Bragoda va gumenadas werd dace tazer. Nume rumeik va bragoda oder ise va lokiewafi estutuni ki torion sur.

Vasilisa tusardawer nume vanpir gokuren yik. Kote yikye ke widava va Vasilisa jukur ise metanye va kona nazbeikya ke vangadikya disuker. Bam bantel va Vasilisa lopoon toz ilkader ise pu kot galpesik dulzer :

— Va tel bocaf nazbeik abdi bat taneaf oku ban me kureté !

Nume moi mallanira ke yikye, va Vasilisa jaxadason alier.

Lanviele, gadikye ta koyara jontikedje gomallakir. Vangadikya ko mona drume aalxo irubar. Koe bato aalxo Baba Yaga guazaf diwik blir. Jupar da metan va inafa mona rovanlanir ise va yon korik dum wil gifegalar. Ilstakseteson, vangadikya va Vasilisa ko aalxo dun stakser djam « Va batcoba aneyal ‼ Va bancoba vanburel ‼» djamae. Vexe yikya kotviele dimlanir ise tir vawelafa kir giwodayana gan bragoda ilstasa gu mona ke Baba Yaga.

Muvugal artfir. Bak sielcekap kota yikya gikobar : battel va talgukay iar, bantel va omexa vooker, ise Vasilisa breltafemur. Vangadikya va lag tori miel pu sin zilir aze ilavasenyar, iskeson va tanoya leta tori baroy kobasik. Tana inafa nazbeikya va leta nujikurtar voxe artafir, batinde gadikya al kobenplekur.

— Ox goxe ! Lag tir metenukeyen ise me tey koe mona tigir. Fiste va tey pu Baba Yaga gonerut ! Toktel fu kevlanir ?

— Me jin, ~ talgukaynyofasik kalir. ~ Tuke noelieem afton lajuwí !

— Mei jin, ~ vookesik kalir. ~ Veel jebed, kle wickí.

Nume kottol va Vasilisa kofed :

— Rin va Baba Yaga ta tey gokevlanil ‼

Nume va ina div olkoba vanplatid. Vasilisa ko lutiz vulter, va sielestuks pu bragoda zanolur, aze boreson kalir :

— Bragodanya, estul ise va jinafa puidera terektal ‼ Mbi kalí da va Baba Yaga di gokevlaní. Arse zo vumbeté !

— Va mecoba kival ‼ ~ bragoda dulzer. ~ Va jin doon naril aze aulon lanil liz zo staksel ‼ Edje doon tigí, pune beta rotaca va rin sometikir.

Vasilisa va bragoda koucomar, gamdumar aze ko tapedafo aalxo lanir. Abicedje skotceson keldonar viele korik kaiklakir : i koton batakaf, batakon vagekiraf is moe batakaf okol batakon wastkiraf. Vere loon aftar.

Ina wan lanir aze va ar okollakisik wir : i va koton keraf, keron vagekiraf is moe keraf okol keron wastkiraf. Nume ticawaltar.

Vasilisa va senta ba siel oxam artlanir lize Baba Yaga blir. Istayaxa ke mona tir dem yupolk ; yona itakirafa oria va bata istayaxa is ayanimat wetce tuveliazwa is nubakirafa ma wetce arelta is art dem opaf talgeem wetce zol ziked.

Wison va batcoba, kimtafa yikya ton toa skotcer, viele korik artlakir : i koton ebeltaf, ebelton vagekiraf is moe ebeltaf okol ebelton wastkiraf. Vere mielar ise ita ke oria runafiwed nume afiad milinde afizar. Vasilisa co djumotcer vexe vudera va ina batlize titickar.

Laizon koe aalxo lorarapa dilizer : gama twawed, toa awiled. Azon Baba Yaga guazaf diwik ko senta awir. Koe ayezvarak gikoyar ise kan ayezvasiki platir aze va conyuta kan tsent relvar. Ayezvarak kabdu tuveli vukir, Baba Yaga va gael senger aze diviegar :

— Va pokeon rossiaf cot pezí ! Toktan tir ?!

