Salma sersikya

Teliz mal Wikikrenteem.

Grablé kal exulera, aneyara

Salma sersikya

Rwaltreiz : Salma sersikya

Lanugale darekeon. Gazaxo tir dem gazikye is baroye nazbeikye.

Lanviele, gazik va baroy nazbeik volmiv vanstar aze pulvir :

— Nazbeik, i oklafa flaweza, vode kurec. Va winyon nazbeik djuwí, i va veygadik. Va tra naric aze van baroya amidafa nia rwodec aze kot tcekac ‼ Aguntanik tigitir lize tceka al artnitir.

Tceka ke taneaf nazbeik ben intasoza ke kulafa mona kabdue mawa ke jiomafa yikya va int kougar. Tceka ke toleaf kabdu yasaxe ke kulaf dolekik luber viele inafa nazbeikya fu titlanir.

Ivan gazikoc, i bareaf, va intafa tceka kougasa ben dibla ke weda wir lize salma vangir. Ivan gazikoc erur :

— Salma, salma, va jinafa tceka dimzilil ‼

Vexe Salma dulzer :

— Va jin kurel ‼

— Djumel da va salma kuré ? Kottan va jin fu nuler.

— Fiste, Ivan gazikoc. Batcoba tir rinafi bali.

Ivan gazikoc gonovaskir. Va sulemam ko tiojexa anamplekur aze gabentackaf ko berma divburer.

Baroya vidia milvielon dilized aze, eldeon, gazik va nazbeikeem tagar.

— Kle, nazbeik, kot baroy re tic kureyes. Co djuwí va coba winafa kurenikya grupaskir. Eldegazdon kot win va klaim asadayan gan ina vanburetec ‼

Ivan gazikoc takomason dimdenlanir.

— Tokcoba dilizer, Ivan gazikoc ? Toka puidera va rin anzar ?

— Gadik gazik djumer da eldegazdon va klaim asadayan gan miv rin di vanburé.

— Me dwil nume ko ilava kenibel, Ivan gazikoc ‼ Miel sopirdar.

Moi komodera ke Ivan gazikoc, salma va kusalma deswar nume va int gu Vasilisa djastikya artazukar, i gu yikya tisa dem ribiegafa listuca milinde batcoba koe reiz anton krulder.

Vasilisa djastikya mo rapsay divlanir, nubadendar aze iegar :

— Zanisik, gestusik, ampuc ‼ Va listaf is gemaf klaim mu jin epuc ‼

Regazdon, Ivan gazikoc va klaim anamplekuyun koe fideyena fozdema moe azega wir. Kalapaf, va in pu gadikye burer.

Toloy taneaf nazbeik dere pid. Gazik va klaim ke taneaf narir aze kalir :

— In anton tir bagaliaf gu tawadayik !

Nume van zanisik malmimar. Klaim vanbureyen gan toleik dere zo mimar.

Azon silu ke Ivan gazikoc tir. In va klaim fideyen gu moava is dilgava is zikeyen gu ilamtaf zovdaks nedir. Gazik diviegar :

— Va man klaim bak fiptapa zo godiskir.

Azon kalir :

— Eldegazdon, kot win va fixu kum batakaf begany epuyun gan intaf kurenik pu jin vanburetec ‼

Ivan gazikoc takomason dimdenlanir.

— Tokocba dilizer, Ivan gazikoc ? Toka puidera va rin rilizar ?

— Gadikye djumer da eldegazdon va begfixu epuyunu gan miv rin di vanburé.

— Me dwil nume ko ilava kenibel, Ivan gazikoc ‼ Miel sopirdar.

Moi komodera ke Ivan gazikoc, salma va kusalma deswar nume va int gu Vasilisa djastikya artazukar, aze mo rapsay divlanir, nubadendar aze iegar :

— Zanisik, gestusik, ampuc ‼ Abdi eldegazda va batakaf beg epuc ‼ I va beg mildaf lion dam dene gadikye gilestuyú !

Ba gazda Ivan gazikoc va batakafa is moavukafa begxa ingayana gu rasek is mona is zikeyena gu listaf zovdaks moe azega trasir.

Ivan gazikoc, kalapaf, mo moavaf azekol aykar aze pu gadikye burer. Toloy taneaf nazbeik dere pid voxe va int me rovemilmud : begfixu ke jiomikocya al zo burmerser, ise telu ke dolekikocya keve moak vols levak al zo burmerser. Gazik va fixu ke battel pu vakol volmiv zilir. Aze va telu ke bantel dere.

