Pulvis aal

Teliz mal Wikikrenteem.

Grablé kal exulera, aneyara

Pulvis aal
Bamanavaf reiz (Malia)


Konviele, gozason koe molda, Suruku dikdatol va divulaca kakeveyer… Azavzaweson vlev aal, va bat aal pulvis ve gildeyer. Batlize akoydanon nheban, divier :

– Tokcoba ! Pulvis aal !


Blayak men zo tenur da gama omawer aze ben oria va in vordavar.


Milviele, tiduon, gildena puda kalir :

– Kot tisik batliz artlanis is kalis va ‘Pulvis aal !’, gama omawer aze va in sagonder.


Dikdatol pu int kalison ve dimlaniyir :

– Va salkanh su kosmá. Va wivga se fu rojekú nume va atela drikon roseotatá.


In ve laniyir aze va Dage putcol wiyir ise ve kaliyir :

– Dage ! Koe molda va rustayaca al wí : va aal pulvis dum ayik. Vexe viele titil, ede vulkutul da kalir va : ‘pulvis aal !’, aalgama omaweter ise va rin sagondeter. Pil ta da wil.


Artlaniyison tit aal Dage ve takamadar aze ekeyur da kalir va : ‘Pulvis aal !’ Kreme gama omawer aze va in awalkon balier. Dikdatol iper aze vumber…


Azon lanir aze va Sensen, va ar putcolap, kalison wir :

– Sensen, koe molda va cugunaykaca batvielon al wí : va aal pulvis dum ayik. Lanit ! Vexe va rin gowalzé. Viele poke aal titil, gevanon me vulkul ise kalil va : ‘pulvis aal !’


Sin lanid aze viele Sensen takamadar kalison va : ‘pulvis aal !’, gamapa tiduon pir nume va in awalkon sagonder. Suruku iper aze estur… (Sonsan libakol, elubkon ulijdas, va beya al kosmar…)


Dikdatol van in dere lanir aze va milafa rupa pwader :

– Sonsan berikam, koe molda va woltendasaca al wí. Va mancoba meviele al wí : va aal pulvis dum ayik. Kle pil ta da wil. Vexe, va Sonsan walzé. Viele tit aal di artlanitil, pudanhon gokalitil va : ‘pulvis aal !’, edeme gamapa va kelt tiduatar aze va rin awalkon balieter’.


Sonsan, grupenhas va ironokaf bifeem, va in mekalison radimelanir. Artlaniyis tid aal, ware stivawer. Suruku pulvasuker :

– Sonsannin ! Tokcoba sokir ? Rin va ‘pulvis…’ blayak me setikel ? Sonsannin ! Ekeyul da va ‘pulvis…’ blayak kalil. Benje ! Va in kalil ! Al vulkul ?


Suruku mibuwer nume pudapon kalir :

– Pulvis aal !


Kreme gama omawer aze batviele va in awalkon balier.


Sonsannin va rovuca ke Suruku al tafur.

  Xanto  
Vergumvelt Jiri min bɛ kuma
Sutesik -
Piskura -
Ava Bamanava
Evla -
  Kalkotavara  
Vergumvelt Pulvis aal
Kalkotavasik Abdoulaye Coulibaly
Piskura -
Evla 2008
  Krentduga  
Webesik Soundiata
Krentduga Image:75%.jpg Gotuenana