NyagaceemScapin Nakileem03 Nakila10

Teliz mal Wikikrenteem.

Grablé kal exulera, aneyara

Nyagaceem ke Scapin


Bareaf nakileem, saneafa nakila

Argante : Pil, nazbeik ! Ise do rin va kalafa stuva ke rinafa abdikurera waunel ! Kelt…

Octave, ~ me wison va Hyacinthe ~: Me, gadikye, kota rinafa dragera va kurera va mecoba zanudatar. Lent rin va xatcaxa godeswá ise jinafa viltera al zo kalir.

Argante : En. Vexe me grupel…

Octave : Va kotcoba gogrupena grupé.

Argante : Pu rin djukalí da nazbeikya ke Géronte jiomik…

Octave : Nazbeikya ke Géronte jiomik mu jin meviele kaatoeter.

Géronte : Ina tir…

Octave : Me, weltik ; ixedá voxe jinaf goraks re tir.

Silvestre : Kevterektal !...

Octave : Me. Stivawel, va mecoba terektá.

Argante : Rinaf kurenik…

Octave : Me, kalí, gadye, awalketé lodame va jinafe neciafe Hyacinthe co-gobulú. ~ remlanison va wenyaxe az kevlanison va ine. ~ En, rokalirsic, inya tir jinaf abdiplekumbik ; arti blira va ina renatá nume va mekar kurenik djumer.

Argante : Ex kle ! Va inya pu rin ziliv. Man bintan gariandik !

Hyacinthe : En, Octave batse jinafe gadikye, su trasí, nume dive arge re tiv.

Géronte : Den jin lanit ! Ta flidera loon dam batlize tigitit.

Hyacinthe : Ax, Gadye ! Va rin dildé da va jin gu bate neciikye fu me solparsal. Ine riwedar nume fu karolatal, viele va ine grupetel.

Géronte : Djumel da va kontan renan gan rinafe berikye is rerielon kaliyis va kunoya fitulaca dene jin sul ?

Zerbinette : Weltik, pará, vay ! Batinde me co-kaliyí ede co-grupeyé da rin tiyil, ise kan sposuca va rin anton grupeyé.

Géronte : Tokinde, kan sposuca ?

Hyacinthe : Gadye, renara ke berikye va ina vol gomilar, ise va inafa ceakuca dulzoé.

Géronte : Batcoba tir kiewapafa. Kas va nazbeikye gu ina me gokuré ? Gu pabujusa megrupenikya.

  Xanto  
Vergumvelt Les Fourberies de Scapin
Sutesik Jean-Baptiste Molière
Piskura -
Ava Francava
Evla 1671
  Kalkotavara  
Vergumvelt Nyagaceem ke Scapin
Kalkotavasik Staren Fetcey
Piskura -
Evla 2006-2013
Klita Kalkotavaks
  Krentduga  
Webesik Vieux Daniel
Krentduga Image:Compare.jpg Vuestena


Nyagaceem ke Scapin (Molière)

Bareaf nakileem

← 9-eafa nakila - 10-eafa nakila - 11-eafa nakila →

Ara ava se