Stuveem ke Alice koe Zultaxo Luz06

Teliz mal Wikikrenteem.

Grablé kal exulera, aneyara

Stuveem ke Alice koe Zultaxo


Teveaf luz : Bulol is culo

Alice disukeson va tuvel bak tanoya ok toloya wexa zavzagir ; nuer va coba gonaskir viele tantazukotkiraf kwik va mikaci levgon divvulter. ( Ine golde tantazukot va in gu kwik krupter ; edeme, kare anton inafa vola, gu skaday co-krupter. ) In kan nubok va tuvel tazeper. Ar tantazukotkiraf kwik, dis va anamkafa vola is itapeem dum salma, fenkur. Alice katcalar da toloy kwik va goayan is kendaf usuk did. Pester rilitapaf enide di gruper va sugdalara ke batcoba, nume ta terektara div mikaci kildegamar.

Skaday kwik levu ma va twapa riwe gijafa lion dam int levimpar, aze pu bantan atoer, fawokon kalison : « Tori Dacikya. Ganera ke Gazikya va croquet vefara. » Salma kwik milinde fawokon tolkalir, anton betamason va ravlemafa vura : « Ke Gazikya. Ganera tori Dacikya va croquet vefara. »

Azon toloy kwik aludevon kiavad nume inaf usukkendeem va sint volins koaotced.

Alice vaon kipegapar eke va mikaci wiluon godimlanir enide me zo gilder ; azon viele ta wira gire takasotcer, Skaday kwik su mallanir solve bantan poke vawa moe sid debanyer, trawon disukeson va kelt.

Alice va tuvel vazon vanlanir aze tazer.

« Tazera tir volfavlafa, ~ Kwik kalir, ~ kire konakdume. Taneon, lecen vome tuvel dum rin tigí ; toleon, lecen kaikeon lorapara tir nume metan va rin co-rogilder. » Tire, koeon tir lorapara, jontika eviera isu teniskafa puzitara, is dile yona nokodawera dumede porma zo arber.

« Vay, tokkane rokolaní ?!» Alice erur.

« Tazera va bat tuvel co-tir pestoraca, ~ mekeson va ine, Kwik dakir, ~ ede tuvel wale min co-tigir. Tulon, ede koeon co-tigil pune co-rotazel nume co-rotiskel da di co-divlanil. » Va kelt kalison dun disuker nume Alice krupter da batcoba tir medolacapa. « Vexe, rotir, va int sometatcer, ~ trakur ;~ inaf iteem tice taka riwe tigir. Vexe kottode va jinyona bibera co-rodulzer. ~ Aze, pudon tolkalir :~ Tokkane co-rokolaní ?»

« Batlize wan debanyé, ~ Kwik bazer, ~ kalieldeon …»

Milviele tuvel ke mona fenkuwer aze razekapa koo rid van taka ke Kwik remnir ; va inaf pez drumnir aze kev kadimeon aal empawer.

« … ok direvielon, rotir, » Kwik dakir, milkomon dumede mecoba al sokir.

« Tokkane co-rokolaní ?» tupoason va puda, Alice tolerur.

« Vexe, kas co-rokolanil ? ~ Kwik kalir. ~ Batse taneaf uum, tire. »

Tire, vexe Alice me karolar da vaon mbi kalir. « Eaftapafa, ~ prejar, ~ prilarinda ke kotbat tisik. Co-tuoviskar !»

Kwik da va intafa dizvera berde arapenison rotolkalir. « Batlize zavzagití, ~ kalir, ~ bettode betedje !»

« Vexe va tokcoba gonaskí ?» Alice kalir.

« Va betcoba djumel. » Kwik kalir aze toz azdar.

« Ox ! pu in me govopulví, ~ Alice gripokolene kalir. ~ In fitulackik. »

Aze va tuvel fenkur aze kolanir.