Vasilisa skotcepesa omakiavason vanlanir :

— Jin, veygadik. Nazbeik ke jinafa vangadikya va jin den rin al staksed, ta erura va abic tey.

— Ae, va sin grupedá, ~ Baba Yaga kalir. ~ Batlize fu zavzagil nume va jin zanitil. Ede kobara co zo askickitir, battode va tey zilití, edeme va rin estutú ‼

Baba Yaga van tuveli rwoder aze iegar :

— Va int volixatcac, acagisa ixatca ‼ Tuvelipi, va int fenkul ‼

Tuveli va int fenkur aze Baba Yaga ko kusk azdadason krafur. Vasilisa radimelanir. Azon tuveli va int buder.

Viele Baba Yaga koe mona tigir, mo starka fandizawer aze pu Vasilisa benplekur :

— Va kotak ke estuks tigis koe cade pu jin zanolul ‼ Ise ampul ‼ Aelé !

Vasilisa toz zanolur. Va zomak is solzaks, va tiorn is lupa, va jimatek is aabre. Va kolt is lavajeb is ekot is vor div blotxo narir, i va jontikcoba rotestuna is rotulina uma tori sana ! Baba Yaga va kotcoba estur ise va kotcoba ulir ; va begkimi is abice aabre is solzayani bulolxaki tori Vasilisa anton isker. Azon kalir :

— Eldeon, moi jinafa mallapira, va kusk tsentetel, va mona tucuatal, va sielestura egatal, va grita ematal ‼ Azon va denta vas tanoya pakta div begak naritil aze sotre olk mubetel. Ise va kotcoba lasugaskickitil, edeme va rin estutú ‼

Bam ilavasenyar aze toz iptoker. Vasilisa va ark ke sielestuks ke Baba Yaga kabdu bragoda aykar aze boreson kalir :

— Bragodanya, estul ise va jinafa puidera terektal ‼ Ede va bata kobara me kotote kotaskí, battode gan Baba Yaga di zo estú !

— Me kival, Vasilisa, ~ bragoda dulzer. ~ Lanil aze aulon kenibel ‼ Gazda lodam siel sotir utcorafa !

Vasilisa abdi vanafizara ranyar, vexe Baba Yaga ixam al ranyer. Fure ita ke oria artafiwed. Batakaf okollakisik pokolakir nume toz afizar. Baba Yaga va kusk divlanir aze azdar, vere ayezvarak do ayezvasiki is tsent kabduon va int rundar. Keraf okollakisik pokolakir nume toz awaltar. Baba Yaga va soli rundanyar aze kalion mallapir. Koe ayezvarak koyar, kan ayezvasiki platir, va conyuta kan tsent relvar…

Re antafa, Vasilisa va mona kodisuker, va kuluca is aultovera mafelar nueson kane va kobara gobokar, viele sonker da kotcoba ixam al zo skur, bragoda va yon bocaf dentolk muber. Vasilisa va ina dablur :

— Tokkane rogrewá, va bragoda abegya ?! Va jin al bligiwal.

Bragoda ko inaf ucom ticumar, kalison :

— Va ant sielestura ware gonegal. Azon va int tildel ‼

Levi siel, Vasilisa va estura tiendur. Fure ebeltaf okollakisik pokolakir nume toz mielar. Ita ke oria runafiwed, gama twawed, toa awiled, banse Baba Yaga artlapir. Vasilisa vanon divlanir.

— Kas kobara tir kotaskiyina ? ~ Baba Yaga erur.

— Miv wil, veygadik ‼ ~ yikya dulzer.

Baba Yaga va kotcoba kaldisuker, kotliz disukerser voxe va mecoba vorcemba kosmar. Bulegar : « Ae, umeke… », aze rozar :

— Sagaf zanisik, i nik ke kusk, kal jin aze va denta glefac ‼

Bam baroy meem awid, va olk kaik wira divbured. Baba Yaga sielestur aze ilavasenyar, kalison :

— Eldeon, valey coba revielon kotaskiyina gan rin, va vibongfay vas tanoya paktapa mubetel ‼ Abica tawa al koaotcewer, lasugaskil enide mea zavzagitir, edeme va rin di estutú ‼

Toz iptoker. Vasilisa va bragoda zanolur. Ina estur aze dum darevielon kalir :

— Lanil aze aulon kenibel ‼ Kotcoba zo kotaskitir, Vasilisa abegya. Gazda lodam siel sotir utcorafa !

