Stuveem ke Alice koe Zultaxo Luz04

Teliz mal Wikikrenteem.

Grablé kal exulera, aneyara

Stuveem ke Alice koe Zultaxo


Balemeaf luz : Libol va lipimi staksar

Batakalibol soredason dimlanir, ise guyon kotliz kodisuker dumede va koncoba al drasur ; Alice va in kalidas gilder : « Dacikya ! Dacikya ! Ox va jinaf kimtaf inieem ! Ox va jinaf imeem isu nyoxa ! Inya askitir da zo takagabeté, tire dum abrikol tir abrikol ! Toklize va sin al rodrasú, ae ?» Alice vere diepiler da in va ruelga is deaxolxaf tobeem aneyar, aze tison nuedon dere toz pomar, vexe sin va sin melize kozwid. Kotcoba al nubetawer vielu ine koe ujiwa al pujer : bontapa is trivazega is tuvelam al koton griawid.

Fure libol va Alice kalaneyase kozwir. Pu ine iegar : « Kle, Mary Ann, va tokcoba batlize askil ? Denvultel aze va tobeem is ruelga trasil ! Tetce !» Alice ve vudeper eke va bazena nia ve vanvulter, melapebuson da in roklar.

« In va jin gu kwik torigir, ~ ine vulteson trakur. ~ Jontikeke zo gevatar viele grupeter dan tí ! Vexe lokiewon co-askí vanbureson va tobeem is ruelga, vexe ede al co-trasí. » Kalison va batcoba, lent monama artvulter, aze va lutafa pozla gretcanafa gu dem “ W- LIBOL ” wir. Me tuveldendason kolanir aze va fogelom ticlanir, skotcason da va ageltaf Mary Ann co-kakever nume co-aloyar abdida va tobeem is ruelga al co-trasir.

« Atedapafa ! Burera va staksa ke kon libol ! ~ Alice trakur. ~ Fure Dinah ta burera va intafa staksa va jin tce stakseter !» Aze toz gestir inde coba co-dilizer : «— Alice weltikyama, vere pil aze va gozara egadal ! — Fure, gaarakwaya ! Vexe va bate fe abdion godizvé vieli Dinah di dimlanil ise di wil kase slakol co-divlanir. » Alice dakir : « Vexe me trakú da va Dinah deneon co-videt ede pu kottan batinde toz co-dirgar !»

Batinde flideson, Alice va vunapafa mawama dem azega koe rusupa kolanir. Moeon ( inde trakur ) ruelga is toloy ok baroy deaxolxaf tobameem. Va ruelga is tanoy tobeem narir aze va mawa su bulur viele va tiracam poke elza kozwir. Batviele mek kral dem “ VAON ULIC !” kosuteks tigir, neke Alice griaretlar aze gu kutc vanplekur. « Kotviele va koncoba estú oke ulí, dulapaca efe sokir. Batdume fu wí va coba tirac rotaskir. Pokolé da va jin dimon laumasitir lecen tabí da anton tí pinaca !»

Efe batcoba sokir, ison valevi da ine zinular. Abdi da va lik ke tirac al ulir, taka va pij zomer nume va int gonomar enide berga me di zo empar. Ine va tirac mo azega ampuson dimplekur, trakuson : « Mea tabí ! Loon me djulaumá ! Dure va tuvel mea roderemlaní. Co-djumé da al co-ulimí !»

Kax ! gaverson ! Laumar, dun laumar, nume mo azeb fure gobader. Vexe moion, uma darka ta batinde zavzagira mea tir, nume moe sid lasenyer, ton bata ladava keve tuvel is bana aname taka. Wori, larde wan laumar, pune turkon va ma reme dilk gogurumkasar ise va nuga ko keldega gorundar, kalison : « Dure, me loon rotaskí, kore betcoba co-sokir. Tokinde fu vanpí ?»

Anye luxe Alice, diolaf tiracam va keskacka al nekir nume ine ten laumar. Wori tirka tir erodansafa, ise larde mekase ine va bata mawa di rodivlanir, efe tir volkalapafe.

« Batcoba deneon tiyir loplinafa, ~ kimtafe Alice trakur, ~ ugale me gibelaumayá oke me gibevollaumayá, ise gan slakol ik libol me zo dirgayá. Do-djumecké da va bat tawaz me al co-titlanir, ise bata blirinda tir atedapafa ! Va jinafa darefa sokira co-djugrupé ! Ugale va diolareiz gibeliyí, gestiyí da meka mancoba co-rotir, voxe re koe diolaxo tigí ! Neva icde jinaf stuveem zo co-gosuté, jontikcoba tir ! Viele tití milgik, jin suteté ! Vexe ixam al laumapá ! ~ gabenton kalir. ~ Kottode, rundama ta lofa laumara batlize mea zavzar. »

« Voxe battode, ~ Alice trakur, ~ kas me tití guazaf loon dam re tí ? Laninde batcoba titir erodafa, da sometí guazik, voxe bantode va jontikcoba parmon sogoravé ! Ox, va mancoba me co-djumé !»

