Stuveem ke Alice koe Zultaxo Luz01

Teliz mal Wikikrenteem.

Grablé kal exulera, aneyara

Stuveem ke Alice koe Zultaxo


Taneaf luz : Tit tawaz

Alice, debanyese poke berikya moe preima, askison va mecoba toz argawer ; va neva belina gan berik abicviele al kodisuker, vexe va meka ewava mei waka dadir, nume Alice trakur : « Tok dulap, ewaviskafa is wakiskafa neva ?»

Nume toz under, ( kiewanson larde idul ke viel komoder ise tuakoydar ) nueson kase puvegura va tronkara va sona dem plastuba va ranyera is imwayestara co-vodar, viele laizon batakaf libol dem raltukaf iteem va ine pokovulter.

Batcoba me tir tolke gevasa ; meie Alice gildeson va Libol va int kalis djam « Ox ! ox ! gaverson fu artvulté » djamae me trakur da batcoba tir tolke akoydesa. ( Dire modovason, ine dosteter da zo co-gogevayar vexe batcoba re nutiyir tuwavackafa. ) Neke viele Libol va trula divucomar aze va ine disuker aze toz vulteper, Alice ve ranyar, pedranon da va libol dem ucomkirafe vage ik trula meviele al wir ; nume va in rem taya turilitawepeson radimvulter aze va in griawis tit fepe valeve gleida biwe rowimir.

Moion Alice va in koo tawaz onkar, meundeson inde va rid di rovotrasir.

Tawaz remi keldama tir rontif dum erilt, aze levgon tir bidtitaf eke Alice pester da tit lirdap luber, vox mefovukison.

Ont lird tir aludevapaf, ont viapon dun luber larde va ugalap ta waldisukera is nuera va borefa sokira lubeson is gevaweson dadir. Taneon tit fe ladisuker enide gruper liz di lanir, vexe bate tiyir orikarsafe ta wira va koncoba. Aze va krileem ke lird maldisuker nume vofar da in tir dem yona rastoka isu varba ; konaklize ine va yon liwot isu ewava bene cepta wir. Kenolanison va botedak mou vegemoy narir ; in tir kralanaf gu “ KURFA DEM KRAMTE ”, vexe agaleson tir vlardaf. Ine va in me rovelubesir, kivason da va kontan co-laxuyatar. Batdume xodiar da remlanison va tana rastoka va in di aykar.

« Efe ! ~ Alice trakur, ~ nope mana lubera, va titkera tit fogelom me kivatá ! Gu budik deneon fu zo krupté ! Batdume vol co-temé kore ticu mona co-lubé !» ( Batcoba ae co-rotir. )

Titon, titon, titon ! « Kle dun lubé ! Co-djugrupé ote va mile lum ixam al exulé ? ~ ine pudon kalir. ~ Ape riwe iste tawava tigí. Undé ! Istexo arte balem-decemoy mile lum titeon co-tigir, tce. » ( Inde rabatec, Alice va jontika mancoba remi vayara koe bema al raver, ise kore batcoba me berde rovotir ta nedira va grupekseem larde mek gildesik tigir, neke tolkalira va raveks tir ksuberacka. ) « En, mon tir solumacka. Vexe battode moe tokeafa laksiwakeka oku wakeka tigí ?» ( Alice vol gruper va coba laksiwak is wak sugdalad, vexe bat trogarnany nuvelad listaf gu ine num tiyara. )

Ine ware fure kalir : « Atedafa ede va tawava runarton co-remlaní ! Nickafa tigira vanmiae yontan lanis ton titefa taka ! Koe Axku, folí. » ( Batviele ine tir valeackafe da metan rogildes batlize tigir lecen bata ewa sedmeon nutir memalyafa. ) « Vexe va yolt ke gola gonerutú, ae. Vay, weltikya, kas tir Warzazelanda ok Australia ?» ( batedje lagidukason djak « Atedafa gidukara bak lubera ! Kas folil da co-grupaskil ?» djakae ). « Man bonaf velik ! ina trakutur viele koerutú. Me, me erutú. Rotir va batcoba konlize suteyena wití. »