Tuvel tir lent burmotaxopo kotlize kotrafo dem vikiz. Dacikya moe barnugafa kaspa isteon debanyer, dumbeson va pintik ; burmotasikya, xowasa van tey, va koncoba koe gadelapa nutisa kotrafa dem aabre kebur.

« Tire, sliko culo koe aabre !» Alice trakur, dun puzitason.

Ape sliko koe gael tir. Dace Dacikya dile puzitar ; ise luxe pintik, onton dun puzitar onton evier. Ant toloy tisik me puzitas tid burmotasik is karvolap ranyes moe teyova dem oblakoblakon konejas art.

« Vay, kas va jin co-rogival, ~ Alice vazamon kalir kire me gruper kase xarion taneon pulvir, ~ dume rinaf karvol batinde konejar ?»

« In tir Cheshire karvol, ~ Dacikya kalir, ~ batdume. Bulol !»

Va bana ewa popon is levgapon tiyar eke Alice bupar. Vexe fure sonker da batcoba pu pintik vols ine al zo maner, nume ine dimdunur aze dakir :

« Me grupeyé da Cheshire karvol sokonejar. Tire, grupeyé da karvol grukonejar. »

« Kot grukonejar, ~ Dacikya kalir ;~ nume lo askid. »

« Va mek grukonejas grupé. » Alice dolon kalir, valeafe gu tisa prilara.

« Va dikcoba grupel, ~ Dacikya kalir, ~ voxe batcoba tickir.

Alice va kom ke bata katcalara vol albar nume trakur da va prilaruum govobetar. Edje va ar aneyar, burmotasik va gadela dem aabre vamou tey deswar aze va kot atoewes plek van Dacikya is pintik toz mimar : va taneon konak teygor az muvakoron jontika milka iku razeka iku azekol. Dacikya meinde obrar, kore dile zo uzar, ise pintik ixam popon evieyer dume metan rokalir kase vordava va in rotud oke me.

« Ox, vay ! obral da askil ! ~ Alice iegar, dun vagrablese is tueaftapane. ~ Ox, inaf tciamaf pez !» Megubefa milka va in su drumonir nume va pezki riwe al solimpar.

« Ede kottan va intaf arienteem co-viunsur, ~ Dacikya wevdon bulason kalir, ~ pune tamava co-tir kiewafa loon dam dure. »

« Batcoba me co-tir gunt, ~ Alice kalir, pestese valeapafe gu katecta da va abica grupeluca ronedir. ~ Undeckel : Tokcoba afiz is miel co-vanpid ?! Rabatel da tawava va tol-san-balemoy bartiv ta bangera somoolegar. »

« Pulvison va bangera, ~ Dacikya kalir, ~ ine zo takagaber !!»

Alice va burmotasik bemuon kodisuker enide vofar kase ina fu zo malveger ; vexe burmotasik va kebura va aabre viunsupur nume me nuterektar. Acum Alice dakir :« Va tol-san balemoy bartiv, tce, ok anton san-toloy ? Tce …»

« Ox ! va jin me kostrul !!~ Dacikya kalir. ~ Va wodeem sotabí !» Aze va nazbeik gire toz dumper, dankason va komodasa dankinda is botcepeson ba kota bloktena :

« Va nazbeikyeme zwadeckel !
Ise viele puzitar, tazeckel !
Ine dun gibedarger,
Grupeson da mancoba sonuger. »

Tsurk
( tamon kanaris gan burmotasikya is pintik ):
« Wau ! wau ! wau !»

Dankason va toleafo dongo, Dacikya va pintik grablesir ise tizon botcer eke kimtaf tisik evier nume Alice va batyona ewa biwe rogilder :

« Pu nazbeikye bokson gukoecké,!
Viele puzitar, tazecké ;
Enide va culo rotalbar,
Viele gipuvegar. »

Tsurk
« Wau ! wau ! wau !»