« Ox ! oviskamafe Alice ! ~ pu int dulzer. ~ Tokkane batlize co-roravé ? Biwe uma runda mu jin tir, voxe meka mu kona raveraneva !»

Aze batinde dakir, remion eruson aze dulzeson ise icdeon prilapason ; vexe va ezufa puda artimon gilder nume ta terektara vukir.

« Mary Ann ! Mary Ann ! ~ puda iegar. ~ Va jinaf tobeem kalion aneyal !» Azon Alice va nugalorara moe fogelom gilder. Gruper da tir Libol aneyas, nume ine skotcapar eke va mona widlasir, ilgrupeson da dure tir deciton zolonafe loon dam Libol nume va mecoba guon rokivar.

Artlaniyis va tuvel, Libol lafenkur ; vexe larde in kouon zo sofenkur ise ladava ke Alice keveon windeper, pune vord me lajupaskir. Alice gilder da in prejar : « Ae, fu anamelaní aze rem dilk kolanití. »

« Lexe !» Alice trakur aze kemer vieli va Libol valeve dilk gilder, bam ta konarira vere masotcer, voxe va gael anton ebidur. Va ieme az lubera is lorara ke empana triva gilder, nume zolter da Libol mo negruyadurni ok kona orala al luber.

Azon, zidesa puda, tela ke Libol : « Pat ! Pat ! Toklize tigil ?» Megrupena puda dulzer : « Batliz en ! Va tawa ta pruve vurpá, feliik !»

« Ta pruve ! anse ! ~ yatkaf Libol kalir. ~ Batliz !! Ta pomara va jin div batcoba kevlanil !!» ( Gire lorara ke empana triva. )

« Kalil, Pat, tokcoba reme dilk tigir ?»

« Tire, tir ma, feliik !» ( In gu “ maa ” tiyar. )

« Ma, zersulik ! Toktan ixam va mana lumafa al wir ? Batcoba va dilk riyursur !»

« Efe, feliik, vexe soe tir ma. »

« Kle, batlize me tir intafo xo. Solimpal !!»

Amlitap dilizer nume Alice va yon tinteks anton dile gilder, tulon : «— En, feliik, me rovebaskí, en, en ! — Askil inde kalí, nyukik !» Tere gire masotcer voxe va gael anton gire ebidur. Banviele toloye ieme is gire lorara ke empana triva tid. « Manote negruyadurni tce tid ! ~ Alice trakur. ~ Nué va coba sin dure fu askid ! Luxe jin, va int gu dilk en djugrilirká kire batlize ware vol djuzavzagí !»

Jontikedje wan ker, gildeson va meka lorara. Tere bwevara ke krafolameem is mam ke jontika dokalisa puda sokid. Ine va batyona ewa solgilder : «— Toklize ban bil tigir ? — Ae, va bat anton gobureyé. Bill va ban. — Tetce, Bill, batliz burel, ayye !! — Va sin keve alava madac !! — Va sint taneon vaniksantuc !! — Va raneacku men zomed ! — Ox ! tid vas ume rane, efe. — Batliz, va bati wazdelki ebidul !! — Bill, kas kepaita levbureter ? — Va bata titickajayana mikiya obrac !! — Ox ! ina titon ! Takanendac !! ~ Nokodapara. ~ — Toktel al askir ? — Bill tir, tce ! — Toktel rem keldega fu titkilder ? — Vol jin ! Rin, tetce ! — Jin, volgue, ae ! — Bill, titlanil !! — Batliz Bill !! feliik kalir da rem keldega gotitkildel !»

« Ax ! Kle Bill rem keldega fu titkilder, ~ Alice trakur. ~ Mandume sin va Bill gu kotcoba nuvajad ! Ika Bill medroe co-tigí ! Teyxo tir vwepafo, tire, vexe va in tce ronugamá. »

Ine va nuga cugeke titon kaimpar aze mea zekar vieli va vamoeon sulemam gilder ( voxe va tela apta me rodiepiler ) vitodas is latitlanis va keldega. Bam, trakuson : « Batse Bill, tce, » nugapar aze ker enide va dilizera di wir.

Va taneaca gildena tir jadifa iegara : « Batse Bill !» aze ant puda ke Libol : « Va in ebiduc, win poke gleida !!» aze amlit aze ara pudafa aotceraja : «— Va inafa taka levgic !! — Va lavajeb, vere. — Va in me belkusic !! — Tokcoba tir, palye ? — Tokcoba al sokir ? Pu min pwadel !?»

Adim axafa valkorafa pudama zo gilder. (« Puda ke Bill, » Alice trakur, ) « Efe, meinde gruper, grewá, ae. Re pesté lokiewaf, vexe al zo ropplekursuyú eke va coba co-ropwadé. Va kotcoba grupé : bro siuva al zo platí nume bro djobal al tictalá !»

« Ageltafa, palye !» artan kalid.

« Va mona koteyat !!» puda ke Libol kalir. Bam kalier : « Ede rovebaskic, pune va Dinah kev win koldá !»

