Stuveem ke Alice koe Zultaxo Luz03

Teliz mal Wikikrenteem.

Grablé kal exulera, aneyara

Stuveem ke Alice koe Zultaxo


Bareaf luz : Vultera ke neda is reizap

Sin volant moe domega va vertovafa lospa tazukad : yoni zveri dem volvunaf bruxeem is sulem dem imeem keve alto. Kot sin tid abdarsaf is aflicejes is trabiangansaf.

Taneafa bibera, ae, tir : « Tokinde sin va int roturodad ? Vanion, Alice pu sin tuwavon yaston flider, dumede va sin jontikedje gruper. Dace, do Lori prilapar. Ini tere druwer nume anton kalir : « Tí klaaf loon dam rin nume arse loote gruper. » Voxe Alice me plier, me grupeson va klaa ke Lori, voxe larde ini vol kalir, pune prilara vukir.

Adim Slakol, nutis rictelackaf gu sin, ier : « Debanyac, kottan, aze va jin terektac ! Va win fure fu turodá, arse !» Kottan anam Slakol debanyar. Alice guyon modisuker kire trakur da fu ermialer ede fure va int me turodar.

« Xum ! ~ Slakol zolonativon kalir, ~ Egadac ? Batse tela coba lorodafa. Guaulawec, vay !? Djam Guillaume the Conqueror, bristun gan papik va englikeem abicedje levplekuyur lecen in va okilik graciyir ise va stibera ik olgalicura giltaveyer. Edwin jiomik ke Mercia is Morcar ke Northumbria …»

« Ugux !» tcotasi Lori kalir.

« Ixedá ! ~ Slakol woltgeruason vox dolapon kalir. ~ Al pulvil ?»

« Jin, me !» Lori blion fargukar.

« Foliyí, ~ Slakol kalir. ~ Dakí. Edwin jiomik ke Mercia is Morcar ke Northumbria va int mu in dakteyed, voxe Stigand, gugafamaf tujradik ke Caanterbury, krupteyer da batcoba tiyir ebokaca …»

« Krupteyer da tokcoba ?» Nudol kalir.

« Krupteyer da batcoba. ~ Slakol braldeson dulzer. ~ Efe grupel va coba batcoba sugdalar. »

« Grupecké va coba batcoba sugdalar, viele jin va koncoba trasí : batcoba gitir lesko ok salma. Uum tir : va tokcoba veytujradik trasiyir ?»

Medulapeson va bat uum, Slakol ampuson dakir. « Tujradik krupteyer da kevlakira do Edgar Atheling va William is firvira va sona tiyir ebokaca. Taneon William vanyeyer luntesik. Vexe jlokuca ke intaf normandiikeem …» Vere van Alice rwoder ise loplekur : « Tokinde dure vil, velya ?»

« Ware abdapaf, ~ Alice kexon kalir. ~ Vol nuturodawé. »

« Battode, ~ Dodo viagon kalir, cugeke ranyason, ~ va obukara is vanikatcura va yon pof sanegaks dragé. »

« Englavul !! ~ kiizoc kalir. ~ Va lik ke batyona ewapa dace me gildá, ise, ostik, tce rin me gildal !» Kiizoc takomar ise va kicera palser ; konakari zveri afton kipted.

« Va nickafa vultera, ~ Dodo natcunon kalir, ~ fu drageyé. Batcoba tir tela lokiewafa coba ta turodara. »

« Tokcoba tir nickafa vultera ?» Alice erur. Me djugrupecker, vexe Dodo al ritar dumede zinular da kontan co-djupulvir, voxe metan nutison djuprokopulvir.

« Batdume, ~ Dodo kalir, ~ lokiewafa peburinda tir skura. » ( Ison larde muvugalon konviele va coba rotir miv co-djulwil, fu kalí kane Dodo al askir. )

Taneon va vultexo conyukar, va ivamuinda, (« tazukack me tir uum, » kalir, ) aze pakesikeem batlize ok banlize keneon zo rundar. Metan ier : « Tanoy, toloy, baroy, tetce !» soe kottan ba djumera toz vulter aze baon vukir, maninde tena ke vultera tir mefakafa gu grupera. Wori, arti bartivacku, sin dure tid rodaf, nume Dodo levgon divier : « Vultera volrunkafa !» Kot cepites, aname Dodo, tigid ise erud : « Vexe toktan su war ?»

Dodo va bata bibera meundepeson me rodulzer nume jontikedje debanyer, ton gelt bene jo ( gubefa tirka ke Shakespeare koe yon delt va ine, ) edje artan amliton ked. Adim Dodo kalir : « Kottan al war nume va waks fu kazawar. »

« Vexe toktan va waks fu zilir ?» sin tamon erud.

« Inya, tire, » Dodo kalir, geltnedison va Alice. Aze kotaf milk vere anamlanir, gojon ieson : « Va waks ! Va waks !»

Alice me gruper va coba rotaskir, nume ta gritoktera va nuba koucomar aze va laorak divucomar, ( anye, lavok me al konir, ) aze va olkom wetce waks pu kottan zilir. Biwe umote tir.

« Vexe, inya va waks dere goseotar, ae, » Slakol kalir.

« Tire, ~ Dodo goreston dulzavar. ~ Va arcoba koe intaf ucom ware dagil ?» rwodeson van Alice dakir.

« Va anton vefaralaga, » Alice gabenton kalir.

