Tel lobudaf ayik ke bara

Teliz mal Wikikrenteem.

Grablé kal exulera, aneyara

Tel lobudaf ayik ke bara
Bamanavaf reiz (Malia)


Toloy nik koe mila wida bliyid, kottol do intafa fertikya. Konviele fertik ke battol ko pokefa wida gozayar. Ba siel fertikye yoltkirafe gu Keleke, wison da in me dimpiyir, va Misa nik ve blikeyer enide in vanon lanir.

Remi da do Misa abduelanisa yikya dimpiyir, va ayiktoraf narmol vanon abdulanis ve kozwiyir.

− Misa, ve kaliyir, tir narmol van min pis.
− Kemel, in ve dulzeyer. Fu atá !

Va abaltap impar aze va ayiktoraf snavol tanon balier.

Azon pu ayikya ve kaliyir :

− Va buduca ke rinaf fertik goposá ! Mo ge senhal, mo rin va narmol ton vadimeinheem soayan moe rinaf jadayeem is vabdueinheem moe ast is gariza bene larida fu plekú. Aze va Keleke djití da rin gan narmol su zo telomtal nume zo vumbel. Witit ede in tir budaf !

Ayikya va posara naler nume va in antaf koe tapeduca iskeson, Misa van pusik mallanir :

− Nik, poke frunkuakap kene kelda va vegungafa wida va in domuson kalir, va rinaf fertik narmol al narir nume vumber. Jin al vudé nume al otcé.

Mekeson da pusik ten pulvir, a ervo is dace peya Keleke ton suka mallanir. Misa wavdon radimelanir. Viele pok bonol Keleke artlanir vaon iper aze kan tanoya nubokanhara mo keldakril tizon kamimar.

Bam fertik ranhar ise kipeson kalir :

− Va nuba me rotul ! Ayiktoraf narmol ixam tir atayan. Misa is jin djugrupeyev ede lente iyelapa va jin co-jovlel.

Pu jin kalic : Toktel ke bata bara tir tel lobudaf ? Kas Misa kalebleyes va dilfura va narmol kan opelon abalt ? Kas ayikya tiyisa budafa zavzason antafa remi mielap leve awalkoda ke narmol megrupeson ede bata tiyir atanhayana oke ede ar narmol me co-awitir ?

Adim kas Keleke djukevalieyes va sulem kan anton nubok ?

  Xanto  
Vergumvelt Le plus brave des trois
Sutesik -
Piskura -
Ava Bamanava
Evla -
  Kalkotavara  
Vergumvelt Tel lobudaf ayik ke bara
Kalkotavasik Abdoulaye Coulibaly
Piskura -
Evla 2008
  Krentduga  
Webesik Soundiata
Krentduga Image:75%.jpg Gotuenana