Awalkamlitap vere dilizer nume Alice trakur : « Va tokcoba sin nopeon fu askid ? Ede co-tid pestoramaf, va kepaita co-deswad. » Arti tanoya ok toloya wexa, kotlizo gire lanid ise Alice va Libol kalis gilder : « Tanoy trumicek taneon stapeter. »

« Trumicek dem tokcoba ?» Alice trakur. Fure vol iltrakur lecen moion onotca dem yeme va dilk alier nume konake ye ben inafa gexata dace zomed. « Va batcoba fu azavzá, ~pu int kalir aze iegar :~ Askickic da mea di tolaskic !!» Batcoba va aludevaf amlit gire daskir.

Alice akoyemenon katcalar da lubeson mo azeb ye vanpid lupama, nume jebesa rieta va inafa swava remfir. « Ede va tanbata lupa estú, ~ ine trakur, ~ batcoba va jinafe rane betapatar. Nume larde mea rolaumá, meinde, kle vollaumatá !»

Va tana lupa fixar nume sonker da kalion vollaumar. Vielu tir omackafe enide va tuvel roremlanir, pune va mona divvulter aze va jontik sulemam diveon kes isu zveri kakever. Kimtafa Zoxa, Bill, vanmiaeon tigir, levgina gan toloy bukol askis da ina benu tirac ulir. Kot va Alice iped vielu kozwir ; vexe toz vulteper aze koe ekamafi mikaci musedon fure tigir.

« Va taneafa coba gonaskí, ~ Alice pu int kalir, krabeson koe aalxo, ~ va jinafe xantafe rane dimon gotrasí ; va toleafa : va kelda stasa ko bata mempesa matela gonaneyá. Folí da batcoba titir tel azedany. »

Tire tir donaf azed, opelapaf is gruon zineyen. Antafe arge tir da ine meinde rieter kane gonarter nume roskur. Edje rem aala obrason levdisuker, vucafa vakolierama vamoe inafa taka vere itamadasir.

Granaf jotaf vakol va ine anamkon kaldisuker ise iniasotcemeson laguzar. « Kimtaf vakolam !» Alice kalir, ton santasa puda is lagazdason. Vudeper kire trakur da in rotir aeler nume battode nekev kota martera va ine ape estutur.

Grupenseson va coba ine askir, va taksulam tredur aze pu vakolam atoer ; nume in upenyason welver, daavon vakolieson, aze va peya iper dumede batkane djuvefar. Alice va kucepe kaiklanir enide me zo sistar. Moida al dimawir, vakolam va peya gire iper, voxe ampuson klantar nume ayudar. Voxe Alice, krupteson da batcoba va vefara do limokol vektapar, is kivason da gan vakol kotvulon zo co-roselur, va kuce gire toz anamelanir. Bam vakolam va peya konakviele vajiker. Kotviele abduvultemer aze wevdon ieson ilon dimelanir. Adim sumeon senyar, cepites is ton rumkawes yoy is likon itabudeson.

Alice krupter da berde rovoyater. Acum vere malvulter vieli pester cuese is ilgaelese ise iera ke vakolam sumuon riwe mea zo gilded.

« In soe tiyir ekoltaf vakolam ! ~ Alice kalir, va int windeson gu dreska ta tildera is va int ruelgason kan tana toa. ~ Va jontik randay balte co-taveyé ede, ede co-tí ontinackaf ta batcoba ! Ox ! vexe vulkuyú da wan golaumayá ! Ae. Tokkane gonaskí ? Tce co-gonestú va koncoba oke co-gonulí ; vexe tel uumap tir “ tokcoba ?”»

Tire, tel uumap tickir “ tokcoba ?” Alice va imwa is werd anamdisuker ; vexe va mecoba nutisa kiewafa gu ulira ok estura koe goaspileem. Pokeon mantaf nyul atrir, riwe ontinaf dum ine. Valevon is vokon is kabduon is kadimon rindeyeson, ine ve rieter da va vamoefa coba co-godisuker.

Va int moe nuguuleem madar aze, vamoo doma ke nyul disukeson, va iteem ke faltafa gomapa ticeon senyesa malwir, va magamdasa goma aulon vikizasa kan turkafo plopo is voltrumafa gu ine ik betcoba.

  Xanto  
Vergumvelt Alice's Adventures in Wonderland
Sutesik Lewis Carroll
Piskura -
Ava Englava
Evla 1865
  Kalkotavara  
Vergumvelt Stuveem ke Alice koe Zultaxo
Kalkotavasik Yurani Andergan
Piskura Kotava.org
Evla 2013
Klita
  Krentduga  
Webesik Yurani
Krentduga Image:100%.jpg Tolbeliyina

Xantof yunkeks ke John Tenniel
Xantof yunkeks ke John Tenniel
Xantof yunkeks ke John Tenniel
Xantof yunkeks ke John Tenniel


Stuveem ke Alice koe Zultaxo
(Lewis Carroll)

← 3-eaf luz - 4-eaf luz - 5-eaf luz →