Titon, titon, titon. Meka arcoba zo rotir, acum Alice gire toz pulvir : « Dinah va jinafa gracara resielon katcalatar, tire !» ( Dinah tir karvol. ) « Pokolé da va furutsa dem vrod ba yeladura mbi zilitir. Dinah, abegya ! Co-djumé da do jin batlize co-tigil ! Mek slakol koe rid, trakuckú, vexe va vesnol co-rotebidul, ise man in va slakol vektapar, ape. Vexe kas karvol va vesnol sokestur ?» Batvielu Alice koz komoder, ise koe klokerinda tolkalir : « Kas karvol va vesnol sokestur ? Kas karvol va vesnol sokestur ?» ; ise konakviele : « Kas vesnol va karvol sokestur ?» ; lecen, gildac, larde ine gu bata erura iku bana me grudulzer, pune erurinda tir dulapiskafa. Ine kenibuder ise toz trakur da do Dinah bene nuba gozar, pu in ekemapon kalison : « Tetce, Dinah, agelton kalil : kas va vesnol konviele al estul ?» Aze, vere, uix, uix ! moe yona klova isu rodafa toa senyer ; su ten luber.

Alice meinde roter nume kalion ranyar ; ticon disuker vexe kotcoba batlize tir orikafa ; lenteon va berlapa wir ise Batakalibol wan vulteper. Vol godrasuna vula ; Alice dum suka malvulter aze biwe artvulter nume va libol rogilder. Taltvulteson arte alava, in kalir : « Ox, ey nyoxa is oblakeem ! Gaveon !» Ine riwe artvulter ise va alava taltvulter, vexe Libol al griawir. Ine koe abrotcafa is omafa bonta dem afiasa gumema levu pij dure tigir.

Cane bonta jontik tuvel tigid, vexe kot tir budenaf. Giopon lafenkuyuson va kot tuvel ke bat kril azu ban, Alice gabenton isteon avlemodar, nueson kane di rodivlanir.

Laizon va barnugafa azegama kum trivama volins klantar ; moeon : mecoba vaxe moavafa marnama. Nume taneafa rieta ke Alice tir da bata va kon tuvel ke bonta rodefenkur ; vexe kax ! ont ludot tir gijarsaf, ont marna pinarsafa, voxe ine va mek laxufenkur.

Wori, ba toleafa kodisukera, va omafa marwida men katcalayana kozwir. Kakeon tuvelam ontinaf gu mon san-aluboy inch lum tigir. Va moavafa marnama ko ludot lwir nume rabatenyer da ina katickir.

Alice va tuvel fenkur aze wir da in ko berlama riwe mantafa dum tovolfe jupar. Ine bader, aze kenon kodisukeson va berla va tela lomempesa sowina matela kosmar. Va bata orikafa bonta en djudivlanir enide vanmiae batyono jebeso imwaxo is batyon fedaf sul di kraber, vexe inafa taka dace tir gijarsafa kapbure tuvel. « Ise kore taka co-remnir, arbe epiteem co-tir favlansafa ! ~ kimtafe Alice trakur. ~ Ox, dum sumedizvesiki va int co-djubudé ! Tce batcoba co-rotir ede co-gruboká. » Inde rabatec, jontikcoba volunaykafa ixam al tikid eke Alice toz trakur da arse vugcoba tir merotisa.

Larde gibekera kabdue tuvelam vol zanudar, ine va azega dimvanlanir, djupotrasimison va ara marna ok icle kona neva tavesa kane korik va int dum sumedizvesiki grubuder. Bam ine va tiracam moeon trasir. (« In arse sure mea tigiyir, » Alice kalir. ) Bene berga ke tirac eluxaf kral tigir, dem “ VAON ULIC !” ravlem koingananyaf ton eltayap.