« Gil ! Va in rodumpel ede albal ! ~ Dacikya pu Alice kalir, puon mimason va pintik. ~ Va croquet vefara do Gazikya fu gonegadá !» Nume div mawa iper. Burmotasik va fovung kabur viele ina malvulter, voxe biwe me lajupuzar.

Alice va pintik voldrikon gralomber. In tir tisikam dem divulaf tazuk, kotliz vodjus va meem is nimateem. « Tire dum munk, » Alice trakur. Viele ebidur, kimtaf tisikam dum gantafoalk iptokar ise fuxetolon dun soawer aze rontion dun atcewer, maninde remi tanoya ok toloya wexa ine va in anton lasugir.

Vielu va kovdas mergilack al trasir, ( skura va webokinda az acafa gira bene roneoblaka is taltenuga, tatceson va ilgluyara, ) va in ko gael divon burer. « Ede va bat velik do jin me divburé, ~ Alice trakur, ~ pune sin arse konviele atatad. Kas jovlera me co-tir adjuberinda ?» Va banyona ewa ontinapudon kalir, nume tisikam bulason dulzer ( batvieli al dun puzitar ). « Me bulal !! ~ Alice kalir. ~ Batcoba vol tir muxarindacka. »

Pintik gire bular. Alice va vola guyon disuker enide va inafa viraja di rowir. Tire pez tir kavlepewepes, dum bulolpezay lodam pezack. Inaf pintikaf iteem dere tupinawersed. Adim va kerdeleem ke bat tisikam vol albar. « Vexe in rotir boregackar, » trakur aze va iteem ke pintik gire disuker enide di wir kase ikuzara co-tir.

Me, meka ikuzara. « Ede fu vanpil bulol, ~ Alice gorestapon kalir, ~ va rin mea djuzolkomé. Obrackal !!» Kimtaf tisikam gire buwejar ( oke bular, grupera va tela coba ke toloya sometir ), aze va kelda amliton dakimid.

Alice toz trakur : « Ae, va tokcoba gu bat tisik rotaskití viele denon al bureté ?» vexe in gire bulapar eke ine va vola guyackon disuker. Batviele meka roklera rotir : in tir bulol, me loon vox me leon, nume ine gildar da ware burera co-tir kipeaca.

Kle va tisikam mo sid daykar nume pester kiazane wison da in van mikaci aulon sorer. « Ede al laumayar, ~ ine trakur, ~ al vanpiyir prazdaf velik ; kevoke bevular listackaf bulolam, nutir. » Nume va aryon grupen rumeik co-bevulas listackaf bulol toz trakur, ise nuecker : « Ede kontan va artazukerinda opelon co-gruper !» viele, wison va Cheshire karvol artemon debanyes moe aalgama, skotcotar.

Karvol kozwison va Alice konejackar. Nutir vrabuckaf, sedme ine, kore va kotcapeem is talgapeem dir ; acum ine gildar da va in tarkon gonaskiper.

« Cheshire Karvolany !» vazamon bokar, megrupeson kase in va bata yastaca co-albar. Voxe lomanton konejar. « Ae, dure tir valeaf, » Alice trakur. Aze dakir : « Kalil, vay, van toka nia golaní ?!»

« Batcoba va djumeno xo rupteper, » Karvol kalir.

« Loxe, fotí, » Alice kalir.

« Battode, betliz rolanil, » Karvol kalir.

« Wari konliz artlanití, » Alice pebuson loplekur.

« Ox, arse, wari umedje lanil, » Karvol kalir.

Alice gildar da batcoba tir meromeuna, acum va ara bibera yovar : « Tok korindik moneon batlize soked ?»

« Batliz, art bata nia, ~ Karvol kalir, pimtason va ivamu kan roneinia, ~ Edjiiasik soker ; voxe banliz, ~ milinde askison kan bana inia, ~ Libakol soker. Va bat ok ban djuworal : kottol tir oviskaf. »

« Vexe va kon oviskik me djunobá, » Alice bazer.

