Tel Rotik dank 03

Teliz mal Wikikrenteem.

Grablé kal exulera, aneyara

Tel Rotik
Bamanavafa kuda (Malia)


Bareaf dank

Va tel rotik !
Toktan va tel rotik gruper ?
Va tel rotik !
Va tel rotik vol grupet !
Tel rotik gorayar da tegijir.
Tel rotik kaliyir da va abic plebotekot fu iar.
Ko lava va vodapasa kita dem plebot plekuyur,
Keter da in welketer,
Aze va in nariyir,
Va welkeyes plebot nariyir,
Leve awalt manton divatceyer,
‘Kotokoto’ ayezvayar,
‘Yekeyeke’ flanceyer,
‘Dru tutu tutu’ koe lava diareyer,
Mo tey obrason plekuyur.
‘Fuyayi fuyayi’ lembieyer,
‘Bukayi bukayi’ kebuyur,
‘Jiro toto toto’ espayar,
‘Koro toto toto’ basplawayar,
Keter da in aulon kaluber,
In va wazdelam aze ludevon ic plawa parvuon plekuyur
‘Dolo’ ‘fuyayi fuyayi’ kacaweyer,
Aze skael vion daykaweyer.
Tel rotik laniyir ise aneyayar va intaf nik .
Atara va tanaf nik,
Batcoba tir drikafa,
Voxe porfeon trasira va toleaf,
Bancoba tir voldrikafa !
Tel rotik va suroga ve kakeveyer.
Ex, suroga nik !
En !
Va abico ‘dolo’ al egá,
Va artan me djugané
Vols anton rin, pitil ?
Ba tok viel titir ?
Teveavielon va sint kabelcatat.
Bato abico ‘dolo’ mu kottol titir umo.
Lanon pití !
Tel rotik losumon laniyir.
Va wil ve kakeveyer.
Ex, wil nik !
En ?
Va abico ‘dolo’ al egá, voxe me jontikote.
Va artan vols anton rin me djugané,
Yawal da pil.
Ba tok viel titir ?
Teveavielon ulitit.
‘Dolo’ keskeon tir abico, en,
Vexe batcoba titir uma.
Bat viel fudjer,
Pití.
Tel rotik wan laniyir.
Va karvukol ve kakeveyer :
Ex ! Karvukol nik !
En ?
Ko lava va abic plebot al plekú,
Okie djumé da, vaxe anton rin,
Metan vaon votar.
Vay, yawal da pil
Enide va jin pomatal da ulití.
Jinafo ‘dolo’ tir abico
Voxe mu kottol en titir umo.
Ba tok viel ?
Gazdon teveavielon.
Lorik zo kumzilir ! Pití !
Tel rotik wan laniyir.
Va vakolap boreon ve kakeveyer.
Ve kaliyir : « Vakolap jinaf nik ! »
En ?
Va abico ‘dolo’ al egá.
In gazdon teveavielon titir kiewaf.
Okie va artan vols rin me djugané.
Batcoba tir kiewafa ise va jin puvegar,
Nume pití.
Batabico ‘dolo’ en titir umo.
Tel rotik keyuyur ise wan laniyir.
Va narmol ve kakeveyer.
Ve kaliyir : « Ex ! Iyepta nik ! »
En !
Va abico ‘dolo’ al egá,
Djumé da rin vaon votal,
Anton rin.
Bak tok viel ulitit ?
Ta firvira teveavielon al egá
Kas gazdon titir ?
En, gazdon.
Pití.
Tel rotik losumon laniyir,
Va ebeltaf dikdatol ve kakeveyer.
Ve kaliyir : « Ex ! Nama nik ! »
En ?
Minafa kakevera sokinhir, va ‘dolo’ al egá.
Okie va artan me gané
Vols anton rin. In teveaviel titir gadiaf.
Batvielon yawatal da pil, mex ?
Ox en, me gracetel.
Tel rotik losumon laniyir,
Lente krapol ve tiyir.
Ve kaliyir : « Ex, krapol nik ! »
En ?
Va ‘dolo’ al egá.
Djumé da rin anton pil aze va jin pomal da ulit
Yawal da pil, pusik.
Ba tok viel ?
Ironokon teveaviel.
Ba bat viel pití.
Tel rotik batlizu ve mallaniyir ;
Va klantasa zamhala ve kakeveyer :
Ex ! Zamhala nik !
Eim ?
Teveavielon me lanitil aze va jin pomatal
Da va jinafa eksa dem ‘dolo’ ulitit ?
Rade rin anton, va metan gané.
Jinafo abico ‘dolo’ titir umo.
Kiewafa, pití.
Tel rotik va tcabanhesik ve kakeveyer.
Pu in ve kaliyir : « Ex ! Feliik ! »
En ?
Va abico ‘dolo’ al egá
Ta da in teveavielon titir gadiaf
Va rin anton gané,
Kas pitil ?
Ex en, pití.
Porfeon, tel rotik va jaxok ve kakeveyer.
Ve kaliyir : » Ex ! jaxok nik ! »
En ?
Va abico ‘dolo’ al egá.
Batcoba tir ickrileks mu rin anton,
Teveavielon pitil ?
Ta da ulitit ?
Denon, pití !
Tel rotik !
Kax ! Boralor ke tel rotik pis !
Tel rotik !
Espur da tir wetasik
Tel rotik !
Kax ! Boralor ke tel rotik kolanis !
Tel rotik !
Espur da tir diepilesik,
Tel rotik !
Kax ! Tel rotik al pir.
Tel rotik !
Espuson da tir diwedik.
Tel rotik !
Ex en ! Tel rotik va batcoba kaliyir.
Tel rotik !
Kaliyir da va norlik wir.
Tel rotik !
Va tel rotik me wiyil ?
Va tel rotik ! Toktan va tel rotik gruper ?
Tel rotik !
En ! Va tel rotik vol grupet !

  Xanto  
Vergumvelt Mɔkɔ juku
Sutesik -
Piskura -
Ava Bamanava
Evla -
  Kalkotavara  
Vergumvelt Tel Rotik
Kalkotavasik Abdoulaye Coulibaly
Piskura -
Evla 2008
  Krentduga  
Webesik Soundiata
Krentduga Image:75%.jpg Gotuenana


Tel Rotik (bamanavafa kuda)

← 2-eaf dank - 3-eaf dank - 4-eaf dank →

Ara ava se