« Deal !» Dodo kalir.

Bam sin va sint anam Alice gire belcad, edje Dodo va laga fawokon atoer, kalison : « Vay, va bata ilamtafa laga nalel !» Arti bata dewitca, kottan xurir.

Alice krupter da batcoba tir kipeapafa, vexe artan nutid gorestapaf eke ine me rovekiper ; larde meka dulzera artfir, ine opelon gidukar ise va laga fawokapon narir.

Bam estura va laoreem gotir : batcoba konakote lorasir ise volvur, lecen zveri temed da olkom tid grivansaf, ise zverimi telomtawed nume zo gedendad. Adim, kotcoba tuaulawer. Sin ivamuon debanyad aze va Slakol bliked enide in va koncoba ware di pwader.

« Al abdiplekul da di inton izval, ~ Alice kalir, ~ ise di pebul dume va K- is V- bogal, » pudamon loplekur, ware kivason da laxuvolpuver.

« Jinafa izva tir gabentafa negapa !» Slakol kalir, rwodeson van Alice is repaleson.

« In tir aultap, ae, ~ Alice kalir, ise va ault ke Slakol gevanon disuker. ~ Vexe tokdume kalil da ina tir gabentafa ?» Aze kotcoba selewer edje Slakol pulvir, nume gestira ke Alice va nega tir koncoba riwe dum : « Fury kalir pu

Slakol
kakeveyen
koe
vreda :
“ Trakú da
va rin
berde
koridá.
Ae,
va kiewatca
ke
sokitiso
arpeo
lané.
Tire
va mecoba
rerielon
gonaskí. ”
Slakol
pu vakolaj
kalir :
“ Mano
arpeo,
weltik,
voldo
malyeruk
ok
malyesik,
co-tir
kuncara. ”
“ Tití
malyesik.
Tití
malyeruk,
~ guazafi
Fury
vepokon
kalir. ~
Va buntura
rindepeté,
nume
va rin
gu awalk
lanzatá. ”»

« Moterektal ! ~ Slakol pu Alice bokson kalir. ~ Va tokcoba trakul ?»

« Ixedá. ~ Alice dulkapon kalir. ~ Arte alubeafa darima tir, nuve ?»

« Me batlize !» Slakol vucon is mibupunon diviegar.

« Arlize ! ~ Alice kalir, sodjupropomase, is nutise wesidafe. ~ Ox, va jin iskel da pomá enide di dimaskil !»

« Va rin me olegatá, ~ Slakol kalir aze ranyar aze mallanir. ~ Kalison va mana fitulaca, rodaxal !»

« Va mancoba djumaskiyí ! ~ kimtafe Alice alutar. ~ Vexe til rokantapan, ae !»

Slakol puskacemer aze illanir.

« Dimlanil, vay, aze ten izval !? Alice iegar. Aze kot artan tamon : « En, va rin vosev !» Vexe Slakol braldeson takazekar aze ware lokalion lanir.

« Aje in al mallanir !» Lori repaler vielu in al griawir. Guazafa tulya va katecta impavantar nume pu tuloc kalir : « Ax, jotya ! Batcoba tir tavera nume someperlel !!» Tuloc eefton dulzavar : « Stivawel, Gadya !! Va orek co-mibul !»

« Co-albá da Dinah batlize co-tigir, en ! ~ Alice pudapon kalir, gukoeson va metan elimaf. ~ In fure di co-dimstar. »

« Voxe toktan tir Dinah, metixolon ae ?» Lori kalir.

Alice ekeyuson dulzer, lecen va rinaf dositol sodjupropulvir : « Dinah tir cinaf karvol. Va slakol grupebidupur, tire ! Ise ox ! va rin onkas va zveri co-disukel ! Riwe wini, vere estuni !»

Bata ewa va manafa keska den lospa nekid. Konaki zveri vere otced ; guazafa Guvaxa va int vetcoyepeson toz besar, katcalason : « En godimdentalar, gael ke siel va jinafa larida rotur !» Ise Natconga pu intaf zverioceem ton skotcasa puda iegar : « Vantalac, abegya is abegye !! Ko begama berde gosenyac !!» Adim, yontason va koncoba ok lancoba, kottan griawir, nume Alice fure tir antafe.

« Co-djumé da va Dinah me al co-miwá ! ~ pu int gabenton kalir. ~ Metan va in batlize nuvalbar, neke tir tel lokiewaf karvol ke tamava ! Ox ! abegaf Dinah ! Nué kase va rin konviele tolwití ?» Aze kimtafe Alice gire toz borer kire pestaler antapafe is burdafe. Vanion, soe, va loram ke lanira gire gilder. Ampuson disuker, pokoleson da Slakol al boybetar nume dimlanir enide di ten izvar.

  Xanto  
Vergumvelt Alice's Adventures in Wonderland
Sutesik Lewis Carroll
Piskura -
Ava Englava
Evla 1865
  Kalkotavara  
Vergumvelt Stuveem ke Alice koe Zultaxo
Kalkotavasik Yurani Andergan
Piskura Kotava.org
Evla 2013
Klita
  Krentduga  
Webesik Yurani
Krentduga Image:100%.jpg Tolbeliyina

Xantof yunkeks ke John Tenniel
Xantof yunkeks ke John Tenniel

Stuveem ke Alice koe Zultaxo
(Lewis Carroll)

← 2-eaf luz - 3-eaf luz - 4-eaf luz →