Direvielon, Baba Yaga mallapir, azon Vasilisa is bragoda va lag kaliapon kotaskid. Moi dimlapira, Baba Yaga va kotcoba kaldisuker, ko beta alavama disukerser, voxe va mecoba vorcemba kosmar. Rozar :

— Sagaf zanisik, i nik ke kusk, kal jin aze va punta ke jinyon vibongfay xuvac ‼

Bam baroy meem awid, va fay kaik wira divbured. Baba Yaga va sielestura benazegar. Vasilisa amliton zanolur nume diwik puskacegar :

— Tokdume va mecoba kalil ? Bro pulviskik batlize tigil !

— Kire, kire me eblé, veygadik ! Vexe ede novel, pune va koncoba di djumerú.

— Erul ‼ Vexe lane bibe zo somekalid. Gruperseson kaliarson sotuguazawet !

— Co djumé da pebul va coba al wí, veygadik. Denlanison va rin, va batakaf okollakisik al gamdá. Toktan tir ?

— Tir jinaf afiz, ~ Baba Yaga dulzer.

— Azon va koton keraf okollakisik al wí, toktan tir ?

— Tir jinaf lujaf awalt.

— Ise azon va koton ebeltaf okollakisik al wí, toktan tir ?

— Tir jinaf orikaf miel, ~ Baba Yaga dulzer. ~ Bat baroy tid jinaf sagaf zanisik !

Vasilisa va baroy meem trakur voxe va mecoba divnedir. Baba Yaga kalir :

— Kle, mea bibel ?

— Umote grupecké, veygadik. Milinde miv al kalil, gruperseson kaliarson sotuguazawet.

— Kiewaxe, ~ Baba Yaga vanovar. ~ Gu coba ezeon wiyina vols deneon sokisa koerul. Va jinafa grita deneon djukutcaté, nume va rilitarsik gilestú ! Vexe va rin siluon bibé : tokkane va kobara zilina kotote lajukotaskil ?

— Gadafa kumzilira va jin kopomar, veygadik.

— Kle batkane ? Kle, kumzilinik, mallanil, vere ‼ Va kumzilinik dene jin vol kuraní !

Baba Yaga va yikya divplatir, voxe abdida va tuveli dimbuder, va oria dem lujaf iteem narir aze ben otsa ke peya levrumkar aze ko nuba ke Vasilisa plekur :

— Batse, va tey tori nazbeik ke rinafa vangadikya, naril ‼ Turkon, batdume den jin ganon zo stakseyel.

Vasilisa ko aalxo malvulter. Iteem ke oria va kelda afiar aze ba vanafiz oxam artafiwer. Ina afizcekon keldonar aze moni siel, edje va intafa mona vanlanir, pu int kalir : « Mali jinafa mallanira, sin va tey tce al trasid… » nume va oria djumimar. Vexe puda vaon divstir :

— Va jin me mimal, den rinafa vangadikya burel ‼

Vasilisa veger. Artlanison, zo kivapar da va meki afi koe mona wir, aze loeke zo kivar viele va vangadikya is toloy nazbeik daavapon emudesa wir. Mali mallanira, ~ mbi kalir, ~ mekane ta dadira va tey koe mona. Bat vanteyan somebokawer is ban stan denu vegungik non sokanteyawer.

— Tel rinaf loon dakiweter, rotir, ~ vangadikya kalir.

Vasilisa va oria ko mawa vanburer ; kreme anteyas iteem va vangadikya is toloy nazbeik titickar aze kotliz benfir. Sin giopon lagotced ike va int lapalsed, vexe iteem dun onkar nume moi vanafiz guboy ke sin anton zavzagid ; ant Vasilisa va meka rotura al levgar.