“ Vaon ulic !” tir kalina fakaca, vexe Alice tir vepokapafe nume va batcoba me fu kalveger. « Taneon rindé, ~ kalir, ~ nume wí kase suteks moeon tir “ jiva ” oke me. Lecen ine koe konak reizany, va yon rumeik burmeyen ok vumben gan govitol ik dikiyis va jontika volplinaca, al belir, ise bata rotaca al sokid kire sin va opelapaf kotrakuks askiyin gan gadikeem al vulkud, tulon : tuidularsayani nornokasiki va girsisa nuba soburmer, ise aludevafa gabera va gelt giforteyasir. Ise ine me al vulkur da ulipison va tirac kralkiraf gu “ jiva ”, pune fure ok stekeon roteter.

Wori, larde bat tirac me tiyir kralkiraf gu “ jiva ”, Alice va cek laxuyoyar, aze krupteson da in tir kiewapaf, ( tire tir dum aotceks va ranetetiorn is vayna is ksago is solzayana ifapolxa is toffee gom is pustayan festkiraf tiornam ), abicedje kotote fixar.

« Pesté atedapaf ! ~ Alice kalir, ~ pesté va int budeyes dum sumedizvesiki. »

Tire batcoba sokir : ine re anton tir ontinaf gu sanoy inch lum, ise inafa vola daavon jeber viele ine trakur da va ranecke re dir enide va bata listafa matela remo tuvelam rokolanir. Soe konakwexon ker abdida wir kase wan tuomawer. Vaon wan crakemer. « Undec, ~ Alice pu int kalir, ~ dum leta rotir fu tenuwé. Tokcoba battode co-vanpí ?» Nume lagestir inde kerdela ke teyka ke volrunkafa leta co-tir, lecen va mancoba meviele tce al wir.

Fure, rabateson da mecoba sokir, gorar da ko matela vere lanir. Vexe kax ! kimtafe Alice ! artlanison va tuvelam, sonker da va moavafa marnama al vulkur. Dimlanir enide di mo azega va ina narir voxe me lajupuzar neke reme triva wickir. Bam tic tana azeganuga latidumar, vexe ina tir kildersesa ; tere kimtafa velikya yovason kuncayasa debanyar aze borer.

« Benje ! tokdume batinde ikuzá ? ~ Alice pu int kirepton kalir. ~ Djay, vere ten boré !!» Va int gipirdanyar ( beka rion skur ), voxe konakviele va int kevidupur eke ikuza va iteem tukotrad ; lanviele va int dace al dendar kire va croquet etsa ant vefana kev int al vurseyer ; lecen bat gevas velik va toloy koredik djukazirseper. « Vexe va toloy mekane rozirsé ! ~ kimtafe Alice trakur. ~ Larde va biwe tanoy rotarkan dace di flecú !»

Bam va trivaf boram valeve azega kozwir ; fenkur aze va lupama dem “ VA JIN ESTUC !” ravlem conyukanyaf ton ble trasir. « Ae, fu estú, ~ Alice kalir, ~ ise ede batcoba va jin co-tuontinar, pune va marna di co-rotuzá ; volson ede co-tuomawé, pune levo tuvel di co-roterigé ; batkane ok bankane va matela kolanití, acke betcoba rosokir !»

Acum ine va lupakimi estur, aze pu int wesidon kalir djam « Tokkane ? tokkane ?» djamae, aykason va nuba mo taka enide ve gruper inde towar, nume zo kivarsar da zavzar mile ; ae, batcoba gisokir viele kontan va lupa estur, vexe Alice va zultaca re gizinular eke blira dum bettan re nutir argara is akoydaca.

Acum ine gire askir nume va lupa fu kalestur.

  Xanto  
Vergumvelt Alice's Adventures in Wonderland
Sutesik Lewis Carroll
Piskura -
Ava Englava
Evla 1865
  Kalkotavara  
Vergumvelt Stuveem ke Alice koe Zultaxo
Kalkotavasik Yurani Andergan
Piskura Kotava.org
Evla 2013
Klita
  Krentduga  
Webesik Yurani
Krentduga Image:100%.jpg Tolbeliyina

Xantof yunkeks ke John Tenniel
Xantof yunkeks ke John Tenniel
Xantof yunkeks ke John Tenniel


Stuveem ke Alice koe Zultaxo
(Lewis Carroll)

← — - 1-eaf luz - 2-eaf luz →