Taneaf ayik

Teliz mal Wikikrenteem.

Grablé kal exulera, aneyara

Taneaf ayik
Madagasikarafa vunda


Yolt ke taneafe ayikye ke Tawava tiyir Ietse. In tiyir antaf is kalapaf kire ta blira me godekobayar. Va yona kudja vektasa va int gibenyofayar.

Viele va saneafa kudja tenukeyer, Lorik pu tana intafa levtirikya ve kaliyir :

– Kuraní da va Ietse di yerumal.

– Vexe in rotir me galpeter, levetirikya ve dulzeyer.

– Witit. Va batyona finyega divburel. Koe taneafa Fent al zo kobudeyer. Griaretlatal viele va Tawava kallanitil. Ietse fenteter nume va rin poklanitir enide va int tuidulatar.

– Ede me vanlanitir, va toleafa finyega kobudesa va Idul di griaretlatar. Viele in divstitir, Ietse va rinaf meem olegatar enide va int tufedatar.

– Ede druweter, va bareafa finyega lize Siput tir fenkutul. Bam inye pu rin va lava erutur.

– Ede wan titir takelaf, va balemeafa finyega koegisa va Ael fenkutul, aze kabdue in va esturapa egatal.

– Ede in me pitir ta estura, va valpokeem alubeon divfinyegatal. Kuranitir da masotcetel enide in me zo puileter.

– Ede va valpokeem divvawatar, batse teveafa finyega, tela va omgara. In guon mejeter maneke kan bata jinon zilina medra ropragatar.

– Ede wan me kuranitir, div pereafa finyega va Arga gudivfisatal, nume kreme va yona rupanya djugildeter.

– Vexe ede va rin negas me terektatar, Kipe mu rin koe anyusteafa finyega wan titir. Inye me gruper nume va rin adim vanlanitir enide kalterektatar ise milaskitir.

Viele ayikya va Tawava kallaniyir, Ietse va in nujimewiyir.

Inya va finyega dem Fent aretlayar : in kreme vanteyapayar.

Inya va toleafa finyega aretlayar, va tela dem Idul : ko aalxo lize fedayar izgon ice yon aalap mallaniyir.

Inya va Siput fenkuyur vexe in va lava ke ravenala trasiyir nume uliyir.

Kev Ael, va konaka bilka yestayar nume va levetirikya egasa va estura dace me disukeyer.

Viele valpok divvawayad, in toz vulteson kan nuba aloyayar.

Viele omgara dilfuyud, in ben aal va int fasiayar.

Kev Arga, va inta gabeyer nume va negara ke ayikya me terektayar.

Adim, viele male ironokafa finyega Kipe divroidatar, in va oblakeem aretlayar aze komodeyer.

Ayikya va kelt dimtidlaniyir aze pu Lorik dakteyer da al rodjeyer. Lorik epitumayar aze ko burmotaxo va in dimstakseyer.

Bam va gelukafa nasbeikya rozayar, va listafo Ivelo, aze va in silukon stakseyer.

Ivelo ta puvera pu Ietse va intaf lolistaf gem al kavageyer : va italkaf gem dem peroya kseva (kadule is kaduluke is falte is kuse is blafote is kramtuke is kere). Nume Ietse krupteyer da inya tiyir listafa maneke in djusuyur ise djuyerumayar.

Vielu Ivelo moe Tawava tiyir, tanion kiewayar. Ietse mea kudjanyofayar, va yerumanik gibedisukeyer. Vexe konviele, Ivelo pu in ve kaliyir :

– Argawé. Do rinafa yona kudja co-djurelandewé voxe sin tid melizis. Pu gadikye fu erú enide in di blizilir, mu sin.

– Ivelo va kelt tidlaniyir aze toz muvayar. Viele dimlaniyir, va awalt is blikirapafa finyega vanbureyer. Mo tublisawesa kudja gimayar : sin di tiyid naskeikeem ke Ietse is Ivelo.

Konviele, Ietse ve awalkeyer : batvielu, ayik, intaf nasbeikoc, viele puzitar, va in setikeson sokalir : « Ietse ».

Ivelo tolon toz argaweyer. Lolofereon mallaniyir voxe lolodabrotcion dimlaniyir. Batdume mo Tawava somuvar. Vexe viele pir enide va min wir, sokiewar, ise kotviele va intaf italkaf gem dem kadule is kaduluke is falte is kuse is blafote is kramtuke is kere.

  Xanto  
Vergumvelt Les premiers hommes
Sutesik -
Piskura -
Ava Madagasikarava
Evla -
  Kalkotavara  
Vergumvelt Taneaf ayik
Kalkotavasik Bruno Cordelier
Piskura -
Evla 2011
  Krentduga  
Webesik Bcordelier
Krentduga Image:75%.jpg Gotuenana