Ba gazda, Vasilisa va oria kotawar, va mona buder aze ko widava mallanir lize gan guazikya zo koemuder, keson va dimlakira ke gadikye. Lanviele, Vasilisa pu guazik kalir :

— Askison va mecoba argawé, veygadik ! Va breltanya tori jin lustel, femutú.

Guazik va brelta vanburer aze Vasilisa toz nyofar. Fem gan nubeem zo divimpar, i gemaf is delaf. Ina kalion ten femur, aze djulayer, vexe meka rujda tir gemackafa tori inaf fem. Gire bragoda pomar iason va rujdacka.

Vasilisa gin kobar nume ba tena ke fentugal stama tir layeyena, i tiguapafa is gemapafa eke va veelfweki rokoonir ! Ba imwugal stama zo tubatakar, bam Vasilisa pu guazik kalir :

— Ko dolexo lanil, veygadik ‼ Va bata stama dolel aze va erba sul ‼

Vexe guazikya pumbar :

— Me modoval, nazbeya ‼ Va man doleks, i va in den gazik fu buré !

Kabdue berma va int koinker aze valevo dilk toz gozar. Gazikye va ina katcalar nume rozar :

— Va tokcoba batlize askil, guazya ? Va tokcoba djumel ?

— Va riaf arsay pu rin vanburé, i va riapaf eke Gazikany vugviele rovowitil.

Gazik jupar da guazikya kolanir aze gan stama zo komafelar :

— Tokdroe erul, guazya ?

— Mana stama tir droiskafa ! Metan roluster, ant Gazik va ina rodiskir. Pu rin siabé !

Guazik gan guazik zo grewar aze mallanir, dem jontik yal.

Gazik va stama pu intyon vageiasik ta klaim zilir. Sin va yon klaim gaboted, voxe mekane lajupasadad ! Mek vageiasik mei gritiasik va mana ligemafa stama rovenyofad. Larves gazik va guazikya volmiv kevlakir, aze kalir :

— Larde va stama al grulayel, battode va jinyon klaim grupasadatal !

— Bata stama me tir gan jinaf nubeem. Vanikatcuyuna nazbeikya al femur aze al layer.

— Battode, inya va jinyon klaim co rotasadar !

Viele guazikya va arienta munester, Vasilisa kicer :

— Vantrakuckuyú da mana nyofara tir tori jinaf nubeem !

Nume toz asadar. San-toloy klaim kaliapon zo epud. Guazik va sin den gazik vanburer. Batedje Vasilisa rieter nume va int kolavar aze va int loiter aze va int kulon vager aze kabdu dilk va int koinker. Vanion va gazastaksenik artlanir aze pu guazik kalir :

— Toklize bat deksaf asadasik tigir ? Gazikany miv djugabler.

Vasilisa ko berma lanir. Bam viele kolanir, viele gazikye va ina disuker, numon ve korenar :

— Vol iské da mallanil, listyanya ‼ Vanpil jinaf kurenik !?

Gazik va nuba ke Vasilisa Listapya narir, ganer da ina pokon debanyar. Vanion sinafa vidia zo fiptar.

Fure gadikye ke Vasilisa dim koyara artlanir, tir valeapafe gu kaluca ke nazbeik aze pok ina blitison di zavzagir. Guazikya do sin dere di zavzagir. Aze blirugalcekon Vasilisa sersikya va bragoda koe ucom keveon di burer.

  Xanto  
Vergumvelt Василиса Прекрасная
Rwaltreizak Народные русские сказки
Sutesik ayoltik
Piskura Александр Николаевич Афанасьев
Ava Rossiava
Evla 1855-1871
  Kalkotavara  
Vergumvelt Vasilisa Listapya
Kalkotavasik Damien Etcheverry
Piskura
Evla 2014
Klita
  Krentduga  
Webesik Troubadour
Krentduga Image:100%.jpg Tuenayana

Yunkeks ke Ivan Bilibin
Yunkeks ke Ivan Bilibin


   
   

Народные русские сказки (Rwaltreiz ke Rossia)