Polinesiafa vunda va kabay

Teliz mal Wikikrenteem.

Grablé kal exulera, aneyara


Polinesiafa vunda va kabay
  Xanto  
Vergumvelt Légende polynésienne du poisson
Sutesik -
Piskura -
Ava Tahitiava
Evla -
  Kalkotavara  
Vergumvelt Polinesiafa vunda va kabay
Kalkotavasik Sabrina Benkelloun
Piskura -
Evla 2005
  Krentduga  
Webesik Sab
Krentduga Image:75%.jpg Gotuenan


Lekeon, Raiatea is Tahaa va tanoya ewalapa yoltkirafa gu Ha-va-i-‘i-nui (Korozan tukotras darkap) sotazukayad.

Konviele, partik yo va warzafa marae dopewa toz vegeduyud. Ta da mecoba va baerdaf alpoz roskalter, wilye vol wilieyer ike vakol vol vakolieyer ike bettan vol liziweyer.

Batugale, listapafa yikya yoltkirafa gu Terehe va biureem ve jukloteyer ise ko kuksa toz kolavaweyer. Tuzidan lorikeem ve askiyir da serpegapa va fe ve divpujeyer aze bata va Terehe vordon ve fixayar.

Serpega, gan swava ke yikya kaldigina, ve turiyomesayar. Kotlizu welveyer ise va aal yo is pistok se divzaetawayar. Va ewalistexo baton vumbeyer nume ton toloya solwifa ewala (Raiatea is Tahaa) va gijaf Havai’i vedil ve tazukaweyer. Serpega loloon laumayar nume va kabayap vanpiyir.

Lorikeem pu Tu-rahu-nui (Diwapik) va in ve odiayad. Kabay mo taka ve zo aykayar ise ronon ve zo jupayar. Va Tahiti-nui yolt bam ve kazawayar. Tiyir wafaf viele lorikeem iltalayar. Orohena, tela lodontinafa mevta, tiyir, inde yolt sobazer, teli taneafi gefi pujesiki.

Tahiti-iti is Moorea tiyid teli toleafi gefi pujesiki vexe bati ko lava ve lubeyer ise bornayon gu Tahiti ve tiyir. Kabay adim ve azavzaweyer vexe zo goweyonayar da di zekayar ta da koe milafo xo malion kotabon sozavzar. Ta da va zwarteem ke kabay gabed, kan guema gejik yo ve artlapiyid. Siluksilukon vox giopon lwiyid. Kotgrupafi Ta-fa’i ta aneyara va gamiapafa rotikirapafa kuftapa va Tubuai ve kallapiyir. Va Tino-rua, va welfajiomaik ve korozayar, nume koe nubeem kufta ve vanpiyir bagafa. Tafa’i va Tahiti kabay toz gabiyeyer aze ten gabiyeyer viele kotaf zwarteem ve tiyir gabeyen.

Acum telo rodopo feliso va Tahiti, ton toloyi ewalaki ve zo gabeyer. Lize Tafa’i ve tazeyer noelkeon yoltkiraf gu Taravao woday ve tazukaweyer.

Batinde gijafa Tahiti ewala ve vanpiyir tentunafa.