Azon silu ke Ivan gazikoc tir. Gazik diviegar :

— Va manu fixu tori jorapa zo gosur !

Nume va inu mo gazafa azega volmiv zanolur. Aze kalir :

— Djuwí va tela ikagadikya lokiewon grustuter.

Nume gazik va sinya do kot kurenik gu lorotap ganer, i gu lorot gotcoketen gan kot aboyik. Ivan gazikoc takomason is ton orikafa gexata dimdenlanir. Gemuiesa Salma erur :

— Tokcoba dilizer, Ivan gazikoc ? Toka nigera va rin anzar ?

— Gadikye djumer da va rin ta lorot eldeon di dostá. Tokinde va rin pu kottan nedití ?

— Me dwil ise ta lorot ant mallanil ‼ Fure kazokeveté. Ede va lorarapa is ediara di gildel, ware me dwil ‼ Pu gazik kalil da tir rinafa gemuiesa salma artlakisa koe bor.

Batinde Ivan gazikoc askir. Koe durgaxe va toloy berik gelangus do kot kurenik kulon vagekiraf is diskipis va roga trasir. Sin va in dun nuled :

— Benje, ant pil ? Tokdume va rinafa salma koe tiojexa me al vanburel ? Toklize va mana listikya al kosmal ? Tce koo kota weda jontikedje al aneyal !

Levgon lorarapa vinustar aze ediara va berma widlasir, vudesipison va ganenikeem. Ivan gazikoc kalir :

— Me vudec ‼ Tir jinafa gemuiesa salma artlakisa koe bor.

Kottan van dilk iper nume va moavukafo diremuko impokano gan balemoy ontinaxaf batakaf okol is fuzodeno gan yon tantazukotkiraf zanisik wir.

Diremuko kabdu rapsay vukir aze Vasilisa djastikya diskisa va faltaf gem dem zikes bitej is taelkorafo amoto moe taka volrundanyar, i listapafa eke metan grukalir ise grupimtar ! Ina va Ivan gazikoc ben nuba vannarir aze kal tienduyuna azega dem jontik fraf burmeks star.

Ganenik va lorot porad. Kottan kolukon ulir ise flider. Vasilisa djastikya va vor ulir aze va titak ke galemacek ko ronef ewazalt gimar ise va solzayana lororxa estur aze va niskeem ko taltef ewazalt aykar.

Ikaberikya va ina govomilaskid.

Gazik griaelesayan va stutera sugdavar. Vielu Ivan gazikoc toz bangesir, pune Vasilisa va ewazalteem botcer : kou bat taltef lavukafa uzda buber ; kou ban ronef batakaf loror va uzda kon kaltalad. Viele Vasilisa ten stuter, pune kotcoba griawir : uzda lidam loror.

Ikaberikya, vere djumilaskisa, va intaf taltef ewazalt tegulad, bumbeson va ganenik gu vor, aze viele va ronef ewazalt tuvlardad, tana niska bubesa va ita ke gazik riwe semar. In, yatkaf, va sina kreme volmiv aloyar.

Sielcek tir levi tena. Ivan gazikoc va vulafa moobrara impavantar nume va berma bulur. Denon iper, va salmalma ke Vasilisa konarir aze ko tey mimar.

Viele Vasilisa djastikya siluon dimdenlanir, va intafa salmalma toz aneyar voxe va guboy koe keldega anton trasir. Bam pu Ivan gazikoc kalir :

— Ivan gazikoc, va tokcoba su askil ? Baroy kes viel ware anton zavzayad, aze kotvieli co tití mu rin. Vexe re, va rin gonobulú, nume va jin kaik tol-san-lerdoya patecta kal bar-saneafo gazaxo dene Koctcey Someawalkesik gonaneyatá.

Moi batyona ewa, va int gu lukoptaf woyek betar aze rem dilk maltalar.

Ivan gazikoc cugeke zo gripokoler. Va int rabander, va tra is tceka narir aze aneyatason va kurenik mallanir.

Remi tokoy bartiv di lanir ? Metan gruper. Arti jontik lanis bartiv oku viel oku aksat, Ivan gazikoc va mazdaf guazik kakever.

— Va veygadikye kiavá, ~ Ivan gazikoc kalir.

— Va budafe yikye kiavá. Va tokcoba aneyal, tokliz lanil ?

Ivan gazikoc va intyon volkalaca pu guazik pwader.

