Orhan Pamuk

Teliz mal Wikikrenteem.

Grablé kal exulera, aneyara
Orhan Pamuk

1952-
Turkaf suterotik

 Nobel Suterotafo Poradro : 2006

Orhan Pamuk ba 07/06/1952 koe kulamafa yasa koe Istanbul koblir. Vanplatiyin gan yasa, va vegeduropafa vayara koe Istanbul kotla bokar. Vexe ta ektudara va sutera arti barda jovler. Bak 1979 Karanlik ve Işik (Tapeduca is Afi) taneaf warzot zo sanegar. Radimi da felavayayar, va Turka tori New York kotla konaktandon bulur.

Orhan Pamuk va jontiko poradro wayar, vanmiaeon va Independant Award for Foreign Fiction zolonafo poradro bak 1990 tuke Beyaz Kale (Batakalamone) izvaberpot. Battandon, koe Turka va Kara Kitap (Ebeltafa neva) sanegar. Bata neva, beka intafe dre isu martig tid esaf, weber da va intafa fiuntuca tulopoar. Kiewatca trenar kan Yeni Hayat (Warzafa blira) neva isu Benim Adım Kırmızı (Jinaf yolt tir Kerik). Bata va yoni amidafi oxi isu watsa, va tulon ardialnega ik berpotara ik trakopundera koe Istanbul bal XVI-eafa decemda, gilton aotcer. Martig ke Pamuk ugalon towar ise va radimiwitafe brube loloyovar inde intaf berpotap tugrupenayas koe Europa vrutad. Batcoba kapbure tuwaveva ke yon taneaf grabom tir varafa betara.

Orhan Pamuk tir fitckiraf suterotik vox dere wideyik djumuxas va intaf gaderopaf trakuray. Koe Kar (Nolda) berpot sanegayan koe Turka bak 2004 batinde taneon askir. Koeon va islam is suptuca is italkkiruca is copuca is gracisuca va muxaranuyuca ikz- suler. Golde kaliks koe swizafa fela lize va xayastanafa saneatara bak 1915 ware stingason meusa gan Turka soka is va yona lonoeltafa stakera varze yon kurdik divrozayar, al zo onkar ise al zo arpeodratcer. Battode va zobera ke jontik kotgrupaf sutesik, tulon Umberto Eco is Mario Vargas Llosa is Günter Grass al kazawar.

Bak 2006, intaf grabom kan gara va Nobel Suterotafo Poradro zo gabler.


Orhan Pamuk

Orhan Pamuk
 Blira 1952-
 Ava Turkava
 Suterind Berpot
  Suterot

  • Cevdet Bey ve Oğulları (1982)
  • Sessiz Ev (1983) - Amlitmona
  • Beyaz Kale (1985) - Batakalamone
  • Kara Kitap (1990) - Ebeltafa neva
  • Gizli Yüz (1992)
  • Yeni Hayat (1995) - Warzafa blira
  • Benim Adım Kırmızı (1998) - Jinaf yolt tir Kerik
  • Öteki Renkler (1999)
  • Kar (2002) - Nolda
  • İstanbul: Hatıralar ve Şehir (2003)