« Ox, va batcoba me robiul, ~ Karvol kalir. ~ Batlize kot tit oviskaf. Jin oviskaf, rin oviskaf. »

« Tokkane grupel da co-tí oviskaf ? Alice kalir.

« Ape til, ~ Karvol kalir, ~ edeme batliz me al lanil. »

Alice trakur da batcoba me wazder. Wori dakir : « Ise tokkane grupel da til oviskaf ?»

« Taneon, ~ Karvol kalir, ~ vakol sometir oviskaf. Seylon ?»

« Tce, » Alice kalir.

« Ae, kle, ~ Karvol dakir, ~ tire vakol sobular viele zider, voxe sokaultzekar viele tir valeaf. Okie, jin, bulá viele tí valeaf voxe sokaultzeká viele zidé. Batdume tí oviskaf.

« Va batcoba gu fremikera vols bulara yoltá, » Alice kalir.

« Yoltal inde djumel, ~ Karvol kalir. ~ Kas do Gazikya va croquet revielon fu vefal ?»

« Va batcoba co-albapá, ~ Alice kalir, ~ voxe me al zo gané. »

« Batlize va jin witil, » Karvol kalir aze griawir.

Alice zo gevansar, larde va volgubefa bifa toz giltir. Edje va xo buluyuno gan Karvol wan disuker, in levgon dimawir.

« Luxeon, tokcoba pintik al vanpir ? ~ Karvol kalir. ~ Fu vulkú da erú. »

« Al vanpir bulol, » Alice aulon dulzer, dumede Karvol tuwavon al dimpir.

« Vantrakuyú, » Karvol kalir, aze gire griawir. Alice kemer, riwe djupotolwison, vexe in me dimawir ; nume arti tanoya ok toloya wexa, ine van nia lize Libakol nusoker, va kelda dakir.

« Va konak edjiiasik ixam al wí, ~ ine trakur. ~ Libakol titir tel lodulapes. » Batvulon ine itamadar, nume batlize gire Karvol, debanyes moe aalgama.

« Kas al kalil : bulol ok bukol ?» Karvol erur.

« Al kalí : bulol, ~ Alice tolkalir. ~ Ise co-albá da me levgon awil oke griawil. Va kottan bangesil. »

« Ae, » Karvol kalir. Aze batviele abicabicon zijnon griawir, tozuson gu aultnaav az tenuson gu konejara zavzamasa vani griawira ke ark.

« Efe, va mekonejas karvol jontikviele al wí, ~ Alice trakur ;~ voxe konejara voldo karvol ! Batcoba tir tela lorilitafa coba wina mali koblira !»

Kelda tir trelafa vieli kabdu mona ke Libakol artlanir. Trakur da bata tir tela mona, lecen keldega tid oblakakorafa ise kepaita tir besanafa gu myot. Ina tir gijapafa eke ine me rovevanlanir abdida va nyulki gini koe taltenuba gire al fafigemer ise va rane vas mon toloy inch lum al zomer. Ise dace moion, vazon abdulanir, trakuson : « Tce, ede in turkon co-tir oviskarsaf ! Va Edjiiasik lodamon riwe co-djuworayá !»

  Xanto  
Vergumvelt Alice's Adventures in Wonderland
Sutesik Lewis Carroll
Piskura -
Ava Englava
Evla 1865
  Kalkotavara  
Vergumvelt Stuveem ke Alice koe Zultaxo
Kalkotavasik Yurani Andergan
Piskura Kotava.org
Evla 2013
Klita
  Krentduga  
Webesik Yurani
Krentduga Image:100%.jpg Tolbeliyina

Xantof yunkeks ke John Tenniel
Xantof yunkeks ke John Tenniel
Xantof yunkeks ke John Tenniel
Xantof yunkeks ke John Tenniel


Stuveem ke Alice koe Zultaxo
(Lewis Carroll)

← 5-eaf luz - 6-eaf luz - 7-eaf luz →