— Al til rovidansaf, ~ guazik culimer, ~ anteyason va bata salmalma. Me rin jupayal da inya di kavageyer, batdume me rin godimimpayal. Vasilisa djastikya al tir rukuzafa loon dam gadikye, i Koctcey Someawalkesik, batdume gu bardafa gemuiesa tiskira koe weda ganon al zo lanzar. Rotaxe, askiks sotir. Arubara tir mefavlaca. Va bata deora lodamon naril ‼ Tanamuson, ina va kelda pu rin tazeter.

Ivan gazikoc va deora kadimelanir. Levgon, arte rimek ke kelda, jotaf sersik va rupol kozwir. Va tra konarir aze atcer voxe rupol pu in kalir :

— Va jin kaval, Ivan gazikoc ‼ Konviele va rin rozanatá.

Ivan gazikoc va rupol umber aze gin lanir. Va nudol az libakol azon kakever ise sin milinde zavzad vawelaf.

Ware kadimelanison va deora, Ivan gazikoc va biradom artlanir aze va krido biwe gaeleso moe bixe wir.

— Saal, sersik ‼ Va jin ko lava kadil ‼ ~ krido kalir. ~ Konviele va rin zanatá.

Ivan gazikoc va krido ko bira kadir aze gin lanir.

Artlaniyis va aalxodom va monama wagayana moe toloya wilinia bankrilesa kozwir. Batlize mazdapafa diwikya soker, i Baba Yaga.

Ivan gazikoc kalir :

— Mona, monama, va int dimplekul milinde gan gadikya al zo nazbal ‼ Lent jin rwodel, ge aalxo ‼

Mona rwoder. Ivan gazikoc kolanir aze va senyesa Baba Yaga moe norkaf bending wir, i va guazaf diwik dem niskaskaf nimateem is demikoraf pez. Ina kalir :

— Va tokcoba batliz askil, Ivan gazikoc ?

Ivan gazikoc vere kalir :

— Abdida va jin bibel, guazik, lodamon jupal da di estú ise di ulí ise va kolavara pu jin egal ‼

Baba Yaga revielon afliceper nume mekevotceson koskur. Azon Ivan gazikoc, va int griaelesayas az kolavayas, va intafa dilizera pwader. Diwik grupenar :

— Rinaf kurenik tir rotion gu Koctcey Someawalkesik. In riwe sotir merocenyen. Va coba anton rokalí : inafa xonukera arte veelotsa tigir, veel ludevon ice ato tigir, ato koe oral ke nudol, nudol koe uvoona ke libakol, ise libakol koe kold tice granafa persa.

Aze Baba Yaga dace tazer lize persa tigir. Ivan gazikoc lajupartlanir. Cugeke takamadason, va kold kozwir voxe vol lajupuzar. Bam rupol inon guvawelayan awir. Sulem, muntaf, va persa kan gijarotif inieem dapnarir aze soltawar. Kold mo sid luber liz arbewer.

Libakol otcer, gan libakol umbeyen gan Ivan gazikoc vere zo onkar. Inaf jivot gan bantol zo sollipar nume nudol otcer. Bat nudol, dilfun gan ban nudol abdiplekuyus va Ivan gazikoc, va ato nyur. Ino ko bira luber. Nume krido artpujer, va ato ko gariza ebidur aze pu Ivan gazikoc burer.

Bam Koctcey Someawalkesik awir. Vexe Ivan gazikoc va ato nedir aze nubanubon toz grablesir. Kotviele, Koctcey Someawalkesik zo levmadar ise ronutalton zo sespar. Azon Ivan gazikoc va ato selur ise va veel arber.

Tir jiadara ke Koctcey Someawalkesik. Diwedaks zo joar. Ivan gazikoc ko berma do Vasilisa djastikya dimlanir, azon kalon is valeon kali ugaltena di blid.

  Xanto  
Vergumvelt Царевна-Лягушка
Rwaltreizak Народные русские сказки
Sutesik ayoltik
Piskura Александр Николаевич Афанасьев
Ava Rossiava
Evla 1855-1871
  Kalkotavara  
Vergumvelt Salma sersikya
Kalkotavasik Damien Etcheverry
Piskura
Evla 2014
Klita
  Krentduga  
Webesik Troubadour
Krentduga Image:100%.jpg Tuenayana

Yunkeks ke Ivan Bilibin
Yunkeks ke Ivan Bilibin


   
   

Народные русские сказки (Rwaltreiz ke Rossia)